President a Odzi Kan na N’apamfo Amandzɛɛbɔ, Kwakwar 2014
Fa Ɔdɔ som Ewuradze
Ewuradze Jesus Christ kyerɛkyerɛɛ dɛ, Obiara a ɔpɛ dɛ ɔgye no nkwa no ɔbɛyew no: na obiara a ɔbɛyew no nkwa wɔ me ntsi, ɔno na ɔbɛgye no” (Luke 9:24).
President Thomas S. Monson kãa dɛ, “Megye dzi dɛ Agyenkwa no rekã kyerɛ hɛn dɛ gyedɛ yegyaa hɛnho mu som binom, ɔno hɛn ankasa hɛn abrabɔ ho mfaso bɛyɛ kumabaa. Hɔn a wɔtse ma hɔnho nko no, n’ewietu no wɔwodow, na sɛ yɛerekã a, wɔyew hɔn abrabɔ, ber a hɔn a wogyaa hɔnho mu som binom no, nyin na wɔyɛ prɔmprɔm —na no nsunsuando no wɔgye hɔnho.”1
Nsɛm a woetwitwa no esinesin a odzi do yi a ofi President Monson no somdwuma mu no, ɔkaa Nda a Odzi Ekyir Ahotseweefo dɛ hɔn nye Ewuradze Ne nsa no na onnyiewiei ho nhyira rotweɔn hɔn a nokwar muara wɔsom binom no.
Temple mu Ɔsom no
“Sɛ yɛgyina ananamu yɛ ayɛdze ma hɔn a wɔkɔ nkataenyim ekyir no a, yɛsom kɛsenara. No dodowara mu no yennyim hɔn a yɛyɛ edwuma ma hɔn no. Hɛn enyi nnda ndaase kwan, ana yɛwɔ awerɛhyɛmu dɛ wɔbɛgye dza yɛdze ma no a. Naaso, yɛsom, na wɔ dɛm kwan mu no yenya dza ommfi mbɔdzembɔ kwan biara do: yɛbɛyɛ agyefo ampaara wɔ Zion Bepɔw do. Dɛ mbrɛ hɛn Agyenkwa gyinae dze No nkwa bɔɔ afɔr maa hɛn no, hɛn so, wɔ kwan kakraba mu no, yɛyɛ dɛmara ber a yegyina ananmu yɛ edwuma wɔ temple ma hɔn a wonnyi kwan biara dɛ wɔbɔkɔ kan gyedɛ hɛn a yɛwɔ asaase yi do no ayɛ biribi ama hɔn.”2
Yɛyɛ Ewuradze Ne Nsa
Mo nuanom na nkyerɛmbaa, hɔn a wohia hɛn mber, hɛn nkuranhyɛ, hɛn mboa, hɛn awerɛkyekyer, hɛn ayamuyie— etwa hɛn ho ehyia, sɛ wɔyɛ ebusua mu mba, anyɛnkofo, mfɛfo, anaa ahɔho. Yɛyɛ Ewuradze Ne nsa wɔ asaase do ha, a yɛwɔ asodzi dɛ yɛsom na yepegya Ne mba. N’enyi da hɛn mu kor biara do. …
“Ɔsom no a wɔafrɛ hɛn nyina wɔ ho no yɛ Ewuradze Jesus Christ no som.”3
Erosom wɔ Agyenkwa No Nwinwin mu
“Ewuradze soɛree fii owu mu no, ɔpaa mu kãa no wɔ Wiadze Fofor no hɔ dɛ, “Hom nyim ndzɛmba a ɔsɛ dɛ hom yɛ wɔ m’asɔrfi mu; na ndwuma a hom ehu me dɛ meyɛ no ɔnoara na hom so hom nyɛ; na dza hom ehu me dɛ meyɛ no, ɔnoara mpo na hom nyɛ’ [3 Nephi 27:21].
“Sɛ yɛsom wɔ Jesus a ofi Nazareth … a okyinii yɛɛ yie” no nwinwin mu a, yehyira binom.” [Ndwuma 10:38]. Nyame nhyira hɛn ma yenhu dɛwdzi a ɔwɔ yɛrosom hɛn Egya a ɔwɔ Sor mu, ber a yɛsom Ne mba wɔ asaase do.”4
Hia a Ohia dɛ Yɛsom
“Yehia dɛ wɔma hɛn kwan ma yɛsom.” Mpaabɔ mu ara yebotum ahwehwɛ kwan bi dze abɛn asɔrmba a wɔayɛ akɔtrɔbɔdwe anaa wɔapa ada na wɔaka hɔn sibea. Yɛrebisa hɔn ma wɔasom wɔ dzibew bi mu no botum ayɛ nkenyan a wohia dze asan abɔbɔ hyew emudzi mu. Naaso ɔtɔfabi a banodzifo a wobotum aboa wɔ kwan yi no tweɔntweɔn hɔn ananadze. Yehia dɛ yɛdze to hɛn adwen do dɛ nyimpa botum asesã. Wobotum efi hɔn suban bɔn ho. Wobotum enu hɔnho efi mfomdo horow ho. Wobotum ekitsa asɔfodzi no emudzi muara. Na wobotum dze enyimpi asom Ewuradze.”5
Ana Yɛreyɛ Dza Ɔwɔ Dɛ Yɛyɛ Nyina a?
“Wiadze no hia hɛn mboa. Ana yɛreyɛ dza ɔwɔ dɛ yɛyɛ nyina a? Ana yɛkaa President John Taylor ne nsɛm no: “Sɛ hom emmpegya hom ɔfrɛ horow no a, Nyame dze hɔn a nkyɛ sɛ hom yɛɛ hom edwuma a hom botum agye hɔn no ho asodzi bebisa hom? Asɔr no ne Presidentfo hɔn Nkyerɛkyerɛ: John Taylor (2001), 164]. Anan wɔ hɔ a yebosuo mu egyina, nsa a yebosuo mu, adwen a yɛbɛhyɛ no nkuran, akoma a yebekenyan, na akra a yebɛgye hɔn. Onnyiewiei ho nhyira rotweɔn hom. Hom ndzinoa nye dɛ hom nnkɛyɛ bɔhweadzefo na mbom hom dze homho bɛhyɛ mu wɔ bea a …. wɔsom wɔ.6
© 2014 Intellectual Reserve, Inc. Wɔakora do tumdzi nyina USA na wotsintsimii. Ngyirisi kasa ho mpendo: 6/13. Nkyereasee ho mpendo: 6/13. First Presidency Message, February 2014. Fante.10862 502 ne nkyerɛasee
Erekyerɛkyerɛ efi Amandzɛɛbɔ Yi Mu
“Sɛ hom wɔ dɔ tse dɛ Christ a, hom bɛyɛ ahoboa yie dɛ wɔbɛkyerɛkyerɛ asɛmpa no. Hom benya nkenyan dze aboa binom ma woehu Agyenkwa no na woedzi N’ekyir.”7 Susu dɛ ibɔbɔ mpaa dze enya ayamuyie mbordo ama hɔn a eserɛ hɔn no. Ber a inya dɔ tse dɛ Christ dze no ma hɔn no, ibotum enya akwan horow a ɔbɛyɛ mfaso yie dze asom Ewuradze na hɔn a ekyerɛkyerɛ hɔn no.