សារលិខិតការបង្រៀនសួរសុខទុក្ខខែ វិច្ឆិកា ឆ្នាំ ២០១៥

ព្រះវិញ្ញាណបរិសុទ្ធជាដៃគូរបស់អ្នក

ដោយ ប្រធាន ហិនរី ប៊ី. អាវរិង

ទីប្រឹក្សាទីមួយក្នុងគណៈប្រធានទីមួយ

យើងអាចមានពរជ័យនៃព្រះវិញ្ញាណនៅជាមួយនឹងយើង ប្រសិនបើយើងរស់នៅឲ្យសក្ដិសមនឹងពរជ័យនេះជានិច្ច ។

បងប្អូនប្រុសស្រីជាទីស្រឡាញ់ ខ្ញុំមានអំណរគុណដោយបាននៅជាមួយនឹងបងប្អូននៅថ្ងៃឈប់សម្រាកនេះក្នុងសន្និសីទទូទៅនៃសាសនាចក្ររបស់ព្រះអម្ចាស់ ។ ខ្ញុំបានទទួលអារម្មណ៍ពីព្រះវិញ្ញាណ គឺជាបរិសុទ្ធព្រះវិញ្ញាណ ថ្លែងទីបន្ទាល់ពីសេចក្ដីពិតនៃពាក្យសម្ដីដែលបានស្ដាប់ឮ ដូចជាបងប្អូនដែរ ។

គោលបំណងរបស់ខ្ញុំនៅថ្ងៃនេះគឺបង្កើនបំណងប្រាថ្នា និងការតាំងចិត្តរបស់អ្នកដើម្បីទទួលបានអំណោយទានដែលបានសន្យាដល់យើងម្នាក់ៗបន្ទាប់ពីយើងជ្រមុជទឹករួច ។ នៅក្នុងពិធីបញ្ជាក់របស់យើង យើងស្ដាប់ឮពាក្យទាំងនេះ ៖ « ទទួលព្រះវិញ្ញាណបរិសុទ្ធចុះ » ។ ^១ ចាប់ពីពេលនោះមក ជីវិតរបស់យើងបានផ្លាស់ប្ដូរជារៀងរហូត ។

យើងអាចមានពរជ័យនៃព្រះវិញ្ញាណនៅជាមួយនឹងយើង ប្រសិនបើយើងរស់នៅឲ្យសក្ដិសមនឹងពរជ័យនេះជានិច្ច ដែលមិនត្រឹមតែក្នុងពេលនេះ តែមានជារៀងដរាប ។ បងប្អូនដឹងចេញពីពាក្យនៃការអធិស្ឋានសាក្រាម៉ង់ពីរបៀបដែលការសន្យានេះត្រូវបានបំពេញ ៖ « ឱ ព្រះអង្គ ជាព្រះវរបិតាដ៏អស់កល្បជានិច្ចអើយ យើងខ្ញុំសូមដល់ព្រះអង្គដោយនូវព្រះនាម នៃព្រះរាជបុត្រារបស់ព្រះអង្គ គឺព្រះយេស៊ូវគ្រីស្ទ សូមប្រទានពរ ហើយញែកនំប៉័ងនេះ ចេញជាបរិសុទ្ធដល់ព្រលឹងនៃជនទាំងអស់ណា ដែលទទួលទាននំប៉័ងនេះ ប្រយោជន៍ឲ្យពួកគេអាចទទួលទានដោយនូវការចងចាំដល់ព្រះកាយនៃព្រះរាជបុត្រារបស់ព្រះអង្គ ហើយធ្វើបន្ទាល់ដល់ព្រះអង្គ ឱ ព្រះអង្គជាព្រះវរបិតាដ៏អស់កល្បជានិច្ចអើយថា ពួកគេនឹងព្រមលើកដាក់មកលើខ្លួនគេនូវព្រះនាមនៃព្រះរាជបុត្រារបស់ព្រះអង្គ ហើយចងចាំទ្រង់ជានិច្ច ហើយកាន់តាមព្រះបញ្ញត្តិទាំងឡាយរបស់ទ្រង់ ដែលទ្រង់បានប្រទានដល់ពួកគេ ប្រយោជន៍ឲ្យពួកគេ អាចបានព្រះវិញ្ញាណរបស់ទ្រង់គង់នៅជាមួយនឹងពួកគេជាដរាប » ។

ហើយបន្ទាប់មកក៏មានការសន្យាដ៏រុងរឿងនេះ ៖ « ប្រយោជន៍ឲ្យពួកគេ អាចបានព្រះវិញ្ញាណរបស់ទ្រង់គង់នៅជាមួយនឹងពួកគេជាដរាប » ( គ. និង ស. ២០:៧៧ គូសបញ្ជាក់បន្ថែម ) ។

ដើម្បីមានព្រះវិញ្ញាណគង់នៅជាមួយនឹងយើងជាដរាបគឺការមានការដឹកនាំ និងការណែនាំពីព្រះវិញ្ញាណបរិសុទ្ធនៅក្នុងជីវិតប្រចាំថ្ងៃរបស់យើង ។ ឧទាហរណ៍ យើងអាចត្រូវព្រះវិញ្ញាណព្រមានឲ្យតតាំងនឹងការល្បួងឲ្យធ្វើរឿងអាក្រក់ ។

សម្រាប់ហេតុផលនោះតែម្យ៉ាង វាងាយមើលពីហេតុផលដែលពួកអ្នកបម្រើរបស់ព្រះអម្ចាស់ខំព្យាយាមបង្កើនបំណងប្រាថ្នារបស់យើងឲ្យថ្វាយបង្គំព្រះនៅក្នុងការប្រជុំសាក្រាម៉ង់របស់យើង ។ ប្រសិនបើយើងទទួលទានសាក្រាម៉ង់ដោយសេចក្ដីជំនឿ នោះព្រះវិញ្ញាណបរិសុទ្ធនឹងការពារយើង ព្រមទាំងមនុស្សដែលយើងស្រឡាញ់ពីការល្បួងដែលមានកម្លាំងខ្លាំងក្លា ។

ភាពជាដៃគូនៃព្រះវិញ្ញាណបរិសុទ្ធធ្វើឲ្យចាប់ចិត្តនឹងអ្វីដែលល្អៗ ហើយមិនសូវងាកទៅរកការល្បួងឡើយ ។ ការណ៍នោះតែម្យ៉ាងគួរល្មមគ្រប់គ្រាន់ធ្វើឲ្យយើងតាំងចិត្តដើម្បីមានគុណសម្បត្តិសក្ដិសមឲ្យព្រះវិញ្ញាណគង់ជាមួយនឹងយើងជាដរាប ។

ដូចជាព្រះវិញ្ញាណបរិសុទ្ធពង្រឹងយើងទាស់នឹងអំពើអាក្រក់ដែរ ទ្រង់ក៏ប្រទានអំណាចឲ្យយើងញែកដឹងរវាងសេចក្ដីពិត និងសេចក្ដីក្លែងបន្លំដែរ ។ សេចក្ដីពិតដែលសំខាន់បំផុតត្រូវបានបញ្ជាក់តាមរយៈវិវរណៈមកពីព្រះប៉ុណ្ណោះ ។ ហេតុផលរបស់មនុស្សយើង និងការប្រើញាណខាងសាច់ឈាមរបស់យើងនឹងមិនល្មមគ្រប់គ្រាន់ឡើយ ។ យើងរស់នៅក្នុងគ្រាមួយដែលសូម្បីតែអ្នកមានប្រាជ្ញាបំផុតក៏ពិបាកនឹងស្គាល់ពីសេចក្ដីពិតដែរដោយសារតែការបោកប្រាស់ដ៏ឆ្លាតវៃ ។

ព្រះអម្ចាស់បានបង្រៀនសាវកទ្រង់ឈ្មោះថូម៉ាស ដែលចង់ឃើញភស្ដុតាងផ្ទាល់ភ្នែកនៃការមានព្រះជន្មរស់ឡើងវិញរបស់ព្រះអង្គសង្គ្រោះដោយការប៉ះមុខរបួសរបស់ទ្រង់ ថាវិវរណៈគឺជាភស្ដុតាងដែលមានសុវត្ថិភាពជាង ៖ « ព្រះយេស៊ូវមានព្រះបន្ទូលទៅកាន់លោកថា ថូម៉ាសអើយ អ្នកជឿដោយព្រោះបានឃើញខ្ញុំទេតើ ៖ មានពរហើយ អ្នកណាដែលជឿឥតឃើញសោះ» ( យ៉ូហាន ២០:២៩ ) ។

សេចក្ដីពិតដែលគូសផ្លូវត្រឡប់ទៅរកគេហដ្ឋានព្រះវិញគឺត្រូវបានបញ្ជាក់ដោយព្រះវិញ្ញាណបរិសុទ្ធ ។ យើងពុំអាចទៅព្រៃពិសិដ្ឋ ហើយឃើញព្រះវរបិតា និងព្រះរាជបុត្រាមានបន្ទូលទៅក្មេងប្រុស យ៉ូសែប ស្ម៊ីធ បានទេ ។ គ្មានភស្ដុតាងខាងរូបកាយ ឬអំណះអំណាងដែលសមហេតុផលណាមួយអាចបង្កើតបានថាអេលីយ៉ាបានយាងមកដូចដែលបានសន្យា ដើម្បីប្រគល់កូនសោបព្វជិតភាពដែលឥឡូវនេះត្រូវបានកាន់ ហើយប្រើប្រាស់ដោយព្យាការីកំពុងរស់នៅម្នាក់ឈ្មោះថា ថូម៉ាស អេស ម៉នសុន បានឡើយ ។

ការបញ្ជាក់ពីសេចក្ដីពិតកើតមានចំពោះបុត្រា ឬបុត្រីម្នាក់របស់ព្រះដែលបានប្រកាសសិទ្ធិដើម្បីទទួលបានព្រះវិញ្ញាណបរិសុទ្ធ ។ ដោយសារសេចក្ដីក្លែងបន្លំ និងសេចក្ដីកុហកអាចកើតមានចំពោះយើងគ្រប់ពេល នោះយើងត្រូវការព្រះចេស្ដានៃព្រះវិញ្ញាណនៃសេចក្ដីពិតជានិច្ច ដើម្បីជួយយើងឲ្យរួចផុតពីគ្រានៃភាពសង្ស័យនានា ។

កាលសមាជិកម្នាក់នៅក្នុងកូរ៉ុមនៃពួកសាវកដប់ពីរនាក់ឈ្មោះ ចច ឃ្យូ ខានុន បានទទូចឲ្យយើងស្វែងរកព្រះវិញ្ញាណឲ្យគង់នៅជាមួយនឹងយើងជាដរាប ។ លោកបានសន្យា ហើយខ្ញុំក៏សូមសន្យាដូចគ្នាដែរថា ប្រសិនបើយើងដើរតាមផ្លូវនោះ យើង « នឹងមិនស្ថិតនៅក្នុងភាពសង្ស័យ ឬភាពងងឹត » ឡើយ ហើយ « សេចក្ដីជំនឿរបស់យើងនឹងខ្លាំង ហើយអំណរ [ យើង ] … នឹងបានពេញលេញ » ។ ^២

យើងត្រូវការជំនួយថិតថេរនោះមកពីភាពជាដៃគូនៃព្រះវិញ្ញាណបរិសុទ្ធសម្រាប់ហេតុផលមួយទៀត ។ មរណភាពនៃមនុស្សជាទីស្រឡាញ់អាចកើតឡើងដោយមិនបានរំពឹងទុក ។ វាគឺជាសាក្សីពីព្រះវិញ្ញាណបរិសុទ្ធនៃធាតុពិតនៃព្រះវរបិតាសួគ៌ជាទីស្រឡាញ់ និងព្រះអង្គសង្គ្រោះដែលមានព្រះជន្មរស់ឡើងវិញដែលបានផ្ដល់សេចក្ដីសង្ឃឹម និងការលួងលោមចិត្តដល់យើងនៅពេលបាត់បង់មនុស្សជាទីស្រឡាញ់ ។ ទីបន្ទាល់នោះត្រូវតែមានភាពស្រស់ស្រាយពេលសេចក្ដីស្លាប់កើតឡើង ។

ដូច្នេះ មានហេតុផលជាច្រើនដែលយើងត្រូវការភាពជាដៃគូថិតថេរនៃព្រះវិញ្ញាណបរិសុទ្ធ ។ យើងចង់បានវា ប៉ុន្តែយោងតាមបទពិសោធន៍គឺវាពុំងាយថែរក្សាទេ ។ យើងម្នាក់ៗគិត និយាយ ហើយធ្វើរឿងនានានៅក្នុងជីវិតប្រចាំថ្ងៃរបស់ខ្លួនដែលអាចប៉ះពាល់ដល់ព្រះវិញ្ញាណ ។ ព្រះអម្ចាស់បានបង្រៀនយើងថា ព្រះវិញ្ញាណបរិសុទ្ធនឹងក្លាយជាដៃគូថិតថេររបស់យើង នៅពេលដួងចិត្តយើងពេញដោយសេចក្ដីសប្បុរស និងពេលដែលគុណធម៌បានតុបតែងគំនិតរបស់យើងដោយឥតឈប់ឈរ ( សូមមើល គ. និង ស. ១២១:៤៥ ) ។

ចំពោះជនដែលកំពុងជួបបញ្ហានឹងបទដ្ឋានដ៏ខ្ពស់ដើម្បីសក្ដិសមទទួលអំណោយទាននៃភាពជាដៃគូរបស់ព្រះវិញ្ញាណ ខ្ញុំសូមផ្ដល់ការលើកទឹកចិត្តនេះ ។ បងប្អូនធ្លាប់មានពេលដែលបងប្អូនមានអារម្មណ៍ពីព្រះចេស្ដានៃព្រះវិញ្ញាណបរិសុទ្ធ ។ វាអាចនឹងកើតឡើងនៅថ្ងៃនេះ ។

អ្នកអាចចាត់ទុកគ្រានៃ ការបំផុសគំនិតនេះប្រៀបដូចជាគ្រាប់ពូជនៃសេចក្ដីជំនឿដែលអាលម៉ាបានរៀបរាប់ ( សូមមើល អាលម៉ា ៣២:២៨ ) ។ ចូរដាំវាម្តងមួយៗ ។ បងប្អូនអាចធ្វើដូច្នេះបានដោយធ្វើតាមការបំផុសដែលបងប្អូនមាន ។ ការបំផុសគំនិតដ៏មានតម្លៃបំផុតនឹងជាអ្វីដែលអ្នកត្រូវដឹងថាព្រះនឹងឲ្យអ្នកធ្វើ ។ ប្រសិនបើវាគឺជាការត្រូវថ្វាយដង្វាយមួយភាគក្នុងដប់ ឬទៅសួរសុខទុក្ខមិត្តដែលមានទុក្ខព្រួយ អ្នកគួរធ្វើវា ។ ទោះនោះជាអ្វីក៏ដោយ ត្រូវតែធ្វើវា ។ នៅពេលបងប្អូនបានបង្ហាញឆន្ទៈគោរពតាម នោះព្រះវិញ្ញាណនឹងបញ្ជូនការបំផុសគំនិតបន្ថែមទៀតដល់បងប្អូននូវអ្វីដែលព្រះសព្វព្រះទ័យឲ្យបងប្អូនធ្វើសម្រាប់ទ្រង់ ។

នៅពេលបងប្អូនគោរពតាម ការបំផុសគំនិតមកពីព្រះវិញ្ញាណនឹងកើតមានកាន់តែញឹកញាប់ ហើយកាន់តែខិតជិតនឹងភាពជាដៃគូដ៏ខ្ជាប់ខ្ជួន ។ អំណាចក្នុងការរើសផ្លូវត្រូវរបស់បងប្អូននឹងកើនឡើង ។

បងប្អូននឹងដឹងនៅពេលដែលការបំផុសគំនិតទាំងនោះបានមកពីព្រះវិញ្ញាណជាជាងមកពីបំណងប្រាថ្នាផ្ទាល់ខ្លួន ។ នៅពេលការបំផុសគំនិតនោះដូចនឹងអ្វីដែលព្រះអង្គសង្គ្រោះ និងពួកសាវក និងពួកព្យាការីនៅរស់របស់ទ្រង់បានលើកឡើង នោះអ្នកអាចជ្រើសគោរពតាមដោយភាពជឿជាក់ ។ រួចព្រះអម្ចាស់នឹងបញ្ជូនព្រះវិញ្ញាណរបស់ទ្រង់ឲ្យមកគង់សណ្ឋិតលើបងប្អូន ។

ឧទាហរណ៍ ប្រសិនបើបងប្អូនទទួលបានការបំផុសគំនិតខាងវិញ្ញាណមួយឲ្យគោរពថ្ងៃឈប់សម្រាក ជាពិសេសពេលវាហាក់ដូចជាមានការលំបាក នោះព្រះនឹងបញ្ជូនព្រះវិញ្ញាណរបស់ទ្រង់មកជួយ ។

ជំនួយនោះបានកើតមានចំពោះឪពុកខ្ញុំកាលពីច្រើនឆ្នាំកន្លងទៅ កាលគាត់ទៅធ្វើការនៅប្រទេសអូស្ត្រាលី ។ នៅថ្ងៃអាទិត្យគាត់មានតែម្នាក់ឯង ហើយចង់ទទួលទានសាក្រាម៉ង់ ។ គាត់គ្មានព័ត៌មានពីការប្រជុំរបស់ពួកបរិសុទ្ធថ្ងៃចុងក្រោយសោះ ។ ដូច្នេះគាត់ក៏ចាប់ផ្ដើមដើរ ។ គាត់បានអធិស្ឋានពេលដល់ផ្លូវប្រសព្វនីមួយៗដើម្បីដឹងថាតើគួរតែបត់ទៅតាមផ្លូវមួយណា ។ បន្ទាប់ពីការដើរ និងការបត់តាមផ្លូវនានាអស់រយៈពេលមួយម៉ោង គាត់បានឈប់អធិស្ឋានម្ដងទៀត ។ គាត់បានទទួលការបំផុសមួយឲ្យបត់ទៅផ្លូវជាក់លាក់មួយ ។ រំពេចនោះគាត់បានចាប់ផ្ដើមឮការច្រៀងចម្រៀងចេញពីជាន់ផ្ទាល់ដីនៃអគារផ្ទះជួលមួយនៅក្បែរនោះ ។ គាត់បានមើលទៅខាងក្នុងតាមបង្អួច ហើយឃើញមនុស្សពីរបីនាក់អង្គុយនៅក្បែរតុមួយដែលមានគ្របក្រណាត់ពណ៌-ស និងថាសសាក្រាម៉ង់ ។

ឥឡូវនេះ វាប្រហែលជាមិនសំខាន់សម្រាប់បងប្អូនទេ ប៉ុន្តែវាជាអ្វីមួយអស្ចារ្យសម្រាប់គាត់ ។ គាត់បានស្គាល់ពីការសន្យានៃការអធិស្ឋានសាក្រាម៉ង់បានបំពេញ ៖ « ចងចាំទ្រង់ជានិច្ច ហើយកាន់តាមព្រះបញ្ញត្តិទាំងឡាយរបស់ទ្រង់ដែលបានទ្រង់បានប្រទានដល់ពួកគេ ប្រយោជន៍ឲ្យពួកគេអាចបានព្រះវិញ្ញាណរបស់ទ្រង់គង់នៅជាមួយនឹងពួកគេជាដរាប »។ (គ. និង ស. ២០:៧៧ ) ។

នោះគ្រាន់តែជាឧទាហរណ៍មួយពីគ្រាមួយដែលគាត់បានអធិស្ឋាន រួចបានធ្វើតាមអ្វីដែលព្រះវិញ្ញាណមានបន្ទូលប្រាប់គាត់ថាព្រះសព្វព្រះទ័យឲ្យគាត់ធ្វើប៉ុណ្ណោះ ។ គាត់បានបន្តធ្វើវាអស់រយៈពេលជាច្រើនឆ្នាំ ដូចដែលបងប្អូន និងខ្ញុំនឹងធ្វើដែរ ។ គាត់ពុំដែលនិយាយពីជីវភាពខាងវិញ្ញាណរបស់គាត់ឡើយ ។ គាត់ចេះតែបន្តធ្វើកិច្ចការតិចតួចសម្រាប់ព្រះអម្ចាស់ដែលគាត់ត្រូវបានបំផុសគំនិតឲ្យធ្វើប៉ុណ្ណោះ ។

នៅពេលណាដែលក្រុមមួយចំនួននៃពួកបរិសុទ្ធថ្ងៃចុងក្រោយបានសុំគាត់ឲ្យនិយាយពីរឿងនោះ គាត់ក៏និយាយ ។ មិនថាមានមនុស្ស ១០ នាក់ ឬ ៥០ នាក់ ឬគាត់នឿយហត់ប៉ុណ្ណានោះទេ ។ គាត់បានថ្លែងទីបន្ទាល់ពីព្រះវរបិតា ព្រះរាជបុត្រា ព្រះវិញ្ញាណបរិសុទ្ធ និងពីពួកព្យាការីនៅពេលណាព្រះវិញ្ញាណជំរុញឲ្យគាត់ធ្វើដូច្នេះ ។

ការហៅដ៏ខ្ពស់បំផុតរបស់គាត់ក្នុងសាសនាចក្រគឺទីប្រឹក្សាជាន់ខ្ពស់ស្តេកបូនណេវៀល រដ្ឋ យូថាហ៍ ដែលគាត់បានបោចស្មៅនៅកសិដ្ឋានរបស់ស្តេក ហើយគាត់បានបង្រៀនថ្នាក់សាលាថ្ងៃអាទិត្យ ។ ច្រើនឆ្នាំកន្លងមកទៀត ពេលគាត់ត្រូវការ ព្រះវិញ្ញាណបរិសុទ្ធបានគង់នៅទីនោះធ្វើជាដៃគូរបស់គាត់ ។

ខ្ញុំបានឈរនៅក្បែរឪពុករបស់ខ្ញុំក្នុងបន្ទប់នៃមន្ទីរពេទ្យមួយ ។ ម្ដាយខ្ញុំ ដែលជាភរិយារបស់គាត់មានអាយុ ៤១ ឆ្នាំកំពុងសម្រាកនៅលើគ្រែ ។ យើងបាននៅមើលគាត់អស់ជាច្រើនម៉ោង ។ យើងបានចាប់ផ្ដើមឃើញភាពឈឺចាប់បានរសាយចេញពីទឹកមុខរបស់គាត់ ។ ម្រាមដៃគាត់ដែលបានក្ដាប់យ៉ាងណែនបានរលាចេញ ។ ដៃគាត់ទាំងសងខាងក៏ឈប់ប្រឹងដែរ ។

ការឈឺចាប់នៃជំងឺមហារីកជាច្រើនឆ្នាំត្រូវបានបញ្ចប់ ។ ខ្ញុំបានឃើញទឹកមុខគាត់ពេញដោយភាពសុខសាន្ត ។ គាត់បានដកដង្ហើមញាប់ រួចក៏ដង្ហក់ ហើយបានដាច់ខ្យល់ទៅ ។ យើងបានឈរនៅទីនោះចាំមើលក្រែងគាត់ដកដង្ហើមវិញ ។

នៅទីបំផុត ឪពុកខ្ញុំបានពោលតិចៗថា « ម៉ាក់កូនបានស្លាប់ហើយ » ។

គាត់មិនបានសម្រក់ទឹកភ្នែកទេ ។ នោះដោយសារព្រះវិញ្ញាណបរិសុទ្ធបានបង្ហាញគាត់យ៉ាងច្បាស់ពីម្ដាយរបស់ខ្ញុំ ថាគាត់មកពីណា ថាគាត់បានក្លាយជាអ្វី ហើយថាគាត់នឹងទៅទីណាវិញ ។ ព្រះវិញ្ញាណបានថ្លែងទីបន្ទាល់ដល់គាត់ជាច្រើនដងអំពីព្រះវរបិតាជាទីស្រឡាញ់ ពីព្រះអង្គសង្គ្រោះដែលបានផ្ដាច់អំណាចនៃសេចក្ដីស្លាប់ និងពីធាតុពិតនៃការផ្សារភ្ជាប់នៅក្នុងព្រះវិហារបរិសុទ្ធដែលគាត់បានចែកចាយនឹងភរិយាគាត់ ព្រមទាំងគ្រួសារ ។

ព្រះវិញ្ញាណបានអះអាងចំពោះគាត់ជាយូរមកហើយថា សេចក្ដីល្អ និង សេចក្ដីជំនឿរបស់ម្ដាយខ្ញុំបានធ្វើឲ្យគាត់សក្ដិសមត្រឡប់ទៅកាន់ផ្ទះសួគ៌ាវិញ ជាកន្លែងដែលគាត់នឹងចងចាំថាជាបុត្រដ៏អស្ចារ្យនៃសេចក្ដីសន្យា និងបានស្វាគមន៍នូវការត្រឡប់មកផ្ទះវិញដោយកិត្តិយស ។

ចំពោះឪពុកខ្ញុំ រឿងនោះគឺលើសពីសេចក្ដីសង្ឃឹមទៅទៀត ។ ព្រះវិញ្ញាណបរិសុទ្ធបានបញ្ជាក់រឿងនេះយ៉ាងច្បាស់ដល់គាត់ ។

ឥឡូវនេះ មានមនុស្សខ្លះអាចនិយាយថា ពាក្យរបស់គាត់ និងរូបភាពនៅក្នុងគំនិតរបស់គាត់ចំពោះផ្ទះសួគ៌ាគ្រាន់តែជាមនោសញ្ចេតនាដ៏ផ្អែមល្ហែមមួយ ជាការវិនិច្ឆ័យដ៏ងងឹតងងុលមួយរបស់ស្វាមីម្នាក់ពេលគាត់បាត់បង់ភរិយាប៉ុណ្ណោះ ។ ប៉ុន្តែគាត់បានស្គាល់សេចក្ដីពិតដ៏អស់កល្បថា ជាវិធីតែមួយគត់ដែលបងប្អូនអាចដឹងពីរឿងនេះ ។

គាត់គឺជាអ្នកវិទ្យាសាស្ត្រម្នាក់ដែលស្វែងរកសេចក្ដីពិតអំពីពិភពលោកពេញមួយជីវិតរបស់គាត់ ។ គាត់បានប្រើឧបករណ៍វិទ្យាសាស្ត្រល្មមគ្រប់គ្រាន់ដើម្បី ទទួលបានកិត្តិយសពីសំណាក់មិត្តភក្ដិរបស់គាត់នៅជុំវិញពិភពលោក ។ អ្វីដែលគាត់បានធ្វើនៅក្នុងគីមីវិទ្យា ភាគច្រើនចេញមកពីការឃើញនៅក្នុងគំនិតរបស់គាត់ពីការបំលាស់ទីនៃម៉ូលេគុល រួចបញ្ជាក់ទស្សនៈរបស់គាត់ដោយដកពិសោធន៍នៅក្នុងមន្ទីរពិសោធន៍ ។

ប៉ុន្តែគាត់ធ្លាប់ដើរតាមផ្លូវខុសគ្នាមួយដើម្បីស្វែងរកសេចក្ដីពិតដែលសំខាន់បំផុតចំពោះគាត់ និងចំពោះយើងម្នាក់ៗ ។ មានតែតាមរយៈព្រះវិញ្ញាណបរិសុទ្ធប៉ុណ្ណោះដែលយើងអាចមើលឃើញមនុស្សដទៃ និងព្រឹត្តិការណ៍នានាដូចជាព្រះដែរ ។

អំណោយទាននោះបានបន្តនៅក្នុងមន្ទីរពេទ្យនោះបន្ទាប់ពីភរិយារបស់គាត់បានចែកឋាន ។ យើងបានប្រមូលរបស់របរម្ដាយខ្ញុំយកទៅផ្ទះវិញ ។ ឪពុកខ្ញុំបានឈប់ដើម្បីថ្លែងអំណរគុណដល់គ្រូពេទ្យ និងវេជ្ជបណ្ឌិតគ្រប់រូបដែលយើងបានជួបតាមផ្លូវដើរចេញទៅរកឡាន ។ ខ្ញុំចាំថា ខ្ញុំមានអារម្មណ៍ថាយើងគួរតែចេញទៅដោយក្តីសោកសៅរបស់យើងចុះគឺគ្រប់គ្រាន់ហើយ ។

ឥឡូវនេះទើបខ្ញុំដឹងថា គាត់បានឃើញរឿងនានាដែលមានតែព្រះវិញ្ញាណបរិសុទ្ធប៉ុណ្ណោះដែលអាចធ្វើឲ្យគាត់មើលឃើញ ។ គាត់បានឃើញមនុស្សទាំងនោះថាជាពួកទេវតាដែលព្រះបញ្ជូនមកឲ្យមើលថែភរិយាជាទីស្រឡាញ់របស់គាត់ ។ ពួកគេប្រហែលជាមើលឃើញខ្លួនឯងថាជាអ្នកជំនាញផ្នែកថែទាំសុខភាព ប៉ុន្តែឪពុកខ្ញុំបានអរគុណពួកគេចំពោះការបម្រើរបស់ពួកគេជំនួសឲ្យព្រះអង្គសង្គ្រោះ ។

ព្រះចេស្ដានៃព្រះវិញ្ញាណបរិសុទ្ធបានបន្តនៅជាមួយគាត់ កាលយើងបានត្រឡប់ទៅដល់ផ្ទះវិញ ។ យើងបាននិយាយគ្នាមួយសន្ទុះនៅក្នុងបន្ទប់ទទួលភ្ញៀវ ។ ឪពុកខ្ញុំបានសុំចូលទៅបន្ទប់គាត់ដែលនៅក្បែរនោះ ។

ពីរបីនាទីក្រោយមក គាត់បានដើរត្រឡប់មកបន្ទប់ទទួលភ្ញៀវវិញ ។ គាត់មានស្នាមញញឹមដ៏រីករាយ ។ គាត់បានដើរសំដៅមកយើង ហើយពោលតិចៗថា « ប៉ាបារម្ភថា មីលឌ្រេដទៅដល់ពិភពវិញ្ញាណតែម្នាក់ឯង ។ ប៉ាបានគិតថាគាត់អាចមានអារម្មណ៍ថាវង្វេង » ។

រួចគាត់បានពោលដោយរីករាយថា « ប៉ាទើបតែបានអធិស្ឋានរួច ។ ប៉ាដឹងថា មីលឌ្រេដមិនកើតអីទេ ។ លោកយាយបានជួបគាត់នៅទីនោះហើយ » ។

ខ្ញុំចងចាំពីស្នាមញញឹមកាលគាត់ពោលពាក្យនោះ ដោយស្រមៃឃើញលោកយាយខ្ញុំបានរត់យ៉ាងរួសរាន់កាត់ហ្វូងមនុស្សដែលទៅចាំជួប ហើយឱបកូនប្រសាស្រីគាត់ ពេលនាងមកដល់ ។

ឥឡូវនេះ ហេតុផលមួយដែលឪពុកខ្ញុំបានទូលសូម ហើយបានទទួលការលួងលោមចិត្តនោះគឺដោយសារគាត់តែងអធិស្ឋានដោយសេចក្ដីជំនឿតាំងពីក្មេងមកម៉្លេះ ។ គាត់ធ្លាប់ទទួលបានចម្លើយដែលប៉ះដល់ដួងចិត្តគាត់ដើម្បីផ្ដល់ជាការលួងលោមចិត្ត និងការដឹកនាំ ។ លើសពីការមានទម្លាប់អធិស្ឋាន គាត់បានស្គាល់បទគម្ពីរ និងសម្ដីរបស់ពួកព្យាការីកំពុងរស់នៅ ។ ដូច្នេះគាត់បានស្គាល់ពីការខ្សឹបប្រាប់ស្រដៀងគ្នានៃព្រះវិញ្ញាណ ដែលអ្នកអាចទទួលអារម្មណ៍បាននៅថ្ងៃនេះ ។

ភាពជាដៃគូនៃព្រះវិញ្ញាណមានលើសពីការដែលគាត់បានទទួលការលួងលោមចិត្ត ហើយបានការដឹកនាំទៅទៀត ។ វាបានផ្លាស់ប្ដូរគាត់ តាមរយៈដង្វាយធួននៃព្រះយេស៊ូវគ្រីស្ទ ។ នៅពេលយើងទទួលយកការសន្យានៃការមានព្រះវិញ្ញាណគង់នៅជាមួយយើងជាដរាបនោះ ព្រះអង្គសង្គ្រោះអាចប្រទានឲ្យយើងនូវការធ្វើឲ្យស្អាតសម្រាប់ជីវិតអស់កល្ប ជាអំណោយទានដ៏មហិមាបំផុត ( សូមមើល គ. និង ស. ១៤:៧ ) ។

បងប្អូនចងចាំពីបន្ទូលរបស់ព្រះអង្គសង្គ្រោះ ៖ « ឥឡូវនេះ នេះគឺជាបញ្ញត្តិថា ៖ ចូរប្រែចិត្តចុះ ឱអ្នករាល់គ្នានៅចុងផែនដីអើយ ហើយចូរមករកយើង ហើយទទួលបុណ្យជ្រមុជទឹកដោយនូវព្រះ នាមយើងចុះ ប្រយោជន៍ឲ្យអ្នករាល់គ្នាអាចបានញែកចេញជាបរិសុទ្ធ ដោយការទទួលនូវព្រះវិញ្ញាណបរិសុទ្ធ ប្រយោជន៍ឲ្យអ្នករាល់គ្នាអាចឈរដោយគ្មានទោសនៅចំពោះយើងនៅថ្ងៃចុងក្រោយបង្អស់ » (នីហ្វៃទី៣ ២៧:២០ ) ។

ព្រះបញ្ញត្តិទាំងនោះមកជាមួយនឹងការសន្យានេះពីព្រះអម្ចាស់ ៖

« ហើយឥឡូវនេះ ប្រាកដមែន យើងប្រាប់អ្នករាល់គ្នាជាប្រាកដថា ចូរដាក់ទីទុកចិត្តរបស់អ្នកទៅនឹងព្រះវិញ្ញាណនោះ ដែលនាំឲ្យធ្វើល្អ—មែនហើយ គឺឲ្យធ្វើដោយយុត្តិធម៌ ឲ្យដើរដោយទាបរាបសា ឲ្យវិនិច្ឆ័យដោយសុចរិត ហើយនេះគឺជាព្រះវិញ្ញាណរបស់យើង ។

« ប្រាកដមែន យើងប្រាប់អ្នករាល់គ្នាជាប្រាកដថា យើងនឹងរំលែកដល់អ្នក នូវព្រះវិញ្ញាណរបស់យើង ដែលនឹងបំភ្លឺគំនិតរបស់អ្នកដែលនឹង បំពេញព្រលឹងរបស់អ្នកដោយសេចក្ដីអំណរ » (គ. និង ស. ១១: ១២-១៣ ) ។

ខ្ញុំសូមថ្លែងទីបន្ទាល់របស់ខ្ញុំដល់បងប្អូនថា ព្រះជាព្រះវរបិតាមានព្រះជន្មរស់ ថាព្រះយេស៊ូវគ្រីស្ទដែលមានព្រះជន្មរស់ឡើងវិញនោះដឹកនាំសាសនាចក្ររបស់ទ្រង់ ថា ថូម៉ាស អេស ម៉នសុន កាន់រាល់កូនសោនៃបព្វជិតភាព ហើយថាវិវរណៈតាមរយៈព្រះវិញ្ញាណបរិសុទ្ធដឹកនាំ ហើយគាំទ្រសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងសមាជិកដ៏រាបសានៃសាសនាចក្រនេះ ។

បន្ថែមពីលើនេះ ខ្ញុំសូមថ្លែងទីបន្ទាល់ទៅកាន់អ្នកថា បុរសដ៏អស្ចារ្យដែលបានថ្លែងមកកាន់យើងថ្ងៃនេះ ក្នុងនាមជាសាក្សីនៃព្រះអម្ចាស់ ព្រះយេស៊ូវគ្រីស្ទ ក្នុងនាមជាសមាជិកនៃកូរ៉ុមនៃពួកសាវកដប់ពីរនាក់ទាំងអស់ គឺត្រូវបានហៅដោយព្រះ ។ ខ្ញុំដឹងថាព្រះវិញ្ញាណបានដឹកនាំប្រធាន ម៉នសុន ឲ្យហៅពួកលោក ។ ហើយនៅពេលអ្នកស្តាប់ពួកលោក និងទីបន្ទាល់របស់ពួកលោក នោះព្រះវិញ្ញាណបរិសុទ្ធ បានបញ្ជាក់ដល់អ្នក នូវអ្វីដែលខ្ញុំនិយាយទៅកាន់អ្នកនាពេលនេះ ។ ពួកលោកត្រូវបានហៅដោយព្រះ ។ ខ្ញុំគាំទ្រពួកលោក ហើយស្រឡាញ់ពួកលោក ហើយខ្ញុំដឹងថាព្រះមានព្រះទ័យស្រឡាញ់ពួកលោក ហើយគាំទ្រពួកលោកនៅក្នុងការបម្រើរបស់ពួកលោក ។ ខ្ញុំសូមធ្វើកិច្ចការនេះក្នុងព្រះនាមនៃព្រះអម្ចាស់ ព្រះយេស៊ូវគ្រីស្ទ អាម៉ែន ។

© ឆ្នាំ ២០១៥ ដោយ Intellectual Reserve, Inc ។ រក្សាសិទ្ធិគ្រប់យ៉ាង ។ បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ 06/15 ។ ការអនុមតិឱ្យបកប្រែ ៖ 06/15 ។ ការបកប្រែនៃ Visiting Teaching Message, November 2015. Cambodian 12591 258