Jodikdik ro
Ron̄jake Im̧we ko
Juon bon̄ eo rilikū edik eaar ko jān m̧weo, kōn menin iaar ekkairir n̄an etal im pukōt e. Ke ij kattōr, Iaar jar bwe Jetōb eo en jipan̄ eō. Iaar jeļā bwe Anij enaaj uwaak im tōl eō, im Iaar kajjieon̄ in ron̄jake im̧we ko an Jetōb eo. Ak ke Iaar jab maron̄ en̄jake men otemjej, Iaar jino en̄jake ellotaan, im kar en̄jake bwe Jetōb eo eaar jab im̧we eō.
Men̄e Iaar kōņaan etal ettoļo̧k jidik n̄an kappok, Iaar en̄jake bwe Ij aikuj pād wōt ilo eria eo peļaakin m̧weo im̧ōn eo rilikkū. Kōn menin Iaar pepe n̄an bar kattōr to̧o̧re eria eo. Ke ij bōjrak ilo juon intōrjāākjen, Iaar lo mirokan juon leddik edik ej etetal. Iaar lo leddik eo rilikkū!
Ke iaar diwōj jen kaar eo im ettōrļo̧k n̄an ippān, iaar kile bwe Jetōb eo eaar jiron̄tok eō aolepān iien eo n̄an jipan̄ eō en̄jake bwe ij aikuj in pād wōt ilo ejja eria eo wōt. Kōnke iaar ron̄jake juon ainikien edik, m̧ōttan wōt jidik in kar kaarmejete im̧we ko an Jetōb eo. Innām iaar meļeļe bwe elōn̄ iien jej jamin naaj ron̄ juon ainikien, ak jenaaj en̄jake im̧we ko ilo būruwōd.
Iaar lukkuun kam̧oolol kōn tōl eo an Jetōb. Em̧ool Ej aolep iien pād ijeņ! Jeje ko Rekwojarjar rej jiron̄ kōj bwe Jetōb Kwojarjar eo enaaj aolep iien m̧ōttad (lale D&C 121:46).
Eļan̄n̄e jej erreo n̄an tōl eo an Jetōb eo, im jej leļo̧k ad n̄an e, jemaron̄ erom juon kein jerbal ilo pein Anij n̄an kōm̧m̧an em̧m̧an n̄an elōn̄ armej ro. Kōn jem̧jerā eo aolep iien an Jetōb eo, jenaaj jeļā iaļ eo jej aikuj etal ie ļo̧k.