iVaqa ni Veisiko, Janueri 2013
Cakacaka ni Kaulotu
Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko. Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Era sa talai yani na Yalododonu Edaidai me ra “ia na cakacaka ena nona were ni vaini [na Turaga] me ra vakabulai kina na tamata” (V&V 138:56), okati kina na cakacaka ni kaulotu. Eda sega ni gadreva e dua na veikacivi vakaivola ni kaulotu me da wasea kina na kosipeli. O ira na tamata me ra na vakalougatataki ena kosipeli era tu wavoliti keda, ni da sa vakarautaki keda, ena vakayagataki keda na Turaga. E rawa vei ira na dausiko vuvale me ra vakamareqeta na nodra itavi vakayalo ka veivuke me “tucake tale mai na mate na tamata kecega ka rawata na bula tawamudu” (Mosese 1:39).
Ena nona tauyavutaka na Parofita o Josefa Simici na iSoqosoqo ni Veivukei ena 1842, e kaya kina ni sega ni dodonu vei ira na marama me ra qaravi ira walega na dravudravua ia me ra vakabula talega na yalo.1 E se noda inaki tikoga oqori.
“Na Turaga … ena vatonaka e dua na ivakadinadina ni ka dina vei ira era na wasea vei ira tale eso,” e kaya o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada. “Sa levu cake, na nona namaka na Turaga vei ira na lewe ni Nona Lotu me ra [dolava na gusudra] ka ‘vunautaka tiko ga yani na [Nona] ivakavuvuli ena veigauna kecega ena yalomarau’ (V&V 28:16). … Ena so na gauna e dua na malanivosa ni ivakadinadina e rawa ni yavalata na veika ena tara na nona bula e dua me baleta na tawamudu.”2
Mai na iVolanikalou
Mai na Keda iTukutuku Makawa
Na italanoa kei Olga Kovářová mai Czechoslovakia e liu e ivakaraitaki ni cakacaka ni kaulotu ni lewenilotu mai na itukutuku makawa ni noda iSoqosoqo ni Veivukei. Ena 1970 vakacaca, a vuli vuniwai voli kina o Olga ka gadreva tu vakalevu me titobu cake na nona bula vakayalo. Qai raici Otakar Vojkůvka yabaki 75, e dua na Yalododonu Edaidai. “E kena irairai vei au ni vitusagavulu kalima na nona yabaki ia e yalona se qai voleka yani na tinikawalu ka dau reki vakalevu sara,” e kaya o koya.“Oqo e ka matalia sara mai Czechoslovakia ena gauna oya ni dui nanumi koya ga.”
A tarogi Otakar kei na nona matavuvale o Olga se ratou kunea vakacava tiko na marau. Eratou vakaveikilaitaki koya vei ira na vo ni lewe ni Lotu ka solia vua e dua na iVola i Momani. A wilika ena vakanuinui ka sega ni dede sa papitaiso ka vakadeitaki. Me tekivu mai na gauna oya sa yaco o Olga me dua na dauveivakayarayarataki ki na vinaka ena dua na vuravura ni veisaqasaqa vakapolitiki kei na veivakacacani vakalotu. A veiqaravi vakaperesitedi ni iSoqosoqo ni Veivukei ena nona tabana lailai ka veivuke ena kena vakabulai na yalodra eso tale ena nona kauti ira mai vei Karisito.3
© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12. Vakadonui me vakadewa: 6/12. Vakadewa ni Visiting Teaching Message, January 2013. Fijian. 10661 858