Visiting Teaching Amandzɛɛbɔ, Ayɛwoho 2014
Jesus Christ No Dwuma a Ofi Sor: Dzimafo
Mpaabɔ mu ara sũa adzesũadze yi na hwehwɛ dɛ ibohu dza ibɛkyɛ. Eretse Agyenkwa N’abrabɔ na dwuma ase besi dɛn ato wo gyedzi mu wɔ No mu na oehyira hɔn a edua visiting teaching do ihwɛ hɔn do no? Ho nsɛm mbordo no, kɔ reliefsociety.lds.org.
Gyedzi, Ebusua, Mboa
Jesus Christ nye hɛn Dzimafo wɔ Egya no enyim. Nsɛmfua dzimafo wɔ Latin kasa ndwow a ɔkyerɛ “nyia ɔtotɔserɛ ma obi.”1 Agyenkwa no dze ntseasee, pɛrpɛrdzi, na ehumbɔbɔr totɔserɛ ma hɛn. Yehu iyi a obotum dze No Werdambɔ no ho dɔ na enyisɔ ahyɛ hɛn mu mã.
“Hom ntsie [Jesus Christ] nyia ɔyɛ dzimafo no wɔ Egya n’enyim, nyia ɔserɛ hom asɛm ma hom wɔ n’enyim—
“Se dɛ: Egya, hwɛ nyia ɔannyɛ bɔn no n’amandzehu na no wu, ɔno a ɔsɔ w’enyi no; hwɛ wo Ba no bɔgyaa a okyii no, nyia iyii no mae ama oeekyi no bɔgyaa aahyɛ wo enyimnyam;
Dɛm ntsi, Egya, gye mo nuanom yinom a wɔgye me dzin dzi no, ama wɔaaba mo hɔ na woeenya daapem nkwa” (N & A 45:3–5).
Dɛ Christ yɛ hɛn Dzimafo no, Elder D. Todd Christofferson a ɔkã Duebien hɔn Quorum ho no kãa dɛ: “Ɔyɛ me asɛm tsitsir dɛ, ber biara mu na gyinabew biara mu no mubotum edua mpaabɔ do abɛn adom ahɛngua no, dɛ mo Ɔsor Egya bɛtse me ntotɔserɛ no, dɛ me Dzimafo no, ɔno a ɔannyɛ bɔn no, ɔno a wokyii no bɔgyaa no, bɛserɛ m’asɛm ama me.”2
Fi Kyerɛwsɛm no mu
Mosiah 15:8–9; Moroni 7:28; Nkyerɛkyerɛ na Ahyɛmudzi 29:5; 110:4
Fi Hɛn Abakɔsɛm mu
Ewuradze N’Asɔr abakɔsɛm ber nyina mu no, Jesus Christ N’esuafo mbaaWi no edzi Ne fasusu do. Nna Esther yɛ dzimafo nokwafo na ɔkokodurfo. No wɔfa ba Mordecai somaa ma wɔdze ɔhen no ɔmom dɛ wɔnsɛɛ Jewfo nyina no ne kyerɛw saso kɛmaa no, na ɔhyɛɛ no dɛ “[ɔ]nkɔtotɔ nserɛ [ɔhen] no na ombisa adze wɔ n’enyim mma ne man.” Ɔsɔɔw do dɛ: “Na woana na onyim dɛ aber a ɔtse dɛm ntsi na wo nsa akã ahendzi no? (Esther 4:8, 14.)
Naaso Esther peen do, dɛ ɔbɛyɛ esian ama no dɛ ɔbɛyɛ ne man dzimafo mpo no: “Na medze no dɛm makɔ ɔhen nkyɛn a ɔnnam mbra kwan do: na sɛ mehera a, mahera” (Esther 4:16).
Nkyii Esther kasae ahobrɛase mu kyerɛɛ ɔhen no na “otwae hwee n’anandze, na ɔdze nyinsuwa totɔe serɛɛ no… dɛ onyi mbusu tsirmpɔw a …wɔ Jewfo no ho no.” Ɔsɔɔw do, “Na mebɛyɛ dɛn na metum atsena hɔ mahwɛ m’ebusuafo hɔn nsɛɛe? (hwɛ Esther 8:3, 5–6). Ɔhen no n’akoma botowee, na ɔmaa no ntotɔserɛdze no.3
© 2014 Intellectual Reserve, Inc. Wɔakora ho tumdzi nyina. USA na wotsintsimii. English approval 6/14. Translation approval 6/14. Visiting Teaching Message, July 2014. Fante.10867 502 ne nkyerɛasee
Susu Iyi
Obesi dɛn na hɛn asɛm a Jesus Christ dzi ma hɛn botum ekenyan hɛn ma ma yɛakyerɛ ehumbɔbɔr na bɔnfakyɛ ama nkaafo?