2014
Ti Nadiosan a Mision ni Jesucristo: Pagwadan
January 2014

Mensahe iti Visiting Teaching, Enero 2014

Ti Nadiosan a Mision ni Jesucristo: Pagwadan

Nainkararagan nga adalenyo daytoy a material ken kalikagumanyo nga ammuen no ania ti ibinglay. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangbendision kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.

Pammati • Pamilia • Tulong

No maawatantayo a ni Jesucristo ti pagwadantayo iti amin a banag, manayonantayo ti tarigagaytayo a sumurot Kenkuana. Dagiti nasantuan a kasuratan ket napnuan iti pammaregta para kadatayo tapno surotentayo dagiti tugot ni Cristo. Kadagiti Nephite, kinuna ni Cristo, “Agsipud ta dagiti aramid a naimatanganyon nga inaramidko ti aramidenyonto met” (3 Nephi 27:21). Ken ni Tomas, kinuna ni Jesus, “Siak ti dalan, ti kinapudno, ken ti biag: awan ti umay iti Ama, no di magna kaniak” (Juan 14:6).

Iti agdama palagipandatayo dagiti lidertayo a ti Mangisalakan ti aramidentayo a pagwadantayo. Kinuna ni Linda K. Burton, sapasap a presidente ti Relief Society, “No addaan ti tunggal maysa kadatayo iti doktrina ti Pannubbot a naisurat iti uneg dagiti puspusotayo, kalpasanna mairugitayonton ti agbalin a kita ti tao a kayat ti Apo a pagbalinantayo.”1

Kinuna ni Presidente Thomas S. Monson, “Ti Apo ken Mangisalakantayo, ni Jesucristo, ti Pagwadantayo ken pigsatayo.”2

Ikeddengtayo ti umasideg ken ni Jesucristo, agtungpal kadagiti bilinna, ken ikarigatan a makasublitayo iti Nailangitan nga Amatayo.

Manipud kadagiti Nasantuan a Kasuratan

2 Nephi 31:16; Alma 17:11; 3 Nephi 27:27; Moroni 7:48

Manipud iti Pakasaritaantayo

“Minarkaanna ti dana ken inturongna ti dalan,” insurat ni Eliza R. Snow, maikadua a sapasap a presidente ti Relief Society, maipapan iti panagserbi iti daga [mortal ministry] ni Jesucristo. 3 Pinagserbianna dagiti tao—a saggaysa. Insurona a nasken a panawantayo ti siam-a-pulo-ket-siam tapno isalakantayo ti maysa a nayaw-awan wenno napukaw (kitaen iti Lucas 15:3–7). Inagasan ken sinuruanna dagiti tao, naaddaan pay iti panawen para iti tunggal tao iti umariwekwek a 2,500 a tattao (kitaen iti 3 Nephi 11:13–15; 17:25).

Kadagiti babbai a Santo iti Ud-udina nga Aldaw, kinuna ni President Dieter F. Uchtdorf, Maikadua a Mammagbaga iti Umuna a Panguluen: “Dakayo a nasasayaat a kakabsat a babbai ket mangipapaay iti serbisio iti panangngaasi kadagiti dadduma para iti dakdakkel a gapu ngem iti tarigagayyo para kadagiti bukod a pagimbagan. Iti daytoy matuladyo ti Mangisalakan. … Kanayon a pampanunotenna maipapan ti no kasano a matulonganna dagiti dadduma pay.”4

© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti Visiting Teaching Message, January 2014. Ilokano. 10861 864

Dagiti Nagadawan

  1. Linda K. Burton, “Is Faith in the Atonement of Jesus Christ Written in Our Hearts?” Ensign wenno Liahona, Nob. 2012, 114.

  2. Thomas S. Monson, “Meeting Life’s Challenges,” Ensign, Nob. 1993, 71.

  3. “How Great the Wisdom and the Love,” Hymns, no. 195.

  4. Dieter F. Uchtdorf, “Happiness, Your Heritage,” Ensign wenno Liahona, Nob. 2008, 120.

Ania ti Maaramidko?

  1. Apay ken kasano a pagwadak ni Jesucristo?

  2. Kasano a ti panagserbik kadagiti kakabsat a babbai ket makatulong kaniak a sumurot iti Mangisalakan?

Iprenta