iVaqa ni Veisiko, June 2015

Na iTovo i Jisu Karisito: iValavala Dodonu

Vulica ena masumasu na itukutuku oqo ka vakasaqara mo kila na ka mo na wasea. Ena rawa vakacava ki na nomu kila vinaka na itovo vakalou ni iVakabula me vakalevutaka cake nomu vakabauti Koya ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Oqo e sa tiki ni dua na ituvatuva ni iVaqa ni Veisiko ka matataki kina na itovo ni iVakabula.

Mo qarauna me savasava tiko ga na nomu vakanananu; ia ena taucoko sara kina na nomu vakabauta ena mata ni Kalou; raica ena yaco vei iko na veivakalougatataki ni ilesilesi vakabete, me vaka na tegu sa lutu mai lagi. Ena sala vata voli ga kei iko na Yalo Tabu” (V&V 121:45–46).

E vuqa vei keda eda buta vinaka tu ena ivolanikalou oqo, ia na cava na dodonu? Na dodonu sai koya “e dua na ivakarau ni vakasama kei na itovo e yavutaki ena ivakatagedegede cecere ni savasava.”¹ “Na yavuvosa vaka-Latini virtus e kena ibalebale na kaukauwa.”² E kaya o Peresitedi James E. Faust (1920–2007): “Na dodonu ena kena ibalebale taucoko e umanaki taucoko kina na gacagaca ni ivalavala dodonu e vukei keda meda bulia kina na noda ivakarau ni bula.”³ E kuria o Peresitedi Gordon B. Hinckley (1910–2008): “Na lomana na Kalou sa ivurevure ni dodonu kecega.”⁴

E vakavulica o Sister Elaine S. Dalton, na peresitedi raraba vakacegu ni Goneyalewa: “Sa vakasalataki ira yadua na luvena yalewa daulomani na Turaga, o iko kei au, me da ‘caka dodonu’ (V&V 25:2). Ko ni sega ni guilecavi. E sega ni ko ka wale. Ko ni sa luvena yalewa na Kalou.”⁵

Ni da sa gadreva meda yaco meda vakataka na Karisito—o koya sa tu vua na dodonu kece ena kena e taucoko—eda na tauyavutaka na ivakarau ni ivalavala dodonu ena vaqaqacotaki keda.

iKuri ni iVolanikalou

Vakaibalebale 31:10; Luke 8:46; Filipai 4:8; 2 Pita 1:3–5

Mai na iVolanikalou

“Na bula dodonu e dua na ka e gadrevi taumada ena kena curumi yani na valetabu ni Turaga kei na kena ciqomi na veituberi ni Yalotabu,” e kaya o Sister Dalton.⁶

Eda raica na kena rawa ni vakayaco-ka vei keda na dodonu ni da vulica na bula nei Ana, e dua na yada “sa sega ni lako tani ena vale ni soro, a sa daulotu ka lolo ka masu ena siga kei na bogi” (Luke 2:37). Sa nanamaki tiko o koya ki na nona lako mai na Karisito. Ni sa yabaki 84, rau a “kauta mai na gone ko Jisu” o Josefa kei Meri ki na valetabu, ka kaya o Simioni vei Meri, “Raica, ko koya oqo sa viritoka me bale sobu kina se tucake kina na lewe vuqa vei ira na Isireli.” Ni sa raica oqo o Ana, sa “vakavinavinakataka talega na Turaga, a sa vosataki koya vei ira kecega era tiko mai Jerusalemi” (Luke 2:27, 34, 38).

Sa mai tauyavutaka o Ana e dua na ituvatuva tudei ni dodonu. Ena vuku ga ni nona yalodina, a rawa kina me kila na iVakabula ka parofisaitaka na Nona veivakabulai ena gauna rau a kauti Koya mai kina o Meri kei Josefa ki valetabu.

© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni Visiting Teaching Message, June 2015. Fijian. 12586 858

iDusidusi

1. Vunautaka na Noqu Kosipeli: E Dua na iDusidusi ni Veiqaravi ni Daukaulotu(2004), 118.

2. Elaine S. Dalton, “Na Lesu ki na Buladodonu,” Liaona Nove. 2008, 79.

3. James E. Faust, “Nodra Dodonu na Luvena Yalewa na Kalou,” Liaona, Me 2003, 108.

4. Gordon B. Hinckley, “Excerpts from Recent Addresses of President Gordon B. Hinckley,” Ensign, Apr. 1996, 73.

5. Elaine S. Dalton, “Me Da Mai Laki Cabe ki na Ulunivanua ni Turaga,” Liaona, Me 2009, 121.

6. Elaine S. Dalton, “Na Lesu ki na Buladodonu,” 79.

Vakasamataka Oqo

Ena vaqaqacotaka ka vakaukauwataki keda vakacava na dodonu?