iTukutuku ni Mataveiliutaki Taumada, Feperueri 2013
iVakasala me baleta na Daukaulotu Lomalomarua
Era dau vakaitavitaki ira ena veigauna na Tisaipeli i Jisu Karisito, me ra vunautaka na Nona kosipeli ki vuravura taucoko (raica na Marika 16:15–16). Ia, e sa dau dredre dina ena so na gauna me da dalaga ka tukuna na noda vakabauta kivei ira era vakavolivoliti keda. Ni so vei ira na lewe ni Lotu e tu vei ira na taledi ni vosa kivei ira eso tale me baleta na vakabauta vakalotu, eso era via lomalomarua se vakila nodra baleca, madua, se ra rerevaka mada ga na cakava.
Oqo na vuna, au gadreva meu na vakatututaka kina e va na veika e rawa me cakava e dua me muria kina na ivakaro ni iVakabula ka vunautaka na kosipeli “kivei ira na tamata kece ga” (V&V 58:64).
Mo dua na Rarama
E dua noqu ivosavosa talei e vakabibitaki vagauna kivei St. Francis mai Assisi e vakaoqo, “Vunautaka e veigauna kece na kosipeli kevaka e ganita, vakayagataka na vosa.”1 Na ivosavosa oqo e sega ni vakabibitaki, ia e vakaibalebaletaka ni dau vakavuqa na ivunau kaukauwa duadua e sega ni dau tukuni.
Era raica na tamata ni da sa dau lomadina ka bulataka matua na noda itagede. Ena gauna eda vakaraitaka kina na reki kei na mamarau, era raica vakalevu cake sara.
Na tamata kece e vinakata me marau. Ena gauna eda vakaraitaka kina na lewe ni Lotu na rarama ni kosipeli, e rawa ni ra raica na tamata na noda marau ka vakila na loloma ni Kalou ni vakasinaita ka luvuca na noda bula. Era via kila na vuna. Era via kila se da rawata vakacava.
Oqori e vakavuna me ra taroga na veitaro me vaka “Na cava na vu ni nomuni dau marau?” se “Cava sa rui dau matau kina na ituvaki ni nomu bula?” Na isaunitaro oqo, vakaidina, e muadonu ki na dua na veivosaki me baleta na vakalesuimai ni kosipeli i Jisu Karisito.
Dau Veitalanoa
Ni kau cake mai na iulutaga vakalotu—vakabibi kivei ira noda itokani kei na daulomani—e rawa ni veivakayalolailaitaki ka veibolei. E sega ni dodonu me vaka kina. Na tukuni ni veika e sotavi vakayalo se veivosakitaki ni itaviqaravi se veika e yaco ena Lotu ena veitalanoa vakacaca wale tu ga e dodonu me rawarawa ka marautaki kevaka e tu vei keda na veivakayaloqaqataki lalai kei na yalomatua.
Na marama watiqu, o Harriet, sa dua na ivakaraitaki totoka ni ka oqo. Ena neirau tiko voli mai Jamani, ena vakasaqara o koya e dua na sala me kauta cake mai kina e dua na iulutaga vaka-Lotu ena nona veitalanoa vata kei ira na itokani kei ira era veimaliwai. Kena ivakaraitaki, ni dua e taroga me baleta nona mua ni macawa, ena kaya, “Na Sigatabu oqo e dua na ka vakasakiti keimami sotava ena neimami lotu! E dua na gone tagane yabaki 16 a vakaitavi ena dua na vosa totoka e matadra na lewe 200 na ivavakoso me baleta na bulataki ni dua na bula savasava.” Se, “Au vulica me baleta e dua na kena marama qase yabaki 90 ka a talia e siva na 500 na itutuvi ka solia ki na neimami parokaramu ni Lotu ena veivuke vakatamata me na vakau kivei ira na tamata era gadreva tu ena veiyasai vuravura taucoko.”
Dau vakavuqa, nodra vinakata na tamata era rogoca oqo me ra via kila vakalevu cake sara. Era taroga na veitaro. Ka mani vakavuna na madigi ni kena veitalanoataki na kosipeli ena dua na kena ivakarau vakatamata, nuidei, sega ni veivakamaduataki.
Me tekivu mai na kunei ni Initaneti kei na sala ni itukutuku raraba, nikua e sa rawarawa sara na kena veivosakitaki na veika oqo ena dua na sala ni veitalanoa me vakatauvatani ena gauna e liu. Eda gadreva walega na yalodei me da vakayacora vaka kina.
Mo Sinai ena Loloma
Na leqa, sa rui rawarawa na sega ni duavata. E yaco vakawasoma ka dau vakavuna noda veiba, vakalelewa, ka veivakacacani. Ena gauna eda cudru kina, viavialevu, se vakamosia na yalo ni tamata, na iotioti ni ka era vinakata me ra vulica vakalevu cake sa ikoya na veika e baleti keda. E dredre sara me da kila se vica na levu ni tamata era sa biuta na Lotu se ra sega ni lewena baleta ni dua a tukuna eso na ka e mosita se vakacudrui ira.
E sa levu sara ga na viavialevu e vuravura nikua. Baleta ni tawakilai se o cei e vakavuna na veivolavolai ena Initaneti, sa rawarawa kina me tukuni eso na vosa e veivakacacani se veivakacudrui e loma. Sega li ni dodonu vei keda, na tisaipeli yalodei ni noda Karisito yalomalua, me da taukena e dua na itagede ni loloma e levu cake, ka cecere sara? E vakavulica na ivolanikalou, “Me ia tiko ga na nomudou vosa ena yalovinaka, ka vakatuituinataki ena masima, mo dou kila kina se cava sa dodonu mo dou kaya tale vei ira na tamata yadua” (Kolosa 4:6).
Au taleitaka na vakasamataki ni noda vosa me matata me vaka e dua na lomalagi ramase ka sinai ena yalololoma. E rawa mo raitayaloyalotaka se na vakacava na noda matavuvale, veitabanalevu, veivanua, kei na vuravura kevaka e rawa me da maroroya na ivakavuvuli rawarawa oqo?
Mo Vakasinaiti ena Vakabauta
Ena so na gauna eda taura vakabibi noda rawa-ka se na sivia na veibeitaki ena gauna era ciqoma kina eso na kosipeli. E ka bibi me da nanuma ni Turaga e sega ni namaki keda me da cakava na saumaki.
Na saumaki e sega ni lako mai ena noda vosa ia mai na veiqaravi vakalomalagi ni Yalo Tabu. E vakavuqa ni ka ga e gadrevi e dua na iyatuvosa ni noda ivakadinadina me baleta e dua na ka e sotavi ka vakavuna na vakamalumalumutaki ni yalo se na dola ni dua na katuba me rawa kina vei ira tale eso me ra sotava na dina cecere duadua mai na veivakauqeti ni Yalotabu.
O Peresitedi Brigham Young (1801–77) a kaya ni kila na kosipeli e dina ena nona “raica e dua na tamata ka a sega ni kilai vakavinaka, se vaka taledi ni vosa raraba, ka rawa wale ga ni kaya, ‘Au kila, mai na kaukauwa ni Yalo Tabu, ni dina na iVola i Momani, ni o Josefa Simici e dua na Parofita ni Turaga.’” Kaya o Peresitedi Young ena nona a rogoca na ivakadinadina malumu oya, “ Na Yalo Tabu a lako yani mai vua na tamata oya ka vakararamataka noqu kila-ka, kei na rarama, lagilagi, kei na tawa mate rawa [sa ra] tu e mataqu.”2
Kemuni na taciqu kei na ganequ, mo ni vakabauta. E rawa me vakatorocaketaka na Turaga na vosa o ni cavuta ka vakacerecerea. E sega ni kerei kemuni na Kalou mo ni vu ni saumaki ia mo ni dolava ga na gusumuni. Na ilesilesi ni saumaki e sega ni nomu—oqori e nona na tamata e vakarorogo tiko ki na Yalo Tabu.
Na Lewenilotu Kece e Daukaulotu
Kemuni na noqu itokani, nikua sa levu cake sara na sala me vaka e liu meda dolava kina na gusuda ka wasea vata kei ira tale eso na itukutuku rekitaki ni kosipeli i Jisu Karisito. E tiko e dua na sala vei keda vakayadua—vakakina na daukaulotu lomalomarua—me da vakaitavi kina ena cakacaka cecere oqo. E rawa ni da kunea e dua na sala me da vakayagataka kina na noda dui taledi kei na veika taleitaki ni kena cuqeni na cakacaka cecere ni kena vakasinaiti na vuravura ena rarama kei na dina. Ena noda vakayacora vakakina, eda na kunea na reki ka lako mai vei ira era sa vakabauta ka vakayaloqaqataki vakarauta “ni vakadinadinataka na Kalou ena veigauna kece ga” (Mosaia 18:9).
© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12. Vakadonui me vakadewa: 6/12. Vakadewa ni First Presidency Message, February 2013. Fijian. 10662 858
Veivakavulici mai na iTukutuku Oqo
Dua na sala veivakadeitaki ni veivakavulici sa ikoya mo “vakauqeti ira o vakavulica me ra tuva … na ituvatuva ka rawa ni vukea nodra bulataka na ivakavuvuli o sa vakavulica” (Veituberi, Me iLutua ni Noda Bula [1999], 159). Nanuma mo sureti ira o vakavulica me ra masulaka e dua na ituvatuva ni kena wasei na kosipeli vua e dua se so tale na tamata ena vula oqo. E rawa ni ra veivosakitaka na itubutubu na sala me ra veivuke kina na gone lalai. E rawa tale ga mo vukea na soli vakasama vakamatavuvale se vakaitavi ena sala ni kena vakavurei na kosipeli ena veitalanoa matau kei na nanumi ni veitaviqaravi ni Lotu e vakarautaki ka rawa ni sureti kina e dua na itokani.