ITUKUTUKU ni Mataveiliutaki Taumada, Julai 2014
Na Yalayala ni Vagolei na Yalo
Na marama tinaqu, o Mildred Bennion Eyring, a tubu cake ena dua na itikotiko raraba ni teitei mai Granger, Utah, Amerika. E dua vei iratou na ganena, o Roy, a vakamuria talega na bisinisi ni matavuvale o ya me susu sipi. Ni se cauravou a dau biuta na nodratou itikotiko me vica na macawa. Ni toso na gauna sa vaka me sega ni taleitaka me mai Lotu. Sa mani toki sara ki Idaho, Amerika, vakamau, ka tolu sara na luvena. A mani mate ni se qai yabaki 34 ka yabaki 28 tiko o watina ka ratou se lalai na gone.
E dina ga ni ratou tiko sara mai Idaho na matavuvale lailai nei Roy ka tiko yawa sara yani o tinaqu ena 2, 500 na maile (4,025 na kilomita) ki New Jersey, Amerika, e dau volavola o tinaqu vei iratou ena yalololoma kei na veivakayaloqaqataki. E ratou dau vakasamei tinaqu na matavuvale nei noqu momo ka vakatokai koya me ko “Nei Mid.”
Ena dua na siga, ni toso na yabaki, a qiriti au mai e dua vei ira na tavalequ. A tukuni mai ni sa mai mate na yada nei Roy. A kaya mai o tavalequ, “E gadreva o Nei Mid mo dou kila.” Sa mate makawa sara o Nei Mid, ia e ratou se vakila tikoga na matavuvale nona loloma ka guta me ratou tukuna vei au.
E tarai au na levu ni veivakauqeti ni ilesilesi nei tinaqu ena nona matavuvale ni sa vakataka na nodra itavi na parofita ni Nifai e veivakauqeti ki na nodra matavuvale ena nodra volekati ira tiko na wekadra era gadreva mera kauti ira mai ki na kosipeli i Jisu Karisito. A vola o Nifai e dua na itukutuku a nuitaka ni na vakauqeti ira na luvei iratou na tuakana mera lesu ki na vakabauta nei nodratou peteriaki, o Liai. E ratou a vakaraitaka na luvei Mosaia na loloma vata oqo ni ratou vunautaka yani na kosipeli kivei ira na kawa i Liai.
Sa vakarautaka tu na Turaga na sala meda vakila na loloma ena matavuvale e rawa ni tomani yani me tawamudu. Era sa vakila tiko nikua na itabagone ena Lotu ni sa mua tiko na yalodra ki na nodra matavuvale. Era sa vaqara tiko na yaca ni lewe ni matavuvale a sega ni yaco vei ira na madigi mera ciqoma na cakacaka vakalotu ni veivakabulai ena bula oqo. Era kauta na yaca oqori ki valetabu. Ni ra dromuci yani ena wai ni papitaiso, sa yaco vei ira na madigi mera vakila na loloma ni Turaga kei ira na lewe ni matavuvale era vakayacora tiko na cakacaka vakalotu oqo ena vukudra.
Au se nanuma rawa tikoga na voqa ni domo ni loloma nei tavalequ ni kaya, “Sa mai mate o tinai keitou, ka gadreva o Nei Mid mo dou kila.”
Kivei kemuni ko ni sa vakayacora na cakacaka vakalotu baleti ira na lewe ni matavuvale ko ni sa cakava tiko ena loloma, me vaka e ratou a cakava na luvei Mosaia kei na parofita o Nifai. Me vakataki ira, ko na vakila na reki baleti ira era sa ciqoma na nomuni cau. Mo na namaka talega mo vakila na marau levu a yaco vei Amoni, ni kaya vakaoqo baleta na nona veiqaravi ni kaulotu vei ira na wekana vakayawa:
“Ia me datou vakamolimoli mada, tou vakamolimoli vua na Turaga, ia me datou reki ena ka oqo, ni sa vuabale na nodatou marau, ia me datou vakacaucautaka na noda Kalou ka sega ni mudu. Raica ko cei ena vakacaucautaka vakavinaka na Turaga? Io, ko cei sa rawa me vakacaucautaka vakavinaka na levu ni nona kaukauwa, na nona loloma, kei na vosoti ira vakadede na luve ni tamata? Raica, au sa kaya vei kemudou, sa sega mada ga ni rawa vei au meu vakamacalataka vakavinaka na levu ni noqu vakacaucautaki Koya” ( Alama 26:16).
Au vakadinadinataka ni yalo ni loloma o vakayacora vei iratou nomu lewe ni matavuvale—ena vanua cava ga era tiko kina— sa ivakaraitaki ni sa yaco na yalayala ni na yaco mai o Ilaija. A yaco dina mai o koya. Era sa vagolei na yalodra na gone vei ira nodra qase, kei na yalodra na qase vei ira na gone (raica na Malakai 4:5–6; Josefa Simici—Ai Tukutuku 1:38–39). Ni sa maqusa mai na yalomu mo vakasaqarai ira nomu qase e liu ka kauta na yacadra ki valetabu, ko sa vakayacora tiko na kena sa vakavotukanataki na parofisai o ya.
Sa dua na veivakalougatataki meda bula ena gauna e yalataki sa mai vakavotukanataki kina na kena vagolei na yalo. E vakila o Mildred Bennion Eyring na maqusa ni yalona. A lomana na matavuvale nei ganena, ka dodoliga yani vei iratou. E ratou vakila ni ratou sa lomani Nei Mid baleta ni ra kila ni lomani iratou o koya.
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni First Presidency Message, July 2014. Fijian. 10867 858
Veivakavulici mai na iTukutuku Oqo
Sa rawa mo wilika na parofisai me baleta na yalo i Ilaija vei ira ko sikova (raica na Malakai 4:5–6; Josefa Simici—Ai Tukutuku 1:38–39). Vakamacalataka na sala ni vakaitavi ena tuva kawa, oka kina na iyaya ni cakacaka me vakataka na tuva matanivola, veitaba, kei na veibulagoci. Kevaka era sa kila vakavinaka tu o ira ko sikova na FamilySearch.org, sa rawa mo vakayagataka e dua na gauna mo vakaraitaka kina.