Poraus seni ewe Aewin Presetensi, February 2014
Angang ngeni ewe Samon non Tong
Ewe Samon Jises Kraist a aitikich, “Pun ika emon a mochen senani manauan, iwe epwe pout seni: nge ika emon a pout seni manauan fan itei, iwe epwe manau” (Luke 9:24).
“Ua nuku,” anon Preseten Thomas S. Monson, “pwe ewe Samon a aitikich pwe ika sisap anisi ekkoch, ese wor popunen manauach. Ekkewe ir manau fan iter pwisin repwe apwaseno me epwe usun a pout senir manauer, nge ekkewe ir mi fakkun achocho ne anisi ekkoch repwe marita me pochokun— me repwe kuna manau.”1
Non ekkei tutenap seni an Preseten Monson afanfan, a achema ngeni ekkewe Aramas mi Pin pwe ir Poun ewe Samon kewe me ekkewe feiochun ese much mi witi ekkewe ir mi nukuchar ne anisi ekkoch.
Angang non ewe Tempel
“Ach anisi ekkoch mi nap mi fis nupwen sia fori ekkewe nongonong fan itan ekkewe mi fen mano. Fan chommong sise sinei ekkewe ir sia fori ekkei angang fan iter. Sise era chok och kinisou, are sise pwan sinei pwe repwe etiwa ekkewe angang sia for fan iter. Nge, sia chok angang, me non ei angang sia angei ekkewe feioch ese feito ren ekkewe och sokkun angang: sia wesewesen winiti chon amanau won ewe Chukun Saion. Usun chok nouch Chon Amanau mi fangeno An manau fan itach, pwe kich, sia pwan fori ei nupwen sia fori ekkewe angangen tempel fan itan ekkewe ir rese tongeni pwisin fori ar angang, iwe mi namwot pwe kich won fonufan sipwe fori fan iter.”2
Sia Nom non Poun ewe Samon
“Pwi me fefinei, a wor chommong aramas mi pwennikich mi namwot sipwe wato rer ach aninis, ach pesepes, ach tumunur, ach kirokiroch—ese nifinifin ika ir chon ach kewe famini, chienach kewe, are ekkewe aramas sise sinei ir. Kich wesewesen noun ewe Samon poun kewe won fonufan, me a wor wisach ach sipwe anisi ekkoch me ekieta Noun kewe. A nuku pwe sia tongeni anisi I. …
“Ewe angang sia angei ach koko ngeni mi chok angangen ewe Samon Jises Kraist.”3
Ach Angang fan Nurun ewe Samon
Won ewe Fonu mi Fo, ewe Samon mi fen manausefan a apasa, “Oua sinei ekkewe mettoch oupwe fori me non ai we mwichefen; pokiten oua kuna seni ekkewe angang ua fori, ina oupwe pwan fori usun chok; nge ami oupwe fori usun ai fori, oupwe anapano seniei.” [3 Nephi 27:21].
Sia efeiochu ekkoch nupwen sia angang fan nurun “Jises ewe re Nazareth … ewe a fori an angang mi murinno.” [Foffor 10:38]. Kot epwe efeiochu kich ren pwapwa ren ach angang ngeni Semach won Nang nupwen sia angang ngeni Noun kewe semirit won fonufan.4
Ewe Namotan Angang Ngeni Ekkoch
“Mi auchea ach sipwe kuna namwotan ach sipwe anisi ekkoch. Ren ekkewe ir mi apatapateno are rese mochen fori ar angang, sia kan tongeni iotek ne kutta eu anen ach sipwe tongeni anisir. Sipwe tingor rer ar repwe fori eu wis mi tongeni winiti eu pisekin aninis pwe repwe pochokun sefan. Nge ekkewe souemwen mi tongeni wato ei sokkun aninis meni rese mochen fori iei sokkun. Mi namwot pwe sipwe sinei pwe aramas mi tongeni ekesiwini manauer. Repwe tongeni poutano ar kewe foforingau. Ra tongeni aier seni tipis. Repwe tongeni fich ngeni ne angei ewe pristut. Me repwe angang weires fan itan ewe Samon.”5
Sia Ennetin Fori Unusen Met Sia Tufich Ngeni?
“Mi namwot sipwe anisi chon fonufan. Sia Ennetin Fori Unusen Met Sia Tufich Ngeni? Ami mi chechemeni an Preseten John Taylor kapas: Kot epwe wesewesen appungok ren ekkena ir ion ka tongeni anisi ne amanaua ika pwe ka apwonueta wisom”? [Teachings of Presidents of the Church: John Taylor (2001), 164]. Mi wor pechen aramas sipwe apochokuna, pau sipwe kamoch, ekiek sipwe aueta, netip sipwe amokutu, me ngun sipwe amanaua. Ekkewe feiochun manau ese much mi witikemi. A wor om tufich pwe kesap chok emon chon katon nge ka tongeni emon chon angang won ewe rongen … anisi ekkoch.”6
© 2014 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, February 2014. Chuukese. 10862 901
Afanafan seni Ei Poraus
“Ika a wor om tongen Kraist fan iter, kopwe anapano om tufich ne aitir usun ewe kapas allim. Kopwe angei pwarata ne anisi ekkoch ne sinei ewe Chon Amanau me tapweno mwirin I.”7 Kopwe iotek pwe om tong ennet fan itan ekkewe aramas ka churi epwe napano. Non om awora ewe tongen Kraist fan iter, kopwe anapano om tufich ne angang ngeni ewe Samon me ekkewe ir ka osukuna.