iTabagone
Cuqeni ena Vakabauta
Na dauvolaivola e vakaitikotiko e North Carolina, USA.
Au na sega ni guilecava na noqu a lako voli ena vanua o Winter Quarters, Nebraska, USA, ka ra a vakaitikotiko kina na ivuvu ena vica na yabaki sa oti. E vakilai na rara ni vakatabui, ka voleka ni vakataka ni’u sikova tiko na tautuba ni dua na valetabu.
A tonawanawa na wai ni mataqu, ka buwawa kina na noqu rai. Au a raica e dua na ivakatakarakara ia au sega ni taura rawa na kena ibulibuli. Ni’u sa qusia tani na wai ni mataqu, au qai raica na matadrau e dua na turaga kei na marama ka rau luvuci tu ena rarawa bibi. Ni’u rai yani vakavoleka, au raica rawa na ibulibuli ni dua na gonedramidrami ni davo koto ena ibulubulu volekata na yavadrau.
A yavalati vakalevu sara na lomaqu ena ka au a raica oqo: rarawa, cudru, vakavinavinaka, kei na reki. Au a vinakata me’u kauta tani na mosi rau a vakila tu na Yalododonu oya, ia au a yalovakacegu ena gauna vata tale ga oya ena ka rau a solibula kina ena vuku ni kosipeli.
Na ka au sotava e Winter Quarters a vukea me’u raica ni dau solia na kosipeli kivei ira na Luvena na Tamada Vakalomalagi ka vakatara vei ira na galala mera vakayacora kina na veika era digia. Sa rawa ni a digitaka na itubutubu ni gone dramidrami oya e dua tale na sala rawarawa cake. Na vakamuri ni parofita kei na bulataki ni kosipeli sa vinakati kina vei rau na ivuvu oqo me rau toso tikoga ki liu veitalia ke gadrevi me buluti na nodrau isolisoli. Ia rau a digitaka me rau taura na kosipeli ki na nodrau bula ka ciqoma na nodrau bolebole. Au vulica rawa ni nodra yalodina ki na kosipeli na Yalododonu vakakina na nodra guta me ra toso tikoga ki liu a cuqeni ena vakabauta kei na inuinui—inuinui ki na dua na gauna totoka mai muri kei na vakabauta ni a kilai ira na Turaga ka rawa ni vakamamadataka na nodra icolacola.