Mensahe iti Visiting Teaching, Enero 2015
Dagiti Kababalin ni Jesucristo: Managtungpal nga Anak
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati • Pamilia • Tulong
Ti panangsurot iti pagwadan ni Jesucristo maipapan iti panagtungpal ket mangpadakkel iti pammatitayo Kenkuana. “Nakaskasdaaw kadi,” kinuna ni Elder Jeffrey R. Holland ti Korum dagiti Sangapulo-ket-dua nga Apostol, “a pilien ni Cristo ti umuna ken kangrunaan tapno mailawlawag iti bagina maipapan iti pakainaiganna iti amana—nga ay-ayatenna ken tungtungpalenna isuna ken agtulnog kenkuana kas maysa a napudno nga anakna? … Panagtungpal ti umuna a paglintegan ti langit.”1
Isuro dagiti nasantuan a kasuratan “Ket no makagun-odtayo iti ania man a bendision manipud iti Dios, babaen ti panagtulnog iti dayta a paglintegan a naibatay.” (DkK 130:21). Naespirituan a dumur-astayo bayat ti yaasidegtayo iti Dios babaen ti panagtungpal ken yaawistayo iti bileg ti Pannubbot ti Mangisalakan iti biagtayo.
“Bayat ti panagtungpaltayo kadagiti pagbatayan ken bilin ti ebanghelio ni Jesucristo,” kinuna ni Elder D. Todd Christofferson ti Korum dagiti Sangapulo-ket dua nga Apostol, “sagrapentayo ti agtultuloy a pannakaibukbok dagiti bendision nga inkari ni Dios iti pannakitulagna kadatayo. Mangted dagita a bendision kadagiti pamataudan a kasapulantayo nga agtignay imbes nga agpannuraytayo bayat ti panagbiagtayo. … Ti panagtungpaltayo ket mangted iti dakdakkel a panangkontrol iti biagtayo, dakdakkel a kabaelan nga agtignay, nga agtrabaho ken agparnuay.”2
Dagiti it Mainayon a Nasantuan a Kasuratan
Manipud kadagiti Nasantuan a Kasuratan
“Maited kadi iti sabali a tao ti naespirituan a pigsa a resulta ti agtultuloy a panagtungpal kadagiti bilin?” sinaludsod ni Elder David A. Bednar ti Korum dagiti Sangapulo-ket-dua nga Apostol. “Ti nalawag a sungbat … ket saan.”3
Ti pangngarig maipapan ti sangapulo a babbalasang ket maysa a pagarigan daytoy a pagbatayan. Idinto nga innala dagiti amin a babbalasang dagiti pagsilawanda tapno “sumabet iti asawa a lalaki,” lima laeng dagiti manakem a nangikuyog iti lana kadagiti pagsilawanda. Naampang dagiti dadduma pay a lima gapu ta “saanda a nagikuyog iti lana.”
Kalpasanna dimteng ti maysa a pukkaw iti tengnga ti rabii: “Adtoy ti nobio, rummuarkayo a sumabet kenkuana.” Tinarimaan ti amin a babbalasang dagiti pagsilawanda, ngem awan ti lana dagiti naampang a babbalasang. Kinunada kadagiti manakem a babbalasang, “Ikkandakami iti lanayo, ta dagiti pagsilawanmi maiddepdan.”
Insungbat dagiti manakem a babbalasang, “Tapno di agkurang ti maipaay kadakami ken kadakayo: inkayo … ket gumatangkayo ti maipaay kadakayo.” Ket bayat ti kaawan dagiti naampang a babbalasang, dimteng ti nobio ket simrek dagiti manakem a babbalasang ket kimmuyogda kenkuanan ket “nailiktub ti ruangan”
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, January 2015. Ilokano. 12581 864
Ibilang Daytoy
Ania dagiti sumagmamano a pagarigan ti panagtungpal kadagiti nasantuan a kasuratan?