Fas Presidensi Mesej, Febwari 2013
Wan Toktok blong Olgeta Misinari we Oli Slo
Ol disaepol blong Jisas Kraes, oltaem oli gat wan responsabiliti blong karem gospel blong Hem i go long wol (luk long Mak 16:15–16). Be, samtaem i had blong openem ol maot blong yumi mo talemaot fet blong yumi long olgeta raon long yumi. Semtaem, long sam memba blong Jos, i nomol long olgeta, i olsem wan presen blong tokbaot long ol narafala man abaot relijin, be sam oli slo smol o ating oli filim se i had, o oli sem, o iven oli fraet blong mekem wan samting.
From samting ia, mi laekem blong talem fo samting we eniwan i save mekem blong folem wok we Sevya i givim blong prijim gospel long evriwan we i stap long wol ia (luk long D&C 58:64).
Stap Wan Laet
Wan toktok we mi laekem tumas, plante taem, i olsem ansa blong Sent Fransis blong Asisi mo i rid se, “Prijim gospel evri taem mo sapos i nid, yusum ol toktok.” Toktok ia i no talem stret samting, be i minim se plante taem, ol toktok we oli no talemaot oli gat moa paoa.
Taem yumi gat fasin blong stap tru mo laef oltaem folem ol standet blong yumi, pipol bae i luksave. Taem yumi soem glad mo hapines long ol narafala man, bae oli luksave moa.
Evriwan i wantem stap hapi. Taem yumi ol memba blong Jos i soem laet blong gospel, pipol i save luk hapines blong yumi mo filim save lav blong God we i stap fulumap mo fulumap gud ol laef blong yumi. Oli wantem save from wanem. Oli wantem save sikret blong yumi.
Hemia i lidim olgeta blong askem ol kwestin olsem “From wanem yu hapi tumas?” o “From wanem, oltaem yu gat wan fasin we i no save agens?” Ol ansa long ol kwestin ia, i tru, i lidim man stret i go long wan storian abaot gospel blong Jisas Kraes we i bin kambak.
Kam Man blong Stap Storian
Blong kam antap wetem topik blong relijin—speseli wetem ol fren mo olgeta we yumi lavem—i save mekem yumi fraet o no ting se yumi save mekem mo i kam wan jalenj. Be i no nid blong i olsem. Blong talem smol abaot ol eksperiens long saed blong spirit o blong tokbaot ol Jos aktiviti o wan spesel taem long storian nomo olsem i save kam wan isi mo gudfafala taem sapos yumi givim wetem smol paoa long tingting mo wetem gud tingting.
Waef blong mi, Hariet, i wan gudfala eksampol blong samting ia. Taem mifala i bin stap long Jemani, bae hem i faenem wan wei blong gat ol topik long saed blong Jos long ol storian blong hem wetem ol fren o olgeta we hem i mitim. Eksampol, taem wan i askem hem abaot olsem wanem long wiken blong hem, bae hem i talem, “Long Sandei ia mifala i bin gat wan intresting eksperiens long jos blong mifala! Wan yang man blong 16 yia i bin givim wan naesfala toktok long fored blong 200 pipol long jos abaot fasin blong laef long wan klin laef.” O, “mi bin lanem abaot wan olfala woman blong 90 yia we i somap wetem han blong hem bitim 500 blangket mo givim ol blangket ia long Jos yumaniterian program blong mifala blong sendem i go long ol pipol we oli stap long nid raon long wol.”
Plante taem long plante situesen, ol pipol we oli harem samting ia oli wantem save moa. Oli askem ol kwestin. Mo hemia i lidim i go long ol janis blong tokbaot gospel long wan nomol wei nomo, mo wetem tras, mo i no wetem fos.
Long taem we yumi stat blong gat intanet mo media, i moa isi tedei blong tokbaot ol samting ia long wan wei blong storian bitim bifo. Wanem we yumi nidim nomo hem i strong tingting blong mekem samting ia.
Gat Wan Hat we I Fulap long Gladhat
Wanem we i nogud, i isi tu blong no agri long wan samting. Plante taem i hapen se yumi raorao, daonem man, mo spolem man. Taem yumi kam kros, stap tok nogud, o mekem nogud long pipol, i mekem se bae oli no wantem blong lanem moa abaot yumi. I had blong save hamas man i bin livim Jos o neva joenem Jos from wan i bin talem wan samting we i mekem oli harem nogud, o i agensem olgeta.
I gat plante rabis fasin tedei long wol. From pipol i save raet long Intanet mo no talemaot huia olgeta, i mekem i moa isi blong mekem wan i harem nogud o talem ol rabis samting long intanet. I no yumi nao, ol disaepol blong hop blong gudfala Kraes, we yumi gat wan standet we i moa hae mo i fulap moa wetem jareti? Olgeta skripja i tijim se, “Yufala i mas toktok gud long olgeta, long ol tok we olgeta oli save glad long hem. Mo yufala i mas save rod blong givim ansa long evri man, we i stret gud long olgeta evriwan” (Kolosi 4:6).
Mi laekem tingting ia blong ol toktok blong yumi we i klia olsem wan skae we san i saenem mo i fulap long gladhat. Traem tingbaot, ol famle blong yumi, ol wod, ol nesen, mo iven wol bae oli olsem wanem sapos yumi save mekem folem simpol prinsipol ia?
Gat Fet I Fulap Insaed long Yu
Samtaem yumi tingting hae tumas long yumiwan o yumi blemem yumi tumas taem i kam long poen blong ol narafala man oli akseptem gospel. Hem i impoten blong tingbaot se Lod i no wantem luk se yumi jenisim laef blong man.
Fasin blong jenisim laef fulwan i no kam tru ol toktok blong yumi nomo, be tru fasin blong help we i kam long heven tru long Tabu Spirit. Samtaem, wanem we i nidim, hem i wan smol toktok aot long testemoni blong yumi o abaot wan eksperiens we bae i tajem wan hat, o i openem wan doa we i save lidim ol narawan blong eksperiensem ol trutok tru ol toktok blong Spirit.
Presiden Brigham Yang (1801–77) i bin talem se hem i bin save se gospel i bin tru taem hem “i bin luk wan man we i no save toktok gud, o i no gat ol talen blong toktok long pablik, we i save talem nomo, ‘mi save, tru long paoa blong Tabu Spirit, se Buk blong Momon i tru, se Josef Smit i wan Profet blong Lod.’” Presiden Yang i bin talem se taem hem i bin harem testemoni ia we i putum tingting i stap daon, “Tabu Spirit we i kamaot long man ia i givim moa laet long andastaning blong mi, mo laet, glori, mo fasin blong nomo save ded [oli] stap long fored blong mi.”2
Ol brata mo sista, gat fet. Lod i save mekem ol toktok we yu stap talem oli kam bigwan, mo mekem oli gat paoa. God i no save askem yu blong jenisim laef blong man, be blong yu openem maot blong yu. Wok blong jenisim laef blong man, i no blong yu—hemia i wok blong man we i stap lisin, mo i wok blong Tabu Spirit.
Evri Memba I Wan Misinari
Ol dia fren blong mi, tedei i gat plante wei moa blong yumi blong openem maot blong yumi mo serem wetem ol narafala man gud nius blong glad ia blong gospel blong Jisas Kraes. I gat wan wei blong evriwan—iven wan misinari we i slo—blong tekempat long bigfala wok ia. Wanwan long yumi save faenem wan wei blong yusum ol wanwan talen mo intres we yumi gat blong sapotem bigfala wok ia mo fulumap wol wetem laet mo trutok. Taem yumi mekem olsem, bae yumi faenem glad we i kam long olgeta we oli stap fetful mo olgeta we oli tingting strong inaf “blong stanap olsem ol witnes blong God long evri taem” (Mosaea 18:9).
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong First Presidency Message, February 2013. Bislama. 10662 852
Yusum Mesej Ia blong Tij
Wan gud wei blong tij i blong “leftemap tingting blong olgeta we yu tijim blong putum ol gol we i save helpem olgeta blong laef folem prinsipol we yu jes tijim” (Teaching, No Greater Call[1999], 159). Gat tingting ia blong invaetem olgeta we yu tijim blong prea mo putum wan gol blong serem gospel wetem wan o moa pipol long manis ia. Ol papa mo mama, oli save toktok raon long ol wei we ol yang pikinini oli save help. Yu save helpem ol memba blong famle blong givim tingting, o aktem ol wei blong mekem gospel i kam insaed long nomol storian mo stap tingting long ol Jos aktiviti we i stap we oli save askem yu blong invaetem wan fren.