Beltikelreng—kmal Moktek er a Ebangkelio

Mla er a President Thomas S. Monson

Kid a diak le meral betik a rengud er a Dios alsekum meng diak el betik a rengud el mora dedak el ngar tial omerael er tial beluulechad.

Betik er a renguk el rodam me a rodos, a Osobel er a lolisechakl er a rechad, e Ngii a mle kerioll er a tal chad er a llach, “Mastang, ngera sel kot el ngarbab el llach?”

A Mateus a lilchesii a mle nger er a Jesus:

“Ng kirel betik a rengum er a Rubak el Dios er kau er a rengum el rokir, me a klengar er a el rokir, me a uldesuem el rokir (Mateus 22:37).

“Tiaikid a kot el ngarbab el llach e kot el klou a belkul.

“E a ongerung el klou a belkul a di uai ngii, Bo el betik a rengum er a ngar bita er kau el ua le betik a rengum er kau.”¹

A Markus a mlo rokir tial cheldecheduch loba tekingel Osobel: “Ng diak a kuk ngodech el llach el ngarbab er a ikal erung.”²

Ng diak el sebeched el merang loubetikelreng el mora Dios a lak el betik a rengud er a rechad el dedak el ngar tial omerael er a beluulechad. Ng osisiu, el diak el sebeched el betik a rengud er a rodam er kid a lak el betik a rengud er a Dios, el Demad el rokui. A Apostol Johanes a melekoi, “Tial llach a de ngiluu er ngii, El ngike el betik a rengul er a Dios a betik a rengul er a odam er ngii.”³ Kede rokui el ngelekel a Chedam er a Babeluades er a reng, a leuaisei, e kede odam e odos. Sel doba tial klemerang er a uldesued, eng mo beot er kid oubeltikelreng er a rokui el ngelekel a Dios.

A mera er ngii, a beltikelreng a kmal moktek er a ebangkelio er a Jesus Kristo el Okesiud. A klengar Ngii a dikesel a beltik el reng. Ngii a ulemekungil ra resmecher; ma remechitechetong e Ngii a ulekiis er tir; e Ngii a ulelsobel ra remekngit. E a ulebongel, e a remekngit el chad a ngiluu a klengar er Ngii. Eng di a tekoi el mildung er a ked er a Kolkata: “Chedam, mousubes er tir; leng diak lodengei a loruul”⁴—a meral ngarbab el okesiul a klechubechub me a beltikelreng.

Ng betok a blekeradel el olchotel a beltikelreng, el uaia blekokeuii, kllouelreng, diak el bechechelingaol, ungil medengei, me a klausubes. Rokui el deleuill er kid, e a ikaikid me a lmuut el bebil er a blekeradel a ngosukid lochotii a beltikelreng er a rengud.

Ng blecheol beltikelreng er kid a mocholt er a deleuill er kid lobengterir a rebebil er a bek el sils. E sel kmal klou a belkul a sel duch er kid el mesa ngesool chad e mo ngoseuir. A kmal di mla soak a tekoi er a chelsel tiakid el llechukl:

Ak mla lmangel a le klebesei
El kedeb osengek
Er a usbechellel a tang a rirellak el mo meuiko;
Eng di ngak a dirkak
Bo kumelchesiu el ouchel a renguk
El kmal mlo iimis el bekokeuii.5

Ak dirk mlo medengelii a kmal ungil okesiu er a blekokeuii el beltikelreng—el meringel el mutab. A rak a mle 1933, er a taem er a Klou el Chelebuul er a kerruul, el mle meringel a dosiik a ureor. Tia dilubech er ngebard er a Beluu er a Merikel. A Arlene Biesecker a dirk tolibed er a high skuul. Uriul er a kemanget el taem losiik a ureor, eng mocha metik er a ureor er a blil omerasm. Tirkal loureor el merasm a sebechir el udeudel lultuil er a ikel derstelkib el mamed lodekdak e rosmii. Alskeum eng mlo betok, eng sebechel mo klou a ududir.

A ta er a klebesei ruriul er a bla lomuchel er tial urrerel, e a Arlene a mlo chelebangel er a teletael el rirellii el mlo rrau a rengul e seselk a rengul. Ng dilengchokl er a mesil er ngii el melasm el muut lomoket er tial resmelel el ngii a bla luchelii ruchei e dikea el sebechel rokir. Ng kora dimlak a chad el sebechel ngoseuir, le tirkal bebil er a remerasm a kora kmal mechesang loreched a resmelir. A Arlene a ulemelcheisu el dikea el sebechel mekerang. Ng mocha chelellakl, e longelang.

A Bernie Rock a dilengchokl el chemau a Arlene. Ng mle klou el redil e meketeketa el merasm. Tia er a lesa Arlene el chebulang, e a Bernie a milchere resmelel e mocha er bita er a Arlene, e mekekokil mesaod el mo er ngii e ngoseuir. Ng dilengchokl el choilii a Arlene el mo meduch el di ngii meng mlo sebechel rokir a resmelel. E a Bernie luueta el mocha merasm er a resmelel, el mla metom er a techall el ruasm a betok, omko ng dimlak bo lolngeseu er a ta er a chad.

Tiaikid el blekokeuii el beltikelreng a mlo uchul, e a Bernice me a Arlene a mlo sechelei. Te di diul mlo bechiil e mlo oungalek. Sera 1950, e a Bernie, el mle chedal a Ikelesia, a milsa Arlene me a telungalek er ngii a Babier er a Mormon. E se er a 1960, e a Arlene me a bechil me a rengelekir a miltecholb el mo chedal a Ikelesia. E a uriul e te mlo moak el telungalek er a chedaol templo er a Dios.

Tiaikid el chubechub el mlocholt lokiu a Bernie el mlo ngoseuir a chad el dimlak lodengelii eng di ng mlara ringel e ulusbech a ngeso, e te betok el chad, a re ngar me a re mla mad, a ngara deureng er a chedaol ruoll er a ebangkelio.

Bek el sils er a klengar kid e ngarngii a techelled lochotii a beltikelreng me a blekokeuii el mo er tirkel iiliuekl er kid. Ng millekoi a President Spencer W. Kimball: “Ng kired el mo medengei el kmo tirkel chad el desterir er a blil a mlai, obis, elevators, me a ngii di el ker a dirrek el Dios a mla meskid el mo oubeltikelreng e mesiou er tir. Ng diak a belkul alsekum e kede mesaod el kirel a klodam e mereko diak domdasu er tirkel ngara bita er kid el rodam me a rodos er kid.”⁶

Ng blechoel ikel techelled el mo olecholt er a beltikelreng a di kiul duum. A okesiul tial techall a mlocholt er a simbung er sera October er a 1981. Ng meral mlo mechas a renguk er a beltikelreng me a klechubechub er a chelsel me ak ngiluu el kudmeklii er a blil a kloklek el mla oba lengelakl er a okedei el rak.

Tial simbung a melekoi el kirel a skoki el Alaska Airlines el tilobed er a beluu er a Anchorage, Alaska, el mora Seattle Washington—loltak er a 150 el chad—e milngodech omerollel el mora basio er a iikrel a beluu er a Alaska el mo oltak er a kmal klou el telemall el ngalek. A eru rekil buik a milloched a klou el ngurd er a chimal er a rrebet el subechii er a bleu el karas er a loilil er bita er a blil. Tial beluu a mle 450 miles (725 km) er a dims er a Anchorage e dimlak el ngii a rolel tial skoki. E ng di, a rechad lulngeseu er ngika el buik a ultebedii ongit el kirel ngika el buik, me tial skoki a ulemitokl el mlo melai er ngika el buik el mora Seattle me bol sebechel mora ospitar.

A skoki er a le metengela er tial mocheuekl el basio, e a rechad el ulemes er ngika el buik a silbedii omekall er a skoki el kmo ng kmal klou el merael a rasech er ngii el locha diak lenguu a Seattle. Ng mloterekokl el luut lomekall el 200miles (320 km) loeak a ngodech el rael el mora Juneau, Alaska, el kot el kmeed el basio el ngarngii ospitar ngii.

Uriul er a lokerdii ngika el buik er a Juneau, e tial skoki luueta el bedul a Seattle, el mla mo tela el sikang el meoud. Ng dimlak a di chimo el chad lulmondai, el betok er tir a locha mo diak el bechir aikel bo loruul me a re melemolem omerollir. Ng bai, tia er a lorael a taem el mong, e te chiludel a udoud, el betok ludoud el mo er ngika el buik me a telungalek er ngii.

Tial skoki er a bochu lekerd er a Seattle, e tirkal chad a mlo ngara deureng le omekall a ulechais el kmo ng mla ngmai a tekoi er a dembio el kmo ngika el buik a mo meisiich.⁷

Ak mlo omdasu a tekoi el ngara chedaol llechukl: “A omesiou a klikiid el beltikelreng er a Kristo, … e ngike el mo oba er a uriul klebesei, a kmal mo ungil er ngii.”⁸

Rodam me a rodos, a bebil er a kmal ungil techall el bo dochotii a beltikelreng a ngara chelsel a rekeblid. A beltikelreng a kmal kirel moktek er a klengar er a telungalek, eng di bebil er a taem eng diak. Ng sebechel mo klou a klechecherd reng, klou a klautoketok, klou a klakeuad, el klou a langel. Ngulmekikngit el reng a President Gordon B. Hinckley e melekoi: “Ngera uchul me [tirkel] kmal betik a rengud er [tir] a blil a mekngit el tekinged? Ngera uchul me a le bebil er a taem e [kede] mengedecheduch el soad lomekringel er a rebebil?”⁹ A nger er a ikal ker a locha kakerous er a derta me a derta er kid, eng di a domes er ngii eng diak a kmal belkul. Omko ke de oltirakl er a llach el mo kaubeltikelreng, eng kired el mo bekokeuii e mengull er a ta me a tang.

Ng uaisei el ngarngii a taem eng kired el mellach e oungeroel. Eng di, bo dolatk er sel, omellach el ngara Doctrine and Covenant—el kmo sel sekum eng klou a belkul el mocha kired el mellach er a tang, eng kired lochotii a beltikelreng ruriul.¹⁰

A kuureng me bo dolasm el blechoel mengull e domdasu a uldesuir me a lomelchesiu me a teletael le ngara chelsel tirkel iiliuekl er kid. Lak doltuub malechub e dolekoi a mekngit. Bai, bo de chubechub e dolisiich. Ng kired el mo kerekikl el diak de temellii sel klaumera er a chad el mei er kid lokiu a terrekakl lomelkinged me a omerelled.

A klausubes a kirel ombil a beltikelreng. Chelsel a telungalek er kid, me a dirrek el resechelid, eng sebechel mo diak el soad lousubes. Ak lmuut el melekoi, ng diak a kmal belkul a kmo ngera mle uchul a mondai. A ultelchekled er a mekngit lomerellir a rebebil, a diak el medechel, el mo melemall. A ultelechakl a diak el sumech a reng. Ng di ta el klausubes a omekungil.

A klebokel dil el meketeketa er a lemad e uleldingel er ngak er a ta er a klebesei e ulechais a bebil er a louchel er ngii el tekoi. Ng milsaod el kirel a teletael el dilubech er a betok el rak ruchei er ngii me a chad er a sers el tonari er ngii, el mle tal ungil sechelei eng di ngii me a bechil a mle betok a mondelengir er a kakerous el teletael. A ta er a klebesei e ngika el chad er sers a ulelturk me loeak a chetemir el mora basio er ngii. Ng dillii tiang, e mocha lmuk, e omriter a ngerel, e dula el kmo, “Brother Monson, ng dimlak kengei er ngii me be loeak a chetemam er tiaikid el taem e millemolem el diak kengei er ngii e dilu er ngii me bo lorael er a kemanget lomerael el di olab ochil. Ak mle mekngit, e ouchel a renguk er chelechang. Ng mla mo dibus, e ngak, oureng ulekum meng sebechek el kmu er ngii el kmo, ‘Ak mlo mekngit.’ A kuureng ulekum eng mla er ngii a lmuut el techellek el mlo bekokeuii.”

Tia er a kurrenges erngii, e ak mlo dobedebekii a mekngit a rengud er ngii el tekingel a John Greeleaf Whitter: “Aikel rokui el mekngit a rengud er ngii el tekoi, e sel kmal mekngit a rengud er ngii a tiakid: ‘Ulekum meng mle sebechek!’”¹¹ Rodam me a rodos, sel doubeltikelreng e debekokeuii el mora rebebil, eng mo diak douchel ruriul.

A beltikelreng a mocholt er a betok el moues el teletael: a klikm, odersii chimam, ungil tekoi, a chemat. E a bebil er a teletael a locha meringel el moues, el uaia ochotii a klemeriar er kid er a ikel loruul a rebebil, olisechakl a suobel loba blekokeuii me a kllouelreng, oldingel er a smecher malechub a di kiei er a blai el chad. Aikaikid el tekoi me a omeruul, me a lmuut el bebil, a ochotii a beltikelreng.

A Dale Carnegie, el merael chisel el chad er a omeluches e meduch el mengedecheduch el chad er a Merikel, a ulemerang el kmo a bek el chad oba “klisiich el kirel a deureng er a beluulechad … lokiu a omelkingir er a omereng el saul el mora chad el sabisi malechub e ngara ringel.” Ng millekoi, “A klukuk e ke locha mo obes a ungil tekoi el mdilung er chelechal sils, e ngdi ngke el ngilai a medechel er a chelsel a rengul el mo charechar.”¹²

Mei e domuchel er chelechang, tiaikid el sils, el mo otii a beltikelreng el mora rokui el ngelekel a Dios, a le chedal a telungalek er kid, resechelid, di dekaodengei el chad, malechub e te kmal ngodech el chad. Sel de bekiis er a bek el tutau, e de tibir er a rengud el mo oba beltikelreng me a blekokeuii mo er a ngii di el chad le bo de kebetech.

E sel diak dotebengar, e rodam me a rodos, a sel beltikelreng er a Dios el mei er kid. Ngultuil er tiaikid el beltikelreng, e Ngii a uldureklii a Ngelekel Sechal, el kmal betik a rengul er kid me nguldersii a klengar Ngii el kired, me bo denguu a diak a ulebengelel klengar. Sel dorael mo medengelii tial diak a smodii el sengk, e a rengud a mo mui er a beltikelreng el mora Diak a Ulebengelel Demad, mora Osobeled, me a rokui el chad. Me bo leuaisei a nglunguchek el ngara chedaol ngklel a Jesus Kristo, amen.