Mensahe iti Visiting Teaching, Hulio 2015
Dagiti Kababalin ni Jesucristo: Manangpakawan ken Naasi
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org..
Pammati • Pamilia • Tulong
Ti pannakaawat a manangpakawan ken naasi ni Jesucristo kadatayo ket makatulong kadatayo a mangpakawan ken mangipaay iti kaasi kadagiti sabali. “Ni Jesucristo ti Pagwadantayo,” kinuna ni Presidente Thomas S. Monson. “Ti biagna ket tawid ti ayat. Inagasanna dagiti masakit; tinulongan ken pinaregtana dagiti marigrigat ken maidaddadanes; insalakanna ti managbasol. Iti kamaudiananna ket pinatay isuna ti makagura a bunggoy a mangriribuk. Nupay kasta umar-araraw manipud iti turod ti Golgota dagiti balikas: ’Ama, pakawanem ida; ta dida ammo ti ar-aramidenda’—maysa a kangrunaan a pagwadan ti asi ken ayat iti biag iti daga.”1
No pakawanentayo dagiti sabali kadagiti basolda, pakawanennatayonto met ti Nailangitan nga Ama. Indawat kadatayo ni Jesus nga “agbalinkayo ngarud a naasi, kas iti panagbalin met ti Amayo aa naasi” (Lucas 6:36). “Umay ti pannakapakawan dagiti basoltayo nga addaan kadagiti kondision,” kinuna ni Presidente Dieter F. Uchtdorf, maikadua a Mammagbaga iti Umuna a Panguluen. “Nasken nga agbabawitayo. Ditayo kadi amin, iti maysa a panawen wenno sabali, sipapakumbaba nga umasideg iti tugaw ti kaasi ket dumawattayo iti parabur? Ditay kadi tinarigagayan ti asi iti amin a pigsa ti kararuatayo—tapno mapakawan kadagiti biddut nga inaramidtayo ken dagiti basol nga inaramidtayo? Ipalubosyo ti Pannubbot ni Cristo a mangbalbaliw ken mangpaimbag iti pusoyo. Aggiinnayatkayo. Agpipinnakawankayo.”2
Dagiti Mainayon a Nasantuan a Kasuratan
Manipud kadagiti Nasantuan a Kasuratan
“Nasken a mamakawantayo a kas iti pannakapakawantayo,” kinuna ni Elder Jeffrey R. Holland ti Korum dagiti Sangapulo-ket-dua nga Apostol.3 Ti estoria maipapan iti nayaw-awan nga anak a lalaki ket mangipakita kadatayo iti agpada a dua a kita ti panagpakawan: napakawan ti maysa nga anak a lalaki ken ti maysa nga anak a lalaki ket nagkarigatan a mamakawan.
Innala ti inaudi nga anakna a lalaki ti tawidna, alisto a binusbosna daytoy, ken idi panagbisin, nagtrabaho isuna a para pakan iti baboy. Kuna ti nasantuan a kasuratan, “idi a nagpanunot,” nagawid isuna ket kinunana iti amana a saan isuna a maikari nga agbalin nga anakna. Ngem pinakawan isuna ti amana ket impartianna iti nalukmeg a baka tapno agpapasken. Nagawid ti inauna nga anak manipud iti trabahona iti talon ket nakagura. Impalagipna iti amana a nagserbi isuna iti adu a tawen, saan a naglabsing kadagiti bilin ngem “uray kaano dinak inikkan iti bassit a kalding tapno makipagragragsak kadagiti gagayyemko.” Insungbat ti ama, Anak sika addaka nga agnanayon kaniak, ket amin dagiti gamengko kukuam ida. Ngem masapul ti panagrambak ken panagay-ayat: ta daytoy kabsatmo natay ket nagungar, ken napukaw ket nasarakan” (kitaen iti Lucas 15:11–32).
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, July 2015. Ilokano. 12587 864
Ibilang Daytoy
Kasano a ti pammakawan ket pagsayaatan ti maysa a mamakawan?