Iren Mahsen en Presidensi Keieu, Suhn 2014
Kamwadangalahn Doadoahko
Komw wehwehki me Mwomwohdiso kapwurupwurdo sounpar 98 mwohn e kauwada stake 100? Ahpw pahnangin sounpar 30 mwurin ansouo, Mwomwohdiso koasoanediher keriaun stake 100 kan. Oh sounpar waluhte mwuri me Mwomwohdiso kauwada tohto sang stake 300. Rahnwet kitail kehlailki tohtosang stake 3,000.
Dah me karehda keirida wet wiawi ni mwohmw mwadang sang mahso? Iei pwehki aramas mwangih kitail mwahusang mahso? Iei pwehki atail ihmw sarawi kan me kaselel?
Mepwukat kesempwal, ahpw kahrepen Mwomwohdiso keirida rahnwet iei me Kauno mahsanih me e pahn wiawi. Nan Doctrine and Covenants, E mahsanih me E pahn kamwadangiala Sapwellime doadoahk ni ansou me konehng.1
Kitail, ni atail wia seri ngehn kan en Samatail Nanleng, pekederdohng nan sampah ansou wet pwe kitail en kak iang towehda kamwadangalahn doadoahk kesempwal wet.
Kauno sohte doluhl, ni duwen me I wehwehki, mahsanih me Sapwellime doadoahk pahn ididi duwehte mour en aramas. Ahpw, Sapwellime doadoahk pahn wie momour poatoapoat. I kamehlele me E pil kamwadangiala Sapwellime doadoahk nan sahpwen ngehno. I pil kamehlele me Kauno, sang rehn Sapwellime tohnpapah wasao, kin kaukaunopada palingehn tohto en ale rongamwahuo. Atail pwukoa iei en rapahkida kadaudokatail me mehlahr akan oh uhd kohla nan tehnpas sarawi oh wiahda tiak sarawi kan me pahn kihong irail me mehlahr ansou mwahu duwehte atail.
Souleng en Imwin Rahn Akan me mwahu koaros nan sahpwen ngehn soupisek, mahsanih President Brigham Young (1801–77). “Dahme re wiewia wasao? Re kin wie kalkalohk, padpadahk ansou koaros, oh kaukaunopada ahl pwe kitail en kak kamwadangiala atail doadoahk en kauwada tehnpas sarawi wasaht oh wasa teikan.”2
Ansou wet, doadoahk en poadoapoad en peneinei sohte mengei. Ong kumwail me kohsang Scandinavia, I ese duwen dahme kumwail tihwohkihlah kan. Karasepe, nan ahi kadaudok kan me kohsang Sweden, eden ahi pahpa kahlap iei Nels Monson; eden ah pahpa kaiden Moson ahpw e wia Mons Okeson. Eden en Mons ah pahpa iei Oke Pederson, oh eden ah pahpa iei Peter Monson—pwuralahng Monson.
Kauno kasik kumwail oh ngehi en wia atail doadoahk en poadoapoad en peneinei ni keneinei. I kamehlele me ma kitail anahne wia doadoahk wet pwe en pweida kitail anahne mahs ahniki Ngehn en Samatail Nanleng rehtail. Ni atail momourki pwuhng ni uwe me kitail wehwehki, E pahn ritingada ahl ong kapai kan me kitail kin pwerisek oh ngidingid rapahki ni mehlel.
Kitail pahn kin wiada sapwung kan, ahpw sohte emen kitail kak wiahla soun doadoahk semen en poadoapoad en peneinei ni e sohte kin wiahda sapwung ni tapio. Ihme kahrehda, kitail poadedi nan doadoahk wet, oh kitail anahne kaunop ong doadoahk apwal. Doadoahk wet sohte mengei, ahpw Kauno ketin ketkihonguhk, oh E ketin ketkihongie.
Ni ahmw wenla nan doadoahk en poadoapoad en peneinei, ke pahn lel nan kahpwal kan, oh ke pahn ndahiong pein kowe, “Solahr mehkoht me I kak wia.” Ni ahmw lel ansouo, kelepwikidi oh peki rehn Kauno en ritingada ahlo, oh E pahn ketin ritingada ahlo ong uhk. I kadehde me met mehlel.
Sahm Nanleng poakong Sapwellime serihkan nan sahpwen ngehno duwehte E poakong kowe oh ngehi. Me doke doadoahk en komourlahn kadaudokatail me mehlahr akan, Soukohp Joseph Smith mahsanih, “Oh met pwehki doadoahk lap kan en Koht kamwadangalahr pwehn pweida, oh kokohp kan en Soukohp akan pil pweidahr, ni wehin Koht eh koasoandier nan sampah, oh koasoandi en mahskan kapwurupwurdohr, Kauno ketin kasalehiong kitail pwukoa oh kapai wet.”3
Duwen kadaudokatail me mehlahr oh sohte ese duwen rongamwahuo, President Joseph F. Smith (1838–1918) mahsanih, “Sang ni atail doadoahk ong irail re pahn saledeksang imweteng ni palingehn, oh rotorot me mih rehrail pahn sohrala, pwe marain en kak daker pohrail oh re pahn rong nan sahpwen ngehno duwen doadoahk me wiawiehr pwehki irail sang neirail serihkan wasaht, oh re pahn iang uhk popohlki ahmw kapwaiada pwukoa pwukat.”4
Mie kidalap en ngehn en sapwellimen Sahmatail Nanleng seri de aramas me saik rong mwaren Krais mwohn arail mehla oh kohla nan sapwen ngehno. Ahpw met re sukuhlkihier rongamwahuo oh awiawi rahn me kowe oh ngehi pahn wia ropirop me anahn pwe kitail en kak pidolong nan tehnpas en Kauno oh wiahda doadoahk ong irail me re sohte kak pein wiahda.
Riei ohl oh lihakan, I kadehde me Kauno pahn kapaiada kitail ni atail alehda oh idawehn kaweid wet.
Padapadahk sang Iren Mahsen Wet
Medewe oapwoat soai kaperen sang ahmw poadoapoad en peneinei oh ehukihda soai wet ohng irail me ke pwarek. Mwein ke pahn men doadoahngki kalelelpak kan nan pali en serihkan nan Iren Mahsen Kan en Presidensi Keieu (teh 6) pwehn kangoange irail me ke kin pwarek en iang ehukihda pein arail soai kan. Mwein komw kak wadek Doctrine and Covenants 128:15 oh koasoaiada kesempwalpen wialiandi kadaudokatail kan wia arail tiahk sarawi kan nan tehnpas sarawi.
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/14. Kamanaman ong kawehwe: 6/14. Kawehwehpen First Presidency Message, June 2014. Pohnpeian. 10866 885