Ennaan eo an Būreejtōnji eo Kein Kajuon, Jānwōde 2013
Ainikien Irooj
Doctrine and Covenants eo ej kūr aolep armej jikin otemjej n̄an ron̄jake ainikien Irooj Jisōs Kraist (lale D&C 1:2, 4, 11, 34; 25:16). Eobrak kōn ennaan ko An, kakkōļ ko, im naan in rōjan̄ ko litok kōn revelesōn n̄an rikanaan ro em̧ōj kāālōti. Ilo revelesōn kein jemaron̄ lo wāween an Anij maron̄ uwaake jar ko ad retiljek kōn ennaan in kōmeļeļe ko, aenōm̧m̧an ko, im kakkōļ ko.
Ilo jar ko ad, jej kappukōt n̄an jeļā ta eo Anij enaaj kōņaan bwe jen kōm̧m̧ane, ta eo jenaaj aikuj in kōm̧m̧ane n̄an lo aenōm̧m̧an, im lem̧ōņōņō ilo mour in, im mour eo tok juon, im ta eo ej pād im̧aad. Doctrine and Covenants eo eobrak kōn uwaak ko n̄an kajjitōk ko kajjitōk jen armej, im jen rikanaan ro ilo jar ettā. Emaron̄ erom juon unin tōl em̧m̧an n̄an katakin kōj wāween eo n̄an bōk uwaak ko n̄an kajjitōk ko kōn ājmour eo ad, im lo̧mo̧o̧r eo ejjeļo̧k jem̧ļo̧kin.
Ettā Bōro im tōmak ilo Irooj Jisōs Kraist rej kii ko. Oliver Cowdery eaar bōk juon uwaak jān Irooj kōn ikdelel eo An n̄an jipan̄ ilo ukook eo an Bok in Mormon eo. Kar kakeememej Oliver bwe eļan̄n̄e ejjeļo̧k tōmak ejjab maron̄ kōm̧m̧an jabdewōt; ijjelo̧kin eaikuj kajjitōk ilo tōmak. Irooj eaar kakien Oliver n̄an jab kajejtokjen men ko an jetōb; im jab kajjitōk men ko ejjab aikuj in kar loi (lale D&C 8:10).
Ej ālij iien n̄an iien ilo Doctrine and Covenants eo, bwe Irooj eaikuji tōmak im ettā bōro m̧okta jān An leļo̧k jipan̄. Juon iaan un eo n̄an menin ej bwe uwaak ko An remaron̄ jab itok ilo wāween eo jej kōtmene kake. Barāinwōt renaaj aolep iien jab pidodo n̄an errā kaki.
Bwebwenato an baam̧le, im en̄jake ko an rūtto ro jibūd im jimaad, rej kōmeļeļeik m̧ool in. Jemen Jim̧aaō Henry Eyring, eaar lukkuun in jar n̄an jeļā ta eo ej aikuj in kōm̧m̧ane ke eaar ron̄ kōn jepļaaktok eo an gospel eo kar katakin ilo 1855. Uwaak eo eaar itok ilo juon ettōņak.
Eaar ettōņak bwe eaar jijōt ilo juon tebōļ ippān Elder Erastus Snow jen Doulul eo an Jon̄oulruo Rijilōk ro, im ippān juon elder etan William Brown. Elder Snow eaar katakin pedped ko an gospel eo ilo jon̄an eo emaron̄ kar juon awa. Innām Elder Snow eaar ba, “Ilo etan Jisōs Kraist Ij kean̄ eok n̄an peptaij, im em̧m̧aan in [Elder Brown] … enaaj peptaiji eok.”1 Baam̧le eo aō ej m̧ōņōņō bwe Henry Eyring eaar tōmak, im ettā būruwōn n̄an peptaij ilo 7:30 ilo jibbon̄ ilo juon būūļ in dān ilo St. Louis, Missouri, USA, jen Elder Brown.
Uwaak eo n̄an jar eo an eaar jab itok ilo juon ainikien pija jān Irooj. Eaar itok ilo juon visōn im ettōņak ilo bon̄, āinwōt eaar waļo̧k n̄an Liai (lale 1 Nipai 8:2).
Irooj eaar katakin kōj bwe uwaak ko remaron̄ barāinwōt itok āinwōt en̄jake ko. Ilo Doctrine and Covenants eo, Irooj eaar katakin Oliver Cowdery, bwe Enaaj jiron̄ kōj ilo kōļmenļo̧kjeņ ko ad, im ilo būruwōd, jen Jetōb Kwojarjar eo, eo enaaj itok iood, im pād ilo būruwōd (lale D&C 8:2).
Im Enaaj rōjan̄ Oliver ilo wāween in: Ālkin Irooj eaar kakeememej Oliver Cowdery. Bwe E eaar kōnono kōn aenōm̧m̧an n̄an kōļmenļo̧kjeņ eo an Oliver (lale D&C 6:23).
Doctrine and Covenants eo, Church history, im bwebwenato eo kar kōjparok jen Henry Eyring ilo mijen eo an ālkin peptaij eo an kar katakin eō bwe uwaak ko remaron̄ en̄jaki āinwōt kakkōļ ko barāinwōt aenōm̧m̧an.
Ilo Eprōļ 1857, Elder Parley P. Pratt jen Doulul eo an Jon̄oulruo Rijilōk ro kar pād ilo juon kweilo̧k ilo jikin eo kiiō Oklahoma, USA. Henry Eyring eaar je bwe ļōmņak eo an Elder Pratt “eaar obrak kōn ļōmņak ko rekabūrom̧ōjm̧ōj … , ilo an jab maron̄ in kile ilju im jekļaj eo ak wāween eo n̄an diwōjļo̧k jene.”2 Henry eaar je nuuj ko rekabūrom̧ōjm̧ōj ejjab etto tokālik kōn iien mej eo an Rijilōk eo. Elder Pratt eaar etal wōt ilo iaļ eo an men̄e en̄jake ko rekauwōtata, āinwōt Rikanaan Joseph eaar kōm̧m̧ane ilo an kar etal n̄an Carthage.
En̄in ej naan in kam̧ool eo aō bwe aolep iien Irooj ej uwaake jar eo ettā kōn tōmak. Doctrine and Covenants eo im en̄jake eo ad make rej katakin kōj wāween n̄an kile uwaak ko im errā kaki ilo tōmak, eļan̄n̄e rej tōl, kapen m̧ool eo, ak juon kakkōļ. Ij jar bwe jen jenaaj aolep iien ron̄jake im kile ainikien eo ejouj an Irooj.
© 2013 jen Intellectual Reserve, Inc. Aolep Jim̧we ko rej pād ippān. Jeje ilo Amedka. Kōmālim ilo kajin Pālle: 6/12. Kōmālim an ukook: 6/12. Ukook eo an First Presidency Message, January 2013. Marshallese. 10661 874
Katakin jān Ennaan In
1. Ļōmņak im riiti ippān doon perokūrāāp ko kōn jar ilo ennaan in. Ilo am̧ riit, kajjitōk ippān membōr in baam̧le eo n̄an lukkuun ron̄jake wāween an Anij uwaake jar ko. Ļōmņak im kam̧ool kōn aorōk eo an jar.
2. Doctrine and Covenants eo eobrak kōn uwaak ko n̄an kajjitōk ko kajjitōk jen armej ilo jar ettā. Ta eļan̄n̄e uwaak ko n̄an kajjitōk ko aer (revelesōn ko) raar jab ļo̧o̧ki? Rōjan̄ baam̧le eo n̄an ekkatak n̄an kile im ļoor im̧we ko an Jetōb eo. Remaron̄ aikuj in je ļōmņak ko aer kōn jar ilo jōōnōļ ko aer.