Mensahe ti Umuna a Panguluen, Hulio 2014
Ti Kari ti Panangisubli kadagiti Puso
Dimmakkel ni nanangko a ni Mildred Bennion Eyring iti kataltalonan a komunidad ti Granger, Utah, USA. Maysa kadagiti kakabsatna a lallaki, ni Roy, ti nangsurot iti negosio ti pamilia a panagtaraken ken panagpatanor kadagiti karnero. Kas maysa nga agtutubo binubosna ti adu a lawas nga adayo manipud iti pagtaengan. Iti panaglabas ti panawen nagbalin nga awan panagessemna a mapan iti Simbaan. Idi agangay immakar isuna iti Idaho, USA, nagasawa, ket naaddaan iti tallo nga annak. Pimmusay isuna idi agtawen iti 34 idi agtawen iti 28 ti asawana ken babassit pay dagiti annakda.
Nupay adda idiay Idaho ti bassit a pamilia ni Roy ken immakaren ni nanangko iti agarup 2,500 a milia (4,925 km) iti New Jersey, USA, masansan a nagsursurat kadakuada kadagiti surat ti pammateg ken pammaregta. Siaayat nga inawagan ti pamilia ti ulitegko ni nanangko iti “Ikit Mid.”
Napalabas dagiti tawen, maysa nga aldaw nakaawatak iti awag iti telepono manipud iti maysa kadagiti kakasinsinko. Naipadamag kaniak a natayen ti balo nga asawa ni Roy. Kinuna ti kasinsinko, “Kayat ni Ikit Mid a maammuam.” Nabayagen a pimmusay ni Ikit Mid, ngem marikna pay laeng ti pamilia ti ayatna ket indanonda nga imbaga kaniak.
Nalagipko no kasano nga impatungpal ni nanangko ti akemna iti pamiliana kas iti akem dagiti propeta a Nephite kadagiti pamiliada babaen ti panagtalinaedda nga asideg kadagiti kabagyanda a kayatda a pangisangbayan iti ebanghelio ni Jesucristo. Insurat ni Nephi ti rekord a ninamnamana a mangimpluensia kadagiti annak dagiti kakabsatna a lallaki tapno agsubli ti pammatida iti amada, ni Lehi. Impakita dagiti annak a lallaki ni Mosiah ti isu met la nga ayat bayat ti panangikasabada iti ebanghelio kadagiti an-annabo ni Lehi.
Nangipaay ti Apo kadagiti wagas a pakariknaantayo iti ayat kadagiti pamilia a makapagtultuloy iti agnanayon. Marikrikna dagiti agtutubo iti Simbaan a maisubli dagiti puspusoda kadagiti pamiliada. Agsuksukisokda iti nagnagan dagiti miembro ti pamiliada nga awanan idi ti gundaway nga umawat kadagiti ordinansa ti pannakaisalakan iti daytoy a biag. Ipanda dagita a nagnagan iti templo. No sumrekda kadagiti danum ti panagbuniag, addaanda iti gundaway a mangrikna iti ayat ti Apo ken dagiti miembro ti pamilia a yar-aramidanda kadagiti pangisaup [proxy] nga ordinansa.
Malaglagipko pay laeng ti ayat iti timek ti kasinsinko nga immawag ket kinunana, “Natayen ni nanangtayo, ket kayat ni Ikit Mid a maammuam.”
Dakayo a mangar-aramid kadagiti ordinansa para kadagiti miembro ti pamilia ket tumultulongkayo a napnuan ayat, kas iti inaramid dagiti annak a lallaki ni Mosiah ken ni propeta Nephi. Kas kadakuada, mariknayonto ti rag-o para kadagiti umawat iti idatdatonyo. Manamnamayo pay ti mangrikna iti isu met la a dakkel a pannakapnek kas ken ni Ammon, a nagkuna maipapan iti panagserbina a kas misionario kadagiti miembro ti pamilia nga adda iti adayo.
“Ngarud, idaydayawtayo, wen, idaydayawtayo ti Apo; wen agragsaktayo, ta napnon ti rag-otayo; wen, dayawentayo ti Diostayo iti agnanayon. Adtoy, asino ti makaitangsit iti kasta unay iti Apo? Wen, asino ti makaibaga iti kasta unay iti naindaklan a bilegna, ken iti kaasina, ken ti naunday a panagituredna para kadagiti annak ti tattao? Adtoy, kunak kadakayo, awan ti masaok uray no sangkabassit laeng iti mariknak” (Alma 26:16).
Paneknekak a dagiti rikna ti ayat nga adda kadakayo para kadagiti miembro ti pamiliayo—sadino man ti yanda—ket pannakaipatungpal ti kari nga umayto ni Elijah. Immayen. Maisubsublin ti puspuso dagiti annak kadagiti ammada, ken maisubsublin ti puspuso dagiti amma kadagiti annakda (kitaen iti Malakias 4:5–6; Joseph Smith—Pakasaritaan 1:38–39). No mariknayo ti tarigagay a mangsapul iti nagnagan dagiti kapuonanyo ket ipanyo dagita a nagnagan iti templo, mapadpadasanyon ti pannakaipatungpal dayta a padto.
Maysa daytoy a parabur ti agbiag iti panawen no maipatpatungpalen ti kari a maisubsublin dagiti puspuso. Narikna ni Mildred Bennion Eyring ti tarigagay iti pusona. Inayatna ti pamilia ti kabsatna a lalaki, ket tinulonganna ida. Nariknada ti puspusoda iti ayat ken ni Ikit Mid gapu ta ammoda nga inayatna ida.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, July 2014. Ilokano. 10867 864
Panangisuro manipud iti Daytoy a Mensahe
Mabalin a kayatyo nga ibasa dagiti padto maipapan iti espiritu ni Elijah kadagiti sarsarungkaranyo (kitaen iti Malakias 4:5–6; Joseph Smith—Pakasaritaan 1:38–39). Paglilinnawagan dagiti wagas a pakairamananyo iti family history, agraman dagiti usaren a kas iti indexing, photography, ken blogging. No saan a pamiliar dagiti sarungkaranyo iti daytoy FamilySearch.org, mangted iti gundaway a mangipakita iti daytoy kadakuada.