Parau poro‘i a te Peresideniraa Matamua, Tenuare 2013
Te reo o te Fatu
Te ani nei Te Parau Haapiiraa e te Mau Parau Fafau i te feia atoa no tera e tera vahi ia faaroo i te reo o te Fatu ra ia Iesu Mesia (hi‘o PH&PF 1:2, 4, 11, 34; 25:16). Ua î te reira i Ta’na mau poro‘i, mau faaararaa e mau parau a‘o faaitoito i horo‘ahia na roto i te heheuraa i te mau peropheta tei ma‘itihia. I roto i teie mau heheuraa, e nehenehe ta tatou e ite nahea te Atua i te pahono i ta tatou mau pure faaroo na roto i te tahi mau poro‘i arata‘iraa, te mau poro‘i hau e te mau poro‘i faaararaa.
I roto i ta tatou mau pure e imi tatou ia ite e, eaha te mea ta te Atua e opua ra no tatou ia rave, eaha te mea e ti‘a ia tatou ia rave no te farii i te hau e te oaoa i roto i teie oraraa e a muri a‘e, e eaha atoa te mea e tia‘i ra ia tatou. Ua î Te Parau Haapiiraa e te Mau Parau Fafau i te pahonoraa i teie mau huru uiraa a te taata e a te mau peropheta, i anihia na roto i te pure haehaa. E nehenehe i te reira e riro ei arata‘i faufaa rahi no te haapii mai ia tatou nahea ia farii i te pahonoraa i te mau uiraa no ni‘a i to tatou ora maitai i te pae tino e to tatou atoa faaoraraa mure ore.
O te haehaa e te faaroo i te Fatu ra ia Iesu Mesia te taviri. Ua farii Oliver Cowdery i te pahonoraa a te Fatu i to’na hiaai ia tauturu i roto i te iritiraa o te Buka a Moromona : « A haamana‘o mai e ia ore te faaroo e ore te hoe mea e oti ia oe ; no reira a ani mai ma te faaroo. Eiaha e rave tapetepete noa i teie nei mau mea ; eiaha hoi e ani mai i te hoe mea ti‘a ore ra » (PH&PF 8:10).
I roto i Te Parau Haapiiraa e te Mau Parau Fafau, te titau tamau nei te Fatu i te faaroo e te haehaa na mua Oia e horo‘a ai i Ta’na tauturu. Te hoê tumu no te reira, o te mea ïa eita paha Ta’na mau pahonoraa e tae mai i te huru e au tatou. Eita atoa paha ïa te reira i te mea ohie ia farii.
Na te aamu o te Ekalesia e te mau ohipa i tupu i ni‘a i to tatou hui tupuna e faahoho‘a nei i teie parau papû. Ua pure tuutuu ore te metua tane o to’u papa ruau, o Henry Eyring, no te ite mai eaha ta’na e ti‘a ia rave a faaroo ai oia i te evanelia tei faaho‘i-faahou-hia mai, tei haapiihia i te matahiti ra 1855. Ua tae mai te pahonoraa i roto i te hoê taoto.
Ua taoto oia e, te parahi ra oia i te hoê airaamaa e o Elder Erastus Snow no te Pŭpŭ no te Tino Ahuru Ma Piti Aposetolo e tei reira atoa te hoê peresibutero to’na i‘oa o William Brown. Ua haapii Elder Snow i te mau parau tumu o te evanelia, hoê hora paha te maoro. Ei reira ua parau Elder Snow e, « I te i‘oa o Iesu Mesia te faaue nei au ia oe ia bapetizo e na teie taata [o Elder Brown]… e bapetizo ia oe ».1 Ua mauruuru roa to’u utuafare no te faaroo e te haehaa o Henry Eyring i te bapetizoraa ia’na i te hora 7:30 i te po‘ipo‘i i roto i te hoê haapunaraa pape ûa i St. Louis, Missouri, i te mau Hau Amui no Marite, ravehia na Elder Brown.
Aita te pahonoraa i ta’na pure i tae mai na roto i te faaroo-tari‘a-raa i te reo o te Fatu. Ua tae mai râ te reira na roto i te hoê orama e te hoê taoto i te pô, mai tei tupu i ni‘a ia Lehi (hi‘o 1 Nephi 8:2).
Ua haapii te Fatu ia tatou e, e tae atoa mai te mau pahonoraa na roto i te mana‘o o te aau. I roto i Te Parau Haapiiraa e te Mau Parau Fafau, ua haapii Oia ia Oliver Cowdery e, « Oia ïa, inaha, e faaite au ia oe i roto i to oe feruriraa e i roto i to oe aau na, na roto i te Varua Maitai, o te tae i ni‘a ia oe e o te vai i roto i to oe aau » (PH&PF 8:2).
E ua faaitoito Oia ia Oliver mai teie te huru : « Aore anei au i parau faahau i to oe aau no ni‘a i teie nei ohipa ? Eaha atu â te ite hau a‘e i tei no o mai i te Atua ra ? » (PH&PF 6:23).
Te haapii mai nei Te Parau Haapiiraa e te mau Parau Fafau, te aamu o te Ekalesia na reira atoa te aamu ta Henry Eyring i tape‘a no ni‘a i ta’na misioni i muri mai to’na bapetizoraa e, e tae mai te mau pahonoraa i te aau mai te hoê faaararaa e aore râ mai te hoê mana‘o hau.
I te ava‘e eperera 1857, ua haere Elder Parley P. Pratt no te Pŭpŭ no te Tino Ahuru Ma Piti Aposetolo i te hoê amuiraa i te vahi e piihia nei Oklahoma i teie nei, i te mau Hau Amui no Marite. Ua tapa‘opa‘o Henry Eyring i te hoê parau no ni‘a ia Elder Pratt, « ua ahoaho roa to’na feruriraa… mai te huru ra aita faahou to’na haro‘aro‘araa no to’na ananahi e aore râ no te hoê rave‘a no te ma‘ue ê atu ». 2 Te mea ta Henry i tapa‘opa‘o i muri noa mai, o te parau oto ïa no te taparahi-pohe-raa-hia te aposetolo. Ua haere noa Elder Pratt i to’na tere noa’tu te mana‘o haamata‘u i te aau, te reira atoa ta te peropheta Iosepha i rave i to’na haereraa i Carthage.
To’u iteraa papû maori râ ïa, e pahono ihoa te Fatu i te pure haehaa e i te pure faaroo. Te haapii mai nei Te Parau Haapiiraa e te Mau Parau Fafau e tae noa’tu i to tatou iho iteraa, nahea ia haro‘aro‘a i te reira mau pahonoraa e ia farii mai i te reira na roto i te faaroo, a riro noa’tu te reira ei arata‘iraa, ei haapapûraa no te parau mau e aore râ ei faaararaa. Te pure nei au ia faaroo e ia haro‘aro‘a tamau noa tatou i te reo here o te Fatu.
© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/12. Parau faati‘a no te iritiraa: 6/12. Iritiraa no First Presidency Message, January 2013. Tahitian. 10661 895
Haapiiraa no roto mai i teie parau poro‘i
1. A opua i te tai‘oraa amui i te paratarafa no ni‘a i te pure i roto i teie parau poro‘i. A tai‘o ai outou, a ani i te mau melo o te utuafare ia faaroo maite nahea te Atua i te pahono i te mau pure. A haamana‘o ia faaite papû atu no ni‘a i te faufaa o te pure.
2. Ua î Te Parau Haapiiraa e te Mau Parau Fafau i te pahonoraa i te mau aniraa a te taata, i anihia na roto i te pure. Ahani pai aita te mau pahonoraa i ta ratou mau aniraa (te mau heheuraa) i tapa‘opa‘ohia, eaha ïa te tupu ? A faaitoito i te utuafare ia haapii ia haro‘aro‘a e ia pee ho‘i i te muhumuhu o te Varua. E nehenehe ta ratou e tapa‘opa‘o i to ratou mau mana‘o no ni‘a i te pure i roto i ta ratou buka aamu.