Feia apî
Te pô maitai roa‘e hou te noela
A paari noa’i au, te hoê o te mau ohipa rahi roa o te matahiti tata‘itahi o te pô ïa hou te noela. Ua hamani au e to’u utuafare i te pizza, ua haere matou e himene i te mau himene noela e i muri iho ua haaputuputu matou no te hoê pureraa no noela. Ua himene matou i te mau himene ma te papû ore i na reo e maha ma te faata‘i i ta matou mau mauhaa upaupa huru ê. E opani o papa i te pô pureraa i te mau taime atoa na roto i te hoê parau faaitoitoraa no noela o te faatahe i to matou roimata oaoa. Aita e taime maitai atu to te oraraa maori râ i te pô hou te noela
I to’u paari-rii-raa mai, ua haamata to’u mama i te utuutu i te hoê tamahine tapiri mai ia matou, o Kelly. Ua haere pinepine mai o Kelly i to matou fare i te mau mahana atoa i muri a‘e i te haapiiraa, a rave ai to’na mama, o Patty, i te ohipa. E pee noa o Kelly ia’u mai te hoê fanau‘a uri—te maniania e te nava‘i ore. E mea au roa ia haere ana‘e mai o Patty e tii i ta’na tamahine e ia vaiiho mai i to’u fare e te utuafare i roto i te hau.
I te hoê ava‘e titema, ua riri roa vau a ani manihini ai to’u mama ia Patty e ia Kelly ia amui mai ia matou i te pô hou te noela. Ta’u pô hou te noela. Ua ataata o mama e ua haapapû mai ia’u e, « aita te hoê mea e taui ». Ua ite maitai râ vau. E amu pauroa raua i ta matou pizza. E faaoo o Kelly i ta matou himene. Ua parau vau ia’u iho o te pô ino roa teie hou te noela.
I te pôraa , ua amui mai o Patty e o Kelly ia matou, e ua paraparau matou, e ua ataata e ua himene. Ua ti‘a mau to’u mama. E mea maitai roa. I te hora ahuru ma piti i te pô, ua haamauruuru mai raua ia matou e ua ho‘i atu ma te oto rii. Ua haere au i ni‘a i to’u ro‘i ma te oaoa. Ua ite a‘era vau e, aita te mau tao‘a faufaa rahi mau o noela e faaitihia mai te mea e, e operehia te reira. E haamonamonahia râ e e faarahihia te reira ia horo‘a ana‘e tatou.