Parau Poro‘i na te mau tuahine hahaere, Atete 2014
Te misioni hanahana a Iesu Mesia : Mesia
A tuatapapa na roto i te pure i teie materia ma te imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi i to outou faaroo Ia’na e i te haamaitai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Te haapii nei te mau papa‘iraa mo‘a e, e nehenehe tatou e parahi i mua i te aro o te Atua « na roto i te mana, e te aroha, e te maitai hoi o te Mesia Mo‘a » (2 Nephi 2:8). Mesia o te « hoê ta‘o Aramaika e Hebera te auraa ‘tei faatahinuhia’ … I roto i te Faufaa Apî ua piihia Iesu Tarâ, na roto i te reo Heleni hoê â e o Mesia. Te auraa ra, te Peropheta, te Tahu‘a, te Arii, e te Faaora tei faatahinuhia ».1
Ua faaite papû mai o Elder Jeffrey R. Holland no te Pŭpŭ no te Tino Ahuru ma Piti Aposetolo e : « Ua ite au e o [Iesu Mesia] te Mo‘a no Iseraela, te Mesia o te haere faahou mai i te hoê mahana i roto i te hanahana hopea, no te faatere arii i ni‘a i te fenua nei, ei Fatu no te mau fatu e ei Arii no te mau arii. Ua ite au e aore hoi e i‘oa i horo‘ahia mai i raro a‘e i te ra‘i, e tia’i i te tane [aore râ i te vahine] ia faaorahia ».2
« O [Iesu Mesia] te Faaora e te Ora o te Ao nei », te parau ïa a te Peresideni Dieter F. Uchtdorf, tauturu piti i roto i te Peresideniraa Matamua. « O Oia te Mesia tei fafauhia. Ua ora Oia i te hoê oraraa maitai hope e ua pohe no ta tatou mau hara. Ei piha‘iho Oia ia tatou e a muri noa’tu. E aro Oia i ta tatou mau aroraa. Oia to tatou ti‘aturiraa ; Oia to tatou faaoraraa ; Oia te e‘a ».3
Te Tahi Atu mau Papa‘iraa Mo‘a
No roto mai i te mau papa’iraa mo‘a
Ua riro te mau pĭpĭ vahine a te Mesia ei ite no To’na ti‘araa ei Mesia. Ua riro o Maria i Magadala ei pĭpĭ na Iesu Mesia. O oia tei ite matamua « e ua huri-ê-hia te ofai o te uputa o te menema » i te po‘ipo‘i o te ti‘a-faahou-raa o te Mesia. « Te ti‘a noa ra oia i rapae i pihai iho i te menema » i muri a‘e i te iteraa e aita To’na tino i roto i te menema.
Ua fariu ti‘a’tura oia i muri, ite atu ra oia ia Iesu i te ti‘a-noa-raa, aita râ oia i ite e o Iesu.
« Ua parau maira Iesu ia’na, e tera ra vahine, eaha oe i oto ai ? O vai ta oe e imi na ? Parau a‘e ra oia, ma te mana’o e, o te taata faaapu ra, na ô atu ra ia’na, e hoa, na oe oia i hopoi ê ra, e faaite mai oe i te vaiiho-raa-hia oia e oe na, e na‘u oia e tii atu e hopoi ê.
«Ua parau maira Iesu ia’na, e Maria. Ua fariu atu ra oia ua parau atu ra ia’na, e Raboni ; o tei parauhia ra e, e te Orometua. Ua ite a‘e ra o Maria e, e ere Oia o te taata faaapu, o Iesu Mesia râ, te Mesia. (A hi‘o Ioane 20:1–17.)
© 2014 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no Visiting Teaching Message, August 2014. Tahitian. 10868 895
A feruri i teie nei
No te aha e mea faufaa ia taa maitai i te ti‘araa o te Faaora ei Mesia ?