Parau poro‘i na te mau tuahine hahaere, Fepuare 2013
Faafariuhia i te Fatu ra
A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
E hinaaro te mau tuahine apî o te Ekalesia—oia ho‘i te feia apî tamahine e tomo atu i roto i te Sotaiete Tauturu, te mau tuahine paruparu e ho‘i mai nei e te melo faafariu-apî-hia—, i te tauturu e te hoaraa a te mau tuahine hahaere. Ua parau o Elder M. Russell Ballard no te Pŭpŭ no te Tino Ahuru Ma Piti Aposetolo e, « E mea faufaa rahi te taviniraa a te mau melo no te tape‘a i te melo faafariu e no te faaitoito i te mau melo paruparu ». « E tape‘a na tatou i te fâ e, e nehenehe i te Sotaiete Tauturu… ia riro ei [hoê o te] mau rave‘a puai roa a‘e i roto i te Ekalesia no te faahoa mai. A faatoro i te rima ia ratou e haapiihia ra e a faaitoito, e a poihere ia ratou i roto i te Ekalesia na roto i ta outou pŭpŭ ».1
Ei tuahine no te Sotaiete Tauturu, e nehenehe ta tatou e tauturu i te mau melo apî ia haapii i te mau ohipa tumu a te Ekalesia mai te :
-
Horo‘araa i te hoê a‘oraa.
-
Faaiteraa i te iteraa papû.
-
Haapa‘oraa i te ture no te haapaeraa maa.
-
Aufauraa i te tuhaa ahuru e te mau ô.
-
Raveraa i te ohipa aamu utuafare.
-
Raveraa i te bapetizoraa e te haamauraa no te hui tupuna tei pohe.
Ua parau Elder Ballard e, « E mea hinaaro-mau-hia te mau hoa maitai e au ai te mau melo apî i te haere mai i te pureraa ma te mana‘o atoa e, te farii-popou-hia nei ratou ».2 Tei ia tatou paatoa, hau atu â râ i te tuahine hahaere, te hopoi‘a rahi ia faatupu i te hoaraa e te mau melo apî ei rave‘a ho‘i no te tauturu ia ratou ia haapapû maitai e, ua « faafariuhia i te Fatu ra » (Alama 23:6).
No roto mai i te mau papa‘iraa mo‘a
No roto mai i to tatou aamu
Ua parau te peresideni Gordon B. Hinckley (1910–2008), « No te numera rahi e tamau noa o te feia faafariu, e mea ti‘a atoa ia tatou ia faarahi i ta tatou tutavaraa no te tauturu ia ratou ia ite i to ratou e‘a. E hinaaro te melo faafariu apî atoa i teie na mea e toru : hoê hoa, hoê piiraa, e ia faaamuhia ‘i te parau maitai a te Atua’ (Moroni 6:4) ».3
E ti‘araa to te mau tuahine hahaere ia tauturu i te feia ta ratou e haapa‘o nei. Te hoaraa o te tupu matamua roa, mai tei itehia i te hoê tuahine apî no te Sotaiete Tauturu tei riro na ei tuahine hahaere no te tahi tuahine paari a‘e. Taupupu rii to raua faahoaraa e tae roa i te mahana ua rave amui raua i te hoê ohipa totauturu, te hoê ohipa tamâraa. Hoa roa’tura raua, e ia haapii raua i te parau poro‘i na te tuahine hahaere, raua piti atoa tei faaamuhia i « te parau maitai a te Atua ».
Ua parau te peresideni Joseph Fielding Smith (1876–1972) e, ua riro te Sotaiete Tauturu « ei tufaa faufaa rahi no te basileia o te Atua i ni‘a i te fenua nei e… te tauturu [nei te reira] i to’na mau melo haapa‘o ia noaa ia ratou te ora mure ore i roto i te basileia o to tatou Metua ».4
© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/12. Parau faati‘a no te iritiraa: 6/12. Iritiraa no Visiting Teaching Message, February 2013. Tahitian. 10662 895
Eaha ta’u e nehenehe e rave ?
-
Te pure nei anei au no to’u hoa ma te ani atoa i te Varua ia arata‘i mai ia maua a tavini ai maua i ta maua mau tuahine ?
-
Eaha te mea ta maua e rave nei i roto i te taviniraa i te tuahine tata‘itahi ta maua e haapa‘o nei, o te riro ei faaiteraa ia’na e, te mana‘ona‘o rahi nei maua ia’na ?