Elder Richard G. Scott: Mipahinungod sa Iyang Pinakamaayong Paningkamot ngadto sa Buhat sa Ginoo
“Isip usa sa Iyang mga Apostoles nga gitugutan sa pagsaksi Kaniya, mahinuklugon kong mopamatuod nga nahibalo ko nga ang Manluluwas buhi, nga Siya nabanhaw, nahimaya nga personahe nga may hingpit nga gugma.”1
Sa ibabaw: litrato sa maayong kabubut-on sa Deseret News
Sa batan-on pa, si Elder Richard G. Scott adunay tinguha sa pagbuhat unsay matarung, bisan kon kini lisud. “Sa bata pa kaayo ko,” miingon si Elder Scott, “Mihimo ko og pakigsaad uban sa Ginoo nga akong ipahinungod ang akong tanang mahimo para sa iyang buhat.”2 Ang iyang integridad niana nga pakigsaad migiya sa iyang mga desisyon sa tibuok niyang kinabuhi. Nakaserbisyo siya isip full-time nga misyonaryo, presidente sa misyon, sakop sa Seventy, ug dayon isip usa ka Apostol sa Ginoo.
Si Richard Gordon Scott natawo sa Pocatello, Idaho, USA, niadtong Nobyembre 7, 1928. Sa singko anyos pa siya, siya ug ang iyang pamilya namalhin ngadto sa Washington, D.C., diin ang iyang amahan nagtrabaho sa Departamento sa Agrikultura sa U.S. ubos ni Elder Ezra Taft Benson sa Korum sa Napulog Duha ka mga Apostoles, kinsa nagserbisyo isip secretary sa agrikultura.
Ibabaw sa wala: Gidasig sa iyang mga ginikanan, si Richard nalingaw sa pagpamungkag og mga butang, nagkat-on unsaon sa pagtrabaho, ug sa pag-assemble niini og balik. Sa ibabaw: Si Kenneth ug Scott uban ni Mary Scott (gikan sa wala): Gerald, Wayne, Walter, Mitchel ug Richard.
Dihang si Richard batan-on pa, ang iyang pamilya dili kanunay nga makasimba. Ang iyang mga ginikanan, si Kenneth ug Mary, mitudlo kaniya og maayong mga hiyas, apan si Kenneth dili miyembro sa Simbahan nianang higayona, ug si Mary dili kaayo aktibo. (Si Kenneth sa wala madugay namiyembro sa Simbahan, ug siya ug ang iyang asawa nahimo nga aktibong mga miyembro, nagserbisyo sa Templo sa Washington D.C. sulod sa daghang katuigan.) Si Richard makasimba usahay, uban sa pag-awhag sa buotang mga higala, mga bishop ug mga home teacher.
Sa high school si Richard mahigalaon nga batan-on. Napili siya nga presidente sa klase, motukar og clarinet sa banda, ug drum lider siya sa marching band. Bisan og maayo siya sa eskwelahan ug dunay daghang higala, gibati niya ang kalaay ug kakulang sa pagsalig. Nakaamgo siya sa wala madugay dihang misyonaryo na siya “nga kadtong mga pagbati wala unta mahimo nga usa ka bahin sa akong kinabuhi kon nasabtan pa gayud nako ang ebanghelyo.”3
Sa ibabaw: Richard (tunga) uban sa iyang manghud nga mga lalaki. Ibabaw sa wala: Si Richard nakagradwar sa kolehiyo niadtong 1950 sa kurso nga mechanical engineering. Wala: Si Richard, nagtukar og clarinet, uban sa iyang mga igsoon.
Kon walay klase atol sa ting-init, manarbaho si Richard bisan unsa aron ikagasto para sa kolehiyo. Usa ka ting-init nagtrabaho siya sa usa ka oyster boat [sakayan nga manguha og kinhason] sa baybayon sa Long Island, New York. Sa laing ting-init mibiyahe siya sa Utah sa pagtrabaho sa kalasangan sa pagpamutol og kahoy; moayo sab siya og mga sakyanan sa riles. Sa laing ting-init mihangyo siya og trabaho sa Utah Parks Company, bisan og giingnan siya nga wala silay bakante. Mitanyag siya nga tighugas lang siya og plato sulod sa duha ka semana nga walay sweldo. Gihunahuna niya nga pinaagi niini may dapit siyang kapuy-an ug makakaon. Gidawat siya sa trabaho human nga napakita niya nga may inisyatibo siya sa pagpangluto ug pagpanghugas sa plato.4
Human sa high school, si Richard mieskwela sa Washington University sa Washington, D.C., nakadawat og bachelor‘s degree sa mechanical engineering niadtong 1950.
Naghunahuna mahitungod sa Pagmisyon
Ubos: Si Elder Scott nagserbisyo isip misyonaryo sa Uruguay. Ubos: Human sa iyang misyon nakigminyo siya ni Jeanene Watkins sa Manti Utah Temple niadtong Hulyo 1953.
Sa edad nga 22, wala kaayo siya maghunahuna bahin sa pagmisyon. Apan nagsugod siya sa paghunahuna mahitungod niini human ang batan-ong babaye nga iyang gika-date, si Jeanene Watkins, miingon niya nga, “Kon magminyo man ko, kana adto sa templo sa usa ka returned nga misyonaryo.”5 Nagsugod siya sa pag-ampo mahitungod sa pagmisyon ug nakig-istorya sa iyang bishop bahin niini. Gitawag siya nga moserbisyo sa Uruguay, sugod 1950 hangtud 1953.
Si Jeanene nagtuon og modern dance ug sociology sa George Washington University. Migradwar siya niadtong 1951 ug dayon nagmisyon sa northwestern United States. Duha ka semana human si Elder Scott nauli gikan sa iyang misyon, siya ug si Jeanene na-sealed sa Manti Utah Temple, niadtong Hulyo 1953. Mahitungod niana nga sealing, gisulti niya sa kinatibuk-ang komperensya, “Ako walay gahum sa paghulagway sa kalinaw ug kahilum nga naggikan sa kasigurohan nga, kon ako magpadayon sa pagpakabuhi sa takus nga paagi, makauban nako ang akong pinalangga nga si Jeanene ug ang among mga anak hangtud sa kahangturan tungod nianang sagrado nga ordinansa nga gipahigayon gamit ang tukmang awtoridad sa priesthood sa sulod sa balay sa Ginoo.”6
Daghang mga higayon sa iyang kinabuhi, si Elder Scott mihimo og matarung nga mga desisyon bisan pa sa oposisyon ug pagpamugos sa mga higala. Mao usab sa pagdawat sa tawag nga magserbisyo og misyon. Nahinumdom siya: “Ang mga propesor ug mga higala naningkamot sa pagdani nako nga dili dawaton ang tawag sa pagmisyon, sa tambag nga ang pagmisyon makabalda sa nagkaayo nakong panarbaho sa engineering. Apan wala madugay human sa akong misyon, ako ang napilian para sa infant Naval Nuclear Program. … Sa usa ka miting nga ako ang gipadala nga magdumala, akong nahibaloan nga ang usa sa mga propesor nga mitambag nako sa dili pag-adto og misyon naa sa mas ubos nga posisyon kay kanako sa programa. Usa kadto ka impluwenyal nga pagpamatuod ngari nako kon giunsa ko sa pagpanalangin sa Ginoo dihang gitarung nako og himo ang akong mga prayoridad.”7
Mga lima ka tuig human sila naminyo, si Elder ug Sister Scott miagi sa gihulagway nga “usa ka nagtubo nga kasinatian”—lisud nga pagsulay nga misangput nga usa ka panalangin sa kinabuhi sa iyang pamilya. Nanganak sila og usa ka babaye ug usa ka lalaki niining higayuna, nag-edad og tulo ug duha. Si Sister Scott nagmabdos og usa ka batang babaye. Subo lang, ang bata namatay sa pagkatawo.
Unom lamang ka semana ang milabay, ang ilang duha ka tuig nga anak nga lalaki si Richard namatay human sa operasyon nga matambalan ang depekto sa kasingkasing. Giistorya ni Elder Scott:
“Ang akong papa, dili miyembro sa Simbahan, nagpangga kaayo sa gamay nga si Richard. Misulti siya ngadto sa dili aktibo nakong mama, ‘wa ko makasabut nganong si Richard ug si Jeanene daw nakadawat ra sa pagkamatay sa mga bata.’
“Si mama, mitubag uban sa pag-aghat, miingon, ‘Kenneth, sila na-sealed sa templo. Nasayud sila nga ang ilang mga anak ikauban nila sa kahangturan kon sila magpuyo nga matarung. Apan ikaw ug ako dili makaangkon sa lima sa atong mga anak kay kita wala makahimo niana nga mga pakigsaad.’
“Gipamalandungan sa akong papa kadto nga mga pulong. Nagsugod siya sa pakigkita sa mga stake missionaries ug unya nabunyagan. Kapin lang og gamay sa usa ka tuig si Mama, si Papa, ug mga anak na-sealed sa templo.”8
Si Elder ug Sister Scott may gisagop pa nga upat ka bata.
Sa ibabaw: Ang pamilyang Scott niadtong 1965, sa panahon nga gitawag siya sa pagka presidente sa misyon sa Argentina, uban sa ilang mga anak nga sila si Mary Lee, Linda, ug Kenneth. Sa ubos (gikan sa wala): Kenneth, David, Linda, Jeanene, Elder Scott, Michael ug Maria Lee. Atbang nga pahina: Nagtrabaho sa US Navy, mitabang si Elder Scott sa pagdesinyo og nuclear reactor alang sa unang nuclear-powered nga submarino.
Pagserbisyo isip Mission President
Nagtrabaho sa naval program sa Oak Ridge, Tennessee, si Elder Scott nakakompleto sa katugbang sa usa ka doctorate sa nuclear engineering. Tungod kay kini nga field usa man ka top secret, ang degree dili mahatagan og ganti. Ang naval officer kinsa midapit ni Richard sa pag-apil sa nuclear program mao si Hyman Rickover, usa ka pioneer sa mao nga field. Dungan silang nagtrabaho sulod sa 12 ka tuig—hangtud nga si Richard gitawag nga magserbisyo isip mission president sa Argentina niadtong 1965. Gipasabut ni Elder Scott sa unsang paagi niya nadawat ang tawag:
Sa ibabaw: Ang pamilyang Scott niadtong 1965, sa panahon nga gitawag siya sa pagka presidente sa misyon sa Argentina, uban sa ilang mga anak nga sila si Mary Lee, Linda, ug Kenneth. Sa ubos (gikan sa wala): Kenneth, David, Linda, Jeanene, Elder Scott, Michael ug Maria Lee. Atbang nga pahina: Nagtrabaho sa US Navy, mitabang si Elder Scott sa pagdesinyo og nuclear reactor alang sa unang nuclear-powered nga submarino.
“Didto ko sa miting usa ka gabii uban sa mga tawo nga nagpalambo sa mahinungdanong bahin sa nuclear power plant. Ang akong secretary misulod ug miingon, ‘Dunay tawo nga nanawag sa telepono kinsa miingon nga kon sultihan ko ikaw sa iyang ngalan moadto ka sa telepono.’
“Miingon ko, ‘Unsay iyang ngalan?’
“Miingon siya, ‘Harold B. Lee.’
“Miingon ko, ‘Eksakto siya.’ Akong gitubag ang tawag. Si Elder Lee, kinsa sa wala madugay nahimong Presidente sa Simbahan, nangutana kon mahimo ba ming magkita nianang gabhiona gyud. Didto siya sa Siyudad sa New York, ug naa ko sa Washington, D.C. Nag-eroplano ko sa pag-adto niya, ug duna mi interbyu nga misangput sa tawag nga mahimo ko nga presidente sa misyon.”
Gibati ni Elder Scott nga si Admiral Rickover, usa ka kugihan ug saputon nga tawo, kinahanglang mahibalo niini nga tawag.
“Dihang akong gipasabut ngadto niya ang tawag sa pagmisyon ug nga kini nagpasabut nga mohunong na ko sa akong trabaho, nahiubos siya. Daghan siyag dili maayong gipanulti, mga baso gibuak sa lamesa, ug ang mga komentaryo nga nagsunod tataw nga nakahimo og duha ka punto:
“‘Scott, ang imong nahimo dinhi sa defense program mahinungdanon kaayo nga mokabat pa og usa ka tuig aron ka mapulihan, mao nga dili ka makabiya. Ikaduha, kon mobiya ka, imong giluiban ang imong nasud.’
“Miingon ko, ‘mahimo nakong bansayon ang mopuli nako sa nahibiling duha ka bulan, ug wala nay risgo ang nasud.’
“Daghan pa ang istorya, ug sa katapusan miingon siya, ‘dili na ko makig-istorya pa nimo. Dili na ko gustong makakita pa nimo og usab. Human na ang tanan sa imoha, dili lamang dinhi, apan ayaw na gayud og planoha nga mobalik ka og trabaho sa nuclear field.’”
“Mitubag ko, ‘Admiral, mahimong dili na ko nimo pasudlon dinhi sa opisina, apan gawas kon pugngan ko nimo, akong ihatag kini nga assignment ngadto sa laing tawo.’”
Matinuoruon sa iyang pulong, ang admiral wala na makigsulti ni Elder Scott. Sa dihang ang lisud nga mga desisyon kinahanglang himoon, mopadala siya og usa ka messenger. Nag-assign siya og tawo nga mopuli sa dapit ni Elder Scott, nga gibansay ni Elder Scott.
Sa iyang katapusang adlaw sa opisina, si Elder Scott mihangyo og appointment sa admiral. Nakalitan ang iyang secretary. Misulod si Elder Scott nga may dalang kopya sa Basahon ni Mormon. Gipasabut ni Elder Scott unsay sunod nga mahitabo:
“Mitan-aw siya nako ug miingon, ‘Lingkod, Scott, unsay imong tuyo? Gihimo nako ang tanang paagi aron mapugos ka nga mausab. Unsay imong dala?’ Misunod ang labihan ka talagsaon, hilum nga pag-istoryahanay. Mas daghan ang pagpaminaw niining higayuna.
“Miingon siya nga iyang basahon ang Basahon ni Mormon. Dayon may nahitabo nga wala nako dahumang mahitabo. Midugang siya, ‘Inig balik nimo gikan sa misyon, gusto kong motawag ka nako. Adunay trabaho alang nimo.’”9
Gipaambit ni Elder Scott ang leksyon nga iyang nakat-unan gumikan niini nga kasinatian: “May mga hagit kamo ug may lisud nga mga desisyon nga pagahimoon sa tibuok ninyong kinabuhi. Apan tinoa karon ang pagbuhat kanunay sa unsay matarung ug tuguti nga mosunod ang sangputanan. Ang sangputanan kanunay nga para sa inyong labaw nga kaayohan.”10
Sa pagserbisyo sa Argentina, si Presidente Richard G. Scott takus kaayo ug usa ka manggiloy-ong presidente sa misyon. Usa sa iyang mga misyonaryo, si Wayne Gardner, nahinumdom nga mihimo og arrangement para sa missionary conference nga himoon layo sa mission home ug siya ang mokuha ni President Scott gikan sa airport. Sa katapusang minuto, ang building asa ipahigayon ang komperensya nga gisabut ni Elder Gardner dili na ipagamit. Dayon siya ug ang iyang kompanyon nadugay sa pag-abut sa airport sa pagkuha ni President Scott. Nakalimot sab sila sa pagsulti sa drayber sa taxi nga magpahulat sila ug natanggong hinoon sila kay walay laing taxi.
“Bisan og akong nakita sa mga mata sa presidente ang kasagmuyo,” nahinumdom si Elder Gardner, “iya kong gigakos ug giingnan nga gihigugma ko niya. Mapailubon kaayo siya ug masinabtanon. Nanghinaut ko nga dili gayud nako kalimtan kadto nga leksyon.”11
Si Presidente Scott misalig sa Basahon ni Mormon isip usa ka tinubdan sa inspirasyon alang sa iyang kaugalingon ug alang sa mga misyonaryo. Sa usa ka okasyon, usa ka misyonaryo miabut sa iyang opisina nga may problema. Si Elder Scott nahinumdom:
“Samtang nagsulti siya, nagsugod ko og hulma sulod sa akong hunahuna og mga ikatubag para matabangan siya nga masulbad ang iyang problema. Dihang nahuman na siya, miingon ko, ‘nahibalo na ko unsaon ko ikaw sa pagtabang.’ Mahinamon siyang nagtan-aw nako, ug sa kalit nablanko ang akong hunahuna. Wala na koy mahinumduman sa akong giandam nga isulti kaniya.
“Sa kabalaka, gisugdan nako og pakli ang Basahon ni Mormon nga akong gigunitan hangtud nga ang akong atensyon nadala ngadto sa mahinungdanon kaayo nga kasulatan, nga akong gibasa para niya. Nahitabo kini sa tulo ka higayon. Ang matag kasulatan mitukma gayud sa iyang sitwasyon. Dayon, ingon og ang kurtina sa akong hunahuna naabli, akong nahinumduman ang tambag nga akong giplano para niya. Kini karon adunay mas dako nga kahulugan, kay nanukad kini sa usa ka pundasyon sa bililhong kasulatan. Sa akong pagtapos, miingon siya, ‘nasayud ko nga dinasig ang tambag nga imong gihatag nako kay imong nasulti og balik ang tulo ka kasulatan nga gihatag kanako dihang gi-set apart ko isip usa ka misyonaryo.’”12
Padayon nga Pagserbisyo sa Panimalay ug sa laing mga Dapit
Dihang ang mga Scotts nahuman sa ilang misyon ug mibalik na sa Washington, D.C., si Elder Scott padayon nga mitrabaho sa nuclear engineering industry. Ang pipila sa iyang mga kaubanan sa trabaho sa wala pa siya magmisyon mihangyo niya nga moapil sa ilang pribado nga consulting firm. Mitrabaho siya sa kompanya gikan 1969 hangtud 1977. Sa simbahan miserbisyo siya isip counselor sa stake presidency ug sa wala madugay isip regional representative.
Niadtong 1977, walo ka tuig gikan sa pagka-release niya isip presidente sa misyon, si Elder Scott gitawag ngadto sa Unang Korum sa Seventy. Ang una niyang mga assignment naglakip sa pagka Executive Director sa Priesthood Department ug dayon isip Executive Administrator sa Mexico ug sa Central America. Siya ug ang iyang pamilya mipuyo sa Mexico City sulod sa tulo ka tuig niana nga assignment. Ang mga miyembro sa Latin America nakadayeg sa maayo niyang pamaagi sa pagpangulo, sa iyang abilidad sa pagsulti og Kinatsila, ug sa sinsero niyang paghigugma sa katawhan.
Sa ibabaw: Si Presidente Spencer W. Kimball ug Sister Camilla Kimball mibisita sa Argentina North Mission, diin si Elder Scott nagserbisyo isip mission president. Giablihan usab ni Elder Scott ang misyonaryo nga buhat para sa Quechua Indians sa southern Bolivia. Ubos: Si Elder Scott, kinsa maayong mosulti og Spanish, nangulo sa paghimo og ika-100 nga stake sa Mexico.
Sa ubos: sa litrato sa maayong kabubut-on sa Deseret News archive
Bisan og usa siya ka General Authority, andam siyang magkat-on gikan sa lokal nga mga teacher ug lider. Nahinumdom siya nga nakadawat og pagpadayag samtang naglingkod siya atol sa miting sa priesthood sa usa ka branch sa Siyudad sa Mexico:
“Klaro sa akong panumduman ang paningkamot sa usa ka mapaubsanong Mexican nga lider sa priesthood nga naglisud sa pagsulti sa mga kamatuoran sa ebanghelyo gikan sa iyang materyal sa leksyon. … Sa iyang kinaiya, anaa ang ebidensya sa usa ka tiunay nga gugma sa Manluluwas ug gugma ngadto sa iyang gitudloan.
“Ang iyang sinseridad, kalunsay sa katuyoan, ug gugma mitugot nga ang kwarto malukop sa espirituhanong kalig-on. Natandog gayud ako. Dayon nagsugod ko sa pagkadawat og personal nga mga impresyon isip sumpay sa mga baruganan nga gitudlo niadtong mapainubsanon nga instruktor. …
“Sa pag-abut sa matag impresyon, gisulat ko dayon kini. Sa proseso, nahatagan ako sa bililhong mga kamatuoran nga akong gikinahanglan kaayo aron mamahimong mas epektibo nga sulugoon sa Ginoo.”13
Human makapauli gikan sa Mexico, w siya og laing bahandianon nga assignment: nga moalagad isip managing director sa Family History Department. Wala lamang siya motabang sa pagdumala sa buhat sa family history sa Simbahan apan siya sa personal milihok gayud. Tungod kay ang amahan ni Elder Scott usa man ka kinabig sa Simbahan, dunay daghang pagsiksik nga gikinahanglan para niana nga pamilya. Si Elder Scott ug ang iyang asawa, uban sa iyang mga ginikanan, mipahinungod og panahon sa pagsiksik sa ilang family history.
Sa tunga-tunga sa 1980, ang teknolohiya nagsugod nga mahimong dakong bahin sa buhat sa family history, apan “bisan sa tabang sa mga computer, kanunay nga ang pagpanginlabut sa tawo gikinahanglan niini nga buhat,” miingon si Elder Scott, “aron ang mga miyembro sa Simbahan makabaton og talagsaong mga kasinatain gumikan niini.”14
Sa wala: Si Elder Scott (layo sa tuo) gitawag ngadto sa Korum sa Napulog Duha Ka mga Apostoles niadtong 1988, diin siya miserbisyo sulod sa 27 ka tuig. Ubos sa wala: Gitimbaya niya si Presidente Thomas S. Monson. Sa ubos: Si Elder Scott gitawag nga moserbisyo sa Kapangulohan sa Seventy niadtong 1983. Sa ubos: Naglakaw human sa kinatibuk-ang komperensya uban ni Elder Jeffrey R. Holland ug M. Russell Ballard.
Niadtong 1988 miabut ang dako nga tawag. Nakigkita niya si Presidente Ezra Taft Benson (1899–1994), kinsa, “uban sa kalumo ug gugma ug talagsaong panabut,” mihatag kang Elder Scott sa tawag nga mamahimong usa ka Apostol sa Ginoo. “Dili ko makapugong sa paghilak,” miingon si Elder Scott niana nga kasinatian. “Ug dayon si Presidente Benson mabinationg misugilon sa kaugalingon niyang pagkatawag aron mahatagan ko og kasiguroan. Misaksi siya sa unsang paagi ang tawag miabut. Kanunay nakong mahinumduman kadto nga kamahunahunaon ug kamasinabtanon sa propeta sa Ginoo.”15 si Elder Scott gipaluyohan atol sa kinatibuk-ang komperensya niadtong Oktubre 1.
Kaminyoon
Si Elder Scott ug ang iyang asawa, si Jeanene, ganahan og daghang mga kalihokan, sama sa pagtan-aw og mga langgam, pag-paint (mogamit si [Elder Scott] og watercolors; mogamit si [Sister Scott] og pastel), ug maminaw og jazz ug South American folk music.
Kadtong nakapaminaw ni Elder Scott sa mga pakigpulong sa kinatibuk-ang komperensya masayud sa iyang gugma alang ni Jeanene. Hisgutan niya kanunay si Jeanene, bisan patay na. Sa iyang unang pakigpulong sa kinatibuk-ang komperensya isip sakop sa Unang Korum sa Seventy niadtong 1977, si Elder Scott mipasidungog sa iyang asawa, “usa ka pinalangga, gihandum nga kompanyon. … Si Jeanene kanunay nga usa ka modelo sa lunsay nga pagpamatuod, paghigugma, ug debosyon; usa siya ka tore sa kalig-on ngari nako.”16
Bag-o lang, sa usa ka makadasig nga pakigpulong sa komperensya bahin sa kaminyoon, gihisgutan niya ang daghang pagpahayag sa gugma nga giambitan nilang duha sa pagpalig-on sa ilang kaminyoon. Miingon siya sa pagtapos: “Nasayud ko kon unsay ipasabut nga higugmaon ang anak nga babaye sa Langitnong Amahan kinsa uban sa grasya ug debosyon nagpakabuhi sa talagsaong kahingpit isip usa ka matarung nga babaye. Ako masaligon nga kon, sa among umaabut, makita ko siya og usab sa pikas nga kinabuhi, among mahibaloan nga kami mas nagkahigugmaay pa. Kami mas modayeg pa sa usag usa, nga nagpuyo niining higayuna nga gibulag tungod sa kamatayon.”17
Karon sila naghiusa.
© 2015 pinaagi sa Intellectual Reserve, Inc. Tanang mga katungod gigahin.