Porausen An Fefin Chon Amwa, November 2015
Ewe Ngun mi Fel epwe Chienom
Mi tufich ngeni kich ika pwe sia nimoch, pwe ewe feiochun ewe Ngun mi Fel epwe nom rech, esap chok fan ekkoch nge fansoun meinisin.
Achengicheng pwi me fefinei, ua kinisou pwe ua nom remi non ei ranin Sabbath non ewe mwichenap an ewe Mwichefenin ewe Samon. Ua fen mefi, usun chok ami oua mefi, ewe Ngun, ewe Ngun mi Fel, a pwarata ewe ennetin ekkewe kapas me kon sia rong.
Ai popun ikenai pwe upwe anapano ami mochen me tiniken ne angei ewe niffang mi fen a pwon ngeni kich mwirin ach papatais. Non ach efeioch, sia rong ekkewe kapas: “Angei ewe Ngun mi Fel.”1 Seni ena fansoun, manauach ra siwin feinfeino.
Mi tufich ngeni kich ika pwe sia nimoch, pwe ewe feiochun ewe Ngun mi Fel epwe nom rech, esap chok fan ekkoch nge fansoun meinisin. Sia sinei seni ewe iotekin sakrament ifa usun ena pwon mi pwonueta: “O Kot, Samach mi Napanap, sia tingor ngonuk fan iten Noum we, Jises Kraist, om kopwene efeiochu me epinano ei pinewa ngeni aionen meinisin ekkewe ra angei, pwe repwe ani achechemenien inisin Noum we, me pwarata ngonuk: O Kot, Samach mi Napanap, pwe ra mochen ar repwe mwarei iten Noum we, o chechemeni i fansoun meinisin, me fori an kewe annuk a ngeni ir.”
Me mwirin a nom ewe pwon: “Pwe Ngunun epwe nonnom rer (D&C 20:77; mi kapach).
Pwe ewe Ngun mi Fel epwe nom rech fansoun meinisin pwe ewe aurour me emwen seni Ewe Ngun mi Fel epwe nom non manauach iteitan ran. Sia tongeni, awewe chok, ewe Ngun mi Fel a tongei esinei ngeni kich sipwe fiu ngeni sossotuch ach sipwe for mi ngau.
Ren chok ena popun, a mecheres sipwe kuna pwata ekkewe chon angangen ewe Samon ra achocho ne anapano ach mochen fen ngeni Kot non ach kewe mwichen sakrament. Ika sia angei ewe sakrament non nuku, ewe Ngun mi Fel epwe tufichin tumunu kich me ekkewe aramas sia kan tongei seni ekkewe sossot ra kan pochokununo me chommongono.
Ewe chiechi ngeni ewe Ngun mi Fel mi öchu met mi och me a apwangapwangano ekkewe sossot. Ren chok ena epwe naf an epwe fori ach sipwe fich ngeni an ewe Ngun epwe nom rech fansoun meinisin.
Usun chok ewe Ngun mi Fel a apochokuna kich seni ngau, a pwan ngeni kich manamanen ach sipwe sinei nefinen ennet me chofona. Ewe ennet a kon auchea a chok fat me ren kapasen pwarata seni Kot. Ach popun inis me aean memeffin inis esap naf. Sia manau non ew fansoun nupwen ekkewe ra unusen mirit ra pwan noninen ne sinei nefinen ennet me chofona.
Ewe Samon a aiti Noun we Aposel itan Thomas, ewe a mochen pisekin pwarata usun an ewe Chon Amanau Mananusefan ren an epwe atapa kinasan kewe, pwe kapasen pwarata a fen och: “Jises a apasa ngeni, Ifa ussun, ka nuku pokiten om ka kunaei: ra feioch ekkewe rese mo kuna ei nge ra nuku” (John 20:29).
Ewe ennet a wisen esisinata ewe aan ngeni neniach ren Kot ra fateno me ren ewe Ngun mi Fel. Sise tongeni tononong nein ewe petewen me kuna ewe Sam me ewe Nau ra fos ngeni Joseph Smith nekukkunun. Ese wor och pisekin pwarata are ekiekin mirit a tongeni pwari pwe Elijah a feito usun a fen apwon pwe epwe watiw ekkewe kien ewe pristut mi nom ren ewe soufous mi manau,Thomas S. Monson.
Fateochun ennet a feito ngeni emon Noun Kot a angei ewe pungun an ewe angei ewe Ngun mi Fel. Pun mwaken me chofona ra tongeni tori kich non fansoun ese nifinifin, mi namwot epwe wor memmefin ewe Ngunun Ennet fansoun meinisin pwe epwe tumunu kich seni fansoun tipemwarawmar.
Nupwen a emon chon ewe Mwichen Engon me Ruemon Aposel, George Q. Cannon a pesei kich pwe sipwe akachocho pwe ewe Ngun epwe nom rech. A pwon, me ua pwan pwonei, ika pwe sipwe fiti ena aan, sisap “osupwang non mirit” ren ewe ennet, “sisap tipemwaramwar are nom non kiroch,” me ach “nuku epwe pochokun, me ach chengin …unus.”2
Mi namwot ngeni kich ena chiechi seni ewe Ngun mi Fel fansoun meinisin ren pwan ew popun. Manon emon sia kan tongei epwe fis me sisap fen sinei inet. A ewe pwarata seni ewe Ngun mi Fel usun ewe tongen emon Sam won Nang me ach Chon Amanau mi manau sefan epwe ngeni kich apinukunuk me epwe echipa kich nupwen emon aramasach a mano. Ena kapasen pwarata epwe pochokun nupwen a wor mi mano.
Nge, ren chommong popun, a kan namwot, an ewe Ngun mi Fel epwe nom rech fansoun meinisin. Sia mochen ena Ngun mi Fel, nge sia fen sinei ese mecheres ach sipwe soposopweno non. Emon me emon kich sia ekieki, apasa, me fori mettoch non manauach iteitan ran minne mi tongeni asonga ewe Ngun. Ewe Samon a aiti kich pwe ewe Ngun mi Fel epwe chienach fansoun meinisin nupwen netipach mi uren tong me pwan nupwen murinno mi aningano ekiekich fansoun meinisin. (nengeniD&C 121:45).
Fan itan ekkewe ra kan weires ren ekkei annuk mi namwot fan itan tufichin ewe niffangen chiechi ngeni ewe Ngun, ua awora ei kapasen pesepes. A fen wor fansoun nupwen oua mefi memmefin ewe Ngun mi Fel. Meni a fen fis ngonukikenai.
Oua tongeni for ngeni ekkana fansoun usun efou foun iran nuku usun Alma a awewei.(nengeni Alma 32:28). Fotukatiw efou non emon me emon ami. Oua tongeni fori ena ren ami fori met minne ewe Ngun mi Fel a amemmef ngenikemi. Ewe auchean memmef ren om kopwe sinei met Kot a mochen kopwe fori Ika ren om kopwe monatiw eu ne engon are feino churi emon chiechiom a netipechou, kopwe chok fori. Met chok, kopwe fori. Nupwen oupwe pwarata ami mochen anneasosich, ewe Ngun epwe tinato chommong memmefin met Kot a mochen oupwe fori.
Nupwen ami oupwe anneasosich, ekkewe memmef seni ewe Ngun epwene napeno an kan ngonuk fetan ngeni epwene chiechom fansoun meinisin. Ami pochokunen fini mi pung epwe napeno.
Oupwe sinei ika ekkewe memmef ir seni ewe Ngun nge esap seni chok pwisin ami mochen. Nupwen ekkewe memmef ra tipew ren met ewe Chon Amanau me Noun kewe soufos mi manau me ekkewe aposel ra kan apasa, oupwe tongeni finata ne anneasosich non nukuchar. Iwe ewe Samon epwe tinato Ngunun pwe epwe anisikemi.
Ren awewe, ika pwe oua angei memmef pwe oupwe asufonu ewe ranin Sabbath, ina mwo ika a weires, Kot epwe tinato Ngunun epwe aninnis.
Ena aninnis a tori semei we chommong ier a fen no nupwen a kan angang non Australia. A chok nonnom akkanamon non ew Raninifel, me a mochen angei ewe sakrament. Ese tongeni kuna porausen mwichen Aramas mi Pin non Fansoun Soponon. Iwe a chok poputa ne fetan. A iotek ren iteitan fansoun ekkewe aan ra chufengen pwe epwe sinei ia epwe feino ia. Mwirin an fetan ukukkun fitu awa, a kouno pwe epwe iotek sefan. A mefi ew memef an epwe kununo me fiti efoch aan. Mwirin chok a poputa ne rong kon seni ew imw mi kan ngeni. A nenong non ewe asamwacho me a kuna ekkoch aramas ra mommot ren ew chepen mi apwon ngeni eche mangak mi pwech me ekkewe minnen sakrament mi nom won.
Iwe, meni ese pwan watte ena ngenikemi, nge a fen amwarar me ren i. A sinei ewe pwonen ewe iotekin sakrament a pwonueta. “o chechemeni i fansoun meinisin, me fori an kewe annuk a ngeni ir, pwe Ngunun epwe nonnom rer fansoun meinisin”(D&C 20:77).
Ina ew chok awewe usun ew fansoun nupwen a iotek me fori met minne ewe Ngun a ereni i pwe Kot a mochen epwe fori. A chok sopweno non chommong ier, usun chok kich sipwe fori. Ese porous usun pwisin manauan non pekin ngun. A chok sopweno ne fori mettoch mi kukkun fan itan ewe Samon.
Iteitan fansoun ew mwichen Aramas mi Pin non Fansoun Soponon ra tingor epwe afanafan ngenir, a chok fori. Ese nifinifin ika pwe ra 10 are fen 50 are ifa ussun an pekus. A apasa an kapasen pwarata usun ewe Sam, ewe Nau, me ewe Ngun mi Fel, me ekkewe soufos iteitan fansoun a mefi seni ewe Ngun an epwe fori.
Wisan ewe mi tekia non Mwichefen a wisen chon aurur tekia non ewe Steik non Bonneville Utah, a fokkun otot non ewe atake an ewe steik, me a wisen sense non Sukunen Raninifen. Ren ekkewe chommong ier, nupwen a mochen, ewe Ngun mi Fel a chiechi ngeni.
Ua uta unukun semei we non ew rum non ew piong. Inei we, punuwan we non ukukkun 41 ier, a kokkon won ewe pet. Am aua nenengeni i ukukkun chommong awa. Aua poputa ne kuna ewe esinesinin metek rese chiwen pwa me won mesan. Autun kumuchun kewe ra kamochunuk fengen, ra pweteteno. Poun kewe ra asoso nepekin.
Ekkewe metekin cancer non chommong ier ra muchuno. Ua kuna mesan a mesemesen kinamwe. A angei fitu mochomochen ngasangas, me a ngasarau ew ngasangas, iwe mwirin chok a mosonoson. Am aua chok uta pwe aupwe uti ika epwe ngasangas sefan.
Iwe, semei we a neuokukun ne apasa, “Emon kukkun nengin a niwino ngeni nenian we.”
Ese pwan kechiw. Pun ewe Ngun mi Fel a fen afata ngeni usun napanapan, ia a feito me ia, met a winiti, me ia epwe feino ia. Ewe Ngun a pwarata ngeni i fan chommong usun emon Sam non Nang, usun emon Chon Amanau a atai ekkewe pochokunun mano, me usun ennetin ewe riri non tempel a aea ren punuwan me an famini.
Ewe Ngun a fen afata ngeni me nom pwe ewe murinno me nuku an punuwan we a fen etufichi i pwe epwe niwin ngeni nenian me nang me repwe chemeni i pwe emon noun Kot mi pwon mi murinno me epwe etiwa i ren ning.
Ren semei we, a nap seni apinukunuk. Ewe Ngun mi Fel a fen affata ngeni i.
Iwe, ekkoch repwe era pwe kapasan me ekkewe nios non ekiekin usun nenian me nang ra chok ew ekiekin apinukunuk, ewe ekiekin emon mwan a osukosuk ren met a keran fis ngeni. Nge a sinei ennet ese much ina chok ewe aan sia tongeni sinei.
I emon scientist a kan kutta ewe ennetin ussun ewe fonufan non unusan manauanen an a watte. A aea ekkewe pisekin science non an angoch iwe chienan kewe chon angang ra ingeiti. Napenon an angang non pekin chemistry a feito non an pwisin anchangei ekkewe mettoch mi wesen kukkun sise kuna, iwe mwirin a apungano non an tes.
Nge a fiti ew aan mi sokono pwe epwe kuna ekkewe ennet ra unusan auchea me ren pwan ngeni emon me emon kich. Ren ewe Ngun mi Fel chok sipwe tongeni kuna aramas me mettoch usun chok Kot a kuner.
Ena niffang a soposopono non ewe piong nupwen a mano punuwan we. Am aua ioi fengeni pisekin inei we pwe am aupwe uwei ngeni neimw. Semei we a kouno pwe epwe apasa kinisou ngeni emon me emon chon kampio am aua kuna non am fetan ngeni waam we. Ua chemeni pwe ua ekiek pwe am aupwe feino pwe aupwe chok nonnom non am netipechou.
Ua esina iei pwe a kuna mettoch minne ewe Ngun mi Fel chok a tongei pwari. A kuna ekkana aramas pwe ir chong nang ra titito me ren Kot pwe repwe tumunu punuwan achengicheng. Me rer ir chon safei, nge Semei a apasa an kinisou ngeni ir ren ar angang fan itan ewe Chon Amanau.
Ewe memmefin ewe Ngun mi Fel a soposopono ren i nupwen aua tori imwen semei me inei. Am aua fos ukukkun fitu minich non ewe rumwen famini. Semei we a tingor an epwe no ngeni rumwan ruwmen mour.
Mwirin ekkoch chok minich, a pwan fetansefaninong non ewe rumw. A wor an emenimenin kinamwe. A fetaneto rem me a neuokukkun ne apasa, “Ua noninen pwe Mildred epwene akanamon ne tori ewe nenien ngun. Ua ekieki epwene morukono non ewe watten mwichen ngun.”
Iwe a pwan apasa non pwapwa, “Ua chok fen iotek iei. Ua sinei pwe ese wor osukosuken Mildred. Inei we a nom pwe epwe churi.”
Ua chemeni ai emenimen nupwen a era ena, ua anchangei inen semei we, pechen kewe mi mwoch mi mokutokut, mi fetan nein ewe mwichen aramas pwe epwe pii pwe epwe nom ne souni me farapachei punuan noun we at nupwen a war.
Iwe, ew popun semei we a tingor ren me angei echip pun a ikiotek non nuku seni nekukkunun. A fen eereni an epwe angei penuen iotek me non netipan ren echip me emwen. Pwan fiti an eereni ikiotek, a sinei ekkewe pukfel me kapasen ekkewe soufos. Iwe a esina mongungun ewe Ngun, usun ena ka mefi ikenai.
Ewe chiechien ewe Ngun ese chok echipa me emweni. A siwini i me ren ewe Achasefanin Jises Kraist. Nupwen sia etiwa ena pwonen an ewe Ngun epwe nom rech fanosun meinisin, ewe Chon Amanau a tongeni nimeti kich pwe sipwe fich ngeni manau ese much, ewe niffang mi nap nein niffang meinisin (nengeni D&C 14:7).
Chechemeni kapasen ewe Chon Amanau: “Iwe iei ewe annuk: Aier, ami meinisin ekis meinisin non ewe fonufan, me feito rei me papatais non itei, pwe oupwe tongeni enimenimochuno me ren ketiwen ewe Ngun mi Fel, pwe oupwe tongeni uta non nimenimoch me mwei atun ewe ranin soponon” (3 Nifai 27:20).
Ekkana annuk mi pwan fiti ew pwon seni ewe Samon:
“Ewe Samon a apasa pwe ika sia annomu ach nuku non ena Ngun a wisen emweni kich ne fofforoch—, ewer, ne foffor mi wenechar, fetan non tekison, me apungu non ennet; iwe ina Ngunui.
“Iwe epwe ngeni kich Ngunun we minne epwe asarama ach ekiek me aurano ngunuch ren chengen.(D&C 11:12–13).
Ua pwarata pwe Kot ewe Sam mi manau, pwe ewe Jises Kraist mi manau sefan a emweni An Mwichefen, pwe Thomas S. Monson a kamoch meinisin ekkewe kien ewe pristut, me pwarata seni ewe Ngun mi Fel a emweni me apownueta ewe Mwichefenin Jises Kraist ren Aramas mi Pin non Fansoun Soponon, me pwan ekkewe memper.
Upwe pwan sopweno ne pwarata ngeni kemi pwe ekkei amwararen mwan ekkei ra kapas ngeni kich ikenai ir chon pwarata usun ewe Samon Jises Kraist, ren chon ewe Mwichen Engon me Ruemon Aposel, ra koko seni Kot. Uwa sinei pwe ewe Ngun mi Fel a emweni Preseten Monson an kokorir. Me ren omw rongorong ngeni ir me ar kewe kapasen pwarata, ewe Ngun mi Fel epwe amef ngonuk usun met uwa apasa ngonuk. Ir ra koko seni Kot. Uwa etiwa ir me tongei ir me sinei pwe ewe Samon a tongei ir me etiwa ir non ar angang. Me uwa fori non iten ewe Samon Jises Kraist, amen.
© 2015 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon chiakun: 6/15. Chiakun Visiting Teaching Message, November 2015. Chuukese. 12591 901