Parau poro‘i a te Peresideniraa Matamua, Mati 2013
Faaea
I te hoê mahana, a rave rahi matahiti, i muri a‘e i te faaotiraa i te mau ohipa i te piha toro‘a, ua farii au i te hoê mana‘o e haere e farerei i te hoê vahine ivi paari, e parahi ra i roto i te hoê pû haapa‘o i te feia paari i Roto Miti. Ua tere afaro atu vau i reira.
I to’u haereraa i to’na piha, aita e taata i roto. Ua ani au i te hoê tuati no ni‘a i to’na huru e ua arata‘ihia vau i te hoê poro o te piha faafaaearaa. I reira, ua ite au i teie vahine ivi marû e farereihia ra e to’na tuahine e te tahi hoa. Ua aparau amui maitai matou.
A aparau ai matou, ua haere mai te hoê taata i te opani o te piha, no te tii i te hoê punu pape monamona i te matini opereraa. Ua hi‘o mai oia ia’u e ua parau mai, « No te aha, o Tom Monson oe ».
Ua pahono vau « e ». « e, e hoho‘a maitai oe i te fetii Hemingway ».
Ua faaite maira oia e o Stephen Hemingway oia, te tamaiti a Alfred Eugene Hemingway, o tei tavini na ei tauturu no’u i to’u episekoporaa a rave rahi matahiti i teie nei, e o ta’u i pii noa Gene. Ua parau o Stephen ia’u e, tei onei to’na metua tane i roto i taua pû ra e te fatata’tu ra i te pohe. Ua pii o Gene i to’u i‘oa, e ua hinaaro te utuafare i te niuniu mai ia’u, aita râ i roaa te hoê numera niuniu.
Ua faaoti oioi au i te paraparauraa e ua haere atu na muri ia Stephen i te piha o to’u tauturu tahito, tei reira atoa te tahi o ta’na mau tamarii i te amuiraa, ua pohe ta’na vahine tau matahiti i ma‘iri. Ua faariro na melo o te utuafare i to’u farereiraa e o Stephen i te poro o te vahi faaearaa ei pahonoraa na te Metua i te Ao ra i to ratou hinaaro rahi ia ite atu vau i to ratou metua tane na mua‘e oia e pohe ai ma te pahono i ta’na pii. Ua ite atoa vau e, o te reira ihoa, ahani e aita o Stephen i tomo mai i roto i te piha tei reira ta’u farereiraa i te taime mau a na reira ai oia, eita roa vau e ite e, tei reira atoa o Gene i roto i taua pû ra.
Ua horo‘a matou ia’na i te hoê haamaitairaa. Ua tae mai te hoê varua no te hau. Ua tupu maitai te farereiraa, i muri iho ua ho‘i atu vau.
Po‘ipo‘i a‘e, ua faaite mai te hoê niuniu e, ua faaru‘e mai o Gene—e 20 minuti noa i muri a‘e i te fariiraa i ta ta’na tamaiti e ta’u hamaitairaa.
Ua faahiti au i te hoê pure mamu no te haamauruuru i te Metua i te Ao ra no Ta’na arata‘iraa faaûru, o tei afa‘i i ta’u farereiraa i te pû haapa‘oraa e ua arata‘i ia’u i to’u hoa here ia Alfred Eugene Hemingway.
Ua au vau ia mana‘o e, te feruriraa o Gene Hemingway i taua pô ra—a tavaihia ai matou i roto i te maramarama o te Varua, a amui ai matou i roto i te pure haehaa, e a faahiti ai i te hoê haamaitairaa autahu‘araa—ua tavevo ïa te mau parau i faahitihia i roto i te himene « E Mea Puai te Vero ».
A noho â i ŏ matou,
E te Faaora,
Ia tae atu i te oaoa
Te tapaeraa maitai.
Ua here roa vau i teie himene e faaite papû ra i te tamahanahana e horo‘a mai te reira :
Tupu noa te vero rahi
E te riri o te mau demoni ra,
Eita e tomo te pahi,
Tei reira te Fatu mana rahi.
E haapao ratou i to reo,
Faaea.1
I roto i te mau roimata e te mau tamataraa, i roto i te mau mata‘u e te mau pe‘ape‘a, i roto i te oto e te omoemoe no te mo‘eraa o te mau taata i herehia, te vai nei te faaiteraa papû e, e mea mure ore te ora. O to tatou Fatu e Faaora te ite ora no taua ohipa ra.2 Ua nava‘i Ta’na mau parau i roto i te mau papa‘iraa mo‘a : « A faatupuna, ia ite mai e, o vau te Atua (Salamo 46:10). Te faaite papû nei au e parau mau teie.
© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/12. Parau faati‘a no te iritiraa : 6/12. Iritiraa no First Presidency Message, March 2013. Tahitian. 10663 895
Haapiiraa no roto mai i teie parau poro‘i
E nehenehe i teie parau poro‘i e tamahanahana i te feia ua mo‘e te hoê taata i herehia i roto i te pohe e aore râ te feia e faaruru nei i te hoê tamataraa. No te amui atu i te parau poro‘i a te peresideni Monson, a feruri i te faaite atu i te hoê o te mau papa‘iraa mo‘a i muri nei, a faatumu i ni‘a i te mau hinaaro o te feia ta outou e haapii ra : Ioba 19:25–26; 1 Korinetia 15:19–22; Mosia 24:13–15; Te Parau Haapiiraa e te Mau Parau Fafau 122:7–9. Mai te mea e faaûruhia mai, e nehenehe ta outou e faaite papû no ni‘a i te hau ta te Faaora i horo‘a ia outou i roto i to outou mau tamataraaa.