Ngaahi Tāpuaki ʻo e Lakanga Fakataulaʻeiki Kuo Foaki pea Toe Fakafoki Mai
Suli Kesi, Kolomupia Pilitānia, Kānata
Tā fakatātā ʻa Bradley Clark
ʻI ha ngaahi taʻu lahi kuohilí lolotonga ʻemau maʻu meʻatokoni efiafi mo ha ongomātuʻa mei homa uōtí, ne ma maʻu ha telefoni mei he tafaʻaki tokoni fakavavevave ʻo e falemahaki ʻi homau koló. Naʻe kole mai ʻa e ʻōfisá ki hoku husepānití, ko e palesiteni fakasiteiki ia he taimi ko iá, pe ʻe lava ke ʻalu ange ha taha mei hotau Siasí ʻo sio ki ha talavou taʻu 17 ne lavea lahi hono ʻulú.
ʻI he aʻu atu hoku husepānití naʻá ne ʻilo ai, ne tō ʻa e talavoú ni ʻi ha saitiuoka sima mei ha fakafaletolo ne fute ʻe 30 (mita ʻe 9) hono māʻolungá. Naʻe longo pea ʻikai ha ʻamanaki ʻe moʻui.
Naʻe fai ngāue hoku husepānití mo e tangata naʻe ʻaʻahi ange ki homau ʻapí ki he talavoú ni. Naʻe fai e fetuʻutaki ki hono fāmilí, ʻa ia naʻa nau nofo ʻi ha feituʻu maile ʻe taha afe (kilomita ʻe 1,610) mei he feituʻu naʻa mau ʻi aí, ʻo fakamatala kiate kinautolu ʻa e meʻa ne hokó.
Ne fakaofo hili ha ngaahi ʻaho siʻi mei heʻene ʻi he loki fakatuʻutāmakí, ne ʻā e talavoú ni pea kamata ke ne fakaakeake. ʻI ha uike ʻe fā ne ʻaʻahi ʻene ongomātuʻá ki falemahaki he ʻaho kotoa pē. Pea nau fakapuna ia ki honau ʻapí ki ʻAlesona, USA, ke fakakakato ki ai ʻene fakaakeaké.
Hono ʻikai fakaofo ʻete mātā tonu ʻa e mālohi fai fakamoʻui ʻo e ngāue ʻa e lakanga fakataulaʻeikí ke ne foaki ha faingamālie ki he talavou ko ʻení ʻi ha kahaʻu moʻui lelei. Pea tatau mo e hā ʻeku houngaʻia ʻi ha husepāniti mo e mēmipa homau uōtí ʻoku nau mateuteu ke fakahoko ʻa e ngāue ʻo e lakanga fakataulaʻeikí pea ngāue ʻi he mafai fakalangí.
Naʻá ku fuʻu ongoʻi e meʻa ne foua ʻe he ongomātuʻa ʻa e talavoú ni, ʻa ia naʻá na nofo mamaʻo ʻi he taimi ne hoko ai e faingataʻa ko ʻení. Ka ne u fiefia ke ʻilo naʻá na ongoʻi fiemālie ʻi heʻena ʻilo ne maʻu ʻe hona fohá ha tāpuaki ʻo e lakanga fakataulaʻeikí pea naʻe fiefia mo e kāingalotú ke tokoni.
Naʻe lahi ange ʻeku ongoʻi ʻofa ki he ongomātuʻa ko ʻení ʻi ha ngaahi taʻu siʻi mei ai ʻi heʻeku maʻu ha telefoni ʻo fakahoko mai ko hoku fohá, ʻa ia ne nofo maile ʻe 2,000 (kilomita ʻe 3,220) hono mamaʻó, naʻe tau ai ha kā lolotonga ʻene heka pasikala ki he ʻunivēsiti naʻe ako mo ngāue aí. Neongo ne u ongoʻi taʻeʻaonga ke tokoni kiate ia ka naʻá ku fakamālō mo ongoʻi nonga ke ʻilo naʻe fai e fetuʻutaki ki he ongo faifekau taimi kakató ke foaki ha tāpuaki ʻo e lakanga fakataulaʻeikí ki hoku fohá, pea naʻe tokoni mai ʻa e uooti Sā Paulo, Minesota, USA ki he ngaahi fie maʻu fakafāmilí. Naʻe fafanga hono fāmilí ʻe he kāingalotú pea tokoni ki hono uaifí, ʻa ia ne fāʻele ʻi he ʻaho kimuʻa he fakatuʻutāmakí, mo tokoni ki heʻene fānau kehe ʻe toko tolú.
Fakakaukau ki he tupulaki ʻeku loto houngaʻiá ʻi heʻeku ʻilo ko e faifekau naʻá ne foaki e tāpuaki maʻa homa fohá, ko e talavou tatau pē ia naʻe foaki ange ʻe hoku husepānití ʻa e tāpuaki ʻi he taʻu ʻe nima kimuʻá. Naʻe fakaofo kiate au ʻa e foki kakato mai e tāpuaki ne foaki atu kimuʻá!
ʻOku hokohoko atu ke tupulaki ʻeku tuí mo hono fakahoko e lotu fakamālō ki heʻeku Tamai Hēvani ʻofá, ʻi heʻeku fakakaukau ʻokú Ne ʻafioʻi kitautolu kotoa mo e ngaahi meʻa ʻoku tau fie maʻú. ʻOku ou ʻilo naʻe ʻi ai ʻa e faifekau ko ʻení ke mau mamata ki he tokaimaʻananga ʻa e ʻOtuá ki he meʻa kotoa pē ʻi ha founga fakataautaha moʻoni.