Te Rongorongo man te Moan Beretitentii, Beberuare 2015
Te Kakoaua ao te Rairaki
Bon iai te kaokoro imarenan karekean te kakoaua ibukin te koaua ao te rairaki ni koaua. Te katoto, te Abotoro are e korakora are Betero e kaota ana kakoaua nakon te Tia Kamaiu bwa e ataia bwa Iesu bon Natin te Atua.
“[Iesu] e taku nakoia, Ao ngkami kam taku bwa antai ngai?
“Ao e kaeka Timoni Betero ni kangai, Bon te Kristo Ngkoe, are Natin te Atua are maiu.
“Ao E kaeka Iesu ni kangai, Ko a kabwaia, Timon, ae natin Iona: ba e aki kaota aei nako im te iriko ma te rara, ma E kaotia Tamau are i karawa.Mataio 16:15–17
Ao imwina riki, e tua nakon Betero, ao te Uea e anganna ao e anganiira te kairi nakon te rairaki ni koaua ibukin te maiu. Iesu e taku n te aro aei: “Ao ngkana koa manga rairaki, ao ko na kateimatoaia tarim” (Ruka 22:32).
Iesu e reirei nakon Betero bwa e teimatoa n iai te bitaki ae korakora are e na riao ni karekean te koaua ni kona n iango, n namakin, ao ni mwakuri n aron ana reirei Iesu Kristo ae rairaki ni koaua. Aio te bitaki ae korakora are ti ukoukouria. N te tai are e reke iroura, ti kainnanoa te bitaki anne n reitinako ni karokoa te toki inanon te maiu ni kataaki (taraa Aramwa 5:13–14).
Ti ataia man bwai aika ti rinanona ao man tarataraakiia tabeman bwa reken tabeua taai aika a korakora n korakoran te maiu n tamnei e na bon aki tau. Betero e kakea ao e ataia te Tia Kamaiu e ngae ngke e a tia ni karekea te kakoaua iroun te Tamnei bwa Iesu bon te Kristo. Taan kakoaua ake Teniman n ana Boki Moomon a karekea te kakoaua ae kaineti nakoia are a anganaki bwa ana Boki Moomon bon ana taeka te Atua, ma imwiina riki a mamara n aia mwakuri ni kamatoa bwa Iotebwa Timiti ae ana Burabeti n ana Ekaretia te Uea.
Ti kainnanoa te bitaki inanora, n aron are e kabwarabwaraaki n ana boki Aramwa: “Ao a bon taekinna nakoia aomata te bwai are e riki nakoia—are nanoia e a tia ni bitaki; ao akea riki nanoia ni kan karaoa te buakaka.” (Aramwa 19:33; taraa naba Motiaea 5:2).
Te Uea e reireiniira bwa ngkana ti rairaki ni koaua nakon Ana euangkerio, nanora a na rairaki ao ni bitaki nakon te ibuobuoki n tabekiarake tabeman ngkai a waaki rake nakon te maiu are akea tokina. Ni karekean te rairaki anne, ti kona n tataro ao ni mwakuri inanon te onimaki n riki bwa te aomata ae e boou are e riki man ana Mwakuri ni Kamaiu Iesu Kristo.
Ti kona ni waaki n tataro ibukin te onimaki bwa ti na rairi nanora man mwamwannanoara i bon iroura ao ibukin te bwaintangira n tabeakiniia tabeman riki nakon tabeakinara. Ti kona n tataro ibukin te mwaaka ni kanakoi ara kainikatonga ao ara bakantang.
Te tataro e na riki naba bwa te king ibukin karekean te bwaintangira n tangiran ana taeka te Atua ao ibukin ana tangira Kristo (tara Moronai 7:47–48). Bwai aika uoua a ikotaki. Ngkai ti wareware, iango, ao n tataroakina ana taeka te Atua, ti na kona n tangiria. Te Uea e karinii inanora. Ngkana ti namakina te tangira anne, ti na waaki n tangiria ao n tangira riki te Uea. Ma te nano anne e na roko tangiraia tabeman are ti kainnanoia bwa ti aonga ni kakorakoaia naake e katikuia te Atua iaon kawaira.
N aron te katoto, ti kona n tataro bwa ti na kinaia naake e na karekeia te Uea bwa a na reirei ma Ana mitinare. Mitinare ake a bwanin aia tai a kona n tataro inanon te onimaki bwa a na ataa te bwai are a na reirei iaona ao ni kakoaua mai iroun te Tamnei. A kona n tataro inanon te onimaki bwa te Uea e na karekea namakinan Ana tangira nakoia aomata nako ake a kaitibo ma ngaiia. Mitinare a na bon aki uotiia ni kabane ake a kaitibo ma ngaiia nakon te ran ni bwabetito ao nakon ana bwaintangira te Tamnei ae Tabu. Ma a kona ni karekea te Tamnei ae Tabu bwa raoraoia. Rinanon aia ibuobuoki ao ana ibuobuoki te Tamnei ae Raoiroi, mitinare a na kona ngkanne, ni bitii nanoia, n te taina.
Te bitaki anne e na kakabouaki ngkai ti reitinako n atatai aomata inanon te mwakuri n onimaki ni kakorakoraia tabeman n ana euangkerio Iesu Kristo. Te rairaki bon tiaki ti te mwaneka ke te bwai are e na tiku ibukin te tai teuana n te maiu ma e na riki bwa te bwai ae e reitinako. Te maiu e na kona n ota riki ni karokoa te bong ae kororaoi, ngkana ti noora te Tia Kamaiu ao ni kunea bwa tia riki n ai Arona. Te Uea e kabwarabwara te kawai n te aro aei: Bwa are mai iroun te Atua bon te ota, ao ane e karekea te ota, ao n reitinako inanon te Atua, e na karekea riki te ota, ao te ota anne e na rikirake n ota ao n otamwaaka riki ni karokoa te bong ae kororaoi (tara D&C 50:24).
I berita nakoimi bwa e kona n riki nakoira n tatabemaniira.
© 2015 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/14. Kariaiakaki rairana. Rairan te First Presidency Message, February 2015. Kiribati. 12582 859
Reirei man te Rongorongo Aei
Unimwane David A. Bednar man te Kooram n Abotoro are Tengaun ma Uoman e kabonganai “taetae ni kaikonaki ibukin taian amarake aika karaoaki man uaan kai ” n reirei bwa te rairaki bon te waaki ae reitinako nakon te tai ae ti te taina: “Te rain iaon te rain ao te reirei iaon te reirei, n tokina teutana imwiin teutana, ara kantaninga, ara iango, ara taeka, ao ara mwakuri a na boraoi ma ana kantaninga te Atua” (“Ko Riai ni Manga Bungiaki,” Riaona, Meei 2007, 19). Iangoa manga rinanoan te taetae ni kaikonaki ibukin te bikoo ma naake ko reireiniia. Tera ae ti kona ni karaoia ngaira n tatabemaniira nako bwa ti na wakirake n teimatoa n rikirake n ara maroro are a uaia ni maroroakinna Beretitenti Eyring ao Unimwaane Bednar?