Klumech er a First Presidency, Ongeuid el buil 2014
Se el Yaksok er a Beltel a Reng
A delak er a, Mildred Bennion Eyring, a mlukeroul er a sers er a beluu er a Granger, Utah, USA. A ta er a ochedal el, Roy, a ultirakl er tia el siobai er a telungalek lomekeroul a sib. Se er a le ngeasek el chad eng mle klou el temel a cheroid er a blai. Cherengel a taem eng mlo diak el sa el semeriar er a Ikelesia. Ng millukl el mo er a beluu er a Idaho, USA, e mlo bechiil, e mlo er ngii a retedei el ngelekel. Ng di mle okedei me a eua rekil e mad e a bechil a lluich me a eai a rekil e a rengelekir a kmal dirk mle mekekerei.
Ng uaisei el tia el kekerei el telungalek er a Roy a mla er a Idaho e a delak a mla melukl el 2,500 miles (4,025 km) el mo er a New Jersey, USA, eng di ng mle blechoel meluches a babier lolchotel a beltikelreng me a omelisiich el mo er tir. Tia el telungalek er ngika el okdemelek a mle blechoel lolker er a delak el “Anti Mid.”
Betok el rak a mlocheuekl, e a ta er a klebesei e ak ngiluu a dengua er a ta er tirka el ngelekel. Ng silbedak el kmo ngika el mesobil mle bechil a Roy a mla mad. Ng dilu el kmo a, “Anti Mid a soal a bo modengei.” A Anti Mid a meketeketang er a lemad, eng di tia el telungalek a dirk omelchesiu er a beltkil a rengul me a uchul e te ouchais er ngak.
Ng mlo mechas a renguk er a betok el ngerachel er a telungalek el delak a kildmokl el osisiu ngii me a ikel ngerachel el reprofet er a re Nephite a kildmokl er a chelsel a telungalek er tir el mle kmeed er a rechederir le ng mle sorir lomerk er a ebangkelio er a Jesus Kristo el mo er tir. A Nephi a milluches er a cheldecheduch e ulureng me bo luchul e a rengelekir a rodam er ngii lobult el mo er a klechelid er a bdelul a kleblillir el, Lehi. A rengelekel a Mosiah el sechal a ulechotii osisiu el beltikelreng er a lolisechakl er a ebangkelio el mora rengelekel a Lehi.
A Rubak a mla kudmeklii a rael el sebeched el melchesuar a beltikelreng er a telungalek el sebechel melemolem el mora ulebongel. A rengeasek el chedal a Ikelesia er chelechal sils a omelchesiu er a beltel a rengrir el mo er a telungalek er tir. Te osiik a ngklir a rechedal a telungalek el tir el dimlak a techellir el ngmai chedaol ruoll el kirel osebelel a klengar tir. E ngmai a ikal ngakl el mo er a templo. Se el siseb er a techolbechelid, e ngar er ngii a techellir lomelchesiu er a beltikelreng er a Rubak me a dirrek el rechedal a telungalek el tir omtechei el meruul chedaol ruoll el kirir.
A kmal dirk dobedebekii se el beltikelreng er ngika el ngelekel okdemelek er a lomekedong el du el kmo, “A delemam a mla mad e a Anti Mid a locha soal abo modengei.”
Kemiu el meruul chedaol ruoll el kirir a rechedal a telungalek a olchotel a beltikelreng, el uaia rengelekel a Mosiah el sechal me a profet Nephi. Kom dirrek el mo melchesuar a deureng el kirir tirkel kongei a ureriu, el uai tir. Kom dirrek el mo melchesuar a klou el klungiolel a reng el uaia Ammon, el millekoi el kirel a urerel misionari el mo er a recheroid el chedal a telungalek:
“A leuaisei, e bo de ngara deureng, oi, deureng er a Rubak; oi, kede ngara deureng, el mui el deureng; oi, kede kobkelli a Dios er kid el mo cherechar. Ele, ng techa mui er a deureng er a Rubak? Oi, ng techa melekoi el kirel a mesisiich el klisichel, me a chubechub er ngii, me a kllouelreng er ngii el kirir a rengelekel a chad? A kmu, er kemiu el kmo, ng diak el sebechek el dulii a di telkib er se el kumelchesiu er ngii” (Alma 26:16).
A kuchais er a klaumerang er ngak el kmo se el beltikelreng el momelchesiu er ngii el mo er a rechedal a telungalek—er kau er a ngii di el ker le ngar er ngii—a olchotel a yaksok el kmo a Elijah mei. Ngii a mlei. A rengrir a rengalek obult el mo er a redemerir, me a rengrir a redemerir obult el mo er a rengelekir (mesa Malachi 4:5–6; Joseph Smith—History 1:38–39). Se el momelchesiu el semeriar losiik a ngklir a rebeldekem e ngmai aika el ngakl el mo er a templo, e kau a oureor el mengedmokl er tia el ulaoch.
Ng klengeltengat el de kiei er a taem el yaksok er a beltel a reng a mla mekedmokl. A Mildred Bennion Eyring a ulemelchesiu er tiaikid el klemeriar reng er a rengul. Ng mle betik a rengul er a telungalek er a ochedal, e ulengeseu er tir. Tir a ulemelchesiu a rengrir lobult er a beltikelreng el mo er a Anti Mid le tir el mle medengei el kmo ngii a betik a rengul er tir.
© 2014 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/14. Kengei er a oidel: 6/14. Oidel a First Presidency Message, July 2014. Palauan. 10867 881
Osischeklel Tia el Klumech
Ng locha ungil a bo mchiuii a ulaoch el kirel a reng er a Elijah lobengterir tirkal moldingel er tir (mesa Malachi 4:5–6; Joseph Smith—History 1:38–39). Mosaod a teletael el uchul a urerel a reksi er a telungalek, luldimukl er a rua indexing, siasing, me a blogging. Alsekum e tirka el moldingel er tir a diak el sa el medengelii a FamilySearch.org, e ngungil bom ngai a sesei el taem losischekelterir.