Ennaan eo an Būreejtōnji eo Kein Kajuon, Jeptōm̧ba 2013
Armej ro Rekwojarjar n̄an Aolep Season ko
Ewōr aō ememļo̧kjeņ ko jān ke iaar ajri kōn juon m̧ōttan laļ in me eaar kanooj aiboojoj ilo kajjojo season ko emen an juon iiō. Kajjojo allōn̄ ej eļļāļo̧k eaar aiboojoj im em̧m̧an. Ilo juon raan in iien m̧ōļo em̧m̧an, jiņo̧ ko rekāāl raar kalbubuik toļ ko im iaļ ko an jikin kweilo̧k eo. Wōt ko ilo iien jibūriin̄ raar karreoik aolep men ko im kōm̧m̧an bwe wōjke ko im menin eddōk ko ren ebbōļ, ererak būlikier, im waļo̧k wut. Aļ ej romaak ilo ineem̧m̧an, mejatoto ko rebūļu ilo iien jōm̧m̧ar. Im kabwilōn̄lōn̄ eo an oktak in peļaak eo ej waļo̧k n̄an ellor ko rem̧m̧an an oran, iaļo, im būrōrō. Āinwōt juon ajri, iaar iakwe kajjojo season, im n̄an rainin, ij iakwe kōjellin im jej uwaan eo an kajjojo iaer.
Ewōr season ko ilo mour ko ad barāinwōt. Jet remeņeņ im em̧m̧an. Ko jet rejjab. Jet iaan raan ko ilo mour ko ad rej aiboojojier wōt juon pija ilo juon kōļōņta. Im aaet ewōr raan ko im jekjek ko me rej kōm̧m̧an metak bar im maron̄ bōktok n̄an mour ko ad en̄jake ko rem̧wilaļ an ebbweer, m̧atōrtōr, im illu.
Ijeļā ilo juon iien ak bar juon ewōr ippād aolep ļōmņak enaaj kar em̧m̧an n̄an mour ilo juon āne eobrak wōt kōn raan ko an pija eo em̧m̧an an season ko im joļo̧k iien ko renana ikōtaer.
Bōtaab menin ejjab pidodo. Ak ejjab ikdelel kake.
Ilo aō kalimjōk mour eo aō make, ealikkar bwe elōn̄ iaan iien ko reļļap an eddōkļo̧k eaar itok n̄an eō ke iaar kijon e season ko reppen an mour.
Jemedwōj Ilan̄ eo elo̧ļe eaar jeļā bwe n̄an an ajri ro Nejin eddōkļo̧k n̄an erom armej ro raar ejake er n̄an erom, rej aikuj in kar ioon season ko an apan̄ ilo iaļ eo aer ilo mour wabanban. Rikanaan eo ilo Bok in Mormon Liai eaar ba bwe ilo an ejjeļo̧k jum̧ae, “wānōk ejamin kar maron̄ kūrm̧ool” (2 Nipai 2:11). Ilo m̧ool, ej illu eo an mour in me ej kōtļo̧k bwe jān kile, jum̧ae, im kam̧oolol kōn em̧m̧an eo an (lale D&C 29:39; Moses 6:55).
Būreejtōn Brigham Young ej likūt ilo wāween in: “Aolep armej ro remeletlet me raar kōpālpel er kōn kūrauun in aiboojoj, mour jab wabanban, im mour indeeo ko rej aikuj eļļā ilo aolep mālijon̄ ko kar karōki n̄an armej ro remeletlet n̄an kijooni, n̄an bōk aiboojoj im mour āinwōt Anij. Aolep jerata me remaron̄ itok ioon armej wabanban naaj en̄taan … n̄an kōpooj er n̄an lan̄lōn̄ kōn im̧aan mejān Irooj. … Aolep mālijon̄ im en̄jake kwar eļļā jāni ej menin aikuj n̄an lo̧mo̧o̧r eo am̧.”1
Kajjitōk eo ej eļan̄n̄e jenaaj jeļā kōn season ko an apan̄ bōtaab ekōjkan ad naaj jelm̧ae lan̄ ko. Iien eo ad em̧m̧aan tata ilo season ko rokoktaktak an mour ej n̄an kōdāpdeb dim n̄an naan ko retiljek an Anij, bwe An kapilōk ej ejaake ejjab wōt n̄an jipan̄ kōj dipuk lan̄ ko an mour ak barāinwōt n̄an tōl kōj jāni. Jemedwōj Ilan̄ eaar letok naan eo An kōn rikanaan ro An—jeļāļo̧kjeņ eo m̧okta eaar kōm̧anm̧an n̄an tōl kōj jen apan̄ ko an season ko reppen m̧aanļo̧k n̄an lan̄lōn̄ eo ejejuwaan im meram elukkuun em̧m̧an an mour indeeo. Ej juon m̧ōttan eaorōk an mour jeļā eo ad ilo mour n̄an kōļapļo̧k kajoor eo, peran eo, im m̧ool eo n̄an kōdāpdeb n̄an m̧ool eo im jim̧we eo kōjekdo̧o̧n eppen ko jemaron̄ en̄jaki.
Ro me raar tulo̧k ilo dān ko an peptaij im bōk menin letok eo an Jetōb Kwojarjar em̧ōj aer likūt neer ilo iaļ eo an rikaļoor im kappeik er n̄an ļoor ilo dim im tiljek ilo bun̄tōn neen ko an ad Rilo̧mo̧o̧r.
Rilo̧mo̧o̧r eo eaar katakin bwe aļ ej tak “ioon ro renana im ioon ro rem̧m̧an, im … kowōt ioon ro rewānōk im ioon ro re jab wānōk” (Matu 5:45). Jet iien jejjab meļeļe etke men ko reppen, em̧ool jab jejjet, rej waļo̧k ilo mour. Bōtaab āinwōt rikaļoor ro an Kraist, jej lōke bwe eļan̄n̄e jej pukōt ilo tiljek, jar iien otemjeļo̧k, im tōmak, … aolep men ko renaaj jerbal ippān doon n̄an em̧m̧an eo [ad], eļan̄n̄e [jej] etetal ilo jim̧we (lale D&C 90:24; kar kakobaba ilo kalikkar).
Āinwōt ro uwaan Kabun̄ eo An, āinwōt Armej ro Rekwojarjar, jej jerbal ilo lan̄lōn̄ im m̧ōņōņō ilo aolep mejatoto im ilo aolep season ko. Im ilo ad kōm̧m̧ane, būruwōd ej erom obrak kōn tōmak ekwojarjar, kōjatdikdik in kemour, im iakwe eo em̧ool an lan̄.
Ej pād wōt, jenaaj aikuj in eļļā ioon aolep season ko—jim̧or em̧m̧an im kemmetak. Bōtaab jekdo̧o̧n tōre ta, āinwōt rikaļoor ro an Jisōs Kraist eo, jenaaj likūt ad kōjatdikdik ioon E ilo ad etetal m̧aanļo̧k n̄an meram eo An.
Ilo tukadu in, jej Armej ro Rekwojarjar an Anij, ļōmņak n̄an katak kōn E, n̄an iakwe E, im n̄an iakwe ro m̧ōttad. Jej āinwōt ritotak ro rej etetal ilo iaļ eo ekwojarjar me rikaļoor ro raar ļoore, im jenaaj etetal ilo dim m̧aanļo̧k n̄an menin kōttōpar eo ad an lan̄.
Kōn menin, jān erom Armej ro Rekwojarjar ilo jibūriin̄, jōm̧m̧ar, fall, im winter. Jen erom Armej ro Rekwojarjar n̄an aolep season ko.
© 2013 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/13. Kōmālim an ukook: 6/13. Ukook eo an First Presidency Message, September 2013. Marshallese. 10669 874
Katakin jān Ennaan In
Būreejtōnji eo Kein Kajuon eaar katakin, “Jet iaan katak ko reļļap rej kwaļo̧ki kōn al al ko” (Hymns, ix). Ilo am̧ ekōnono kōn ennaan in, ļōmņak in al ippān ro kwoj katakin juon iaan al ko ak bar juon al kōn niknik ilo apan̄: “Bedbed Eo E Bin” (nō. 5); “The Lord Is My Shepherd” (no. 108); ak “Jen Wōnmanlok Wōt” (nō. 7). Eļan̄n̄e kwoj en̄jake im̧we, kwaļo̧k juon iien n̄e juon season epen ilo mour eo am̧ eaar waļo̧k āinwōt juon kōjeram̧m̧an.