Poraus seni ewe Aewin Presetensi, November 2013
“Upwe Nonnom Reom Fansoun Meinisin, Usap Tongeni Nikitukono”
Semach won Nang … a sinei pwe sia kaeo me mamarita me pochokununo nupwen sia weri me nikitu non ekkewe sossot sipwe kuna.
Nepwinei, upwe makkei non ai puken porausen manauei ekkei kapas, “Ei mwich mi murinno seni meinisin ekkewe mwichenapen mwichefen ua fiti me nom. Mettoch meinisin sia rongorong mi fakkun auchea ngeni ngunuch kewe.”
Pwii me fefinei kana, onu maram me nom nupwen sia chufengen non mwichenapen mwichefen, punuwei we, Frances, a nom non pioing, a riaffou mwirin a turutiw. Non May, mwirin fitu wik ren an pwara me achocho ne pworacho ngeni feingawan kewe, a feino ngeni fansoun ese much. Ua fakkun pwositi. Am aua apupunu non ewe Salt Lake Tempel non October 7, 1948. Nesor epwe fen am 65 apwapwan apupunu. Ua tongei i nap seni och mettoch non manauei, ua epinukunuk non i, me chienei fochofoch. Ne apasa pwe ua pwositi ese pwarata wesewesen netipei.
Ei mwich a ranin ai chechemeni 50 ier seni ua kokko ngeni ewe Mwichen Engon me Ruemon Aposel seni Preseten David O. McKay. Seni ekkei ier meinisin punuei we a chok unusen anisiei. A chommong mettoch a asoreno pwe ua tongeni fori wisei. Use fen rongorong kapasen mongunungun seni nupwen ua sai fan ekkoch ran are wik seni ir me noum kewe semirit. I ennetin emon chon nang.
Ua mochen pwarata ai kinisou, pwan seni ai famini, ren watte pwaratan tong minne a feito rem seni fansoun Frances a mano. Fitu puku taropwe ra war seni won unusen fonufan ra pwarata tong ngeni i me kapas kirokiroch ngeni ai famini. A wareto chommong pon ira. Aua kinisou ren chommongun ekkewe asoren moni ngeni an ewe Mwichefen Nenien Isoisen Monien Misineri fan itan. Fanasengesin ekkewe ir aua chuen nom, ua pwarata ennetin kinisou chapur ren ami pwaratan tong seni netipemi.
Ewe mettoch mi akinamwe ngeniei non ei fansoun mufesen mi ai kapasen pwaratan ewe kapas allimen Jises Kraist me ai mirit pwe Frances a chuen manau. Ua sinei pwe am mufesen mi chok ren ekkis fansoun. Aua ririfengen non ewe imwen Kot seni emon a mwutata ne ririno won fonufan me won nang. Ua sinei pwe aupwap chufengen fan eu me aute mufesen sefan. Ei mirit a apochokunaei.
Pwii me fefinei, sia tongeni nuku pwe ese wor emon a fen manau minne ese mefi riaffou me netipechou, me ese wor eu fansoun non uruon aramas meinisin ese weri osukosuk me riaffou.
Nupwen ewe anen manau a rikino, sia sossot ne eisini “Pwata ngang?” Non ekkena fansoun a usun pwe ese wor saram non epekin ewe pwang, ese wor saram a tineta nesoponon pwinin we. Sia mefi pwe sia uren netipechou me osukosuk pokiten ach mochen rese fisita. Sia fiti ewe kechiw non ewe paipel, “Ese wor safei non Gilead?”1 Sia mefi anaemon, me a ta netipach. Meni sipwe nengeni ach feingaw seni foun maasen ekiekingaw. Sia songokai fan iten ach osukosuk rese wesino, nge sia monnuki pwe fan chommong mi namwot ewe feiochun songommang.
Ekkewe weires ra feito rech ra pwarata ennetin testin ach tufichin nikitu. Kich meinisin sipwe pwonueni ei kapas eis: upwe fangeta, are upwe win? Ekkoch ra fangeta nupwen ra nuku pwe rese tongeni pworacho ngeni ar osukosuk. Ne win a anamwota nikitu tori wesen nesoponon manau.
Nupwen sia ekipwichi ekkewe mettoch ra tongeni fis ngenikich meinisin, sia tongeni apasa usun Job, “Aramas ra pwisin aosukosuker.”2 Job a emon “mwan mi murinno” minne a “pin ngeni Kot o tumunu pwe esap fori och mi ngaw.”3 Wenecharan an foffor, fefeita non moni, Job a weri eu test epwe ataieno emon. A pout seni pisekin kewe, chienan kewe rese chieneni, riaffou chapur, osukosuk ren manon chon an famini, emon a pesei ngeni epwe “otteki Kot, iwe epwe mano.”4 Ese tur ren ei sossot me a pwarata seni ngunun we:
“Mi wor emon non nang epwe anisi ei o ppeni ei.”5
“Nge ua sinei pwe ai chon angaseno mi manau.”6
Job a nukuchareno. Sipwe pwan usun chok nupwen sia kuna ach kewe osukosuk?
Nupwen sia mefi pwe sia osukosuk fan choun osan manau, sipwe chechemeni pwe ekkoch ra fiti ei an, ra nikitu, me ra pworacho ngeni.
Iei ewe uruon ewe Mwichefen, non ei sengan fansoun mi unus, a uren chommong porausen ekkewe ir ra riaffou nge ra nukuchar me pwapwa. Ewe popun? Ewe kapas allimen Jises Kraist a nom nukunapan manauer. Iei met epwe anisikich ne nikitu. Sipwe chuen weri osukosuk mi weires, nge sipwe tongeni kunnu ngenir, ne nenengenir, me pworacho ngenir.
Seni ewe nenien riaffou, seni ewe pinnu mi chechen ren chenun kechiw, sia ekieta ngeni nang seni ewe pwonen nang: “Upwe nonnom reom fansoun meinisin, usap tongeni nikitukono.”7 Ei kinamwe mi aucheanap.
Nupwen ua sai ekkis meinisin won fonufan ne apwonueta wisen ai kokko, ua kaeo chommong mettoch—fiti ewe mirit pwe netipechou me riaffou mi nom ekkis meinisin. Use tongeni aukuku meinisin ewe metekin netip me riaffou ua kuna nupwen ua chufengen me ekkewe ir ra weri osukosuk, samau, repwene mu seni punuer, osukosuk ren nour we a rikino, are riaffouni niwinin tipis. Ua tongeni sopweno, pun a chommong osukosuk ra tongeni kuu kich. A weires ne kapas usun eu chok, nge nupwen ua ekieki usun osukosuk, ai ekiek a kunnu ngeni Pwiich Brems, emon sensen Sukunen Raninifel nupwen ua emon at. Emon chon Mwichefen mi nukuchar, netipen a uren tong. Ir me punuan we, Sadie, ra nounou wanumon semirit, chommong neir mi nonno ierin ekkewe ir non ai famini.
Mwirin am me Frances aua apupunu me mokut seni ewe wart, aua kuna Pwiich me Fefinach Brems me chon ar famini non fansoun apupunu me mi ma, pwan non apwapwan ewe wart.
Non 1968, punuen Pwiich Brems, Sadie, a mano. Ruemon me nein nour wanumon ra pwan mano non ekkewe ier mwirin.
Fan eu ukukun 13 ier ra no, noun noun Pwiich Brems we mi watte a kokkoriei. A awewe pwe semanapan we a tori 105 ierin. A apasa, “A nonnom non eu nenien tumunu nge a chufengen ren unusen an famini iteitan Raninifel, minne a afanafan ngenir.” A sopweno, “Non ei Raninifel Semenapei we a apasa, ‘Ami mi achengicheng, upwene mano non ei wik. Ouse mochen oupwe kokkori Tommy Monson. Epwe sinei met sipwe fori.’”
Ua chufengen me Pwiich Brems non ena ran. Use kuna ren fansoun nangatam. Use tongeni kapas ngeni pokiten a pung seningan. Use tongeni makkei poraus ngeni, pun ese chuen tongeni kuna. Ua kaeo pwe chon ewe famini ra poraus ren i me ren ar angei autun poun me ra mina tichikin iten ewe emon a churi won pwan efoch poun we. Iei usun och poraus ngeni i. Ua fori usun chok me ren ai angei autun poun we me itichiki “T-O-M-M-Y M-O-N-S-O-N,” ewe it a sinei ei ren. Pwiich Brems a fakkun meseik, a angei pei kewe, me isetta won mokuran. Ua sinei pwe a mochen angei efeiochun pristut. Ewe emon a wawa ngang ngeni ewe imwen tumunu a fitiei non am isetta poum kewe won mokuren Pwiich Brems me awora ewe feioch. Mwirin, a suputiw chen mesan mi mesechun. A angei poum kewe ren kinisou. Ina mo ese rong ewe efeioch aua ngeni, ewe Ngun mi Fel a pochokun, me ua nuku pwe a sinei pwe aua awora ewe feioch mi namwot ren. Ei mwan ese chuen tongeni kuna. Ese chuen tongeni rong. A chok nonnom non eu kukkun rumwen ei imwen tumunu. Nge nupwen a emenimen me a pwan fos ngenikem, mi kuu netipei. “Kinisou chapur,” a apasa, “Semei we won Nang a fakkun och ngeniei.”
Non eu wik, usun chok Pwiich Brems a kapas, a mano. Ese ekieki usun met ese fen angei; nge, iteitan a ennetin kinisou chapur ren chommongun feiochun kewe.
Semach won Nang, minne a ngenikich chommong pwe sipwe pwapwa ren, a sinei pwe sia kaeo me mamarita me pochokununo nupwen sia weri me nikitu non ekkewe sossot sipwe kuna. Sia sinei pwe a wor chommong fansoun nupwen sipwe weri netipechou a ataieno netipach, nupwen sipwe riaffou, me nupwen epwe much ach tufichin sopweno. Iwe nge, ekkena osukosuk ra mut ngenikich ne ekkesiwin, ne kouta sefanni manauach non ewe napanap Semach won Nang a aitikich, me sipwe sokkofesen seni me nom—och seni me nom, weweoch nap seni me nom, tong watte seni me nom, me ach kapasen pwarata repwe pochokun seni me nom.
Ita iei ach popun—ne sopweno me nikitu, ewer, nge pwan unusochuno non pekin ngun nupwen sia feiniu seni fansoun och me fansoun ngaw. Ika esap punun weires ne pworacho ngeni me osukosuk sipwe aweseno, sipwe chok usun kich iei, esap wor chommong fefeita ngeni manau ese much. Ewe chon mak a pwarata ei sokkun ekiek non ekkei kapas:
Ira och ese mecheres ne marita,
Pochokunen asepwan, pochokunen ira.
Tekian nang, taman ewe ira,
Osukosuken menumen, watte pochokunan.
Seni akkar me fou, seni pungutiw ran me snow,
Non ira me mwan, iraoch ra marita.8
Ewe Masta chok a sinei anonnon ach osukosuk, ach metek, me ach riaffou. I chok a awora kinamwe ese much non fansoun sossot. I chok a attapa ngunuch ren An kapas mi akinamwe:
“Oupwe feito rei, ami meinisin mi pekus ren choun osemi o ngang upwe asoso kemi.
“Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno.
“Pun osei we upwe ngeni kemi mi mecheres o upwe ngeni kemi osemi mi pwas.”9
Ina mo ika fansoun mi och are fansoun mi ngaw, A nom rech. A pwon ngenikich pwe esap siwin.
Pwii me fefinei kana, amo ita ach pwon ngeni Semach won Nang ese ekkesiwin seni fansoun me fansoun anongonong won osukosuken manauach. Sisap weri osukosuk pwe sipwe chechemeni I, me sisap atekisonatiw me mwen sia ngeni I ach nuku me epinukunuk.
Amo ita sipwe akkachocho ne arap ngeni Semach won Nang. Ika sipwe fori, mi namwot sipwe iotek ngeni I me ausengeni ngeni I iteitan ran. Iwe mi namwot rech iteitan awa, ina mo awan tinen akkar are pungutiwen ran. Amo sipwe chechemeni an pwon: “Upwe nonnom reom fansoun meinisin, usap tongeni nikitukono.”10
Ren unusen pochokunen nguni, ua kapasen pwarata pwe Kot mi manau me A tongeikich, pwe Noun we Anaemon a manau me mano fanitach, me ewe kapas allimen Jises Kraist mi ewe saram a tin seni osukosuken manauach. Amo epwe ina usun feinfeino chok, ua iotek non iten Jises Kraist, amen.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, November 2013. Chuukese. 10670 901