Pweng ke Forfor Luti, Nohfuhmpuh 2013
Fahsruh, Wi Kuht
Finne ke ohiyac sikyak lowos an, ma mahtuh ke moul lowos an sifacna, kuh kuhiyacn fahkwack luhlahlfongi lowos an, oasr na acn suwos ke Alu se inge.
Sie pacl ah oasr sie mukul suc mwemekihn muh el oasr lun infuckihl luhlahp se ma alu nuh kwewa fin facluh tuhkweni we. El akihlen muh ke kais sie alu uh oasr ma yohk kac ma luhman mwelyuck ac sekoeyuck.
El ohsun nuh sin sie siacnyacn suc ahol Alu luhn Jisus Kraist luhn Mwet Luhlahlfongi ke Lwen-sahflah ac el siyuck, “Meac kowos sapkihn sin mempucr lowos an?”
“Kuht tiacna sapkihn kuhtwena ma,” elos topuk. “Tuh Leum El siyuck kuht in ahkmuhtahlye ma nuh kwewa.”
Siacnyacn sac tahfwelah in ahkuhtweyac kunohkohn luhn Alu uh, forfor luti ac luti in sucu, misin ke pacl nuh kwewa, ekuh in toeni luhn sucu ke kais sie wik, orekma ke tempuhl, kuhlwacnsap ke mwet enenuh, ac kunohkohn in luti.
“Kuh kowos moli mwet lowos an ke orekma nuh kwewa elos oruh uh?” mukul sac siyuck.
“We, moh,” siacnyacn sac ahkuhtweyac. “Elos sang pacl lalos ke tiac moul.”
“Oacyacpac,” siacnyacn sac tahfwelah, “mahlwem onkohsr nuh kwewa mempucr ke Alu lasr uh sislah pacl lalos ke sie kapihn wik in wi kuh liye toeni luhlahp uh ke oa 10.”
“Ao singucul mwet uh sramsram?” mukul sac motkwaclah.
“Kuh fuhkah toeni ke kais sie wik luhn alu lowos an?” Lusac kac?”
“Ao tolu, Sacnri nuh kwewa!”
“Kuh sel kuhtuh,” mukul sac fahk. “Kuh mempucr ke alu lowos an oruh na pwacye ma kom fahk an?”
“Ma ingacn ac kuhtuh pac. Kuht soenna sruhmuhn ke sramsram mahtuh ke sucu, tuhkweni luhn mwet fuhsr, sramsram ke alu, lutlut ke ma suhmuhslah, ahkpah luhn mwet kol, ma pwacr luhn mwet fuhsr, kuhlahs luhn mwet fuhsr ke lututwacng, karihngihnyacn lohm Alu, ac ahok oasr masap luhn Leum ke karihngihn mahno, lalo ke mahlwem nuh kwewa in kahsruh mwet suhkahsruhp, ac sie tahfuh singucul.”
Mukul sac fahk, “Ingena nga fohsack. Kuh mwet uh kuh kuh in wi kain alu se?”
Siacnyacn sac isracsr srihsrihk ac fahk, “Kuht pahngon kom ac tiac siyuck.”
Kuh Mwet uh Kuh Kuh in Wi Kain Alu Se?
Ke pacl se inge ma alu puhkantwen fin facluh nohfohn puhlakihn suhpucsweni luhn mwet kac, Alu luhn Jisus Kraist luhn Mwet Luhlahlfongi ke Lwen-sahflah—finne srihklac liki alu sahyac—pa sie sin alu fin facluh ma pihsrpihsr in puhsacni emet uh. Ke Septempuh 2013 mempucr ke Alu uh puhs liki miliacn 15 fin facluh nohfohn.
Oasr srihpac puhkantwen ke ma inge, tuh nga kuh in fahk kuhtuh na?
Alu luhn Mwet Lahngo
Ma se met, Alu se inge fohlohkihnyuckyak ke lwen lasr uh sel Jisus Kraist Sifacna. Inge kom fah konwacack wal in orekma ke Innel—pacptais ke ellah luhn ma koluk, sang mwe sang luhn Nguhn Muhtahl, ac in sili fin facluh ac inkuhsrao.1
Elos suc wi Alu se inge luhngse Mwet Lahngo Jisus Kraist ac elos kena fahsr Tohkohl. Elos engankihn etwacack se ma God El sifilpac sramsram nuh sin mwet uh. Ke elos eis akwuck muhtahl luhn pristut ac orwaclah olwelah yurin God, elos kuh in puhla kuh Lal ke moul lalos an.2 Ke elos utyak nuh in tempuhl muhtahl, elos akihlen muh elos oasr ye Muhtahl. Ke elos riti ma suhmuhslah muhtahl uh3 ac moulkihn mwe luti luhn mwet pahluh Lal, elos fototoyang nuh sin Mwet Lahngo suc elos luhngse yohk.
Sie Luhlahlfongi Fokoko
Sie pac srihpac uh pa ke srihpen Alu uh sang pacl wowo in oruh ma wo.
Luhlahlfongi ke God kaksyakihnyuck, tuhsruhktuh inkaiyacn mwet uh ke oruh yohk likina lohacng nuh ke sramsram mokleyuck kuh mwemekihn tohkohsrahi lalos lucng.4 Elos ahkpahye luhlahlfongi lalos. Elos ke luhmuhnwack poun wes lalos uh ac kihluckyang in wi ke orekma na luhlahp se inge.
Ac pa ingacn ma sikyak ke elos wi kuht uh—oasr pacl wowo pucspucs lalos in ahkpahyelah talan lalos, kuhlwacng lalos, ac pacl lalos nuh ke orekma wowo. Ke srihpen wacngihn mwet orekma ke alu lasr uh moliyuck ke alu lasr fin facluh nohfohn, mempucr lasr uh sifacnna oruh orekma luhn kuhlwacnsap. Elos pahngonyuck ke pihrihkyuck luhn Nguhn. Kuhtuh pacl uh kuht sifacna eiskuhtyang; kuhtuh pacl uh kuht pa “pahngonyuck”. Kuht liye ma kunacsr uh tiac oacna ma toasr uh tuh oacna pacl wowo in ahkfalye olwelah kuht engan in orwaclah in kuhlwacnsapuh God ac tuhlihk Nahtuhl.
Mwe Insewowo Sacohklacna
Srihpac se ahktolu ma oruh mwet uh welah Alu uh pa ke srihpen fahsrkihn inkacnek ke ohiyacn mwet tuhma lutlut kol nuh ke mwe insewowo sacohk.
Kuht liye pacptais in oacna muhtwacwacackiyacn fuhfahsryucsr lasr ke ohiyacn mwet tuhma lutlut. Fahsr ke lwen nuh kwewa lasr yurin Jisus Kraist kol nuh ke mihslac ac srihpac ke moul se inge ac engan yohklacna ac molwelah ma pahtpaht ke facl se fahsruh uh.
Elos suc ukwe inkacnek se inge ke luhlahlfongi kahingkihn ma puhkantwen ke ma sensen, mwe ahsor, ac mwe auli luhn moul uh.
Elos suc suhkahsruhp ke nguhn ac suc pwacye ke insiyac konwacack mwe kahsruhp yohk ke etwacack inge.
Elos suc kweok kuh ahsor konwacack onweyac inge.
Elos suc toasrkihn ma koluk konwacack nuhnak muhnahs, sukohsohk, ac monglac.
Nuh Selos Suc Fahsr Liki
Suk ke ma pwacye uh kol mwet miliacn nuh ke Alu luhn Jisus Kraist luhn Mwet Luhlahlfongi ke Lwen-sahflah. Tuhsruhktuh, oasr kuhtuh mwet suc fahsr liki Alu se ma elos tuh luhngse ah.
Mwet se kuh in siyuck lah, “Fin wosasuc uh arulacna wo na pwacye, efuh mwet uh fahsr liki?”
Kuhtuh pacl uh kuht nuhnkuh ma sikyak ke srihpen elos ngalyak kuh alsracngwesr kuh orekma koluk. Pwacyelah, tiacna ma fihsrwacsr se. Ma na pwacye, tiacna srihpac sefanna pa fal nuh ke kain in ma sikyak puhkantwen uh.
Kuhtuh sin mempucr sacohk lasr uh upac nuh se ke yac puhs ke kihsen siyuck se fin elos enenuh in srwacloslac sifacna liki Alu uh.
Ke Alu se inge suc ahkfuhlwactye yohk ke sukohsohk in sifacna sulaclah ma tuh fohlohkihnyuckyak sin mukul fuhsr se suc siyuck kihsen siyuck ac suc suk ke top, kuht ahkfuhlwactye elos suc pwacyena in suk ke ma pwacye. Ac kuh in ahkmuhnahsyelah insiyacsr ke fuhfahsryucsr lalos usacloslac liki Alu se kuht luhngse ac ma pwacye ma kuht konwacack, tuh kuht ahkfuhlwactye sukohsohk lalos in kaksakihn God Fuhlwactlacna fal nuh ke ma elos nuhnkuh muh pwacye, oacna ke kuht pahngohn sukohsohk wo se ingacn in ma lasr pac.5
Kihsen Siyuck Soenna Toplac
Kuhtuh upackihn kihsen siyuck soenna toplac ke ma suc oreklac tari kuh fwacklac ke pacl somlah ah. Kuht akihlen wo lah apkuhran in sun yac 200 ke sramsram mahtuh luhn Alu uh—wi na tahk tiacna tui ke ma sikyak mokleyuck, ahkfuhlwactyeyuck, ac ahkmuhtahlyeyuck—oasr kuhtuh ma fwacklac ac oreklac ma kuh in oruh mwet uh in kihsen siyuck.
Kuhtuh pacl uh kihsen siyuck uh tohuyak ke srihpen wacngihnna pwacye etweyac sesr ac kuht enenuh na in muhtweng kuhtuh srihk. Ke ma pwacye uh nohfohn etweyucklac uh, ma ma tiacna ahkkahlwemyeyuck nuh sesr met ah fah ahksuwohsyeyuck nuh ke luhngse lasr.
Kuhtuh pacl uh oasr ma siena ke nuhnak ke ma kalmeyac pwacye luhn “ma na pwacye” uh. Kihsen siyuck ma orwaclah suhmuhngnguh ke kuhtuh ma uh kuh in, tukun liyeyuck wo uh, muhsahi luhlahlfongi ke mwet sahyac uh.
Tahfonglac luhn Mwet Sesuwohs
Ac, in fahk in arulacna suwohs, oasr pacl ke mempucr kuh mwet kol ke Alu uh pwacyena tahfonglac. Ac tuh sahp oasr ma fwacklac kuh oreklac ma tiacna fal nuh ke luhlahlfongi lasr, ip yohk srihpac lasr, kuh mwe luti lasr.
Nga nuhnkuh muh Alu uh ac suwohswohsna fin ac ahkfahsryeyuck sin mwet suwohswohs. God El suwohswohs, ac mwe luti Lal nwacsnwacs na pwacye. Tuh El orekma kacsr—tuhlihk sesuwohs Nahtuhl—ac mwet sesuwohs orwaclah tahfonglac uh.
Ke sra puk se ke sifacn Puk luhn Mormon kuht riti lah fin oasr ma tahfonglac kac pa ma tahfonglac luhn mwet uh oruh kuht enenuh in tiac ahkkolukye ma luhn God, tuh kuht in kuh in sukokyak nwacsnwacs ke siyah in nuhnuhnkuh luhn Kraist.6
Pa inge ohiyacn ma sikyak ah ac ohiyacn ma ac fah sikyak nwe ke lwen suwohswohs sac ke Kraist Sifacna fah kol facluh.
Koluk ohiyac lah kuhtuh tikuclkucl ke srihpen tahfonglac luhn mwet. Tuh finne ohinge, ma pwacye ma pahtpaht ke wosasuc fohlohkihnyuckyak sukokyak ke Alu luhn Jisus Kraist luhn Mwet Luhlahlfongi ke Lwen-sahflah tiacna ahkfohkfohkyeyucklac, ahksrihkyeyucklac, kuh kuhnausyucklac.
In oa sie Mwet Sap luhn Leum Jisus Kraist ac sie suc sifacna liye toeni ac orekma ke Alu se inge, nga lohoh ke puhsisacl lah wacngihn sulaclah ke ma yohk srihpac oruh Alu se inge kuh mempucr kac uh tuh tiacna suleyucklac sahyacn suk na pwacye ke mokleyuck, kolyuck, ac luhngseyuck luhn Pahpah Ma Pahtpaht tuhmasr. Pa inge Alu luhn Jisus Kraist. God El fah tiac lwelah Alu Lal in forlah liki inkacnek srihsrsrihsri kuh tiac ahkfahsryelah in ahkfalye orekma muhtahl kac uh.
Oasr Acn Nuh Suwos
Nuh selos suc srwacloslac sifacna liki Alu uh, nga fahk, kawuck sacohk luhk, srwackna oasr acn suwos inge.
Fahsruh ac sang talan lowos, mwe sang lowos, ac kuhiyowos nuh ke ma lasr. Kuht nuh kwewa fah ahkwoyeyuck kac.
Kuhtuh kuh in siyuck, “Tuh ke tahfuhluo luhk uh?”
Wona in oasr kihsen siyuck—fihtac srihsrihk ke kihsen siyuck pwacye uh kwacna fahrngwelihk acyohkwaclihk nuh ke sahk na yohk soko ke kahlwem. Oasr kuhtuh na mempucr ke Alu uh suc, ke sie pacl ah, tiac upackihn kihsen siyuck yohk kuh sacohk nuh selos sifacna. Sie srihpac luhn Alu uh pa in tuhfa ac ahkyohkye fihtac ke luhlahlfongi—finne ke fohk suhfal luhn suhmuhngnguh ac nuhnak suhfal. Luhlahlfongi pa in finsrak ke ma ma tiacna liyeyuck tuh ma pwacye.7
Pwacnwacng, tamuhlwel ac tahmtahel sacohk wiyuck—kawuck sacohk luhk—nuhnak muhnahs, ma se met tahfuh luo ke suhmuhngweyac suwos mwet liki kowos tahfuh luo ke luhlahlfongi lowos.8 Kuht tiacna ke kuhtwena ma lwelah suhmuhngnguh in kaprikuhti in oacna mwet kaclpous ac eiskuhtlac liki luhngse, mihslac, ac mwe sang muhtahl ma tuhkuh ke luhlahlfongi ke Leum Jisus Kraist.
Kuhtuh kuh in siyuck, “Nga suhfal nuh suwos mwet ke Alu uh.”
Kowos fin kuh in liye insiyacsr, kowos kuh in sahp konwacack lah kowos wo likina nuhnkweyac suwos. Kowos kuh in lut in konwacack lah oasr ma kena ac ma upac ac mwe finsrak lasr ma oacna ma lowos an. Moul met lowos kuh kapkapwack lowos an kuh in luhman siena liki ma kowos nuhnkuh ke puhs Mwet Luhlahlfongi ke Lwen Sahflah, tuh ma ingacn kuh in oacna sie mwe insewowo. Tamuhlwel ac tahmtahel, mwet kawuck sacohk, kuht enenuh talan ac nuhnak sesahlah lowos an. Sielacna luhn mwet se kuh mwet uh fin facluh nohfohn pa sie mwe ahkkuh ke Alu se inge.
Kuhtuh kuh in siyuck, “Nga tiac nuhnkuh muh nga kuh in moulkihn akwuck fal lowos an .”
Srihpac yohkna in tuhkuh! Alu uh oreklac in tuhfahlah mwet sesuwohs, tikuclkucl, ac tohtohlah. Alu uh sesseslah ke mwet suc kena ke insiaclos nohfohn in liyacacng masap uh, finne elos soenna wolac na pwacye kac inge.
Kuhtuh kuh in siyuck, “Nga etuh sie mempucr ke Alu lowos an suc ma wosonkahs. Nga tiac kuh in wi sie alu ma oasr kain mwet ma oacna el kac.”
Kom fin ahkuhtweyac mwet wosonkahs in oacna mwet se suc tiac moul suwohswohs nuh ke ma el luhlahlfongi uh, na kuht nuh kwewa mwet wosonkahs. Wacngihn sesr apkuhran in oacna Kraist oacna ke kuht etuh muh kuht enenuh. Tuh kuht kena na pwacye in kuhtanglah tahfonglac lasr ac ohiyac se in orekma koluk. Ke insiyacsr ac nguhnasr kuht suk in wolac liki met ah ke kahsruh luhn Iwaclah luhn Jisus Kraist.
Fin ma inge oacna kena lowos an, na sahyacn ohiyac sikyak lowos an, kuh ohiyac mah ke moul lowos an, kuh kuhiyacn fahkack luhlahlfongi lowos an, oasr na acn lowos ke Alu se inge. Fahsruh, wi kuht!
Fahsruh, Wi Kuht!
Sahyacn na ma sesuwohswohs luhn atacsr ke moul kawihl uh, nga luhlahlfongi na pwacye lah kowos fah konwacack inmahsrlon mempucr ke Alu se inge puhs sin nguhna wo emet ma oasr fin facluh se inge. Alu luhn Jisus Kraist kwacna orwacni mwet kuhlwacng ac inse wowo, mwet pwacye ac mwet tiac alsruhngwacsr ke orekma.
Kom fin nuhnkuh in konwacack mwet suwohswohs inge, kom ac suhpwacrlac. Tuh kom fin suk ke mwe luti suhwohs na pwacye luhn Kraist, kahs luhn God ma onwelah nguhna kineta uh9 ac puhla ahkmuhtahlyeyuck luhn Nguhn Muhtahl, na kom ac fah konwacack inge. Ke pacl inge luhn luhlahlfongi srihkweni—ke pacl inge ma puhs mwet puhla loessuhlah liki luhngse luhn inkuhsrao—inge kom fah konwacack mwet suc kena etuh ac fototoyang nuh sin Mwet Lahngo lalos ke elos kuhlwacnsapuh God ac mwet wiyaclos, ma oacna kowos. Fahsruh, wi kuht!
Yac Kowos Luhngse Pac Som?
Nga ahkacsmakihnyeyuck ke pacl se in moul luhn Mwet Lahngo ke puhs mwet fahsr luhkwel ah.10 Jisus El siyuck sin mwet tuhma lutlut singucul luo Lal ah:
“Yac kowos luhngse pac som?
“Na Simon Peter el topuk, Leum, kuht ac som nuh yurin suc? kahs ma use moul ma pahtpaht oasr yurum.”11
Oasr pacl ma kuht enenuh in topuk kihsen siyuck sepacna. Yac kuht luhngse pac som? Kuh kuht ac fah, oacna Peter, sruokyac in wo kahs ma use moul ma pahtpaht?
Kom fin suk ke ma pwacye, oasr srihpac, ac ke inkacnek se in ekuhllah luhlahlfongi nuh ke orekma; kom fin suk ke acn in luhngseyuck kom: Fahsruh, wi kuht!
Kom fin sislah luhlahlfongi se ma kom tuh wi ac: Sifilpac fohlohkuh. Wi kuht!
Fin srihfeyuck kom in fuhlwelah: Muhta in paht kuhtuh. Oasr acn lowos inge.
Nga ngihsre suwos nuh kwewa suc lohng kuh riti kahs inge: Fahsruh, wi kuht. Fahsruh ukwe pahng luhn Kraist kuhlwacnglacna se. Sruhkwack sahkseng lowos an ac fahsr Tokohl.12
Fahsruh, wi kuht! Tuh inge kowos fah konwacack ma se ma sacohk likina molo se.
Nga fahkwack lah inge kowos fah konwacack kahs ma use moul ma pahtpaht, olwelah se ke molwelah insewowoyeyuck, ac inkacnek nuh ke mihslac ac engan.
Nga pruhe ke oaru tuh sukok ke ma pwacye lowos sifacna an fah moklweack insiyowos kena se in fahsruh ac wi kuht. Ke ine muhtahl luhn Jisus Kraist, amen.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn Visiting Teaching Message, November 2013. Kosraean. 10671 868