Yut

Spendem Taem blong Savegud Bubuwoman blong Mi

I Kam long Jiwelen Kata.

Woman we i raetem hemia i stap long Vijinia, YSA.

Long wan long olgeta Yang Woman projek blong mi, mi bin volontia blong helpem bubuwoman blong mi blong faenem ol bubu blong hem. Mitufala stap luktru long ol maekrofilm long famle histri senta long Mesa, Arisona, YSA. Taem mitufala i stap sidaon tugeta mo stap lukaotem famle blong mifala, mi stat blong tingting: “?Mi rili save gud bubuwoman blong mi we i stap sidaon kolosap long mi?”

Mitufala i faenem plante memba blong famle, mekem rere ol infomesen blong olgeta, mo bin go long Mesa Arisona Tempol blong mekem ol baptaes mo konfemesen blong olgeta. I no longtaem afta, bubuwoman blong mi i bin givim long mi wan koleksen blong famle histri blong hem.

From hem i stap harem nogud from ol joen blong hem oli stap soa, i had tumas blong bubuwoman blong mi i taep. Mi glad blong helpem hem long saed blong kompiuta. Tugeta, mitufala i raetem ol stori blong laef blong hem blong helpem famle blong mifala long saed blong spirit. Mi lavem blong stap wan pat blong laef blong hem mo lanem plante samting abaot histri blong Jos taem mitufala i wok tugeta long ol projek.