Fas Presidensi Mesej, Ogis 2014
Karemaot Kakae long Garen blong Papa God
Wan woman nem blong hem Krista i bin wok long wan smol kampani blong sid. Hem i lavem wok blong hem. Hem i wan bigfala samting blong stap tingbaot se wan wan long ol smol sid ia i gat fasin ia blong jenisim hem wan i kam wan gudfala samting— wan karot, kabij, o wan bigfala ok tri.
Krista i laekem blong stap sidaon long kompiuta blong hem mo tekem ol oda mo stap ansarem ol kwestin. Be long wan dei hem i kasem wan komplen we i mekem hem i tingting plante.
“Ol sid ia oli no wok,” kastoma i talem. “Mi bin pem olgeta tu (2) manis i pas nao be i nogat wan samting yet.”
“Yu bin planem olgeta long gudfala graon mo givim inaf wota mo sanlaet?” Krista i askem.
“No, be mi mekem wok blong mi finis,” kastoma i ansarem hem. “Mi bin pem ol sid ia finis. Nomata wanem, oli mas gro.”
“Be yu no bin planem olgeta?”
“Heven i luk mi, no. Hemia i minim se bae mi mekem han blong mi i toti ia.”
Krista i stap tingting long hemia mo hem i ting se bae hem i mas raetem ol rul blong olsem wanem nao blong planem ol sid ia. Hem i mekemap tingting blong hem se fas rul bae hem i: “Yu mas folem ol rul blong olsem wanem blong planem ol sid blong oli save gro. Yu no save putum olgeta i stap long sef mo ting se bae oli gro.”
I no longtaem afta, wan narafala komplen i kam mo mekem hem i fasfas.
“Ol sid ia oli no givim kakae,” wan kastoma i talem.
“?Yu bin planem olgeta long gudfala graon?” Krista i ansa. “?Yu bin givim inaf wota mo sanlaet?”
“O, yes,” kastoma i talem. “Mi mekem evri samting ia—stret olsem we i stap long paket. Be i no wok.”
“?I no gat wan samting i hapen nating? ?Oli no sakem lif?”
“I no gat wan samting i hapen,” kastoma i talem. “Mi bin planem stret olsem we oli talem. Mi stap hop blong kakae tomato long sava. Naoia mi harem nogud tumas”
“Yu wet,” Krista i ansarem hem. “Yu stap talem se yu jes planem ol sid ia tedei nomo?”
“No stap kranke,” kastoma i ansa. “Mi bin planem olgeta wan (1) wik i pas nao. Mi save se bae mi no luk tomato long fas dei; mi bin wet long taem. Be mi talem long yu, mi bin givim plante wota mo wet plante bitwin long taem ia kasem naoia.”
Krista i save se hem i mas ademap wan moa rul: “Ol sid ia oli jenis folem loa blong saens. Sapos yu planem ol sid ia long moning mo ting se bae yu kakae tomato long sem wik ia, sore tumas. Yu mas gat fasin blong wet longtaem mo wet long wok blong laef blong tekem ples.
Evri samting i bin go gud kasem Krista i kasem wan moa komplen.
“Mi no glad long ol sid blong yufala,” kastoma i stat. “Mi bin planem olgeta semmak olsem we paket i talem. Mi givim wota, mekem sua se san i saenem olgeta, mo wet kasem oli givim kakae.”
“Mi harem olsem se yu bin mekem evri samting i stret,” Krista i talem.
“Evri samting ia i oraet,” kastoma i ansa. “Be mi bin kasem ol sukini!”
“Rikod blong mi i soem se yu bin odarem ol sukini ia nao,” Krista i talem.
“Be mi mi no wantem sukini; mi wantem pamkin!”
“Mi no kasem yu.”
“Mi bin planem ol sid ia long graon—blong pamkin, semmak ples we mi bin plantem ol pamkin las yia. Mi toktok gud long ol plan ia evri dei, mi talem long olgeta se bae oli kam ol naesfala pamkin. Be i no gat ol bigfala, raon, orenj pamkin, mi kasem ol long, grin sukini. Plante long olgeta!”
Krista i save se ating ol rul ia i no naf mo i nid blong gat wan stamba toktok: “Ol sid we yu plantem mo taem we yu planem bambae i soemaot wanem kaen kaekae bambae yu karemaot.”
Loa blong karemaot kakae long Garen
Aposol Pol i tijim abaot fasin blong karemaot kakae long garen blong Lod:
“Yufala i no mastik long samting ya. I no gat wan man i save giaman long God. Wanem sid we man i planem fastaem long garen blong hem, be frut blong hem nomo man ya bambae i mas kakae.
“Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we ded nomo. Be sipos hem i planem fasin we Tabu Spirit i wantem, Tabu Spirit bambae i givim kakae long hem, we Hemia laef ya we i no save finis.
“Bambae yumi no kam slak blong mekem ol gudfala fasin, from we sipos yumi mekem olsem, bambae long stret taem blong hem, yumi save kasem kakae from ol had wok ya blong yumi” (Galesia 6:7–9).
Long ol taem blong yumi tedei. Lod i givim wan moa waes lukluk insaed long loa ia we i no save jenis:
God i talemaot se i gat wan loa, we oli bin talemaot long heven blong i stap foreva bifo faondesen blong wol ia, we tru long loa ia evri blesing i kamaot long hem.—
Taem yumi kasem ol blesing long Papa God, hem i tru long fasin blong stap obei long loa ia we oli bin talem finis (luk long D&C 130:20–21).
Wanem we yumi planem, bambae yumi kasem.
Kakae we i kamaot long garen blong papa God i gud i bitim evri samting we yu save tingbaot. Blong givim ona long Hem, ol plante plante blesing blong Hem “olsem we man i fulumap bag i seksekem, i ramem gogo i fulap gud, i folfoldaon. Fasin we yufala i folem blong givim samting i go long narafala man, Hemia nao fasin we God bambae i folem blong givim ol samting i kam long yufala” ( Luk 6:38).
Olsem we ol sid blong wol ia, i nidim blong wokhad from mo gat fasin blong wet longtaem, I semmak olsem ol plante blesing blong heven. Yumi no save putum relijen blong yumi i stap nating antap long wan sef mo gat tingting se bambae yumi kasem ol blesing long saed blong spirit. Be sapos yumi plantem mo lukaotem gud ol standet blong gospel long evridei laef blong famle blong yumi, i gat wan gudfala janis se bae ol pikinini blong yumi bae oli groap mo gat ol frut blong spirit we bae oli laekem tumas mo semmak long ol fiuja jeneresen.
Papa God I no ansarem prea blong yumi long semtaem— samtaem yumi luk se ansa i no kam nating—be Papa God i save wanem i gud blong ol Pikinini blong Hem. Leftemap tingting blong yu se, wan dei bambae yu save lukluk i moa klia; mo long dei ia bae yu save luksave se heven i gud mo i kaen.
Naoia, gol mo bigfala glad blong yumi hem i blong wokbaot long futstep blong Masta mo Sevya blong yumi mo blong laef long wan gudfala laef folem standet blong Hem mo hem i promesem yumi se bae ol blesing ia we i gud tumas we bae oli karemaot long garen blong Papa God bae hem i blong yumi.
Wanem we yumi planem, bambae yumi kasem.
Hemia hem i loa blong heven.
Hemia hem i loa blong karemaot kakae long garen blong Papa God.
© 2014 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/14. Oli letem translesen: 6/14. Translesen blong First Presidency Message, August 2014. Bislama. 10868 852
Yusum Mesej Ia blong Tij
Tokbaot wetem olgeta we yu visitim olgeta; olsem wanem nao loa blong karemaot kakae long garen blong Papa God i wok long ol rilesensip, storian mo testemoni, ol gol blong wok mo skul. Yu save ridim mo tingting long ol skripja we i tokbaot loa ia, olsem Ol Proveb 11:18 ; Seken Korin 9:6; mo Alma 32. Leftemap tingting blong olgeta blong luklukbak long ol gol we oli bin mekem mo putum ol niufala gol blong kasem ol stret risal. Helpem olgeta blong mekem wan plan blong oli stap folem oltaem blong save kasem ol stamba tingting blong olgeta we i blong longtaem.