Agtutubo
Agnanayon a Naisilpo iti Pamiliak
Agnaed ti nagsurat iti Utah, USA.
Idi naamponak idi tallo ti tawenko, impalubos ti pudno nga inak a maaramid laeng a pinal ti panagampon no anamongan dagiti nagannak kaniak a maaramidto kaniak dagiti ordinansa ti Simbaan kalpasan nga agtawenak iti 12. Napanunotna a kasapulan a manakmanak nga agaramid iti pili para iti bagik, ngem talaga a narigat ti aguray.
Wen, narigat kaniak a makakita iti adu a gagayyemko a mabuniagan no agtawendan iti walo, ngem narigrigat pay ti pannakaammok a saanak a mailantip kadagiti nagannak a nangampon kaniak ken kadagiti lima nga in-inauna pay a kakabsatko agingga nga agtawenak iti 12. Mabutengak idi amangan ta adda banag a mapasamak kaniak ket diakton mailantip pay kadakuada.
Iti yaasideg ti maika-12 a panagkasangayko, rinugianmi ti panagplano iti panagbuniagko ken pannakailantipko iti pamiliak. Pinagpilidak dagiti dadakkelko no ania a templo ti pakailantipanmi. Kanayon idin a napanunotko a ti Templo ti San Diego California ti kapintasan, isu nga immanamong ti sibubukel a pamiliak nga agbiahekami a mapan iti California para iti pannakailantip.
Diakon makauray tapno agbalin nga agnanayon a pamilia a kadennak dagiti dadakkelko ken kakabsatko. Bayat ti pannakailantipko, nariknak ti Espiritu a sipipigsa ta narigatko nga isawang daytoy iti balikas. Ita ta iti kamaudianan nailantipakon iti pamiliak, dagiti riknak a madandanagan ket nasukatan iti liwliwa ken talna, iti pannakaammok nga agnanayon a naisilpoak kadakuada.