Fas Presidensi Mesej, Disemba 2013
Famle mo Ol Fren blong Oltaem
Wea ples yu stap, yu gat ol fren we oli stap lukaotem bigfala glad we yu bin faenem taem yu stap laef folem gospel blong Jisas Kraes we i kambak. Ating bae oli no save eksplenem long toktok, be bae oli save luksave taem oli stap luk long laef blong yu. Bae oli wantem tumas blong lanem ples we glad ia i kam long hem, speseli taem oli luk yu fesem ol hadtaem olsem olgeta i stap fesem.
Yu bin filim glad taem yu stap kipim ol komanmen blong God. Hemia hem i frut we oli bin promes blong kasem taem yu laef folem gospel ia (luk long Mosaea 2:41). Yu no stap obei long ol komanmen blong Lod, blong ol naraman oli stap luk yu, be olgeta we oli stap luklukgud yu yu stap glad, Lod i stap mekem rere olgeta blong oli harem gud nius blong gospel we i kambak.
Ol blesing oli bin givim long yu i bin krietem ol wok we yu mas mekem mo ol gudfala janis blong yu. Olsem wan disaepol blong Jisas Kraes we yu mekem kavenan wetem Hem, yu mas givim long ol narawan wan janis blong faenem bigfala hapines, speseli long ol fren blong yu mo ol memba blong famle blong yu.
Lod i bin luk janis we yu gat mo i bin tokbaot wok we yu mas mekem wetem komanmen ia, taem hem i talem se hem i diuti blong evri man we oli bin kasem woning, blong oli wonem ol neiba blong olgeta (Luk long D&C 88:81).
Lod i mekem komanmen ia i kam moa isi blong obei long hem tru long jenis we i tekem ples long hat blong yu taem yu akseptem mo laef folem gospel blong Jisas Kraes. Olsem risal blong jenis ia, lav blong yu long ol narawan i gro, i semmak long disaea blong yu long olgeta blong gat semfala hapines ia we yu bin eksperiensem finis.
Wan eksampol blong jenis ia hem i olsem wanem nao yu akseptem janis ia blong help long misinari wok blong Lod. Ol fultaem misinari oli save lanem kwik se, oli save kasem wan gudfala ansa long wan tru konvet taem oli askem blong oli faenem wan man blong oli tijim. Brata o sista we i konvet ia, i wantem tumas blong ol fren mo ol memba blong famle oli serem hapines blong olgeta tugeta.
Taem branj misin lida blong yu o ol misinari oli askem nem blong wan man o woman long yu blong oli tijim, hem i wan gufala samting tumas long yu. Oli save se ol fren oli luk hapines blong yu mo, hemia nao from wanem, ol fren ia oli bin rere blong harem mo jusum blong akseptem gospel. Mo oli gat tras se bae yu stap olsem fren ia we bae oli nidim, taem oli kam insaed long kingdom.
Yu no nidim blong fraet se bae yu lusum ol fren taem yu invaetem ol misinari blong mitim olgeta. Mi bin gat ol fren we oli sakemaot ol misinari be oli bin talem tangkyu long mi blong plante yia, from oli save se mi bin givim long olgeta wan samting we i impoten tumas long mi. Yu save mekem fren blong oltaem taem yu serem gospel, we oli luk i givim hapines long yu. Neva mestem wan janis blong invaetem wan fren mo speseli wan memba blong famle blong jusum blong folem plan blong hapines.
I nogat wan janis we i moa bigwan blong invitesen ia bitim hemia insaed long ol tempol blong Jos. Long ples ia Lod i givimaot ol odinens blong fasin blong sevem man long ol bubu blong yumi we oli no bin save kasem, taem oli stap laef. Oli stap lukluk i kam daon long yu wetem lav mo hop. Lod i bin promes se bae oli gat janis blong kam insaed long kingdom blong Hem (luk long D&C 137:7–8), mo Hem i helpem yu blong filim lav blong olgeta long hat blong yu.
Plante long yufala oli bin filim glad taem oli mekem ol odinens blong tempol blong ol narawan, i semmak taem yu givim ol nem blong ol pipol blong mitim ol misinari. Yu bin filim glad i bigwan moa long yu, taem yu mekem ol odinens blong ol bubu blong yu. Josef Smit i bin kasem revelesen se, yumi save kasem hapines we i no save finis, sapos nomo yumi mekem gud rod we ol bubu blong yumi oli save kasem blesing ia tru long ol gudfala odinens blong tempol (luk long D&C128:18).
Krismas taem i mekem yumi tingting hevi mo gat strong filing long Sevya mo long hapines we gospel blong Hem i givim long yumi. Yumi soem gud moa tangkyu blong yumi long Hem taem yumi givim hapines ia long ol naraman. Fasin blong talem tangkyu i jenis i kam gladhat taem yumi givimaot ol nem long ol misinari mo taem yumi tekem ol nem blong ol bubu blong yumi i go long tempol. Fasin ia blong talem tangkyu i pruf ia we i save mekem ol fren mo ol famle we oli save stap strong blong olatem.
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13. Oli letem translesen: 6/13. Translesen blong First Presidency Message, December 2013. First Presidency and Visiting Teaching Messages, December 2013. Bislama. 10672 852
Yusum Mesej Ia blong Tij
Presiden Aering i eksplenem se yumi save soemaot tangkyu blong yumi blong Sevya tru long fasin blong serem gospel long ol narafala man. Yu save toktok raon wetem olgeta we yu stap tijim se olsem wanem presen blong gospel i bin blesem laef blong olgeta. Gat tingting ia blong invaetem olgeta blong oli prea mo faenemaot olgeta we oli wantem blong serem presen blong gospel mo olsem wanem bae oli save mekem.