Rongorongon Reirei ni Kakawari, Nobembwa 2013
Nakomai, Raoniira
N aki tabe ma am kanganga, rongorongon maium, ke korakoran am koaua, iai te tabo ibukim n te Ekaretia aei.
N te taina ao iai te mwaane ae mi bwa e mena inanon te mwaneaba ae korakora ike a bane ni bootaki iai kaain aaro ni kabane n te aonaaba. E kunea bwa ni kabane aaro iai irouia te bwai ae tara n tangiraki ao ni kakawaki.
E kaitibo ma te taanga ae tamaroa ae tei ibukin Ana Ekaretia Iesu Kristo Ibukiia Aika Itiaki ni Boong aika Kaitira ao e titiraki, “Tera ae ko kainnanoia ibukiia kaain am aro?”
“Ti aki kainnanoa te bwai teuana,” a kaeka. “Ma te Uea e titiraki bwa ti na katabui ni kabane.”
A reitia nako taanga akekei ni kabwarabwarai mwakuri inanon te Ekaretia, reirei n te mweenga ao reirei ni kakawari, mitinare aika bwanin aia tai, bootaki n utu ni katoa wiiki, mwakuri n te temborta, ibuobuoki ao mwakuri n ibuobuoki nakoia aomata, ao mwioko n reirei.
“Ko kaboia ami aomata ibukin mwakuri ni kabane ake a karaoi?” e titiraki te mwaane.
“O, tiaki,” a kabwarabwara te taanga aei. “Anga aia tai n aki kaboaki.”
“Naba,” a reitianako te taanga aei, “ni katoa onoua namwakaina ao ni kabane membwa n te Ekaretia a kabanea aia bong ni motirawa ni kaei ke ni matakuakin maungatabu ni kabuta aika 10 aoaia.”
“Tebwina te aoa ae a taetae iai aomata?” e mimi te mwaane.
“Ao ami taromauri ni katoa wiiki? Manra taia?”
“Teniua te aoa, ni katoa Tabati!”
“O, au,” e taku te mwaane. “A karaoa raoi te bwai ae kam tuangiia kaain ami Ekaretia bwa a na karaoia?”
“Anne ao a mwaiti riki. Ti tuai taekina rongorongon te utu, aia kaembwa kairake, waaki n taromauri, reirei man booki aika tabu, kataneiai irouia taan kairiiri, waaki ni kakukurei irouia kairake, tieminari n te karangaina, tararuakin ana kateitei te Ekaretia, ao ni koauana bon iai ana tua te Uea ibukin te marurung, te aki mamatam ni katoa namwakaina ni buokiia kainnano, ao te kabwianibwai.”
E taku te mwaane, “Ngkai I a raraoma. Ibukin tera ngkai aomata a tangiria ni kaina te Ekaretia?”
A ngare te tanga ao a taku, “Ti taku bwa ko na aki kona n titiraki.”
Ibukin tera Aomata Ana Kaaina te Ekaretia?
N te tai are a namakina te kerikaki ni mwaitia aia aomata kaain aaro ake tabeua ni kabuta te aonaaba, Ana Ekaretia Iesu Kristo ibukiia Aika Itiaki ni Boong Aika Kaitira—e ngae ngke e uarereke ni kabotauaki ma aika mwaiti riki tabeua—bon teuana mai ibuakon ekaretia ae rangin ni birimwaaka rikirakena n te aonaaba. N tokin Tebetembwa 2013 ao mwaitia kaain te Ekaretia ni kabuta te aonaaba e raka iaon 15 te mirion.
A mwaiti bukin bwaai aikai, ma I kona n taekin tabeua?
Ana Ekaretia te Tia Kamaiu
Te Moan, e kaokaki te Ekaretia aei n ara bong iroun Iesu Kristo. Ikai ao ko na kona ni kunea te kariaiakaki ni mwakuri n Arana—ni bwabetito bwa bwaini kabaraan aia bure, n anga ana bwaintituaraoi te Tamnei ae Raoiroi, ao ni kabaeaki iaon te aba ao i karawa.1
Naake a kaina te Ekaretia aei a tangira aia Tia Kamaiu Iesu Kristo ao a tangiria ni kan Iriria. A kimwareirei n te atatai are e manga taetae te Atua nakoia aomata. Ngke a karekei otenanti n te nakoanibonga aika tabu ao ni karaoi berita aika tabu ma te Atua, a namakina Mwaakana inanon maiuia.2 Ngke a rin n te tembora ae tabu, a namakinna ae a mena Imatana. Ngke a wareki booki aika tabu3 ao ni maiuakin aia reirei Ana burabeti, a uaakan riki ma te Tia Kamaiu ae a rangin n tangiria.
Te Onimaki ae Mwakuri
Bukina teuana bwa ibukina bwa e katauraoi te Ekaretia taai ibukin karaoan te raoiroi.
Onimakinan te Atua bon te bwai ae tamaroa, ma angiia aomata a tangiria ni karaoa ae bati riki nakon te kakauongo nakon taekan reirei aika kairaki mai ieta ke n ti iangoia bwa e na kanga ni karekea te kukurei ae kororaoi ni motirawa i karawa.4 A tangiria ni kani kamwakuria aia onimaki. A tangiria ni wakina te mwakuri ao ni moana karaoakin te mwakuri ae kakawaki aei.
Ao anne te bwai ae riki ngkana a raoniira—a mwaiti aia konabwai ni kamwakuri aia tarena, aia nanoanga, ao aia tai ni karaoi mwakuri aika raraoi. Bukina bwa akea ara kiraaka ae kaboaki n ara bootaki n taromauri ni kabuta te aonaaba, kaain ara aro a karaoi mwakuri i bon irouia. A weteaki mai ieta. N tabetai ti anganano, n tabetai tabeman a bubutira bwa ae ti na karaoi, aika ti anganaki.” Ti tarai katabeakira bwa tiaki te rawawata ma ti taraia bwa te tai ae ti na kona iai ni kakoroi nanon berita aika tabu aika ti kukurei ni karaoi ni beku ibukin te Atua ma Natina.
Kakabwaia aika Kakawaki
Bukina te katenua bwa ibukin tera aomata a kaina te Ekaretia bukina bwa a maiuakina maiun ana reirei Kristo.
Ti tara te bwabetito bwa moan kawaira n riki bwa ana reirei Iesu ao te kimwareirei ae korakora ao te kamiu ae akea tokina n te aonaaba ae imwaira.
Naake a ira te kawai aei ma te kakaonimaki a totokoi angiin taian kanganga, ao nanokawaki, ao karautaeka n te maiu.
Aika a nanorinano ao n te nano ae tamaroa ana kunea te kaubwai ae korakora n te atatai ikai.
Akana a korakai ke n nanokawaki a na kunea kamaiuakiia ikai.
Naake a karawawataaki ma te bure a na kunea te kabwarabure, te tokanikai, ao te motirawa.
Nakoia Naake A Nako
Ukoukoran te koaua e a tia ni kairiia mirion aomata nakon Ana Ekaretia Iesu Kristo ibukiia Aika Itiaki ni Boong Aika Kaitira. Eng, bon iai tabeman aika a kitana te Ekaretia aika a rangin n tangiria.
Temanna e kona n titiraki, “Ngkana e rangin n tikiraoi te euangkerio, ibukin tera ae na nako temanna?”
N tabetai ti iangoia bwa ibukina bwa a tia n aki butimwaeaki raoi ke n taningaroti ke ni karaoa te bure. Ni koauana, bon tiaki raoi bukina anne. Ni koauana, akea raoi bukina teuana ae kaineti ma aeka ni kanganga aika kakaokoro.
Tabeman mai ibuakoia ara membwa aika tangiraki a kekeiaki inanon ririki aika mwaiti ma te titiraki bwa ana kararoaia ma te Ekaretia.
N te Ekaretia aei are e karinea inaomatan te aomata ni korakora, are e kaokaki iroun te ataeinimwaane ae titiraki titiraki ao ni ukoukori kaekaia, ti karineia naake a ukoukora raoi te koaua ma nanoia ni koaua. E kona ni kananokawakira ngkana e kairia nako kawaia man te Ekaretia ae ti tangiria ao te koaua ae ti a tia ni kunea, ma ti karinea inaomataia n taromauria te Atua ae Mwaaka nakon te koaua ae a taku bwa e eti, n aron ae ti a tia ni karekea bon iroura.5
Titiraki aika Tuai ni Kaekaaki
Tabeman a korakai ma titiraki aika tuai ni kaekaki ke n taekinaki n te tai ae nako. Ti ataia raoi bwa ni kania 200 te ririki n nako n rongorongon te Ekaretia―n raonaki ma taai aika kaunganano man karineaki ao n tabu―iai bwaai aika a taekinaki ao ni karaoaki ake a kona ni karaoia aomata bwa a na titiraki.
N tabetai a kaoti titiraki ibukina bwa akea bwaninin te rongorongo iroura ao ti riai n nanorinano teutana. Ngkana e ataaki raoi bwaninin te koaua, bwaai ake a aki boo ma aongiia nakoira imwaain ae a na rinanoaki nakon ara kariaia.
N tabetai iai te kaokoro n te iango n aron ae tera te “koaua” ae nanonaki iai. Te titiraki are e karika te nanououa irouia tabeman e kona, imwiin te kakae ma te karaurau, e katea te onimaki inanoia tabeman.
Aia Kairua Aomata aika aki Kororaoi
Ao, n reitaki n ae koaua, iai taai ngke kaain te aro ke taani kairiri n te Ekaretia a tia ni karaoi kairua. E na bae ni iai baika a taekinaki ke ni karaoaki ake aki boraoi ma ara kainibaire, reirei ke ara tua.
I kantaningaia bwa te Ekaretia e na kororaoi tii ngkana e kairaki irouia aomata aika kororaoi. E kororaoi te Atua, ao a itiaki Ana reirei. Ma e mwakuri rinanora―natina aika aki kororaoi―ao aomata aika aki kororaoi a karaoi kairua.
Moan iteranibaan ana Boki Moomon ti warekia, “Ao ngkai, ngkana arona bwa iai kaairua ao bon aia kaairua aomata; mangaia ae kam na aki kabuakakai ana bwai te Atua, bwa e aonga n akea barekami ae e na kuneaki i matan ana kaintekateka ni motikitaeka Kristo.”6
Aio te kawai ae ririki n taainako ao e na bon iai nikarokoa te bong ae kororaoi ngke e na tautaeka Kristo n ti Ngaia iaon te aba.
N akea te tekeraoi tabeman a tionako ibukin kaairua ake a karaoaki irouia aomata. Ma n aki ongea aei, koauan ana euangkerio Iesu Kristo ae a tia ni kaokaki e kuneaki n Ana Ekaretia Iesu Kristo ibukia Aika Itiaki ni Boong aika Kaitira e aki bareka, keerikaki, ke n uruaki.
N aron ae ana Abotoro te Uea ae Iesu Kristo ao n aron ae temanna are e a tia n nooria imatana ana kauntira ao ana mwakuri te Ekaretia aei. I kaota au koaua bwa akea te babaire ae kakawaki n roota te Ekaretia ke kaain te aro ake a riki bwa kaaina n aki ukoukora ana kairi te tamnei, te kaetieti, ao ana kariaia Tamara ae akea tokina. Aio ana Ekaretia Iesu Kristo. Te Atua e na bon aki kariaia Ana Ekaretia bwa e na tibanako mani kawaina ke n aki kakoroabukin tokin kawaina ae tabu.
Iai te Tabo Ibukim
Nakoia naake a kararoaia man te Ekaretia, I kangai, raoraou aika tangiraki, iai te tabo ibukim ikai.
Nakomai reita am tarena, bwaintituaraoi, ao korakoram nakoira. Ti na bane n nakoraoi n tokin te tai.
Tabeman a na titiraki, “Ma e kanga taekan au nanououa?”
E bon riai karekean te titiraki—atin te titiraki ae koaua e bwebweraki nakon te aroka ae bubura ibukin te atatai. Iai tabeman kaain te Ekaretia ake, n tetaina ke n tabetai, a tuai ni korakai ma titiraki aika kakaiaki mani kai rorota te nano. Oin teuana ana kantaninga te Ekaretia bon nabeakinan ao ribanakin koraan te onimaki―e ngae inanon korakoran te nanououa ma te aki koaua. Te onimaki bon kantaningan bwaai aika aki nooraki ma a koaua.7
Ma ngaia are, tariu ma mwaneu aika tangiraki—raoraou aika tangiraki—taiaoka, tai kakoaua ae ko nanououa imwaain ae ko nanououa n am onimaki.8 Ti riai n aki kariaia te nanououa bwa e na kabaeira bwa buure ao ni kararoaira man te tangira ae tabu, te rau, ao bwaintituaraoi are e roko rinanon onimakinan te Uea Iesu Kristo.
Tabeman a na kangai, “I aki tau ni mena irarikimi n ami Ekaretiah.”
Ngkana kam kona n noori nanora, kam na bon kunea bwa kam tau nakon are kam kantaningaia. Kam na mimi ni kunea bwa iai nanora ao korakaira, ao ara kantaninga ae ti te aekakina ma ngkami. Aromi ma kaikawakimirake e taraa ni kaokoro ma are ko nooria irouia angiina Aomata aika Itiaki, ma anne e kona n riki bwa te kakabwaia. Tariu ma mwaaneu, raoraou aika tangiraki, ti kainnanoi ami tarena ma ami taratara aika onoti. Kakaokoron te aomata ma aomata ni kabuta te aonaaba boni korakoran te Ekaretia aei.
Tabeman a na kangai, “I taku bwa I aki kona ni maiuakin ami kainibaire.”
A mwaiti riki bukina aika a na kaoti! Te Ekaretia e baireia bwa e na nabaeakinia aika aki kororaoi, ake a korakai, ao ake a kua. E onrake irouia aomata ake iangoia ma nanoia bwa a na kawakin tuua e ngae ngke a bon konabwai ni kawakin raoi tuua.
Tabeman a na titiraki, “I ata kaain ami Ekaretia ae baka ni kan raoiroi. I aki kona ni kaaina te aro ae iai temanna kaaina ae aron anne.”
Ngkana ko raira nanon baka n raoiroi n aron temanna ae aki kona ni maiuakina ae raoiroi n te bwai ae taekinna teuanne ke neienne, ngkanne boni ngaira aomata ni kabane aika ti baka ni kan raoiroi. Bon akea mairoura ae ai aron Kristo n aron ae ti ataia bwa ti bon riai. Ma iai nanora ae korakora n tokanikai iaon ara kaairua ao te kawai nakon te bure. Ma nanora ao tamneira ti kan katamaroaira riki ma te ibuobuoki n ana Mwakuri ni Kamaiu Iesu Kristo.
Ngkana aikai am kantaninga, ngkanne n aki tabe ma am kanganga, ke korakoran am koaua, iai te tabo ibukim n te Ekaretia aei. Nakomai, raoniira!
Nakomai, Raoniira!
N aki ongei kaairua n aomata, I kakoaua bwa ko na kunea ibuakoia kaain te Ekaretia aei tamnei aika kabane n tamaroa are e anga te aonaaba. Ana Ekaretia Iesu Kristo e taraa ni katiki nanoia aika a akoi man nanoanga, akea a koaua man maiuraoi.
Ngkana ko kantaningaia bwa ko na kuneia aomata aika a kororaoi ikai, ko na bon rawawata. Ma ngkana ko ukoukora ana reirei Kristo aika itiaki, ana taeka te Atua “are e kamaiu tamnei aika ikoaki,”9 ma ana ana anainano te Tamnei ae Raoiroi, ngkanne ko na kuneia ikai. N ririkin te onimaki ae tabe ni memeere—n te ririki aei ngke angiia a namakina kararoaia man ana tangira te Atua—ko na kuneia aomata ikai ake iai nanoia ni kan ataa ao ni kaania riki aia Tia Kamaiu man aia beku ibukin te Atua ma aomata, n ai arom. Nakomai, raoniira!
Ao Ngkami Kam Kan nako Naba?
I kauringaki te tai are e maiu iai te Tia Kamaiu ngke a mwaiti ake a bwainikirinna.10 Iesu e titirakinia ana reirei ake tengaun ma uoman:
“Ao ngkami kam kan nako naba?
“Ao e kaeka Timoni Betero, Te Uea, ti na nako n antai? E mena I Roum taekan te maiu are aki toki.”11
Iai taai are ti na kaeka te titiraki ae ti te arona. Ngkami kam kan nako naba? Ke ti kan, riki n ai aron Betero, n taua ni kamatoa taekan te maiu are akea tokina?
Ngkana ko ukoukora te koaua, nanona, ao te kawai are e bita te onimaki nakon te mwakuri; ngkana ko ukoukora te tabo ni bwaibwai: Nakomai, raoniira!
Ngkana ko a tia ni kitana te onimaki are ko a tia ni karekea ke ni butimwaia: Oki rikaaki riki. Raoniira!
Ngkana ko kaririaki bwa ko a taenikai: Teei riki ni kamaniko teutana. Iai te tabo ibukim ikai.
I bubuti nakoimi ake a ongo ke ni wareki taeka aikai: Nakomai, raoniira. Nakomai ongo nakon ana kakao Kristo ae maraara. Uota am kaibangaki ao Iriiria.12
Nakomai, raoniira! Bwa ikai ko na kunea te bwai ae raka iaon kakawakina.
I kakoaua bwa ikai ko na kunea taekan te maiu ae akea tokina, te berita ni kakabwaia ni kamaiuaki, ao te kawai nakon te rau ao te kukurei.
I kakorakoraai n tataro bwa oin am kakae ibukin te koaua e na kaotaaki nakon nanom te nano ni kan raoniira. N aran Iesu Kristo ae tabu, amen.
© 2013 iroun Intellectual Reserve, Inc. A bane n tauaki mwiin taian kariaia ibukin katotongana. Boretiaki i USA. Kariaiakaki n te Ingiriti: 14/10/13. Kariaiakaki rairana: 14/10/13. Rairan te Visiting Teaching Message, November 2013. Kiribati. 10671 859