Bin Somm’on e Mulwol ko Presidency, December 2012
Piryeg bayay fare Kan Thothup ko Christmas
Fa’aram e duw nap’an gag e elder nib fel’ yangreg, kan pinningeg nge reb e gidii’ ngak e hospital u Salt Lake City ere rayog ningad pii’ e taw’ath ngak e bitir kar ma’aar. Nap’an waered riy’, kug saped e gak’iy ko Christmas ni bay e magal nib gaelgael mug saped e taw’ath ni kan ‘iing utangin pa’angin. Kug waered u singil ni bay e bitir nib pagal nge pinn—boech kar chuweged e plaster cast ko pa’ fa aay, reb ni bay e m’aar dani fel’rogon ni pap’ay— kar pinninged dad ko sminmin u oewchraed.
Ba bitir, boechi pagal ni kari ubchiya’ e be pinningeg, “Mini’ fithingam?”
Mug goeg fithingag ngak, me fith ngog, “Rayog ningam yibiliyeg?”
Kan pi’ fare tawa’ath, ma nap’an ni gu chelgad ni ngug chuw gaed u to’oben e bet rok, me ga’ar, “Karimagar”
Kug guted in e tawo’, ma aram mug rung’ag nibe tolul, “Oh, Brother Monson, Merry Christimas ngom.” Me arame tingi’ nib alamrin u oewchen.
Re pagal nem e bay fare kan thothup ko Christmas rok. Fare kan thothup ko Christmas e ban’nen gube athapeg ni ra paer rodad ulane gumiracha’dad nge laneyafos rodad—gathi kemus ni ngiyal’ ney u lane duw machane urgnin e ngiyal’ u lane duw.
Napan ni bay fare kan thothup ko Christmas rodad, ma be sulaen’ daed Ngak e cha’ nike sumni ngad madnomnog ko biney e ningyal’ ko duw: “Re rran n’ey u lan e binaw rok David e kan gargeleg e Tabyul romed, ni Kristus ni ir e Somol” (Luke 2:11).
U lane erran rodaed ma fare kan thothup ko rogon e pii’ tawa’ath ni ngan pi’ e ba ga’fan e ayuw ningad pugeran dad ngiyal’ ne Christmas. Gube lemnog fa’anra ngad fel’ wa’athan dad nap’an ngad fithed, Magne tawa’ath ni en Somoel ra fith ngog ningu pii’ed Ngak fa bee’ nap’an e bin thabi ga’fan ko ngiyal’ u lane duw?
Rayog ningu ayuweg mug yip fan ni e Chitamangdaed nu Tharmiy e ba’adag ni rabagdad ma nge pii’ Ngak nge Fak e tawa’ath ko mfol. Mug thamiy ni Irra fith ningad pii’daed ni dad chugownoged fa damomuwgaed fa chamgaed, woed Ke pinning e Fak nib t’uf rok ulane fare Babyor ku Mormon:
“Ya rriyul’, nriyul’, ni gube yoeg ngomed, ni cha’ ni bay fare lem ko togopluw rok’ e gathi gamow, machane yow fare mo’oniyan’, ni’ir… ma k’aring e damomuw nga lan gum’ircha’en e gidii’ ni ngar togopluw gaed u fithik’ e damomuw roraed ngoraed.
“Musap gaed, gathi ireray e machib rog, ni nggu k’aring e damomuw nga lan gum’ircha’en e gidii’, ngar togopluw gaed ngoraed; machane ba’aray e machib rog, ni pin’en ni aray rogon e ngan pag i rin’. (3 Nephi 11:29–30).
U tiney erran nib ma’ang’ang ko e sulweg ko gubin ba’nen, e rogon kan bing ngodaed ningad t’ufeged mag pii’ed dad e dani tungun, machane rayog ninge tagaen’. Daba’ ni bay e gum’racha’ ningan manged fafalaen’, thin nib gol ni ngan yoeg, nge ya’el ningan thapeg.
Rebe bee’ ni bay e nang fan marunga’gen e Kan Thothup ko Christmas ke yoloey:
I gag en Kan Thothup ko Christmas—
Gube waen ulane e tabinaew ko gafgow, mug pinning e bitir nib wechwech oewchen ningar binged oewchraed, mar falfalean’gaed.
Mug pinning e bee’ nibe chugownog ninge bing pa’ me yoloey roror e yang ko ya’el rok.
Mug pinning e labthir ningar feked bayay fel’ yangraed mar minmingaed ko rogon u kakrom nib faflaen’.
Mug pinning e t’ufeg ulane gum’racha’en bitir, mug pinning e magal ko mol ko lik’ay nib machmach.
Gube pinning e em ninge paer ‘ko tawo nib talmor ni bay e wei ni kan sug, mug paged fel’ gum’racha’ ko tin nib fel’ ko fayleng.
Gube gay rogon e mo’on kan malog ni nge soen ko rogon, nib tagaen’ nge pii’ed nga gidii’ nib t’ufeg e pow nib achigchig nira pinning maap luwan— luwan nira thang e kirebaen’.
Bay gub ulane kalbus nib lumor, mug pinning u laniyaen’ ko pou’mon nib gafgow mug yip nga rran ni bay nib fel’.
Bay gub nib sapoechpoech ulane, e na’un nib wech wech ko amith, u lungun nib waer ningar noned mar rugruged u dariy’ lingan, magaraen’ nib fel’.
U miri’yay e rogon, Gube ngongoliy e fayleng nib wo’owaer ninge sapeg nga lang me guyed oewchen Got, nge ko boechi ngiyal’ mar paged talin e tin nib achigchig nge kireb.
I gag fare Kan Thothup ko Christmas.1
Rayog ningad piriyeged bayay e kan thothup ko Christmas—arrogon e Kan Thothup ku Kristus.
© 2012 ko Intellectual Reserve, Inc. Gubin ni mat’won ma bay. Nni yoloey u Mariken. Kan micheg nag ko thin nu Ngalis: 6/11. Micheg nag i pilyeg : 6/11. Ni pilyeg ko First Presidency Message, December 2012. Yapese. 10372 905
Rogon ni ngan Fil ko Biney e Mulwol
Nap’an ngam pii’ed e mulwol ko President Monson ngak e tabinaew, mu lemnog ngam puluw ko e duwer ke fith marunga’agen mange taw’ath e Somoel ra fith ningam pii’ Ngak fa reb ko ngiyal’ ko duw ney. Pinning fapi chongin e tabinaew ningar yoloeyed e lem roraed (fa, ko bitir nib achigchig, ningar artnoge saysing) marunga’gen urrogon ni ngar “piriyeged bayay e kan thothup ko Christmas— arrogon e Kan Thothup ku Kristus.”