2014
Misin Sarawi en Sises Krais: Marain en Sampah
March 2014

Iren Mahsen en Padahk en Pas, Mahs 2014

Misin Sarawi en Sises Krais: Marain en Sampah

Onopiki audepen padahk wet ni kapakap oh rapahki en ese dah me komwi en ehukihong mehteikan. Ia duwen wehwehki mour oh misin en Sounkomouro eh kin kalaudehla omw pwoson Ih oh kapaiada irail akan me komw kin tetehk sang ni padahk en pas? Pwehn alehdi iren kapehse kapatapat, tehk reliefsociety.lds.org.

Pwoson, Peneinei, Sawas

Ni atail kin wehwehkihla me Sises Krais iei Marain en Sampah, kitail pahn kalaudehla atail pwoson Ih oh wiahla marain ong mehteikan. Krais ketin kadehdehki duwen Sapwellime pwukoa duwen marain mehlel me kin serehda ohl oh lih koaros me kin kohdo nan sampah (tehk D&C 93:2) oh peki kitail en “kolada [Sapwellime] mehn ser pwe en kamarainiada sampah” (3 Nephi 18:24).

Atail soukohp akan pil kadehdehier duwen Marain en Krais. President Henry B. Eyring, Sounsawas Keieu nan Presidensi Keieu, mahsanih, “Ehuehu ansou me kumwail kin pilada en momour duwehte Sounkomouro, amwail kadehde kan pahn kakehlailda. Kumwail pahn kedkedeo esehla ong pein kumwail me Ih me iei Marain en Sampah. … Kumwail pahn kamarainihki mehteikan Marain en Krais nan amwail mour.”1

Elder Quentin L. Cook en Pwihn en Wahnpoaron Ehk-riemeno mahsanih duwen atail pahn wia marain ong sampah: “Kitail anahne doarehla atail peninei kan oh en tiengla mwowe patehng aramas koaros me men wia mwahu oh wia uwen atail kak en kolokol marain, koapwoaroapwoar, oh mwekid pwung nan atail wasahn kousoan kan.”2

Sang Pwuhk Sarawi Kan

Sohn 8:12; Doctrine and Covenants 50:24; 115:5

Sang Atail Poadoapoad

Lih Souleng en Imwin Rahn Akan rahn wet kin wie doudoulahte en kolada arail marain.

Ni pesoke 80 en ehu ihmw ileile nan Hong Kong, China, emen lih sohte pwopwoud me ahniki kahpwal kan en paliwar—me kelehpw wia Souleng en Imwin Rahn nan ah peneinei—wiahda imweo en wia wasa mwahu wasa me ih oh irail me kin pwarek ihmwo kin kak pehmada Ngehno. E kin nekid nah pwuhk sarawi kan, pwuhk en Pwihn en Sawas en Lih, oh nah pwuken koulo keren. E seiloklahng tehnpas sarawio pwehn kapwaiada tiahk sarawi kan ong kadaudokehkan.3

Nan Brazil, emen nohno mwahu apwalihada nah serihkan nan marain en rongamwahuo. Koul kan en Primary kin audehla nan imwe ihmw siment weitahtahu, oh kilel kan sang nan Liahona en tehnpas sarawi kan, soukohp akan en Koht, oh Sounkomouro kidimala dihd en imweo. Liho oh ah pwoudo tohnmetei pwehn katengtengdi nan tehnpwas sarawio pwe neira serihkan en kak ipwidiong nan inouo. Ah kapakap ansou koaros iei me Kauno pahn sewese ih apwalihada nah serihkan nan marain, mehlel, oh kehlail en rongamwahuo.4

© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen Visiting Teaching Message, March 2014. Pohnpeian. 10863 885

Iren sawas akan

  1. Henry B. Eyring, “A Living Testimony,” Ensign de Liahona, Mei 2011, 128.

  2. Quentin L. Cook, “Let There Be Light!” Ensign de Liahona, Nohpempe 2010, 30.

  3. Tehk Daughters in My Kingdom: The History and Work of Relief Society (2011), 163–64.

  4. Tehk Daughters in My Kingdom, 164.

Dahme I Kak Wia?

  1. Koasoaia wehwehn en wia marain ong sampah rahn wet.

  2. Medewe duwen idihdawehn marain en Krais eh kak seweseiuk powehdi kasongosong kan.