Klumech er a First Presidency, Ongeai el buil 2013
Mtebengar, Dobedebekii, e Mereng a Saul
A Dios a olengit me doureng a sulel er a ngii di el klengeltengat el dengai er Ngii. Ke de beot el mo smau er a osisiu el blekerdelel a nglunguuched er a omereng el saul, el blechoel lomelekl osisiu el tekoi e diak er a rengud oureng a saul el ngii a sengk el ngara rengud el mora Dios. Ng kired loureng a saul lokiu a Chedaol Reng meng sebeched el melchesuar a dmolech el saul er a ikel Dios a mla meskid. D&C 46:32
Kede mekera e sebeched el mo dobedebek a tedobech er a ikel rokui el Dios a mla remuul el kired? A Johanes el Apostol a liluches a osisecheklel Osobel el merkid el kirel a sengk er a omelbedebek el ngii a mei er kid lokiu a sengk er a Chedaol Reng: “Eng di a Olengeseu, el Chedaol Reng, el bo lodureklii a Chedam el mei el oba ngklek, a mo osisecheklemiu a rokui el tekoi, e mo omeklatk er kemiu er a ikel bek el bla kdu er kemiu” (Johanes 14:26).
A Chedaol Reng a mekletkid er a mla mo merek el tekoi el Dios a mla osisecheklid. E a ta er a rael el Dios a olsisechakl er kid a okiu a klengeltengat er Ngii; me a leuaisei, e alsekum e kede melilt el ngara klaumerang, ea Chedaol Reng a mo ocholt el merkid a ungil lomerellel a Dios el bo dolbedebek.
Ng sebechem el mo melasem er ngii lokiu a nglunguuch er chelecha el sils. Ng sebechem el oltirakl er a omellach el melekoi el kmo ng kirem el oureng a sulel a Rubak el Dios er kau er a rokui el tekoi (D&C 59:7).
A President Ezra Taft Benson (1899–1994) a millekoi el kmo a nglunguuch a meskid a techall el mo meruul er tiang. Ng dilu el kmo: “A Prophet Joseph a millekoi er a ta er a taem el kmo a ta er a kot el klou el klengit el Uriul-klebesei el Santo a sebecherir el reuebet er ngii a klengit er a diak loureng a saul. A kumdasu e a betok er kid a dirkak a tang me lomdasu er tiang el kmo ng klou el klengit. Ng ngarngii a teleteled el doluluuch me a ongtid el mora Rubak lolengit a lmuut el bebil er a klengeltengat. Eng di a kumelchesuar a le bebil er a taem eng kired el choitii a klou el temed er a nglunguched el kirel a dmolech el omereng el saul er a klengeltengat el bla dengai. Ke de mla mukngeltengat er a kmal betok.”1
Ng sebechem el mo medengelii tiang lokiu a sengk er a Chedaol Reng er chelecha el sils. Ng sebechem el omuchel er a nglunguchem loureng a saul. Ng sebechem el omuchel el mo omechur a klengeltengat el mla mei er kau e okor e mo chelellakl el telkib el team. Alsekum e ke meruul lokiu a klaumerang, loba sengk er a Chedaol Reng, e ke mo dobedebek a bebil er a klengeltengat el me soiseb er a uldesuem. E alsekum e ke mo omuchel el oureng a saul el kirel a derta er a ikang, ea nglunguchem a sebechel telkib el mo kemanget. A omelbedebek a mo sebechel, me a dirrek el dmolech el omereng el saul.
Ng sebechem el melasem er a osisiu el omeruul sel moluches er a journal er kau. A Chedaol Reng a mla olngeseu er a rechad el kirel tiang er a uchelel. Ke lotkii sel ngara hong er a Moses eng melekoi el kmo a omelchesel a hong er a uleklatk a mla er ngii el llechukl er a tekingel a Adam el ngar tial hong e ng llechukl el ngii di el chad lomekedong er a Dios el mo meluches el ultuil er a reng el ngii omekrael a mlo sebechel rulii.Moses 6:5.
A President Spencer W. Kimball (1895–1985) a milsaod er a teletelel a mlukrael lomeluches: “Tirkel meluches er a hong er a uleklatk a sebecherir el mo melatk er a Rubak er a bek el sils er a klengar er kir. A Journal a dokiu ngii e omechur a klengeltengat er kid el mo medechel el ulecherangel el klengeltengat el mo er a merael mei el telcheroll.”2
Sel bocha moluches, eng sebechem el oker er tial ker leko er kau, “Ng milkera Dios er a lomekngeltengat er ngak me a rebetik er a renguk er chelecha el sils?” Alsekum me ke blechoel el meruul er tiang loba klaumerang, e ke mo metik er kau el mo dobedebek a klengeltengat. E sel bebil e ke mo omdasu a sengk el ngii a dimlak kom ues er sel sils eng di kau a mo medengei el chimal a Dios el rirtechii a klengar er kau.
Ak meluluuch me bo dolemolem el blak a rengud lokiu a klaumerang el mo omtab, dobedebek, e mo oureng a sulel a Demad er a Babeluades me a Osobel er a ikel blal ruul me a loruul el mo omok er a roled el mo remei el mo er Tir.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/13. Kengei er a oidel: 6/13. Oidel a First Presidency Message, August 2013. Palauan. 10668 881
Osischeklel Tia el Klumech
Me ngar tial klemechel, ea President Eyring a omekedong er kid el mo melbedebek a klungiolel a Chedam er a Babeluades sel doluluuch. Bo msodii lobengterir tirka el molisechakl er tir el mekera nglunguuch loba omereng el saul a sebechel ngosukid el mo omtab a chimal a Dios er a klengar er kid. Momdasu a meluluuch lobengterir tirka el molisechakl er tir e molekoi er ngkel mo meluluuch me bo loluluuch el kuk di oureng a saul.
Ng dirrek el sebechem el mesuub er a ultutelel omereng el saul el mo menguiu a ika el bades el lobengkel aike el bades el mildung er a President Eyring: Psalm 100; Mosiah 2:19–22; Alma 26:8; 34:38; Doctrine and Covenants 59:21; 78:19; 136:28.