Ennaan eo an Būreejtōnji eo Kein Kajuon, Juun 2014
Kōm̧ōkajļo̧k Jerbal eo
Kwoj ke kile bwe Kabun̄ eo eaar jepļaaktok eaar 98 iiō rūtto in m̧okta jen an wōr 100 stake ko ie? Ak eaar dik ļo̧k jān 30 iiō tokālik, Kabun̄ eo eaar ejaak kein karuo in an 100 stake ko. Im ralitōk wōt iiō tokālik bwe Kabun̄ eo eaar lōn̄ ļo̧k jān 300 stake ko ie. Rainin, ewōr ippād elōn̄ jān 3,000 stake rekajoor.
Etke eddōk ļo̧k in ej bōk jikin ilo juon jon̄ok eo emōkaj? Ej ke kōnke em̧m̧an aer jeļā kajjeed? Ej ke kōnke em̧m̧an m̧ōn jar ko ad?
Men kein raorōk, ak unin an Kabun̄ in eddōk ļo̧k rainin ej bwe Irooj ej kwaļo̧k bwe enaaj kar. Ilo Doctrine and Covenants, Eaar ba bwe Enaaj kōm̧ōkajļo̧k jerbal eo An ilo iien eo an.1
Kōj, āinwōt ajri in jetōb ro nejin Jemedwōj Ilan̄, kar jilkintok n̄an laļ in ilo iien in bwe jen maron̄ bōk koņaad ilo kōm̧ōkajļo̧k jerbal in eļap.
Irooj ej jan̄in kar, ilo aō jeļā, kar kwaļo̧k bwe jerbal eo An ej kōm̧m̧an jon̄an ilo mour wabanban in. Ijjelo̧kin, jerbal eo An ej kitbuuj mour indeeo. Ij tōmak Ej kōm̧ōkajļo̧k jerbal eo An ilo laļ eo an jetōb. Ij barāinwōt tōmak bwe Irooj, jen rikarejar ro An ijeņ, ej kōpooj elōn̄ jetōb ro n̄an bōk ko̧jpeļ eo. Jerbal eo ad ej n̄an pukōt ro nukud remej innām etal n̄an tampeļ eo im kōm̧m̧ane kain̄i ko rekwojarjar ko renaaj bōktok n̄an ro iturājet in rōn̄ōl eo ejja iien kein wōt rem̧m̧an ewōr ippād.
Būreejtōn Brigham Young eaar ba, aolep Armej ro Rekwojarjar ilo Raan-ko Āliktata rem̧m̧an ilo laļ eo an jetōb rej boub (1801–77). “Ta eo rej kōm̧m̧ane ijeņ? Rej kwaļo̧k, kwaļo̧k aolep iien, im kōpooj iaļ eo n̄an kōj n̄an kōm̧ōkajļo̧k jerbal eo ad ilo kalōk tampeļ ko ijin im ijoko wōtemjej.”2
Kiiō, menmenbwij an baam̧le ejjab pidodo. N̄an kom̧ ro jān Scandinavia, ij jaake inepata eo ami. N̄an waanjon̄ok, ilo menmenbwij in Swedish eo aō, etan jim̧aaō ekar Nels Monson; jemān eaar jab Monson n̄an jidik ak Mons Okeson. Jemān Mons ekar etan in Oke Pederson, im etan jemān ekar Peter Monson—bar ro̧o̧ltok n̄an Monson.
Irooj ej kōtmāne bwe kwe im n̄a nej kōm̧m̧ani menmenbwij in baam̧le eo ad. Ij ļōmņak bwe men eo jinoin tata jej aikuj kōm̧m̧ane eļan̄n̄e jej kōm̧anm̧ane jerbal eo ad ej n̄an bōk Jetōb eo an Jemedwōj Ilan̄ ippād. N̄e jej mour jim̧we ilo ad jeļā wāween mour, Enaaj kōppeļļo̧k iaļ eo n̄an kakūrm̧ool kōjeram̧m̧an ko jej m̧ool im tiljek in pukōt i.
Jenaaj kōm̧m̧an bōd ko, ak ejjeļo̧k iaad emaron̄ erom juon mōkade ilo jerbal in menmenbwij an baam̧le m̧ae iien ej jino rijinoe. Kōn menin, jej aikuj tiljek ilo kōm̧m̧ane jerbal in, im jej aikuj kōppopo n̄an en̄jake men ko reppen. Ejjab juon jerbal epidodo, ak Irooj eaar likūt i iood, im Eaar likūt i ioō.
Ilo am̧ jino jerbal in menmenbwij, kwonaaj loe am̧ make jelm̧ae kapan̄pan̄ ko im̧aan iaļ ko, im kwonaaj ba ippām make, “Ejjeļo̧k bar men imaron̄ kōm̧m̧ane.” N̄e kwoj retōpar jekjek in, būkwelōlō ioon bukiem̧ im kajjitōk ippān Irooj n̄an kōppeļļo̧k iaļ eo, im Enaaj kōppeļļo̧k iaļ eo n̄an kwe. Ij kam̧ool bwe menin ej m̧ool.
Jemedwōj Ilan̄ ej iakwe ajri ro Nejin ilo laļ eo an jetōb jon̄an wōt āinwōt Ej iakwe kwe im n̄a. Kōn jerbal in lo̧mo̧o̧r an ro nukud remej, Rikanaan Joseph Smith eaar ba, “Im kiiō āinwōt jibadbad ko reļļap an Anij rej kōm̧ōkajļo̧k aer tōprak, im men kein kōnono kake jen Rikanaan ro rej kūrm̧ool, ilo an aelōn̄ eo an Anij ejaak ioon laļ in, kōllaajrak ko etto kōn men ko raar jepļaaktok, Irooj eaar kwaļo̧k n̄an kōj eddo in im jeram̧m̧an in.”3
Kōn rūtto ro jibūd im jim̧aad ro raar mej kōn ejjeļo̧k juon jeļāļo̧kjeņ kōn ko̧jpeļ eo, Būreejtōn Joseph F. Smith (1838–1918) eaar kwaļo̧k, “Jen kijejeto ko ad ilo etaer tomede ko aer kōn kōm̧akoko renaaj wōtlo̧k jān er, im maroklep eo ej jepo̧o̧l er naaj jako, bwe meram emaron̄ rom̧aak ioer im renaaj ron̄ ilo laļ eo an jetōb kōn jerbal eo eaar kōm̧m̧an n̄an er jen ajri ro nejier ijin, im naaj lan̄lōn̄ ippāer ilo m̧akūtkūt in eddo kein.”4
Ewōr milien ioon milien ajri in jetōb ro nejin Jemedwōj Ilan̄ ro raar jab ron̄ etan Kraist m̧okta jen mej im kar etal n̄an laļ eo an jetōb. Ak kiiō emōj aer katak ko̧jpeļ eo im rej kōttar raan eo n̄e kwe im n̄a naaj kōm̧m̧ane etale eo emenin aikuj n̄an kōmeļak iaļ eo bwe jen maron̄ etal n̄an m̧weo imōn Irooj im kōm̧m̧an jerbal kōn er jerbal eo me er make rej jab maron̄ kōm̧m̧ane.
Ro jeiū im jatū, ij kwaļo̧k bwe Irooj enaaj kōjeram̧m̧an kōj ilo ad bōke im uwaak n̄an apan̄ in.
Katakin jān Ennaan In
Ļōmņak kōn juon bwebwenato em̧m̧an jān bwebwenato eo an baam̧le eo am̧ im kwaļo̧k bwebwenato in ippān ro kwoj loļo̧k. Bōlen komaron̄ in kōjerbal kajjitōk ko ilo m̧wen̄an eo an ajri ilo Ennaan eo an Būreejtōnji eo Kein Kajuon (peij 3) n̄an rōjan̄ ro kwoj loļo̧k n̄an kwaļo̧k bwebwenato ko aer. Ļōmņak im riiti Doctrine and Covenants 128:15 im kōnono kōn aorōk eo kōn kōm̧m̧ani kain̄i ko an tampeļ ilo etan rūtto ro jibūd im jim̧aad.
© 2014 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an First Presidency Message, June 2014. Marshallese. 10866 874