Klumech er a First Presidency, Ongeim el buil 2013
A Blekongesenges a Meskid a Klengeltengat
A llomes er a klemerang me a nger el kirel a kerid a mei sel sekum e kede olngesenges a llechul a Dios.
Rodam me a rodos er ngak, ng dmeu a renguk el teloi er kemiu er chelechal tutau. A kulengit a klaumera me a nglunguchiu el kirel tial techall el kungedecheduch er kemiu.
Ng di mla teletael er a ngaramong, el rsechal me a redil a ulsiik a llomes me a klemedengei el kirel tial klengar er a beluulechad me a deruchelir me a moktek er tir, me a dirrek el rael el kirel a budech me a deureng. A dersta er kid a ngara uai tial teletael er a siik.
Tial llomes me a klmedengei a ngarngii el mora rokui el chad. Ngara chelsel a diak a ulebengelel klemerang. Chelsel aDoctrine and Covenants, er a 1 el bliongel, er a 39 el bades,, eng kmo a Rubak a Dios, ea reng ouchais el kirel, e tia klemerang, ea klemerang a melemolem el mora ulebongel.
A chad er a omeluches a milluches:
Ng uaisei el rokui el tekoi er a eanged me a chutem a mo diak,
Eng di a klemerang, el uchul a rokui, a melemolem el mora ulebongel,
Mo cherechar, diak el mengodech, el mora ulebongel.1
A rebebil oker, “Kede metik er tial klemerang er ker, e mekera bo dodengelii?” Chelsel ocholt el mlora Profet Joseph Smith er a Kirkland, Ohio, er a May er a 1833, ea Rubak a dilu el kmo:
A klemerang a klemedengei er a tekoi er chelechang, chelii, me a klukuk. …
A Reng er a klemerang a Dios. …
E diak a chad el nguu a cherrengelel a lak loltirakl a Llechul.
Ngike el ngii oltirakl a llechul a [Dios] a nguu a klemerang me a llomes, el di merekmo le mekebkall er a klemerang e bo lodengei a rokui el tekoi.2
Ng klebokel el yaksok! Ngike el oltirakl a llechul a [Dios] a nguu a klemerang me a llomes, el di merekmo le mekebkall er a klemerang e bo lodengei a rokui el tekoi.
Ng diak a belkul er kau malechub eng ngak, er chelechal taem el dolab a klemedengei el cherrengelel ebangkelio a mla moluut, losiik er a klemerang er a chelsel a teletael el dirkak le mekedmokl. A oubeltikelreng el Chedam er a Babeluades a mla meketeklii a rael e meskid a omtebechel er kid —el ngii a blekongesenges. A llomes er a klaumerang me a nger el kirel a kerid a mei sel sekum e kede olngesenges a llechul a Dios.
Kede suubii a blekongesenges er a chelsel a klengar kid. Lomuchel sel de mekekerei, e tirkel lomekerreu er kid a kudmokl a teletael me a llach el kirel a sebechekled. Ng kmal mo beot a klengar kid el rokui omko kede mui el oltirakl aika el llach. Ng uaisei, el betok er kid, a suubii a llomes el kirel olngesenges lokiu otireklel a llach.
Sera kurael me klou, ea bek el summer lomuchel er a uchelel a July el mo uchelel a September, ea telungalek er kemam a kiliei er a kekerei el blimam er a Vivian Park er a Provo Canyon er a Utah.
A tara kmal sechelik er tiaikid el taem el ki mkiei er a ked a mle Danny Larsen, el telungalek er ngii a dirrek el mlarngii a blirir er a Vivian Park. Bek el sils e ngii me ngak a milil er tial basio el betok a ki moruul, mengereel er a omeuachel, meruu a bad me a bebil er a ki betik el klalou, milil er a chereomel, melemiakl, e ngara deureng er a bek el bung er a bek el sikang er a bek el sils.
A tal tutau ea Danny me ngak a omdesua el kirel a mo mengumel er a ngau er sel kebesengei lobengterir a rokui el sechelimam el mla er tial ked. Ng mle kiram el di kudmeklii a basio el di kmeed el sebechemam el rokui el mo kldibel. A chedelel tial basio a kmal mle medirt e mekekad a bedenged er ngii, el rullii tial ked meng diak lungil kirel a moktek er kemam. Aki mocha omadel aika el mekemanget el udel, lomdasu a dmedesii a klou, e chaibibeob el basio. Aki mle meringel loureor, eng di ng mle sebechemam el di madel a sesei er a ikal kmal kmes lobadel el udel. Aki mle medengei el kmo tia urerel a tal sils, e kemam a mesikang el dikea klisichel a bedengam.
Ea kumdesua el renguk a kmo ng mle ungil luldasu el siliseb er a uldesuel eai a rekil. Ak dula er a Danny, “Ng kmal kired el di metutii a ngau er a ikal udel. Kerdi sosebii a ua klungel a chaibibeob el udel!” Ng mle mereched el kongei, e rirurt el mora blai el mo melai a mases.
Lak momdasu el kmo ng mle sebechemam el ousekool a mases er a leai a rekmam, msall ek beketeklii el kmo a Danny me ngak a mle mekull el diak ki morutech a mases a lak a klou el chad lomes er kemam. Kemam el terung el mla muklatk el kirel a kengaol er a ngau. Eng di, ak mle medengelii a blil a mases, e mle kiram el kudmeklii tial basio. Meng dimlak luut lomdasu, ak di rirurt el mora blimam e ngmai a sesei el lletul a mases, el kmal kerekikl el diak a mesekak. Ak mle mereched el mart er a bokket er ngak.
Ak rirurt el mora Danny, el ungil a renguk el kmo aki ungiang. A kulemdasu el kmo a ngau a di sosebii sel ngii a somam a le meseseb e locha di ngii el mo diak.
Ak silesiur a lletul a mases er a bad e mideklii er a udel. Ng tilaut el kmal di uaia bla le mesubs er a kasoring. A kot e ngak me a Danny mle ungil a rengmam lomes aikal udel el mo diak, eng di mle telkib eng mocha bleketakl el kmo tial ngau a diak el di el ngii el mo diak. Aki medektang el mocha medengei el kmo ng diak a ngera el sebechemam el rullii el torbengii. Tial mekerkard el ngau a mocha meleseb a ika el mekerker el udel er a bengedel a rois, el sebechel tomall a dellomel el ngas me a lmuut el bebil.
Ng dikea rolel er kemam me a ki rurta el mo osiik a ngeso. A rokui el mle mededaes el sechal me a redil er a Vivian Park a mediderurt el mong e mei lolab a ralm, el melubs er tial ngau el melasm lomekeuad er ngii. Uriul er a tela el sikang e tial mle mekerekard el ngau a kol medei. Aikal meketeketa el dechor el ngas a dimlak el metemal, me a ikel blai el locha mle sebechel a ngau el morngii.
A Danny me ngak a siluub a bebil er a meringel eng di meklou a belkul suobel er tial sils—ea klou er ngii a sel ultutelel a blekongesenges.
Ngarngii a llach lomtebechel a sebecheklel a bedenged. Ngosisiu, el Rubak a mla meskid a ulekrael me a llach el kirel a sebecheklel a chedaol klengar kid me luchul el sebeched el merael er tial meringel el klengar el lemuut el mo remei er a Chedam er a Babeluades.
Betok el rak er a memong, ea Samuel a millekoi er a telcheroll er a rechad el tir a mla mosisechakl el kirel omelenget el charm: “Ng bai ungil a dolngesenges er a dolenget er a kot el ungil sib.”3
A Rubak a ulechotii el mora Profet Joseph Smith el kmo Ngii a mengerechir er a reng me a mesisiich el uldasu e ngkel blak a rengul e bekongesenges a mo menga kelel a Zion er a uriul klebesei.4
Rokui el profet, er a recheuodel me chelechang, a di mla medengei el kmo a blekongesenges a klou a belkul kirel osebeled. A Nephi a millekoi el kmo, “Ak mo meruul aikel tekoi el Rubak a mla meskemam a llach el kirel.”5 Ng uaisei el rebebil a mlo mechitechut a klaumera me a blekongesenges er tir, eng di Nephi a dimlak a ta me lechoit aikel ngii a Rubak a millekoi er ngii. Betok el telcheroll a mla mukngeltengat er tia el teletael.
A mesisiich el olchotel a blekongesenges a cheldechedechal a Abraham me a Isak. Ng locha kmal mle meringel er a Abraham, lolngesenges er a Rubak, el nguu a betik er a rengul ngelekel er a Isak el mora beluu er a Moriah el mo melenget er ngii. Ng sebeched el mtebengar a berraod er a rengul a Abraham er a lorael mo er tia el basio? Sel berroad a locha kmal mlo meringel er a bedengel me a uldesuel er a llechetii a Isak, e lenguu el mekedusii er a altar, e lotebedii oles el mo omekeuad er ngii. Ngultuil er a diak el mesim el klaumerang me a mui loumera er a Rubak, e ngultirakl er a tekingel a Rubak. Ng klebokel el tekoi a mildung, ea Abraham a locha kmal mlo iimis lungil a rengul er a rrenges: “Lak le bo chimam er a buik e lak molemall er ngii: ak mla mo medengei el kmo ke kldmokl lorrenges er a Dios, meng dimlak mkiresii a di tal ngelekem er ngak.”6
A Abraham a mlara omelasm me a skeng, me ngultuil er a klaumera me a blekongesenges ea Rubak a milsa klebokel el yaksok: “Me a bek el beluu er a beluulechad a mo ngeltengat; ele kau el lulngesenges a tekingek.”7
Ng uaisei el diak bo de mongit el mochotii a blekongesenges er kid er tiaikid el kmal meringel el teletael, eng di a blekongesenges a longerchir ngii er kid el dirrek.
Ng millekoi a President Joseph F. Smith er sera October 1873 el kmo, “A blekongesenges a kot el llach er a babeluades.”8
A President Gordon B. Hinckley millekoi el kmo, “A deureng el mora Ruriul-klebesei el Santo, a budech el mora Ruriul-klebesei el Santo, a ngescheklir a Ruriul-klebesei el Santo, a mo klungiolir a Ruriul-klebesei el Santo, me a diak a ulebengelel klengar er tirkal chad a ultuil er a bklekongesenges er tir er a tekingel a … Dios.”9
A blekongesenges teletelir a reprofet; el uchul a klisiich me a llomes el mor tir er a chelsel a reksi. Ng klou a belkul bo dodengei el kmo kid, a dirrek, el sebeched el nguu tial uchul a klisiich me a llomes. Ng klmdokl el medechel el mora dersta er kid er chelechal sils sel dolngesenges a llechul a Dios.
Chelsel aikal betok el rak eak medengelterir a rebetok el chad el tir a mui er a klaumerang me a blekongesenges. Ak mla mukngeltengat e mukrael er tir. Msall e kuchais er kemiu a eru el okesiu er tirkaikid el chad.
A Walter Krause a mle mesisiich a klaumera er ngii el chedal a Ikelesia el, ngii me a telungalek er ngii, a kiliei er a Dims er a Dois ruriul er a Ongeru el Mekemad. Meng diak el iior er a meringel longarm le bla er ngii leng dimlak a kmal iilmokl er tiaikid el basio er sel taem, eng di a Brother Krause a chad el mle betik a rengul e mesiou er a Rubak. Ng mle blak a rengul e kerekikl el kudmokl a bek el tekoi el mlo er ngii.
A tara chad, el Johann Denndorfer a ngklel, el chad er a Hungary, a ulebult el mo chedal a Ikelesida er a Dois e miltecholb risei er sera 1911 er a le 17 a rekil. Dimlak el meketeket ruriul eng lilut el mora Hungary. Uriul er a Ongeru el Mekemad, eng mlo kelebus er a belual, er a beluu er a Debrecen. A iilmokl a dirrek el mlengai er a rechad er a Hungary.
A Brother Krause, a dimlak lodengellii a Brother Denndorfer, e ngiluu a ngerachel el mo oldingel e olisechakl er ngii. A Brother Krause a ulemekedong er a kldemel e dula er ngii el kmo, “Kede mla nguu a ngerachel el mo oldingel er a Brother Johann Denndorfer. Ke mededaes er chelechal sandei e dedak el mo odngelii e de bsa klemechel ebangkelio?” E millemolem el kmo, “A Brother Denndorfer a kiei er a Hungary.”
Ngika el mechese rengul kldemel a uleker, “Kede merael er a oingerang?”
“Klukuk,” a mle nger er a Brother Krause.
“Kede mei er a oingerang?” ng uleker ngika el kldemel.
A Brother Krause a ulenger, “Ng, locha chelsel a tal sandei—alsekum e kede lmuut el mei.”
Me te mirrael tirka el teru el loldingel e olisechakl el mo oldingel er a Brother Denndorfer, el ngara kzia me a bas er a bedul ongos er a Dois el mo er a Debrecen, er a Hungary—el kemanget lomerael. A Brother Denndorfer a dirkak a re me oldingel er ngii ruchei er a lomuchel a mekemad. Tia, er a lesterir tirka el mesiungel a Rubak, eng mlo mui er a omereng el saul er a dmiir. A kot eng dimlak el soal aksiub chimorir. Ng bai, mlora delmerab er ngii e otebedii a kekerei el baks el seluk a ongeltacher ngii er a chelsel el bla longudel el tela el rak. Ngilai el mesterir tirka el mle oldingel er ngii e dula el kmo, “Chelecha eak mla kudmeklii a ngerchelek er a ongeltacher el mora Rubak. Chelecha ea kumelchesiu el klikiid el aksiub chimorir a remesiungel a Rubak!” A Brother Krause a ulechais er ngak ruriul el kmo ng kmal ulebotech a rengul el dimlak a tekoi el msodii a lulmelchesiu er ngii lomdasu el kirel ngika el mui er a klaumerang el odam, el diak a lodengelii er a Ikelesia el betok el rak, a mla blak a rengul mengudel er a teruich el basent er a sesei el kerkerengel el mo harau ongeltacher ngii. Ng milengudel el dimlak lodengei el kmo ng oingerang malechub eng locha morngii a techellel locha ongeltacher ngii.
A Brother Krause a mlo smecher er a etui el rak er a memong el mle 94 a rekil. Ng mle blak a rengul mesiou er a chelsel a klengar ngii e mle ulekrael el mei er ngak me tirkel rokui el mle medengelii. Sel mongit el kirel a ngerachel, eng diak loumededenger, diak loumondai, e diak a lolekoi a betok el tekoi.
Rodam me a rodos er ngak, a klou el skeng er tial klengar a blekongesenges. A Dios a millekoi el kmo ng mo skeng er kid el mo medengei el kmo kede meruul aikel rokui el tekoi el Rubak el Dios a kmu er kid.10
Ng millekoi Osobel: A rokui el sorir a klengeltengat er a Rubak a kirir loltirakl a llach me a teletelel el mla mekedmokl el kirel sel klengeltengat, el ngii a milkedmokl er a uchelel a beluulechad.11
Ng diak a ngodech el ngarbab lokesiu er a blekongesenges el uaia Osobel. A Paulus a melekoi el Kirel kmo:
“Ng mle Ngelekel a Dios, eng di uleak a ringel eng mlo meduch el olngesenges;
“Sera lerekui aikel kirel meruul, eng mlo uchul ea diak a ulebengelel osobel a mo er tirkel rokui longesenges er ngii.”12
A Osobel a ulechotii a bleketakl el beltikelreng er a Dios lokiu a klikiid el klengar ngii, el milengull er a chedaol ureor el mlor Ngii. Ng dimlak a ta me bol ngarbab a rengul. Ng dimlak a ta me bol kedidai a rengul. Ng dimlak a ta me bo lak loumerang. Ng di uleba ngariouelreng. Ng mle blak a rengul. Ng mle bekongesenges.
Meng uaisei el Ngii a mlengai lokiu a Reng el mora chereomel el mor omengetikaik er ngike el mastang er a cheleblad el diablong, me Ngii a kmal mlo mechitechut a bedengel er a olsengerenger el okeua llomes me a okeua el klebesei meng mle songerenger, e Ngii a milskid a cheledaol okesiu er a blekongesenges el dimlak le touchakl er sel Ngii a lodengelii el kmo ng melemalt.13
Sera le bora ringel er a Gethsemane, el Ngii a ultekangel er tial ringel el “klsib er ngii a mirberebt el rasech el mora chutem,”14 e Ngii a mle okesiul a bekongesenges el Ngalek el dilu el kmo, “Chedam a lungil er a rengum e mnguu tial kob er a ringel el choridii er ngak: Eng di motireklii sel soam, e lak el sel soak.”15
El uaia tekingel Osobel el mora re Apostol er Ngii er a uchelel, meng dirrek el tekingel el mo er kau me a ngak, “Moltirakl er ngak.”16 Ngarngii er a rengud el mo olngesenges?
A llomes el kid osiik, a nger el kmal soad, me a klisiich el kid a soad el mo olab er chelechal sils el mo sobecheklid er tial chetituokel e ngeldengodech el beluulechad a sebeched el mo ngmai alsekum e ngarngii er a rengud el mo olngesenges a llechul a Rubak. A klmuut el dmu tekingel a Rubak: Ngike el chad el oltirakl a llechul a Dios a nguu a klemerang me a llomes, el di merekmo bol mekebkall er a klemerang e bo lodengei a rokui el tekoi.17
Nglunguchek me bo de mukngeltengat er a obdois el mla metib el nguked el mora rolngesenges. El ngara ngklel a Jesus Kristo, el Rubak e Osobeled, amen.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/12. Kengei er a oidel: 6/12. Oidel a First Presidency Message, May 2013. Palauan. 10665 881