Mensahe ti Umuna a Panguluen, Pebrero 2014
Agserbi iti Apo nga addaan iti Ayat
Insuro ni Apo Jesucristo, “Asino man a mangisalakan iti biagna mapukawnanto: asino man a mangpukawto iti biagna gapu kaniak, maisalakannanto met daytoy” (Lucas 9:24).
“Mamatiak,” kinuna ni Presidente Thomas S. Monson, “ibagbaga ti Mangisalakan kadatayo a malaksid no pukawentayo ti bagitayo iti panagserbi kadagiti dadduma, adda bassit a panggep iti bukodtayo a biag. Dagiti agbibiag laeng para iti bagida ket maipadada iti mula nga aglaylayto no saan a masibugan ket mataydanto iti kamaudianan, idinto a dagiti mangpukaw iti bagbagida iti panagserbi kadagiti dadduma ket tumanor ken rumang-aydanto—ket kas bungana maisalakanto ti biagda.”1
Kadagiti sumaganad nga adaw manipud iti panagserbi ni Presidente Monson, ipalpalagipna kadagiti Santo iti Ud-udina nga Aldaw nga ay-ayawanan ida ti Apo ken agur-uray dagiti bendision ti kinaagnanayon kadagiti sipupudno nga agserbi kadagiti dadduma.
Panagserbi iti Templo
“Maited ti dakkel a serbisio no agaramidtayo kadagiti pangisaup [vicarious] nga ordinansa para kadagiti pimmusayen. Iti adu a kasasaad ditay am-ammo dagiti tao nga yar-aramidantayo iti ordinansa. Ditay namnamaen ti panagyamanda, wenno ditay namnamaen nga awatendanto dayta nga idiayatayo. Nupay kasta, agserbitayo, ken iti dayta a proseso, magun-odtayo dayta a nagtaud iti saan nga aramid ti sabali: literal nga agbalintayo a mangisalakan iti Bantay Sion. Bayat ti panangted ti Mangisalakan iti biagna kas sakripisio para kadatayo, kasta met nga, iti bassit a pagrukodan, aramidentayo met ti kasta no agaramidtayo iti pangisaup [proxy] nga aramid iti templo para kadagiti awanan iti pamuspusan a makapagtultuloy iti agnanayon a panagdaliasat malaksid no adda maaramid para kadakuada babaen kadatayo ditoy daga.”2
Datayo dagiti Ima ti Apo
“Kakabsatko, naipalawlaw kadatayo dagiti agkasapulan iti panangasikasotayo, panangparegtatayo, suportatayo, liwliwatayo, panangngaasitayo—miembroda man ti pamilia, gagayyem, kapulapol, wenno ganggannaet. Datayo dagiti ima ti Apo ditoy daga, nga addaan iti bilin nga agserbi ken mangitag-ay kadagiti annakna. Isu ket agpannuray iti tunggal maysa kadatayo. …
“Dayta a serbisio a nakaawagan ti amin kadatayo ket ti serbisio ni Apo Jesucristo.”3
Panagserbi iti Salinong ti Mangisalakan
Iti Baro a Lubong, impakdaar ti nagungar nga Apo, ‘Ammoyo dagiti banag a rumbeng nga aramidenyo iti simbaanko; agsipud ta dagiti aramid a naimatanganyon nga inaramidko ti aramidenyonto met; ta no ania dayta nakitayo nga inaramidko kastanto met ti aramidenyo’ [3 Nephi 27:21].
“Mabendisionantayo dagiti dadduma no agserbitayo iti salinong ni ‘Jesus a taga Nazaret … isu a namagpagna a nagar-aramid iti kinaimbag.’ [Dagiti Aramid 10:38]. Bendisionannatayo ti Dios a mangsarak iti rag-o iti panagserbi iti Nailangitan nga Amatayo bayat ti panagserbitayo kadagiti annakna iti daga.”4
Ti Kasapulan nga Agserbi
“Kasapulan a maikkantayo iti gundaway nga agserbi. Para kadagiti miembro a saanen nga aktibo wenno nagsardengen a makimisa ken awan panagkumitda, mabalin a nainkararagan a mangsapultayo iti sumagmamano a wagas a tumulong kadakuada. Ti panagkiddaw kadakuada nga agserbi iti sumagmamano a kapasidad ket mabalin a pammaregta a kasapulanda tapno makasublida iti naan-anay a panagaktibo. Ngem dagiti lider a makatulong iti daytoy a pakaseknan ket agkedkedda no dadduma a mangaramid iti kasta. Nasken a laglagipentayo a makapagbalbaliw dagiti tao. Maikkatda dagiti dakes nga ugalida. Makapagbabawida kadagiti basbasolda. Mabalin a maikarida a mangikut iti priesthood. Ken makapagserbida a sipapasnek iti Apo.”5
Ar-aramidentayo Kadi ti Amin a Nasken nga Aramidentayo?
“Kasapulan ti lubong ti tulongtayo. Ar-aramidentayo kadi ti amin a nasken nga aramidentayo? Laglagipentayo kadi dagiti balikas ni Presidente John Taylor (1808–87): ‘No saanmo nga aramiden a nasayaat dagiti takem a nakaawagam, pagsungbatennakanto ti Dios kadagiti mabalin koma nga insalakanmo no inaramidmo ti pagrebbengam’? [Teachings of Presidents of the Church: John Taylor (2001), 164]. Adda dagiti saka a papigsaen, dagiti ima a tenglen, dagiti panunot nga allukoyen, dagiti puso a paregtaen, dagiti kararua nga isalakan. Agur-uray dagiti bendision ti kinaagnanayon kadakayo. Karbengam ti agbalin a saan nga agbuybuya ngem makiramraman iti entablado ti … serbisio.”6
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannaakaipatarus ti First Presidency Message, February 2014. Ilokano. 10862 864
Panangisuro manipud iti Daytoy a Mensahe
“No addaanka iti ayat a kas ken ni Cristo, maisaganakanto a nasaysayaat a mangisuro iti ebanghelio. Maparegtakanto a mangtulong kadagiti dadduma a mangam-ammo iti Mangisalakan ken sumurot Kenkuana.”7 Agkararagkayo para iti dakdakdakel pay a panangngaasi para kadagiti sarungkaranyo. Bayat panangpadur-asmo iti ayat a kas ken ni Cristo para kadakuada, kabaelamto a nasaysayaat ti agserbi iti napapateg a wagas iti Apo ken kadagiti sursuruam.