Mulwol ko Bin Somm’on e Presidency, May 2013
Mafol Nima Gay e Ta’awath
A nang fan ko tin riyul’ nge marunga’gen urngin e fulweg ko e bin thabi ga’ e duwer rodad ningan fulweg udakaen e mafol rodad ko fapi motochiyel ku Got.
Pi walageg nib mo’on nge ppin nib t’uf, ba gel e magaeraen’nug ningu non ngomed e biney e kakadabul. Gube fith ko mich nge meybil romed nap’an bay gu fulweg mug non ngomed.
U urngin e mfen, mo’on nge ppin kar gayed e lowaen’ nge nang fan maruna’gen biney e yafas nge tagil’ roraed riy’ nge fan roraed riy’, ma rogon nira yaen nga gapas nge flaflaen’. Woed rogon ni fan dad. Bineye magow e gidad gubin ni gidad ma rrin.
Biney e lowaen’ nge nang fan kan pii’ ngak urngin e gidii’. Bay u lane tin riyul’ nib manemus. Ulan fare Doctrine nge Covenants, section 1, verse 39, ba ga’ar ni en Somoel i’ir Got, nge fare ya’el nem ba micheg, ni farka babyor e ba riyul’, nge riyul’ nima athamgil ko manemus nge manemus.”
Fare poet ke yoloy:
Arragon fare tharmiy ra chuw nge rran ko fayleng e ra pil,
Riyul’, e puluwon ko yafas, ra athamgil ko bin kireb,
Manemus, dani thiliyeg, manemus.1
Boech ra fith, “Bu’uw biney e riyul’, ma urogon ningad nanged riy’?” Ulane thogthog ni kan pii’ idakaen fare Profet Joseph Smith u Kirtland, Ohio, ko May ko 1833, en Somoel ke yoeg:
Riyul’ i’ir e nang fan ko rogon pin’nen chiney, u kakrom, nge u ngiyal’ ni bay yib. …
Fare Ya’el ko riyul ma yib ku Got. …
Nge dariy’ e mo’on ra thapeg urngin riy’ mada’ ko irra thapeg e motochiyel rok.
Enra fol e motochiyel ku Got ra thapeg e riyul’ nge magal, mada’ ko ke gay fel’ngin ko riyul’ ma nang urngin e ba’nen.2
Aram a micheg nib ma’ang’ang! Enra fol e motochiyel ku [Got] ra thapeg e riyul’ nge magal, mada’ ko ke gay fel’ngin ko riyul’ ma nang urngin e ba’nen.
Dani t’uf ningad milekagow, u tiney erran nib lowaen’ nap’an urngin e tin ko gospel e kan fulweg, ngad tawreg nga dai ni dad nanged fa milekag ko kanawo’ mag piriyegew e riyul’. E Chitamangdad nu Tharmiy ni ba’adagdad ba pii’ e tapowiy’ ngodad— arragon e mafol. E nangfan ko riyul’ nge fapi fulweg ko bin thabi ga’ e duwer rodad ra yib ngodad fa’an ngad fol ngak e motochiyel ku Got.
Gadadma fil e mafol ko urngin e yafas rodad. Nira tab’ab nap’an kad bitir, e gidii’ nima chathowliydad ba ning chilen ngodad ma pii’ed motochiyel ningar matangiydad. Yafas ra mang mom’ fa’an ngad folgad ko motochiyel nib polo’. Boech u fithikdad, machane, ra filed e nang fan udakaen e ngongol nib lowaen’ ningad folgad.
Nap’an ba fel’ yangreg, urngin e summer ko July mada’ ko September, tabinaew rog ra paered u na’un romad u Vivian Park u Provo Canyon u Utah.
Bin rugba’adag e fagar rog u tinem erran nap’an kug paer u canyon nem i Danny Larsen, tabinaew rok ba fanay reb e na’un u Vivian Park. Urngin erran gomow i ir nge gag kug milekagow u biney e tafen nib fel’ ko pagal, fita’gow u chi lul’ nge bin baga’ e lul’, fanay e malong nge reb e tin nib ga’ puluwon, milekag, gararaw, mag faflaen’gow ko urngin e minute ko urngin e awa urngin erran.
Reb e kakadabul Danny nga Gag kug me’legew ningu urufegew e nifiy u nep ko boech e fagar ko canyon romow. Thingar tomilang niged biyang I paan’ nib chugur ningug mo’olung gad riy’. E paan ko June ke malik me sakadkad, ma tafen nem nib kireb ko tin ni gamow be lemnag. Kug tab’abew ningu pugew fapi paan nib n’uw, kug me’legew ningu tomilang nigew biyang nib gaa’, biyang nib lilbuy. Kug tilew mug chuweg ko urngin ni rayog romow, machane kemus boech’uw e paan e kug fek. Kug nang nira muruwel ney era yan i mada’ ko naep, nge gelnginmow nge rayog romow e ba waer.
Me yibi buch Kug lemnog rogon nib thabi fel’ ko tafney rog nib merub e duw rog. Kug gog ngak Danny, “Kemus ningu tew e nifiy ko paan me yik. Gadowra urufeg ba lilbuyko biney e paan!” Maki arragonnog, Mug mil nga na’un romad ningu fek boech e masis.
Richey ni gamed ba lemnog ni nap’an ba nel’ e duw rog rayog ningu fanay e masis, Gube a’dag ningu weliy’ ni gamow i Danny nge Gag e kan siyeg ngomow ningu ngongoliy nap’an dariy e labthir. Bo’or e yay kan koel chiya’ ngomow e tin kireb ko nifiy. Machane, Kug nang bu’uw e tabinaew rog nikar tayed fapi masis riy, ma thingar ningu tomilang nag fapi paan’. Dabkug lemnog bayay, Kug mil nga na’un romad mug fek boechuw I masis, kug sapoechpoech ni de guyeg bee’. Kug mithag e pinn’em u pocketo rog.
Mug sul Mug mil ngak Danny, kug faflaen’ bachan bay e fulweg Rog u pocketo rog. Gube pug erran ni kug lemnog fare nifiy ea ra mu’ruf ngayan I taw ko gin ni gubadag mab ma’ang’ang rogon nira yim’ ni yogo’ir rok.
Kug tabag fare masis ko malong mug urfeg fare paan nib malik ko June. Ke mu’ruf woed nike sug ko pinsin. U somm’on Danny nge Gag kug faflaen’ nap’an kug guyew niba mu’ruf fapi paan, machane tomuren boech e ngiyal’ kug nang dabi ta’l fare nifiy. Kug rusgow nap’an kug nang fan dabiyog ningu ta’legew. Fare nifiy ke garar nga dakaen fare tagil’ ko burey, ba urufeg e gak’iy nge gubin ba’nen u pulwon.
Me yibi buch dariy’ reb e rogon ere mug milgow ko ayuw. Urngin e mo’on nge ppin u Vivian Park ba mil mar feked e burlap bag nib sug ko rran, mar toy ko fapi nifiy ma gay rogon ningar thanged. Tomuren boech e awa ke waer fare nifiy. Fapi gak’iy ni pine e kan thapeg, woed rogon fapi na’un ka garar fare nifiy ngay.
Danny nge Gag kug fil boech e mafil nib mom’aw binem erran—u somm’on e tin nib ga’fan ko mafol.
Bay e motochiyel ninge ayuwegdad ma matangiydad. Boed rogon, fare Somoel ke pii’ motochiyel ninge ayuweg ma gaye matangiy ko ya’el rodad ninga milekag ko biney e yafas magidad sul ngak Got ni Chitamangdad nu Tharmiy.
Bo’or e duw kafram, ngak e mfen ni bay yalen roraed ningar maligach nag e gamanman, Samuel ke non u gel bugwaen, “Kabfel’ ni ngan fol rok ko bin ni nga pi’ e bin th’abi fel’ e saaf ngak ni maligach.”3
U tiney erran, fare Somoel ke dag ngak fare Profet Joseph Smith ni Irma t’uf fare “gum’racha’ nge fel’ laniyaen’nge e gidii’ nima fol ra kay’ed e tin nib fel’ ko binaw u Zion u tiney e tin tomur erran.”4
Urngin e profet, u kakrom ma tiney erran, ma nanged fan ni mafol nib t’uf ko thap rodad. Nephi ke yog, “gag e bay guwaen nggu rin’ e pin’en ni ke motochiyel nag Somoel.”5 Arragon reb e gidii’ kar waer gad ko mich nge mafol roraed, machane dabi waer Nephi ninge rin’ e tin ni fith Somoel ngak. Bo’or e mfen kan ta’awath nograed riy’.
E chepin nira gay ba gel e thamtham ko mafol i’ir e chepin Abraham nge Isaac. Nib mom’aw ko Abraham, ufithik e mafol ko motochiyel rok Got, ninge fek Isaac nib t’uf ngak mar milekagow nga binaw ko Moriah ninge pii’ ir ni maligach. Rayog ningam lemnog e tomal ko gum’racha’en Abraham nap’an ke milekag ko rigin nem? Arragon e gafgownog e downgin nge tafney rok nap’an ke m’ag Isaac, me tay ngadakaen e altar, me fek e yar ninge lii’ nge yim’. Ufithik e mich ni darma waer nge pagaen’ nib polo’ ngak en Somoel, ke fulweg ngak fare motochilyen Somoel. U fel’ngin fapi thin, ma faflaen’ Abraham nap’an ke yib: “Dab mu maad’ad ngak e chi pagel nir ara mrin’ ba’nen ngak. Kug nang e chiney nib magan’um ngay ni ngam fol rok Got: ya fakam ni kari maagirag rom e da mu tel rok.”6
Kan sikengnog Abraham, nge key yib u fithik e michaen’ nge mafol ngak en Somoel biney e micheg: “Ma urngin e nam nu fayleng ni bay ra weniggad ngog ni nggu fal’eg wa’athrad ni bod rogon ni kug fal’eg wa’athrad ni bod rogon ni kug fal’eg wa’athan e pi’in ni owchem, ni bochan kam fol ko tin kugog ngom ningam rin’.”7
Dani fith ningad daged e mafol rodad u biney e rogon nib ma’ang’ang nib gafgow ko gum’racha’, nib t’uf e mafol ngodad.
Ke yoeg President Joseph F. Smith ko October 1873, “Mafol i’ir e bin somm’on e motochiyel u Tharmiy.”8
Ke yoeg President Gordon B. Hinckley, “Faflaen’ ko Gidii’en Got ko Tin Tomur e Rran, nge gapas ko Gidii’en Got ko Tin Tomur E Rran, e garar ko Gidii’en Got ko Tin Tomur e Rran, fla’ab ko Gidii’en Got ko Tin Tomur e Rran, nge e thapeg nib manemus nge fel’ngin ko biney e gidii’ ra yib udaken e mafol ngak e chilen ku …Got.”9
Mafol i’ir e pow ko fapi profet; ba pii’ gelngin nge nang fan ngoraed u urngin e mfen. Nib t’uf ningad nanged ni gadad, arragon, ba ma’tawaen’dad ko biney e gelngin nge lowaen’. Ra yib ngodad nib papay nap’an ngad folgad ko motochiyel ku Got.
U bo’or e duw Kug nang bo’or e gidii’ nib michaen’ mar folgad. Kar pii’ed e taw’ath ngog makar piningaen’ug. Rayog Ningu pii’ boechi e chep ko la’agruw e gidii’ ney.
Walter Krause i’ir e chongin nib michaen’ ko fare Galasia niyad,e tabinaew rok, e kar paered u tafen ni kanoeg ni East Germany tomuren fare Second World War. Dariy’ fan e gafgow rok bachan kar thanged e puf mat’awon u binaw nem ko ngiyal’ nem, Brother Krause i’ir e mo’on ni ba’adag ma pigpig ko en Somoel. Ke mugu’ul ufithik e michaen’ urngin e muruwel kan pii’ ngak.
Reb e mo’on, Johann Denndorfer, bee’ nu Hungary, ke mang chonggin e Galasia u Germany maki tawfe urom ko 1911 nap’an ba 17 e duw rok. Ma fini buch nga tomren nike sul nga Hungary. Tomuren fare bin Second World War, ke mang woed bee’ u kalbus ko nam rok, ulane fare donguch ko Debrecen. Puf mat’awon e kan fek ko pi gidii’en u Hungary.
Brother Walter Krause, ni de nang Brother Denndorfer, ke thapeg e muruwel ninge mang e home teacher rok maki mada’ ngak bo’or e yay. Brother Krause ke pinning e home teaching companion rok me yoeg, “Kug thapegew e muruwel ningu mada’nog Brother Johann Denndorfer. Rayog ningad milekag gow biney e week ningad mada’nigew mad pii’ew fare milwol ko gospel?” Ma fini yoeg, “Brother Denndorfer e ba paer u Hungary.”
E companion rok ke fith, “Wi’in ningad darow?”
“Gabul,” keyib e fulweg rok Brother Krause.
“Wi’in ningad sulow nga tabinaew?” ke fith fare companion.
Brother Krause ke fulweg, “Oh, sna u ta’areb e week—fa’an ngad sulow.”
Mar milekagow gali home teach companion nem ningar mada’ Brother Denndorfer, mar milekagow ko train nge bus ko gin u ngel’ ko Germany nga Debrecen, Hungary—e milekag nib palog. Brother Denndorfer dabki thapeg e home teacher mada’ u m’on ko mael. Chiney, nap’an ke guy gali tapigpig ku en Somoel nem, ke sug ko magaer ni kar bow. U somm’on dabki rugrug paa’row. Machane, ke yaen nga singgil rok me fek e kahol ni bay urngin e tithing riy’ ni ke thapeg ko bo’or e duw. Ke pii’ fare tithing ngak fagali home teacher rok me yoeg, “Chiney dariy’ e malfith rog ngak Somoel. Chiney gube thamiy nib mat’aw ningu rugrug paa’mew i gimew e tapigpig ku en Somoel! Brother Krause ke yoeg ngog u tabuch nike thamiy ni dabiyog u yog rok rogon ni walagen nib michaen’, ni dabki mada’ nag fare Galasia nike n’uw nap’an, e ke thapeg e 10 percent ko salpiy rok ninge pii’ e tithing rok. Ke cha’riy ma de nang ko wi’in fa rayog e wo’en ni ninge pii’ pulwon.
Ke yim Brother Walter Krause mereb e duw kafram nap’an ba 94 e duw rok. Ke pigpig nib michaen’ ma ke fol ko urngin e yafas rok ma gay e fel’ laniyaen’un rog nge urngin e gidii’ ni manang. Nap’an nikan fith ninge mug’ul’liy e muruwel rok, dabki fith, dabki moning, ma dabki waer.
Pi walageg nib mo’on nge ppin, e bin thabi’ ga’fan e sikeng ko yafas ney i’ir e mafol. Ke yoeg Got ni yowra sikennog dad mar guyew fa’an ngad rin’ed urngin e tin ni ra fith en Somoel e Got rodad nira motochiyel nogdad.10
Ke yoeg en Somoel urngin e gidii’ ni ba’adag e taw’ath ko fare Somoel thingari fol fare motochiyel nge tin nib t’uf ni kan pethpeth ko fare taw’ath, woed kan yarmiy u somm’on e fayleng.11
Dariy’ reb e rogon nib fel’ ko mafol ko birok e en Tathapeg. Marung’agen, ke yoeg Paul:
“Yugu aram rogon ni ir Fak Got, machane u daken e gafgow ni i tay e fil rogon riy ni ngi i fol rok Got;
“Ma fa’ani yan i par ni kari fel’ rogon ni bochan e gafgow ni tay, me par ni ir e be thapeg e girdi’ ngak Got ngar pired rok ndariy n’umngin nap’an, ni urngin e pi’in yad be fol rok.”12
En Tathapeg ke dag e t’ufeg nib riyul’ ku Got bachane ke paer nib machaelboeg, maki liyoer ko muruwel nib thothup Rok. Dani Uf’uf. Darma Sug ko uf’uf. Darma paer ni dar yul’yul’. Irma Sobutaen’. Irma e ba riyul’. Irma Fol.
Arragon kan powiy’ Ngak ko Ya’el nga wuru’ e binaw ninge lumelnog ko masta ko baen, arragon en mo’oniyaen’, arragon Ke waer u downgin ko bilig ko 40 erran nge 40 e nep ma ba’adag e gan, machane nap’an en mo’oniyaen’ ke pii’ Yesus e bin thabi lumel nge micheg, Ke pii’ nogdad e rogon nu tharmiy ko mafol bachan dabki chel ko tin ni Irmanang nib riyul’. 13
Nap’an keb fare gafgow ko Gethsemane ngak, nap’an Ke athamgil re mith nem ni “ke maap racha’en mar thiged nga but,” 14Ke tay fel’ rogon en Fak nima fol nap’an ke yoeg, “Chitamag, fa’anra mm’agan’um ngay ma ga fek e re kap ney ngam chuweg rog. Machane gathi tin nib m’agan’ug ngay e ngam rin’, ya tin nib m’aga’um ngay.”15
Woed en Tathapeg ke chiliy ngak fapi bin somm’on Apostle Rok, woed rogon Irba chiliy ngodow i gur nge gag: “Mlekeg ngog.” 16 Gadad ba’adag ningad folgad?
E lowaen’ ni gadadba gay e chiney, fapi fulweg nib t’uf ngodad, nge gelngin ni gadad ba’adag daba’ ningad mugu’uliyed e tin nib mom’aw ko e fayleng nima thilyeg ningad thapeged nap’an ngad folgad ko fapi motochiyel rok Somoel. Gube yoeg bayay fapi thin ku en Somoel ni enra fol ko motochiyel ku Got era thapeg e tin riyul’ nge tomilang, mada’ ko ra gay urngin e fel’ngin ngak nge ma nang urngin e ba’nen.17
I’ir e meybil u sobutaen’nug ningad thapeged taw’ath ko e tin fla’ab ni kan micheg ngak e gidii’ nima fol. Udakaen fare fithingan ku Yesus Kristus, e Somoel ma Tathapeg rodad, amen.
© 2013 by Intellectual Reserve, Inc. All rights reserved. Kan yoloey u Merika. Kan micheg nag ko thin nu Ngalis: 6/12. Micheg nag i pilyeg: 6/12. Piliyeg ko First Presidency Message, May 2013. Yapese. 10665 905