2015
Dagiti Kababalin ni Jesucristo: Saguday
Hunio 2015

Mensahe iti Visiting Teaching, Hunio 2015

Dagiti Kababalin ni Jesucristo: Saguday

Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo kadagiti nadiosan a kababalin ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.

Pammati • Pamilia • Tulong

“Mapno koma met ti lalaemmo iti kinamanangngaasi kadagiti amin a tao, ken kadagiti kapammatian, ket taraonan koma ti saguday ti pampanunotmo nga awan ressatna; sa kalpasanna mapapigsa ti panagtalekmo iti imatang ti Dios; ken mailimog koma iti kararuam ti doktrina ti kinasaserdote a kas iti linnaaw nga aggapu iti langit” (DkK 121:45).

Ania ti saguday? Kinuna ni Presidente James E. Faust (1920–2007): “Ti saguday iti naan-anay a kaipapananna ket sakupenna ti amin a kababalin ti kinalinteg a makatulong kadatayo a mangsukog iti ugalitayo.”1 Innayon pay ni Presidente Gordon B. Hinckley (1910–2008): “Ti ayat ti Dios isu ti ramut ti amin a saguday, ti amin a kinaimbag, ti amin a pigsa ti kababalin.”2

Maipapan iti pakainaigan dagiti babbai iti saguday, kinuna ni Elder D. Todd Christofferson ti Korum dagiti Sangapulo-ket-dua nga Apostol: “Isangbay dagiti babbai ti pudno a saguday ditoy lubong, maysa a saguday a mangaramid kadakuada a nalaing iti panangitukit kadagiti kasta a kababalin kas iti pammati, tured, pannakipagrikna, ken pannakapatarnaw dagiti pannakilangen ken kultura. …

“Kakabsat, iti amin a pannakipulapolyo, ti relasionyo iti Dios, ti Nailangitan nga Amayo, nga isu ti pagtaudan ti nadayaw a bilegyo, ti nasken a kanayon nga umuna nga ipagpangrunayo iti biagyo. Laglagipenyo nga immay ti bileg ni Jesus babaen ti naipamaysa a debosionna iti pagayatan ti Ama. … Ikarigatanyo ti agbalin iti kasta a kita ti disipulo ti Ama ken ti Anak, ket saanto nga agkupas ti impluensiayo.”3

Dagiti Mainayon a Nasantuan a Kasuratan

Dagiti Salmo 24:3–5; Taga Filipos 4:8; 2 Pedro 1:3–5; Alma 31:5; DkK 38:23–24

Manipud kadagiti Nasantuan a Kasuratan

Ita, dagiti nainsagudayan a babbai, napnuan iti pammati, umasidegda iti Mangisalakan. Iti Lucas 8 mabasatayo maipapan ti maysa a babai nga agsagsagaba iti panagpabulos iti dara iti uneg ti 12 a tawen a saan a maagasan. Tinarigagayanna ti maagasan idi “immay iti likudan ni [Cristo], ket sinagidna ti gayadan ti pagan-anayna: ket naigiddato a [nagsardeng] ti panagbulos ti darana. … Ket kinuna ni Jesus, Adda nangsagid kaniak: ta nariknak nga adda rimmuar a pannakabalin4 kaniak.” Nagpakleb daytoy nainsagudayan ken napudno a babai iti sanguananna, a mangibagbaga “kenkuana iti sango ti amin a tao” a “sinagidna isuna” ket “naigiddato a naagasan. “Ket isu kinunana, Anakko, ti pammatim pinasalun-atnaka” (kitaen iti Lucas 8:43–48; kitaen met iti 6:17–19).

Babaen ti sagudayna,5 kabaelan ni Cristo ti mangagas, mangpabael, mangpapigsa, mangliwliwa, ken mangparagsak no pilientayo nga addaan iti tured ken pammati tapno makadanontayo Kenkuana.

© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, June 2015. Ilokano. 12586 864

Dagiti Nagadawan

  1. James E. Faust, “The Virtues of Righteous Daughters of God,” Liahona, Mayo 2003, 108.

  2. Gordon B. Hinckley, “Excerpts from Recent Addresses of President Gordon B. Hinckley,” Ensign, Abr. 1996, 73.

  3. D. Todd Christofferson, “The Moral Force of Women,” Liahona, Nob. 2013, 29, 31.

  4. Adda bileg ti saguday (kitaen iti Marcos 5:30).

  5. Iti Pangiwanwan iti Nasantuan a Kasuratan, ti “Kinasaserdote [Priesthood]” ket kaipapananna a kas: “Ti awtoridad ken bileg nga ited ti Dios iti lalaki nga agtignay iti amin a banag para iti pannakaisalakan ti tao” (DkK 50:26–27).

Ibilang Daytoy

Kasano a pabilgen ken papigsaennatayo ti saguday?