Rongorongo man te Moan Beretitentii, Maati 2014
Mwakuri n Ibuobuoki ao te Maiu ae Akea Tokina
Te Tia Kamaiu bon ara katoto n te mwakuri n ibuobuoki ae akoi. E babane maiuna ae kororaoi ni beku ibukin te Tama are i Karawa ao Natina ni kabane. Katiteuanaakin oin aia kantaninga te Tama ma te Nati bwa a na anganira ni kabane te bwaintangira ae te aki mamate ao te kakabwaia ibukin te maiu ae akea tokina. (tara Moses 1:39)
N te aro bwa ti na tau ibukin te maiu ae akea tokina, ti riai ni bitaki rinanon ana Mwakuri ni Kamaiu Iesu Kristo―ni manga bungiaki kaua ao ni kaitiakaki man ara bure. Ataei aika uarereke iaan waniua te ririki, ma e ngae n anne, bon akea aia bure ao a kaboaki rinanon te Mwakuri ni Kamaiu (tara Motiaea 3:16, 21; Moronaai 8:10–12).
Ibukira ngaira ni kabane ake ti a roko n te ririki ni kabaeaki nakon te bukinaki, iai te babaire ae kamimi are e kariaia bwa ti na kaitiakaki man te bure ao ni katauraoi ibukin te maiu ae akea tokina. Te katauraoi anne e moanaki man te bwabetito man ana kariaia te nakoanibonga ao ana butimwaai te Tamnei. Ngkanne ti riai n ururinga te Tia Kamaiu n tainako ao ni kawakin ana tua are E a tia n anganira.
E taetae te Uea ae Beniamina nakoia ana aomata n ana Boki Moomon ibukin te kimwareirei are e roko man namakinan te kabwarai bure rinanon ana Mwakuri ni Kamaiu Iesu Kristo. Imwina e katanoata bwa karekean kamaunaan aia bure, a riai n reireinia natiia ni beku i bon imarenaia ao a na rang n mwamwannano ngkai a kona ni kaitarai kainnanoia n te maiu n rabwata ao n te tamnei ibukia naake irarikia. (Tara Motiaea 4:11–16).
E reirei naba “Nooria I taekin bwaai aikai bwa e aonga n reke iroumi te wanawana; bwa kam aonga n ataia bwa ngkana kam beku ibukiia raomi ao kam bon beku naba iroun Atuami” (Motiaea 2:17).
E nako Iesu n taetaekina ana euangkerio ao ni karaoa ae raoiroi (tara Mwakuri 10:38). E kamarurungia aoraki. E kautia maate. Man mwaakana E kamwarakeia te ngaa n aomata ngke a baki ao n akea kanaia (tara Mataio 14:14–21; Ioane 6:2–13). Imwin Mangautina E angania kanaia Ana Abotoro ngke a roko ni biken Naman Kariraia (tara Ioane 21:12–13). Iaon Amerika, E katoki aoraki ao e kakabwaiaia ataei temanna imwiin temanna (tara 3 Nibwaai 17:7–9, 21).
Te Abotoro ae Iakobo e reireinira bwa e kanga aron te beku ibukia tabeman n rikirake man ara kakaitau n te bwai are E karaoia te Uea ibukira.
Ma ane e taratara te tua are moan te raoiroi, are te tua n inaomata, ni memena naba iai ngkai tiaki te tia ongo te tua ae mamanuokia, ma e makuria te makuri, ao e na kabaia n ana makuri.
“Aio te aro ni Kiritian ae itiaki ae aki kam’ara i matan te Atua ae te Tama, te kakawari’a akana a mate tamaia ma aine aika a mate buia, ngkai a rawawata, ao te kakawakina naba ngaia, ba e kawa ni bareka ni b’ain aon te aba” (Iakobo 1:25, 27).
Teuana kakoauan are ko a tia ni kaitiakaki raoi bon rikiraken nanom ni kan beku ibukia tabeman ibukin te Tia Kamaiu. Te reirei n te mweenga ao te Reirei ni Kakawari e riki bwa te kimwareirei ae korakora riki ao tiaki tii te bwai are ti kairoroaki bwa ti na karaoia. Ko kuneko bwa ko anganano riki iaon anne n angin te tai n te tabo n reirei i abam ke ni buokia n tararuaia raoi naake a kainnano n am kawa. E ngae ngke e aki bati n tau am mwane n anga nako nakoia naake e a karako riki are irouia, ko iangoia bwa e bia ke rawata riki ae ko karekea bwa ko aonga n anga riki ae mwaiti (tara Motiaea 4:24). Ko kuneko bwa ko a ingainga ni kan beku ibukia natim ao ni kaotia nakoia bwa e kanga te beku ibukia tabeman.
Ngkana e a bitaki kateim, ko na namakina nanom bwa e a korakora riki n te mwakuri n ibuobuoki n akea kinaakim iai. I ataia ana reirei te Tia Kamaiu ake a anga bwaintangira aika korakora n te mwane ao te mwakuri n ibuobuoki ma baireana irouia bwa akea temanna ma tii te Atua ao natiia ae a ataia. E a tia ni kinaaki aia mwakuri n ibuobuoki iroun te Atua man kakabwaiakia n te maiu aei, ao E na kakabwaiaia n te maiu ae akea tokina (tara Mataio 6:1–4; 3 Nibwaai 13:1–4).
Ngkai ko a tia ni kawakina te tua ni beku ibukia tabeman (tara Mataio 22:39), ko a tia n namakina te bitaki n namakinan te kainikatonga. Te Tia Kamaiu e na kaetiia Ana Abotoro ngkana a ikawiia bwa antai ae korakora riki mai buakoia. E taku:
“Ao tai atongaki ngkami ba tani kairiri: ba ti temanna am tia Kairiri, ba te Kristo.
“Ao ane kakanato riki i buakomi ao e na riki ba ami tia makuri” (Mataio 23:10–11).
E reireinira te Tia Kamaiu bwa ti na kanga n reiakinaki ni beku ibukia tabeman. E beku ma te kororaoi, ao ti riai n reiakinaki ni beku n aron ae E reiakinaki—te reirei iaon te reirei (tara D&C 93:12–13). Rinanon te mwakuri n ibuobuoki are ti anga, ti kona n riki n Ai Arona. Ti na tataro ma korakoran nanora n tangiriia ara kairiribai n aron ae E tangiriia. (tara Mataio 5:43–44; Moronaai 7:48). Ngkanne n te kabane ti a tau ma Ngaia ao Tamara are i Karawa ibukin te maiu ae akea tokina.
I berita bwa ti kona ni beku n ae kororaoi riki ngkai ti irira ana reirei te Tia Kamaiu ao ana katoto.
© 2014 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA Kariaiakaki n te Ingiriti: 6/13. Kariaiakaki rairana: 6/13. Rairan teFirst Presidency Message, March 2014. Kiribati. 10863 859
Reirei man te Rongorongo Aei
Unimwaane M. Russell Ballard man te Kooram n Abotoro n te Tengaun ma Uoman e kaungaira bwa ti na tataro ibukin taai ni beku: “N am tataro n te moaningabong ni katoa te bong ae boou, butiia te Tama are i Karawa bwa e na kairiko bwa ko na ataa am tai ni beku ibukin temanna natina ae rangin kakawaki. Ngkanne naako kabanea te bong … ni kakaea temanna ae e na buokaki” (“Tauraoi ni Katabeaki,” Ensign ke Liahona, Nobembwa. 2012, 31). Iangoia ni kaoia naake ko reireinia bwa a na katea aia kouru n tataro ni katoa ingabong koraki ibukin taai ni beku ao imwina kakaeia ni kabane n te bong anne.