Ennaan eo an Būreejtōnji eo Kein Kajuon, Pāpode 2013
Juon Ennaan n̄an Mijenede eo Epere
Rikaļoor ro an Jisōs Kraist kar iien otemjej eddo n̄an bōkļo̧k ko̧jpeļ eo An n̄an aolepān laļ (lale Mark 16:15–16). Mekarta, jet iien epen n̄an kōpeļļo̧k lo̧n̄id im kōnono kōn tōmak eo ad n̄an ro peļaakid. Ilo an jet membōr in Kabun̄ in wōr ippāer maron̄ eo n̄an kōnono n̄an ro jet kōn kabun̄, ro jet ewōr jidik āliklik ak maron̄ en̄jake japde, jook, ak em̧ool mijak n̄an kōm̧m̧an āindein.
Kōn un in, Ikōņaan elmakote emen men ko me jabdewōt emaron̄ kōm̧m̧ani n̄an ļoor ijitōn̄ eo an Rilo̧mo̧o̧r n̄an kwaļo̧k kōn ko̧jpeļ n̄an aolep armej otemjeļo̧k (D&C 58:64).
Erom juon Meram
Juon jabōn kōnnaan em̧m̧an ippa emmakijkij an io̧kļo̧k St. Francis jān Assisi ej kōnono, “Kwaļo̧k ko̧jpeļ eo ilo aolep iien im eļan̄n̄e emenin aikuj, kōjerbal naan ko.”1 Jabōn kōnnaan in ejjab kanooj kalikkare ak ej meļeļe in bwe kwaļo̧k ko rekajoor tata rej jab kōnono kaki.
N̄e ewōr m̧ool ippād im jej mour aolep iien kōn jon̄ok ko ad, armej rej kile. Eļan̄n̄e jej kwaļo̧k n̄an ro jet lan̄lōn̄ im m̧ōņōņō, rej kile eļapļo̧k.
Aolep rekōņaan m̧ōņōņō. Eļan̄n̄e kōj membōr ro an Kabun̄ in jej kajedeed meram eo an ko̧jpeļ eo, armej remaron̄ lo ad m̧ōņōņō im en̄jake iakwe eo an Anij ekobrak im lutokleplep ilo mour ko ad. Rej kōņaan jeļā etke. Rej kōņaan meļeļe ekōjkan ad bōke.
Ekōm̧m̧an bwe ren kajjitōk kajjitōk ko āinwōt “Etke kom̧ kanooj m̧ōņōņō?” ak ‟Etke kom̧ iien otemjej ewōr juon ami m̧wil em̧m̧aan?” Uwaak ko n̄an kajjitōk kein, aaet, ejejjet aer tōl ļo̧k n̄an juon kōm̧m̧ao kōn jepļaaktok eo an ko̧jpeļ eo an Jisōs Kraist.
Erom Ribwebwenato
Bōklōn̄tak unin kōnono eo kōn kabun̄—eļaptata n̄an ro m̧ōttad im ro rejitenbōro—maron̄ alikkar aer mijak ak edik aer lōke. Ejjab aikuj āindein. Kwaļok en̄jake ko ilo jetōb ak kōnono kōn makūtkūt ko an Kabun̄ in ak makūtkūt ko ilo iien kōm̧m̧ao bajjōk emaron̄ kapidodoik im kam̧ōņōņō eļan̄n̄e jej kōjerbal jidik peran im jokkuun wōt juon.
Lio pāleeō, Harriet, ej juon waanjon̄ak em̧m̧aan kōn menin. Ke kōm kar jokwe ilo Germany, ekōn pukōt juon wāween n̄an bōklōn̄tak unin ekōnono ko kōn Kabun̄ in n̄an iien kōm̧m̧ao ko an ippān ro m̧ōttan im ro ejeļā kajier. N̄an waanjon̄ak, n̄e ewōr juon ej kajjitōk kōn ta eo enaaj kōm̧m̧ane ilo jemļo̧kin wiik eo, ekōn ba, ‟Jabōt in, ewōr juon am en̄jake ekaitoktok limo ilo im̧ōn jar eo am! Juon likao 16 iiō dettan eaar kwaļo̧k juon ennaan eo eaiboojoj im̧aan mejān 200 armej ilo jarlepju eo am kōn mour juon mour erreo.” Ak, ‟Ikar katak kōn juon kōrā eo 90 an iiō, eo eaar kiij elōn̄ļo̧k jen 500 ko̧o̧j ko im lilo̧k n̄an būrokraam̧ eo an Church humanitarian n̄an jilkinļo̧k n̄an armej ro raikuj aolepen laļ in.”
Ilo aolep jekjek ko, armej ro rej ron̄ kōn menin n̄an kōņaan jeļā eļapļo̧k. Rej kajjitōk kajjitōk ko. Im menin ej tōl ļo̧k n̄an iien ko rem̧m̧an n̄an kōnono kōn ko̧jpeļ eo ilo juon wāween eo em̧m̧an, lōke, im juon wāween eo ejjab nana n̄an ro jet.
Jen iien eo kar ejaake Intōrnet im media ko jet, epidodoļo̧k rainin n̄an kōnono kōn men kein ilo juon wāween kōm̧m̧ao em̧m̧an jen mokta. Ta jej aikuji ej peran eo n̄an kōm̧m̧an āindein.
Obrak kōn Jouj
Ekabūrom̧ōjm̧ōj, elukkuun pidodo n̄an jab errā. Emākijkij an waļo̧k n̄e jej akweeļ, kōnanaik, im liaakeļo̧k. N̄e jej illu, emmōlkaro, ak inepata ippān armej, men eo āliktata rekōņaan ej n̄an katak eļapļo̧k kōn kōj. Epen n̄an jeļā jete armej raar ilo̧k jen Kabun̄ in ak kar jab kobatok kōnke ewōr juon ekar ba jet men ko rekōmetak ak kalel er.
Elukkuun ļap lāj ilo laļ in rainin. Kōnke armej remaron̄ jeje ilo intōrnet ilo an ro jet jab jeļā wōn eaar jeiki, epidodoļo̧k jen mokta n̄an ba men ko rekōmetak ak kalellel ilo online. Jaikuj ke, rikaļooran ro rekōjatdikdik an ad Kraist em̧m̧an, ewōr jon̄ak eutiejļo̧k, eļapļo̧k aer jouj? Jeje ko Rekwojarjar rej katakin,‟ami kōnono, iien otemjej ilo jouj, im en em̧ōj jo̧o̧le, bwe kom̧win jeļā kōjkan em̧m̧an ami uwaak armej otemjej” (Kolosse 4:6).
Em̧m̧aan ippa ļōmņak eo bwe naan ko ad ren erreo āinwōt mejatoto eokmāņān im obrak kōn tiriam̧o. Kōmaron̄ ke kejo̧kļo̧kjeņ mōk ta baam̧le ko ad, ward ko, laļ ko, im barāinwōt laļ erom āinwōt ta eļan̄n̄e jenaaj kōkajririik katak in epidodo?
Obrak kōn Tōmak
Jet iien jej bōk iood make eļap nōbar ak eļap jekpen ņae n̄e ej itok n̄an an ro jet bōk ko̧jpeļ eo. Eaorōk n̄an kememej bwe Irooj ejjab kōtmāne jen kōj n̄an kōm̧m̧ane oktak eo.
Oktak ejjab itok kōn naan ko ad bōtaab kōn waļo̧k tok ko an lan̄ ko an Jetōb Kwojarjar. Jet iien men eo dein jaikuj kōm̧m̧ane ej juon ennaan kōn naan in kam̧ool eo ad ak kōn juon iminene eo ej kōkm̧anm̧an bōro ak kōpeļļo̧k juon kōjām me emaron̄ tōl ro jet n̄an en̄jake m̧ool ko kōn im̧we ko an Jetōb Kwojarjar.
Būreejtōn Brigham Young (1801–77) ekar ba ejeļā bwe ko̧jpeļ eo eaar m̧ool ke eaar ‟lo juon em̧m̧aan ejaje kōnono, ak kapeel ko n̄an kōnono lo̧pļej, eo emaron̄ ba wōt, ‘Ijeļā, kōn kajoor eo an Jetōb Kwojarjar, bwe Bok in Mormon ej m̧ool, bwe Joseph Smith ej juon rikanaan an Irooj.’” Būreejtōn Young ekar ba ke ej ron̄ naan in kam̧ool eo etta, ‟Jetōb Kwojarjar ar waloktok romeļo̧k meļeļe eo aō, im meram, aiboojoj im mour jab wabanban [rekar] pād imaō.”2
Ro jeiū im jatū, kom̧in tōmak. Irooj emaron̄ kōkm̧anm̧anļo̧k naan ko kwoj kōnono kaki im kōkajooriļo̧k. Anij ejjab kajjitōk ippān n̄an oktak ak ijjeļo̧k n̄an kōpeļļo̧k ļo̧n̄im. Jerbal in oktak ejjab am—ej an armej eo ej ron̄jake im n̄an Jetōb Kwojarjar.
Aolep Membōr ej juon Mijenede
Ro m̧ōtta jitenbōro, rainin elōn̄ļo̧k wāween ko jen mo̧kta n̄an kōj n̄an kōpeļļo̧k lo̧n̄id im kwaļo̧k n̄an ro jet nuuj ko relem̧ōņōņō an ko̧jpeļ eo an Jisōs Kraist. Ewōr juon iaļ n̄an aolep—barāinwōt mijenede eo epere—n̄an bōk koņaan ilo jerbal in eļap. Jemaron̄ kajjojo pukōt juon wāween n̄an kōjerbal tōļan ko ad make im itoklimo̧ ko ilo rejtake jerbal eo eļap n̄an kobrak laļ in kōn meram im m̧ool. Ilo ad kōm̧m̧an āindein, jenaaj lo lan̄lōn̄ eo me ej itok n̄an ro eļap aer tiljek im bwe peran ippāer ‟n̄an jutak āinwōt ri kam̧ool ro an Anij ilo aolep iien ko” (Mosaia 18:9).
© 2013 jen Intellectual Reserve, Inc. Aolep Jim̧we ko rej pād ippān. Jeje ilo Amedka. Kōmālim ilo kajin Pālle: 6/12. Kōmālim an ukook: 6/12. Ukook eo an First Presidency Message, February 2013. Marshallese. 10662 874
Katakin jān Ennaan In
Juon wāween ejejjet n̄an katakin ej n̄an ‟kōketak ro kwoj katakin er n̄an kōm̧m̧an … kōtōpar ko me remaron̄ jipan̄ er mour kōn pedped eo kwaar katakin” (Teaching, No Greater Call [1999], 159). Ļōmņak in karuwaineneik ro kwoj katakin er n̄an jar ilo kōm̧m̧ane juon kōttōpar n̄an kwaļo̧k ko̧jpeļ eo ippān juon ak elōn̄ļo̧k armej ilo allōn̄ in. Ro jinen im jemān remaron̄ kōnono kōn wāween ko ajri ro remaron̄ jipan̄. Komaron̄ jipan̄ barāinwōt ro uwaan baam̧le eo tipidikiļo̧k ak waanjon̄aki wāween ko n̄an kwaļo̧k ko̧jpeļ eo ilo iien bwebwenato ko im ļōmņak kōn m̧akūtkūt ko an Kabun̄ in rej pojān kōm̧m̧an me remaron̄ karuwaineneik juon m̧ōttaer.