Parau poro‘i a te Peresideniraa Matamua, Atete 2015
Ti‘a ei ti‘arama
Ua fana‘o vau i te haereraa e rave rahi oro‘a faariiraa tei faatupuhia no te mau haamo‘araa hiero. Ua au pauroa vau i te reira, oia’toa teie i tupu iho nei, ta’u i haere i Phoenix, i Arizona, i te fenua Marite, i te ava‘e novema i ma‘iri a‘enei.
Ua horo‘a mai te u‘i apî feia moʻa no te mau mahana hopea nei, tei amui mai i roto i te oro‘a faariiraa i te hoê faanahoraa faahiahia mau e te popou. I te matahiti i ma‘iri a‘enei i Phoenix, na mua a‘e i te oro‘a faariiraa, ua parau vau i teie nei feia apî tei amui mai, « e tamarii outou no te maramarama ».
Ua hinaaro vau ia ite te feia apî atoa o te Ekalesia e, e mau tamarii ratou no te maramarama. E no reira, e hopoi‘a na ratou ia riro « ei mau ti‘arama o te ao nei » (Philipi 2:15). E hopoi‘a na ratou ia faaite i te mau parau mau o te evanelia. E piiraa no ratou ia ti‘a mai te hoê fare mori no te hiero, ia anaana te maramarama o te evanelia i mua i te hoê ao te haere noa’tura i te pouriraa. E hopoi‘a na ratou ia tape‘a ama noa to ratou maramarama e ia ama puai.
Ia ti‘a ia tatou ia riro ei « haapa‘oraa râ na tei faaroo ra » (1 Timoteo 4:12) e ti‘a ia tatou iho ia ti‘aturi. E mea ti‘a ia tatou ia faananea i te faaroo tei titauhia, ia oraora noa tatou i te pae varua e ia horo‘a i te maramarama ia vetahi ê. E mea ti‘a ia tatou ia aupuru i to tatou iteraa papû e tae roa ia riro mai ei hoê tutau no to tatou oraraa.
I roto i te mau rave‘a manuïa atoa no te roaa e no te tape‘a i te faaroo tei titauhia i teie mahana, te vai nei te tai‘oraa e te tuatapaparaa i te papaʻiraa moʻa e te pure-tamau-raa. I te feia apî o te Ekalesia, te parau nei au, mai te mea e, aita â outou i na reira, a haapii i teie nei i te peu no te tuatapaparaa papaʻiraa moʻa e te pureraa i te mau mahana atoa. Aita ana‘e teie na raveraa faufaa roa, e nehenehe te mau umeraa no rapae mai e, i te tahi taime atoa, te mau ohipa paari o te oraraa nei e haamohimohi e e tupohe roa’toa i to outou maramarama.
E ere te haamataraa o te taure‘are‘araa i te hoê tau ohie. O te mau matahiti matamua e faahema Satane ia outou e e faaohipa ho‘i i te mau rave‘a atoa no te faahahi ê ia outou i te e‘a e arata‘i ia outou i te utuafare tiretiera Teie râ ia tai‘o outou e ia pure, ia tavini outou e ia haapa‘o, e taa maitai ïa outou i « te maramarama o te anaana mai nei i roto i te pouri » (PH&PF 6:21), to tatou Hi‘oraa e to tatou puai—oia ho‘i te Fatu ra o Iesu Mesia. O Oia te maramarama ta tatou e faateitei i ni‘a no te tiahi i te pouri (hi‘o 3 Nephi 18:24)
Na roto i te hoê iteraa papû puai no te Faaora e Ta’na evanelia tei faaho‘i-faahou-hia mai, e rave‘a oti‘a ore ta outou no te anaana. Te haati ra te reira ia outou i te mau mahana atoa, i roto i te mau huru faanahoraa atoa tei reira outou. A pee ai outou i te hi‘oraa o te Faaora, mai te huru ra, tei ia outou atura ïa te rave‘a no te riro ei maramarama i roto i te oraraa o te feia e haati ra ia outou—e melo anei no to outou utuafare, e hoa anei i te fare haapiiraa, e hoa rave ohipa anei, e mau taata mâtauhia anei e aore ra e taata êê.
Ia riro ana‘e outou ei maramarama no to te ao, e ite te feia e haati ra ia outou i te varua taa ê o te faatupu i te hinaaro ia amui mai ia outou e ia pee i to outou hi‘oraa.
Te taparu nei au i te mau metua e te feia faatere o ta tatou feia apî ia tauturu ia ratou ia ti‘a papû no te parau mau e te parau ti‘a. A tauturu ia iriti-rahi-hia i mua i to ratou mata te mau opani no te haapiiraa, no te taa-maitai-raa e no te taviniraa i roto i te basileia o te Atua. A patu i roto ia ratou i te puai no te pato‘i i te mau faahemaraa a to te ao nei. A horo‘a ia ratou i te hinaaro ia haere na roto i te viretu e te faaroo, ia pure noa, e ia hi‘o i ni‘a i te raʻi mai to ratou tutau aueue ore.
I to tatou feia apî, te parau nei au e, ua here to tatou Metua i te Ao ra ia outou. Ia ite atoa outou i te here o te feia faatere o te Ekalesia no outou. Ia vai noa i roto ia outou te hoê hinaaro ia tavini i to outou Metua i te Ao ra e Ta’na Tamaiti. E ia haere noa outou na roto i te parau mau e ia ti‘a ho‘i ei ti‘arama i rotopu i te mau tamarii a te Atua.
Haapiiraa no roto mai i teie parau poroʻi
A feruri ia aparau e te feia ta outou e haapii ra, e aha te auraa ia riro ei hoê « [tamarii] no te maramarama ». E aha te mau hopoi‘a ta te reira e titau mai ? E nehenehe outou e aparau i te mau taime a riro ai to ratou maramarama ei mea anaana taa ê e te mea ho‘i i faaanaana i te reira. A feruri ia ani ia ratou ia haamana‘o i te hoê taata taa ê, mai te hoê taure‘are‘a, hoê hoa rave ohipa, e aore râ hoê melo o to ratou utuafare, o te hinaaro nei i te maramarama. I muri iho, ia pure amui outou no te hoê rave‘a no te faaiteraa i te maramarama i taua taata ra.
© 2015 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/15. Parau faati‘a no te iritiraa : 6/15. Iritiraa no First Presidency Message, August 2015. Tahitian. 12588 895