Yut
Serem wetem wan Fren
Wan dei, taem mi stap stadi from seminari klas blong mi, mi bin gat wan filing we i gud mo defren. Taem mi stap rid tru long lesen blong nekis dei, mi bin luk fes blong wan fren long skul mo mi bin gat strong tingting ia se mi mas serem testemoni blong mi wetem hem.
Nomata, filing ia i no bin klia gud, mi bin fraet. Mi bin wari se fren blong mi ia bae i no akseptem mi, speseli from i luk olsem hem i no kaen gel ia we bae i intres blong joenem Jos.
Mi tingtingbak long wan toktok we i kam long Sista Meri N. Kuk blong Ol Yang Woman Jeneral Presidensi taem we hem i bin jalenjem yumi blong wokhad mo stap waes. Mi wantem se bae i olsem ia nao, mekem se mi bin raetem wan leta long gel ia mo testifae from Jos we i tru, mo from lav blong mi long Buk blong Momon. Long nekis dei mi pusum wan kopi blong Buk blong Momon, tugeta wetem leta blong mi, i go insaed long basket blong mi.
Mi sapraes, fren blong mi i bin akseptem gud gospel. Stat long dei ia, bae hem i talem long mi abaot wanem we hem i bin lanem taem hem i stadi long Buk blong Momon. Sam wik afta, mi mekem hem i mitim ol misinari. Kwiktaem afta, hem i kasem wan konfemesen we i kam long Tabu Spirit se wanem we hem i bin stap lanem i bin tru. Mi mo ol misinari i bin krae taem hem i bin talem long mifala ol filing blong hem. Fren blong mi i bin baptaes i no longtaem, mo papa mo mama blong hem i bin sapraes blong luk ol jenis we i stap hapen long hem.
Mi mi glad tumas, mi bin save winim fraet blong mi mo help blong karem gospel i go long laef blong hem.