Fas Presidensi Mesej, Julae 2014
Promes blong Hat we I Tanem
Mama blong mi, Mildred Benion Aering, i bin groap long fam komuniti blong Granja, Yuta, YSA. Wan long ol brata blong hem, Roe, i bin folem bisnes blong famle blong lukaotem ol sipsip. Taem hem i stap olsem wan yang man, hem i spendem plante wik longwe long hom. Afta long plante yia hem i lusum intres blong hem long Jos. Afta, hem i bin muv i go long Aedaho, YSA, i mared, mo i gat tri pikinini. Hem i gat 34 yia taem hem i ded, mo tetaem ia waef blong hem i gat 28 yia mo ol pikinini blong tufala oli smol.
Nomata we smol famle blong Roe i bin stap long Aedaho mo mama blong mi i bin muv samples 4,025 kilometa, i go long long Niu Jesi, YSA, oltaem hem i stap raetem ol leta blong lav mo ol toktok blong leftemap tingting i go long olgeta. Famle blong angkel blong mi, oltaem oli singaotem mama blong mi: “Anti Mid.”
Ol yia oli pas, mo wan dei, mi kasem wan fon kol we i kam long wan long ol kasen blong mi. Oli bin talem long mi se wido blong Roe i bin ded. Kasen blong mi i talem olsem: “Anti Mid i bin wantem yu blong save.” Anti Mid i bin ded longtaem finis, be famle i stil filim lav blong hem mo oli bin kasem mi blong talemaot long mi.
Mi bin sapraes long hamas mama blong mi i bin putumaot blong mekem wok insaed long famle blong hem i semmak olsem wok we ol profet blong ol man blong Nifae oli putumaot long famle blong olgeta taem oli bin stap kolosap long olgeta. Oli wantem blong tekem olgeta i kam long gospel blong Jisas Kraes. Nifae i bin raetem wan histri, wetem hop ia, se bae i jenisim tingting blong ol pikinini blong ol brata blong hem blong oli kambak long fet blong petriak blong olgeta, Lihae. Ol boe blong Mosaea oli soemaot semfala lav ia taem oli bin prijim gospel long ol pikinini we oli kamaot long laen blong Lihae.
Lod i bin openem ol rod long yumi blong filim lav insaed long famle blong yumi we i save gohed blong oltaem. Ol yangfala insaed long Jos tedei, oli stap filim hat blong olgeta i tanem i go long ol famle blong olgeta. Oli stap lukaotem ol nem blong ol famle memba we oli no gat janis blong kasem ol odinens blong fasin blong sevem man long laef ia. Oli tekem ol nem ia i go long tempol. Taem oli go insaed long ol wota blong baptaes, oli gat janis ia blong filim lav blong Lod mo blong ol famle memba we oli mekem ol odinens long bihaf blong olgeta.
Mi save stap tingbaot yet lav long voes blong kasen blong mi we i bin ring mo talem: “Mama blong mifala i bin ded, mo Anti Mid i bin wantem yu blong save.”
Long yufala we yufala i stap mekem ol odinens blong ol memba blong famle, yufala i stap givimaot lav, olsem ol boe blong Mosaea mo profet Nifae oli bin mekem. Olsem olgeta, bae yu filim glad blong olgeta we oli akseptem ofring blong yu. Bae yu save filim semfala filing ia blong bigfala glad olsem we Amon i bin filim, we i bin talem abaot misinari seves blong hem long ol memba blong famle blong hemwe oli bin stap longwe:
“Taswe, letem yumi presem, yes, bae yumi presem Lod, yes, bae yumi glad, from glad blong yumi i fulap; yes, bae yumi presem God blong yumi blong oltaem. Luk, ?huia bae i save presem tumas, Lod? Yes, ?huia i save talem tumas long saed blong bigfala paoa blong hem, mo blong sore blong hem, mo long fasin blong go tru long hadtaem wetem longfala tingting blong hem we i go long ol pikinini blong ol man? Luk, mi talem long yufala, mi no save talem smolfala pat blong samting we mi mi filim” (Alma 26:16).
Mi talem testemoni se ol filing blong lav we yu gat long ol memba blong famle blong yu—nomata weaples oli stap—oli wan ansa blong promes ia, se Elaeja bae i kam. Hem i bin kam. Hat blong ol pikinini oli stap tanem i go long ol papa blong olgeta, mo hat blong ol papa oli stap tanem i go long pikinini blong olgeta (luk long Malakae 4:5–6; Joseph Smith—History 1:38–39). Taem yu filim strong tingting blong faenem ol nem blong ol bubu blong yu mo tekem ol nem ia i go long tempol, yu stap eksperiensem wanem profesi ia i stap talem.
Hem i wan blesing blong stap laef long taem ia we promes blong jenis blong hat i stap hapen. Mildred Benion Aering i gat strong filing ia long hat. Hem i lavem famle blong brata blong hem, mo hem i bin helpem olgeta. Oli filim hat blong olgeta i tanem i go long Anti Mid from se, oli save se hem i lavem olgeta.
© 2014 i kam long Intellectual Reserve, Inc. Oli gat evri raet. Oli printim long YSA. Oli letem long Inglis: 6/14. Oli letem translesen: 6/14. Translesen blongFirst Presidency Message, July 2014. Bislama. 10867 852.
Yusum Mesej Ia blong Tij
Maet yu wantem blong ridim ol profesi abaot spirit blong Elaeja wetem olgeta we yu stap visitim olgeta (luk long Malakae 4:5–6; Joseph Smith—History 1:38–39). Tokbaot ol rod blong save kam blong mekem wok blong famle histri, wetem tu ol tul olsem indeksing, foto, mo storian long blog. Sapos olgeta we yu visitim oli no save long FamilySearch.org, tingting blong tekem sam taem blong soem long olgeta.