Eu Uruon Epikunukunuk Niwinin a men watte

Seni Preseten Henry B. Eyring

Aewin Chon Aninis non ewe Aewin Presetensi

Nupwen oua finata ne fori are apwonueta pwon mi pin ren Kot, oua fini ika oupwe anomatiw eu uruon epinukunuk ngeni ekkewe repwe tawpweno mwirimi pwe ami ar nenien appiru.

Pwiich me fefinach mi achengicheng, ekkoch ami ekkewe misineri seni Ewe Mwichefenin Jises Kraist ren Aramas mi Pin non Fansoun Soponon ra tungoreikemi oupwe fiti ei mwichenap. Ekkana misinieri meni ra fen tungor ngenikemi oupwe finata ne fori eu pwon ren Kot me ren paptais.

Pwan ekkoch ami oua ausening pun oua etiwa ewe tungoran sememi me inemi, ika meni emon semirit, a tungor ngonuk pun ra mochen om kopwe finata ne anneasochisi ekkewe pwon mi pin oua fen fori ren Kot. Ekkoch ami mi ausening oua fen finata ne niwinsefan ngeni ewe Chon Amanau me oua mefi ewe pwapwan An etiwa.

Ese nifinifin ion ami ika ami oua nom ia, oua kamoch non poumi kewe ewe pwapwan chommong aramas oua tongeni ekkieki ussun. Iteitan ran me awa oua tongeni finata ne fori ika anneasochisi eu pwon mi pin ren Kot.

Ese nifinifin ia ami oua nom ia won ewe ann ne angei nifangen manau ese much, oua kamoch ewe tufich ne pwar ngeni chommong aramas ewe ann ngeni pwapwa mi napano. Nupwen ami oua finata ne fori ika anneasochisi pwon mi pin ren Kot, oua tongeni finata ika oupwe nikitano ewe anamwurimen epikunukunuk ngeni ekkewe repwe tapweno omw nennien appiru.

En mi ngang aua fen feioch ren ewe pwonen eu anamwirich. Chommong ai pwapwa non manauei a fis fan iten emon mwan use mwo churi non manauen inis. I emon semirit ese wor seman me inan I a winiti emon semanapen semei we. A nikitano ngeniei eu uruon epikunukunuk niwinin a men watte. Ouse mochen etufichiei ai upwe ereneikemi wisan ne fori ena animwirum ngeniei.

Itan Heinrich Eyring. I a uputiw non eu famini mi pisekisek. Seman we, Edward, a wor imwan mi watte non Coburg non ewe fonu sa eita Germany. Inan we itan Viscountess Charlotte Von Blomberg. Seman I ewe sou tumunun ekkewe fonu an ewe kingen Prussia.

Heinrich I noun Charlotte me Edward we mwannichi. Charlotte a mano nupwen a 31 ierin, mwirin ewe uputiwan aunugaton semerit. Edward a mano ekisano mwirin, I a poutono noun kewe pisekisek meinisin mwirin eu fofforon moni mi nusmwan. A chok 40 ierin A nikitano unumon semerit.

Heinrich, semanapen semei we, inan me seman ra mano me mi kan watte anamwirin non pekin inis. Ese fen wor noun foun senis eu. A makkei non an we uruo pwe a mefi pwe an epinukunuk mi anonganong won an epwe sai ngeni Merika. Ina mwo ese wor chon an famini me chienan ra nom ikenan, a wor an memmefin epinukunuk ren an epwe no Merika. Akkom a feinno ngeni New York City. Mwirin a sai ngeni St. Louis, Missouri.

Non St. Louis emon chienan chon angang I emon Aramas mi Pin non Fansoun Soponon. A angei echo kapien ewe taropwe mi makk seni Elter Parley P. Pratt. A anneani me a statini meinisin ekkewe kapas a tufichin angei usun ekkewe Aramas mi Pin non Fansoun Soponon. A iotek pwe epwe sinei ika pwe mi wesen wor chon nang ra pwa ngeni aramas, ika pwe a wor emon sofous mi manau, me ika a wor a fen kuna ewe ennetin namanam mi pwato.

Mwirin ruu maram ren an stati me ikiotek, Henrich a kuna eu nemasepwi mi afatta pwe epwe paptais. Emon mwan ua kan kamoch itan me asamonu pwe mi pin, Elter William Brown, epwe fori ewe angangen annuk pwisin an paptais. Henrich a paptais non eu kukkun iton koniken ran non March 11, 1855, kunok 7:30 nesessor.

Ua nuku pwe Henrich Eyring a sinei pwe met minne ua aitikemi ikenai mi ennet. A sinei ewe pwapwan manau esemuch mi feito me ren foffon famini mi soposopono feinfeino. Ina mwo ika a keran kuna ewe kokkotun pwapwa an ewe Samon, a sinei pwe an apinukunuk ngeni manau esemuch mi anongonong won pungun finatan pwan ekkoch aramas non ar tapweno an we nenien appiru. An apinukunuk ngeni manau esemuch mi chok anongonong won aramas rese mwo uputiw.

Pwe eu kinikin non am famini uruon apinukunuk, a annomatiw eu uruo ngeni mwirimwirin kewe.

Non ena uruo ua tongeni mefi an tong ngeni kich ekkewe sia finata ne tapweno mwirin i. Non an kapas ua mefi an apinukunuk pwe mwirmwirin kewe repwe finata ne tapweno mwirin i won ewe aan mi niwin ngeni neniach me nang. A sinei esap chok finatan fan eu chok epwe esenipato nge finien chommong mi chok kukkun. Ua kapas seni an uruo:

Seni ewe fansoun ua akkaewin rong an Elter Andrus afanafan … Ua fiti iteitan ekkewe mwichen Aramas mi Pin me a wor chok men aukukun ekkis fansoun use fiti ekkewe mwich, pun ina wisei ai upwe fiti ekkana mwich.

Ua makkei ei non ai we uruo pwe nei kewe semerit repwe ne tapweno mwirin nenien appiru me resap amam ewe wis mi auchea ne mwicheto ren ekkewe Sounneng.”¹

Heinrich a sinei pwe non mwichen sakrament sa tongeni sofosefan ach kewe pwon ne chechemeni ewe Chon Amanau fansoun meinisin pwe Ngunun epwe nom rech.

Mi ewe Ngun a wisen anisi non an misin a kokko ngeni fitu chok maram mwirin an etiwa ewe pwonen paptais. A annomatiw pwe an uruo an nenien appiru non nukuchar ngeni an we misin ukukkun wonu ier non ewe neni itan Nenien Indian. Pwe epwe pichino seni an wisen misineri, a fetan seni Oklahoma ngeni Salt Lake City, ukukkun taman 1,100 main (1,770 km).

Ekisano mwirin a kokko seni ewe soufosun Kot pwe epwe feino nonnom non eorun Utah. Seni ikkewe a ponueni pwan eu kokko ne feino misineri non fonuan we Germany. A etiwa ei tingor seni emon Aposel an ewe Samon Jises Kraist pwe epwe aninnis ne aueta ekkewe mwichen Aramas mi Pin non Fansoun Soponon, non effenen Mexico. Seni ikkana a kokko sefan pwe epwe emon misineri non Mexico City. A apwonueta ekkana kokko. A peias non eu kukkunun nenien peias non Colonia Juárez, Chihuahua, Mexico.

Ua aporausa ekkei mettoch esap pwe upwe aningano itan are aningano an kewe foffor fan itan are fan itan mwirmwirin kewe. Ua aoprausa ekkei mettoch ne asamonu i fan itan an nenien appirru non nuku me apinukunuk minne mi nom non netipan.

A etiwa ekkana kokko pokiten an nuku pwe ewe Kraist mi manausefan me Semach won Nang a pwa ngeni Joseph Smith nein petewen non ewe sopun New York. A etiwa ir poikiten a wor an nuku pwe ekkewe kien pristut non an ewe Samon Mwichefen ra niwinsefan me ren ewe manamanen ariri ekkewe famini feinfeino, ika pwe mi naf ar nuku ne apwonueta ar kewe pwon mi pin.

Usun chok Henrich Eyring, ai we neuo, meni ami ewe aewin non ami famini ne emwen won ewe aan ngeni manau esemuch mi masou pwon mi pin mi for me pwonueta ren tiniken me nuku. Meinisin ekkewe pwon mi pin mi fiti wis me pwon. Ren kich meinisin, usun chok ren Henrich, fan ekkoch ekkana wis repwe mecheres nge napengeni fansoun mi weires. Nge chemeni pwe fan ekkoch ekkei wis repwe weires pokiten popuner pwe repwe asopwei kich won ewe aan ngeni ach sipwe nonnom ren Semach won Nang me Noun we At mi Achengicheng, Jises Kraist, non ach kewe famini.

Oua chechemeni ekkewe kapas seni ewe puken Abraham:

A wor emon a uta neir I a ussun chok Kot, me a apasa ngeni ekkewe ra nom ren I. Sipwe feitiw, pun a wor neni ikkenan, me sipwe angei ekkana mettoch, me sipwe fori eu fonufan ian ekkana aramas ra tongeni nom;

Kot a era pwe repwe sotuni kich pwe repwe kuna ika sipwe fori mettoch meinisin a annuku ngenikich;

“Me ion repwe apwonueta ewe aewin napanaper repwe angei ekkoch nap seni met ra akaewin angei, me ekkewe rese apwonueta ewe aewin napanaper resap angei ningoch non ena muun ren ekkewe ir repwe apwonueta ewe aewin napanaper, me ir repwe apwonueta ewe aruan napanaper repwe angei ningoch won mokurer feinfeino.”²

Ach apwonueta ewe aewin napanap mi anongonong won ach fori pwon mi pin ren Kot me ach tiniken ne fori ekkewe wis mi namwot seni kich. Mi namwot nuku non Jises Kraist pwe i ach Chon Amanau pwe sipwe apwonueta ach kewe pwon mi pin unusan manauach.

Pun Atam me If ra turutiw, ach anamwirin mi sossot, weires, me mano ngenikich meinisin. Nge, Semach won Nang mi tongeikich a ngenikich ewe nifangen Noun we At mi Achengicheng, Jises Kraist, I ach Chon Amanau. Ewe nifang mi nap me feiochun ewe Achasefanen Jises Kraist a awora ngenikich eu anamwirin ngeni aramas meinisin: ewe pwonen ewe Manausefan me ewe tufichin manau ese much ngeni meinisin ra uputiw.

Ewe feioch mi nap an Kot, manau ese much, epwe chok feito rech ika sipwe fori ekkewe pwon mi kawor seni ewe Mwichefenin Jises Kraist mi ennet me ren noun kewe chon angang mi mwutata. Pokiten ewe Turutiw, mi namwot pwe kich meinisin sipwe angei ekkewe nimenimochun papatias me ewe issetan pau ne angei ewe niffangen ewe Ngun mi Fel. Ekkei annuk pwisin repwe for seni ekkewe mi kamoch ewe mwumwutan pristut mi pung. Mwirin, ren ewe aninnisin ewe Ngunun Kraist me ewe Ngun mi Fel, sa tongeni anneasosichi ekkewe pwon meinisin sa fori ren Kot, akkaewin ekkewe mi kawor ngeni non An kewe tempel. Non ena chok napanap, me ren ena aninnis, emon a tongeni angei anamwirin pwe epwe emon noun Kot non eu famini feinfeino.

Ren ekkoch oua ausening ngeniei, epwe nikinikin pwe esap tufich.

Oua fen kuna in me sam ra neitpechou fan itan nour kewe mi amama ar ra finata ne atai ar kewe pwon mi pin ren Kot. Nge ekkana in me sam ra tongeni pwan angei pochokunen netip me apinukunuk seni porausen pwan ekkoch.

Noun Alma we at me noun King Mosaia kewe at ra niwin seni ar mwanochunon ungeni ekkewe pwon mi pin me annukun Kot. Alma ewe kukkun a kuna noun we at Corianton a kunu seni tipis mi anioput ngeni nukuchar non angang. Ewe Pukun Mormon a pwan masoueni ewe porausen ekkewe Chon Laman ra nikitano ar kewe urenien oput wenechar me siwin ngeni repwe fen mano ne awora kinamwe.

Emon chon nang a titito ngeni Alma me noun Mosaia kewe. Ewe chon nang a feito pokiten ewe nuku me iotekin semer kewe mi nukuchar me ekkewe aramasen Kot. Seni ekkana minen appirun manamanen ewe Achasefan mi anganga netipan aramas, oua tongeni pochokununo me chipeno.

Ewe Samon a ngeni kich meinisin ewe popunapen epinukunuk ren ach achocho ne anisi ekkewe sia kan tongei ar repwe etiwa anamwirir. A fori pwon ngeni kich nupwen sia chok achocho ne ioifengeni noun kewe aramas ngeni I, ina mwo ika pwe ra ungeni an we tingor. Ar ungeni mi anetipechoua I, nge Ese fangeta, sisap pwan fangeta. A pwar ngenikich ewe nenien appiru mi unusoch ngenikich ren an tong mi soposopono, A ereni ewe imwen Israel pwe epwe ionifengenir fan chommong ussun chok emon inanapen chuko a ionifengeni noun kewe chuko fan poun. A achocho ne ionifengeni ekkewe aramasan ewe imwen Israel a pwan kapachenong ekkewe ra mano me ekkewe ra nom non Jerusalem—Ussun chok emon inenapen chuko, nge ami ouse fori.³

Sia tongeni anongonong won ewe mochen an ewe Samon ese fangeta, ne aniwiniti meinisin noun Semach won Nang kewe ngeni nenier ren I me won nang. Meinsin in me sam, inenap me semanap, me tettenin inenap me semenap ra nonnofengen non ena mochen. Semach won Nang me ewe Chon Amanau ach kewe nenien appiru mi unusoch usun met sia tongeni fori me met mi namwot sipwe fori. Rese umwesi ach anneasosich pun mi namwot sipwe fini. Ra fori pwe sipwe essina wenechar, me Ra mut ngeni kich sipwe kuna pwe uwan wenechar mi anno.

Aramas meinisin ra uputiw won fonufan ra angei ewe Saramen Kraist, minne me anisikich ne kuna me mefi met mi pung me met mi mwan. Kot a tinato aramas pwe noun chon angang ra tongeni, me ren ewe Ngun me Fel, anisikich ne essina met I a mochen kich sipwe fori me met mi annuku kich sisap fori. Kot a fori pwe och ewe apwapwa ngeni kich ren an mut ngeni kich sipwe mefi niwinin ach kewe foffor. Ika sia fini mi pung, sipwe kuna pwapwa—non ena fansoun. Ika sia fini mi ngau, a feito netipengau me niamam—non ena fansoun. Ekkana niwinin foffor mi fat. Fan chommong ra ekkis mang nge a wor popun ar mang. Ika ekkewe feioch mi chok mwitir, ach fini mi pung esap anganga ach nuku. Me pokiten netipengau mi pwan mang, mi namwot nuku pwe sipwe mefi namwotan ach sipwe kutta omusomusen tipis me mwen esap mwirin ach fen mefi netipechou me metek.

Semanapach Liai a netipechou fan itan finian ekkoch noun kewe at me ar kewe famini. I emon mwan mi nap me emon mi aramasoch—emon soufosun Kot. Fan chommong A kan pwarata ngenir usun ach Chon Amanau, Jises Kraist. I eu nenien appirun aneasosich me aninnis nupwen ewe Samon a kokkori an epwe nikitano pisekin fonufan pwe epwe tumunu an famini seni tatakis. Nesoponon manauan, mi chok wau an kapasen pwarata ngeni noun kewe. Usun chok ewe Chon Amanau—me pwan nukun an tufichin kuna mochenin netiper me kuna ewe fansoun mwach mi anetipechou me apwapwa—Liai a eitau poun kewe ne uwei an famini ngeni manau.

Ikenai chommong minion mwirimwirin Semenapach Liai ra apwonueta an apinukunuk fan iter.

Met sia tongeni fori ne pochokun seni an Liai nenien appiru. Sia tongeni pochokun seni an nenien appiru seni ach iotek nupwen sa annea pukfel me pwan ren ach nenengeni.

Ua peseikemi oupwe ekieki mochomoch me nangatam nupwen oupwe achocho ne ngeni ami famini ewe uruon apinukunuk. Non fansoun mochomoch, epwe wor osukusok me Setan epwe pupuchor. Me mi wor mettoch sipwe kan witi non engino, nuku, me non ach sinei pwe ewe Samon a angang non pwisin An fansoun me non pwisin An napanap.

Ekkei mettoch oua tongeni fori nupwen ekkewe oua kan tongei ir mi chok kukkun. Chechemeni pwe iotekin iteitan ran non famini, annea pukfel non famini, me aporausa ach kapasen pwarata non mwichen sakramen mi kan mecheres me och nupwen semirit ra kukkun. Kukkun semirit ra kan tongeni mefi ewe Ngun nap seni ach essina.

Nupwen ra watte, repwe chechemeni ekkewe kon mi fel ra kon reimi. Pwan nap seni ar chechemeni kon, repwe chechemeni ekkewe kapasen pukfel me kapasen pwarata. Ewe Ngun mi Fel a tongeni achemato mettoch meinisin, nge ekkewe kapasen pukfel me kon mi fel repwe nommotam. Ekkana ekiek mi tongeni uweir pwe repwe niwinsefan nupwen ra rikino fan ekkoch, meni epwe ukukun fitu ier, seni ewe aanen manau esemuch.

Mi namwot sipwe nenengeni towaw nupwen ekkewe sia kan tongeir ra mefi ewe sossotun ewe fonufan me ewe kuchun nukunukumang a kan pworacho won ar nuku. Mi wor rech nuku, apinukunuk, me tong, repwe emweni kich me apochokuner.

Ua fen kuna ena ren ai ua emon chon aninnis ngeni ruemon soufosun Kot. Ir aramas ren napanap mi sokkono. Nge usun ra nonnofengen non ar apinukunukoch. Nupwen emon a essisinata eu osukosuk usun och mettoch non ewe Mwichefen, ewe ponuen mi kan fis fan chommong mi chok “O ina, epwe chok fisioch.” Napengeni fansoun ra fen sinenap usun ewe osukosuk nap seni ekkewe ra essisinata ewe osukosuk.

Ra pwan sinei aanen ewe Samon, iei minne ir mi chok apinukunukoch non Muun we. Ra sinei pwe I a nom nemokuran. A wor ren unusan pochokun me a kan afannikich. Ika oua mutata I epwe ewe chon emwenin ami famini, mettoch meinisin repwe fisioch.

Ekkoch mwirimwirin Henrich Eyring ra mwanecheno. Nge a wor chommong mwirimwirin kewe ra fiti ekkewe tempel an Kot kunok wonu nesessor ne fori ekkewe angang mi pin fan itan ekkewe newo rese mwo fen churi. Ir ra feinno pun ewe uruon epinukunuknuk a ngenir. A ngenir eu anamwir chommong mwurimwurin ir ra angei.

Mwirin mettoch meinisin sa tongeni fori non nuku, Ewe Samon epwe apwonueta ach kewe apinukunuk ren feioch mi nap fan itan ach kewe famini nap seni ach tufichin weweiti. A mochen met mi och fan iter me fan itach, pun kich Noun.

Kich meinisin noun emon Kot mi manau. Jises ewe re Nazareth I Noun we At mi Achengicheng me nouch Chon Amanau mi manausefan. Iei An Mwichefen. Ekkewe kien pristut a nom non, pwe famini ra tongeni nom fengen feinfeino. Ei ach uruon epikunukunuk niwinin mi men watte. Ua pwarata pwe mi ennet non itan Jises Kraist, amen.